HADITHI: Pengo asononekea hadhi ya chini wanayopewa walimu katika jamii

NA SHIUNDU MUKENYA

VISA vya dharau kwa walimu vilimfanya Pengo awazie upya kuhusu taaluma yake. Alikumbuka jinsi viongozi kwingineko walivyolazimika au kulazimishwa kujiuzulu walipotoa kauli zilizoonekana kukidharau kikundi chochote katika jamii.

Lakini ilivyoonekana, mambo yalikuwa tofauti nchini Kavaluku. Viongozi wa kisiasa walitoa kauli za kuwadhalilisha walimu lakini hakuna lililofanywa zaidi ya kelele za mtandaoni zilizomithilishwa na vituko vya chura visivyomzuia ng’ombe kunywa maji.

Kelele za wananchi kuhusu viongozi waliowadharau walimu kwa kuwaita ‘watu wa vokali na watu wa kushika chaki tu’ zilififia na hatimaye zikatoweka.

Hakuna aliyerejelea kauli hizi. Pengo lakini hakuzisahau, alimkumbusha na kumlalamikia Sindwele kuhusu dharau hii.“Hilo si geni kwa walimu na haswa sisi wa shule za ulimwengu wa tatu, tumezoea dharau hizo. Umesahau msemo kuwa kizuri cha bwana Sweyyid kikiharibika ni cha mwalimu fundi.

Ni sisi mafundi wa kutupiwa vilivyoharibika na kupigiwa mifano ya watu duni katika jamii.” Kauli hii ya Sindwele japo iliuma, ilimkumbusha Pengo aliloambiwa na baba yake siku ile alipoipokea barua ya kuenda chuoni kusomea ualimu.“Una maana kuwa huko pia wanafundisha ualimu?”

Nzeki alimuuliza Pengo na kumjuza kuwa enzi zao watu ambao hawakuweza kuendelea na masomo ya chuo kikuu waliajiriwa kuwa walimu. “Kumbe mambo yamebadilika hivi?”

Mbali na mtazamo huu wa baba yake kuhusu ualimu, Pengo alikumbuka swali alilowahi kuulizwa na mwanafunzi wake mwanzoni kabisa mwa taaluma yake.

Wakati huo Pengo alikuwa barobaro aliyefundisha kwa nguvu zake zote na dhati ya moyo wake. Alipohitimisha kipindi, mmoja wa wanafunzi akaunyanyua mkono akaulize swali.

Mwanafunzi alianza kwa kumpongeza mwalimu kwa kipindi kizuri, “Lakini mwalimu mbona waonekana kuwa msomi hivi na hujawahi kupata kazi nzuri? Mbona ungali unang’ang’ania huu ualimu? Mbona usitafute kazi yenye staha kidogo?” mwanafunzi akauliza hatimaye.

Naam, haya yalitosha kumkumbusha Pengo stihizai walizopitia walimu.“Lakini mbona walimu hawa wasitumie kura zao kuwaadhibu hawa wanasiasa wenye jeuri?” akamuuliza Sindwele.

“Wewe wajua walimu walivyo watu wa kutafuta vijipeni vya ziada. Wao huajiriwa kusimamia uchaguzi na hivyo basi hawapigi kura. Isitoshe, kunayo ile dhana ya ‘mbaya wetu’ kama inavyosawiriwa katika tamthilia ya Ken Walibora. Kwamba kwa pamoja tunamchukia kiongozi yeyote anayetudhulumu, chuki hii hudumu tu hadi wakati wa uchaguzi kila mtu anaposimama na mwanasiasa wa kwao licha ya ubaya wa mwanasiasa huyo,” Sindwele akamfafanulia Pengo.

VITUKO: Uadilifu wa Pengo wamvunia marafiki na mahasidi, maadui wapanga kumdamirisha

Na SAMUEL SHIUNDU

TANGU arejee Sidindi kutoka Bushiangala, hajamjulia hali mwenzake wa dhati.

Kimya hiki kilitokana na kazi nyingi za shuleni Sidindi. Mwalimu mkuu wa Sidindi alikuwa na matumaini makuu kwa wanafunzi wake.

Matumaini haya yalimfanya awasukume walimu kufanya kazi kwa bidii. Kwake mwanafunzi alikuwa mfalme na mwalimu alijuzu kumtumikia.

Chochote ambacho wanafunzi walihitaji kilitekelezwa haraka iwezekanavyo hususan muhula huu wa pili wenye tishio la visa vya utovu wa nidhamu katika shule za upili.

Aliwateua baadhi ya wanafunzi kuipeleleza mienendo ya wanafunzi wenzao na hata walimu. Wapelelezi hawa walikuwa na satua hata kuliko walimu sikwambii viranja.

Kwa kuwa Pengo alikuwa na bidii za mchwa, mwalimu mkuu alimchukulia kama mwenza ambaye angemsaidia.

Pengo hakuwa kama walimu wengine hapo Sidindi. Alikuwa mwanamume aliyejihifadhi, si kama wanaume wenye macho yafwatayo kila uso wa msichana mzuri waliyepishana naye.

Mwalimu mkuu alimpenda Pengo kutokana na uadilifu wake, insafu yake na uchapakazi wake.

Yeye hakusukumwa kama wenzake, alijituma.

Hakuwekewa makataa, alijiwekea. Alipendwa na wengi wa wanafunzi.

Hata makachero wa mwalimu mkuu hawakumpelekea ripoti yoyote mbaya kumhusu huyu mwalimu. Huyu ndiye aliyekuwa Pengo, kipenzi cha wengi hapo Sidindi.

Uadilifu wavuna vyeo

Uadilifu wake ukamvunia vyeo tele.

Akateuliwa kusimamia michezo na shughuli za bweni hapo Sidindi. Waliokuwa wakizishikilia nyadhifa hizi awali hawakufurahi. Wakamtafutia njama.

Walitafutana na kushauriana kuhusu walichopaswa kufanya.

Wakakumbuka kwamba alipokuwa akiwaandaa wanafunzi kwa tamasha za drama na, alipiga marufuku suala la matumizi ya dawa za kulevya.

Lazima kuna wanafunzi walioumizwa na hili? Kama wapo basi lazima nao wana kisasi na hiki kimalaika cha mwalimu mkuu” walikubaliana.

Hawakutafuta sana. Alipatikana mwanafunzi aliyekuwa akiuza dawa hizi. Wakapatana naye. Akakubali.

Kwa vile aliaminiwa sana na wanafunzi, Pengo alikuwa akiwahifadhia wanafunzi pesa walizotumiwa na wazazi kwa ajili ya masurufu.

Pia, alitumwa kuwanunulia vitu walivyohitaji sokoni na kwenye maduka ya kijumla. Si kalamu, si vitafunwa na vipochopocho vingine. Na hapo ndipo walipokubaliana kumnasia huyu bwana Pengo.

Pengo hakushuku lolote Sande alipombishia akiomba kununuliwa sabuni mjini.

Sande alijulikana kwa kutofua wala kukoga. Alisisitiza asinunuliwe kwingine ila kwa duka la baniani maarufu hapo mjini.

“Tafadhali ninunulie kwa Mirza, bei yake ni nafuu.” Sande alirudia maneno aliyokuwa kapewa jana yake na walimu wawili waliomtwika jukumu hili na kumwahidi malipo. Pengo akaridhia.

JAMVI: Vinara watatu wa Nasa wataziba pengo la ‘Baba’?

 WYCLIFFE MUIA na CHARLES WASONGA

NI wazi kuwa kinara wa upinzani Raila Odinga atafanya kazi na serikali kutimiza ajenda ya Jubilee ya maendeleo, lakini mjadala unazidi kuibuka kuhusu ni nani atakayechukua nafasi ya Bw Odinga ya kuikosoa serikali ambayo bado ina miaka minne ya kuhudumu kabla ya Uchaguzi Mkuu wa 2022.

Mwezi mmoja baada ya Rais Uhuru Kenyatta na Bw Odinga kusalimiana nje ya Jumba la Harambee, Wakenya wengi bado hawafahamu maafikiano kati ya wawili hao huku vinara wenza katika muungano wa NASA wakiendelea kumkabili Bw Odinga kwa ‘kuwasaliti’ kisiasa.

Vinara wenza katika NASA Kalonzo Musyoka (Wiper), Musalia Mudavadi (ANC) na Moses Wetang’ula (Ford-Kenya), sasa wameanzisha mikakati ya kujipanga upya kisiasa kuelekea katika Uchaguzi Mkuu wa 2022.

Wadidisi wanasema kibarua cha watatu hao kwa sasa ni kuhusu atakayetoshea katika nafasi ya Bw Odinga kama mkosoaji mkuu wa serikali na kuonekana msemaji wa wafuasi wa upinzani.

“Mwanya ulioachwa na Raila katika upinzani ni mkubwa na yeyote miongoni mwa watatu hao atakayeonekana kujaza nafasi hiyo atakuwa katika nafasi nzuri ya kupambana na (Naibu Rais) William Ruto 2022,” anasema mhadhiri wa masuala ya kisiasa Prof Edward Kisiang’ani.

 

Fursa kwa Kalonzo 

Kulingana na Prof Kisiang’ani, Bw Musyoka ana nafasi nzuri ya kujijenga kisiasa na kukubalika katika maeneo mengi nchini kutokana na siasa zake za kidiplomasia.

“Japo Rais Kenyatta hatamuunga mkono Kalonzo 2022, jamii ya Wagikuyu wanamuamini zaidi kuliko Ruto, lakini itategemea jinsi atakavyojipanga kisiasa kuelekea katika uchaguzi ujao,” anaongeza Prof Kisiang’ani.

Kwa upande mwingine wadadisi wanahisi kuwa Mudavadi na Wetangula wana nafasi nzuri katika kura za 2022 kutokana na idadi kubwa ya kura kutoka magharibi.

Wawili hao tayari wameanzisha mchakato wa kuunganisha vyama vyao vya ANC na Ford Kenya ili waseme kwa sauti moja kisiasa.

Wachanganuzi wanasema kuwa watatu hao wanapaswa kutekeleza kikamilifu wajibu wa kuikosoa serikali ya Jubilee kwa uketo kama Bw Odinga alivyokuwa akifanya kabla ya kubuni ushirikiano na Rais Kenyatta.

 

Njia ya pekee

“Badala ya watatu hawa kutumia muda wao mwingi kushambulia Raila, wanafaa kujipanga kujaza pengo aliloacha la kuwa mkosoaji mkuu wa serikali. Hii ndiyo njia ya kipekee itakayowafanya kuvutia uungwaji mkono kutoka kwa wananchi,” anasema Bw Vincent Kimosop.

Mchanganuzi huyo anasema inavunja moyo kwamba Bw Musyoka, Mudavadi na Wetangula hawajasema lolote kufuatia hatua ya Waziri wa Usalama Fred Matiang’i kushambulia Idara ya Mahakama kuhusiana na sakata ya mwanaharakati Dkt Miguna Miguna.

Naye mchanganuzi mwingine Suba Churchil anahofia kuwa huenda taifa likatumbukia katika utawala wa kidikteta endapo hakutakuwa na upinzani thabiti dhidi ya Jubilee.

“Baada ya Raila kuungana na Uhuru, wanasiasa wa upinzani waliosalia ni butu…. hawana ujasiri wa kuikosoa serikali. Kwa kuwa mashirika ya kijamii na vyombo vya habari vimelemazwa na utawala wa sasa kwa kiasi fulani, nahofia kuwa taifa utawala mbaya utakita nchini kuelekea uchaguzi mkuu wa 2022,” anasema.

Sawa na Kimosop, anawakosoa Musyoka, Mudavadi na Wetang’ula kwa kukumbilia makabila yao “wakati huu ambapo Serikali ya Jubilee inapaswa kukosolewa katika ngazi ya kitaifa”.

 

Si wageni

“Hawa sio viongozi wageni katika siasa za nchini, kwamba wawili kati yao wamewahi kuwa makamu wa rais. Wanafaa kucheza siasa za kitaifa,” anasema Suba ambaye ni Mshirikishi wa Kitaifa wa Muungano wa Mashirika ya Kijamii.

Ili kuunda chama chenye sura ya kitaifa, Bw Musyoka amepanga kuzuru bara ya Ulaya Juni mwaka huu ili kujifahamisha mengi kutoka kwa vyama komavu vya kisiasa kanda hiyo.

Mwenyekiti wa Wiper Prof Kivutha Kibwana anasema baada ya Wiper kubadilisha jina kuwa One Kenya Movement (OKM), viongozi wa chama hicho wataanzisha kampeni za kitaifa ili kupata uungwaji Kenya nzima.

“Kalonzo anapanga kufanya kikao na Mama Ngina, Seneta Gidion Moi, marais wastaafu Daniel Moi na Mwai Kibaki ili kupata baraka zao hata kama si uungwaji wa kisiasa,”anasema Prof Kibwana.

Nao Seneta Wetangula na Bw Mudavadi wanadaiwa kuanza kumnyemelea Bw Ruto ili mmoja wao awe mgombea mwenza wake 2022.

 

 

 

VITUKO: Nia fiche ya Farida kumfichulia Pengo njama ya Mwinyi na Tumbo

Na SAMUEL SHIUNDU

Walifika faraghani na kuagiza chakula. Pengo hakula nyama kwa sababu za kidini. “Huu ni mwezi mtukufu wa pasaka aisee! Lazima tususie kila jambo linalotupa raha’ Hili lilimgutusha Farida.

Akatambua kuwa kakutana na mwanamume mwenye msimamo mkali wa kidini. Hakujua kama hii kauli ya Pengo kuhusu ‘kila jambo la raha’ ilihusisha pia yale yaliyomsumbua roho.

Hapo naye akaomba apewe soda baridi kwa keki. Hakutaja pombe asije akadhaniwa mhuni na muumini huyu. Hakuna mwanamke ambaye hujiachilia na kuonyesha udhaifu wake kwa mwanamume kwa mara ya kwanza. Kwake stara ilikuwa ngao iliyomsaidia kuvishinda vita vingi vya aina hii. Akajitunza na kunyenyekea.

Baada ya jambo-sijambo, Farida alimfichulia mwenzake lililowakutanisha katika mkahawa huo. Alimweleza jinsi alivyoyasikiliza mazungumzo kati ya Tumbo na Mwinyi.

“Nilisikia wakizungumzia kitu kama ‘interdiction’. Mwanzoni sikujua maana ya neno hilo. Lakini baada ya kulitafitia, nikagundua kuwa ni jambo kama, kufutwa kazi.” Farida alimfafanulia mwenzake kabla ya kuendelea, “Na anayepangiwa njama hii si mwingine ila wewe mpenzi” akampasulia mbarika hatimaye.

‘Yakoje haya masikio basi?’ Pengo alijiuliza kwa mshangao. Alijua kuwa Mwinyi hakumpenda, lakini hakujua kuwa uhasama wao ulikuwa umefikia kiwango hiki. Akameza mate machungu huku akimsikiliza Farida aliyekuwa akirogonya kama muumini aliyepandwa na roho wa ndimi, “Nilipogundua hili nikajiambia kuwa si haki kabisa!

Si haki kwa kijana mwema kama wewe kupatwa na nakama hii! Ndipo nilipoikumbuka methali ya kikwetu isemayo kuwa, asiyetahadhari hugaagaa kwenye mapito ya majitu.

Nimekuita nikujuze utahadhari kabla ya hatari. Wajua tena ilivyo vibaya kukumbwa na balaa huku mwenyewe huna habari? Wanasema wahenga kuwa, nzi asiye na mshauri huuandama mzoga hadi kaburini. Singetaka uwe nzi huyu.”

Pengo alikumbuka siku aliyokutana na huyu binti Farida kwa mara ya kwanza. Hakuwahi kufikiria kuwa angemfaa. Aliaibika kwa kumpuuza awali. “Sasa nitafanyaje maskini?” Pengo alishangaa.

Kwa kulisikia swali hili la Pengo, Farida alijiwa na matumaini ya kuvuna alilolilenga. Akampa habari nyingine nzuri. “Swala lako lilinikeshesha na kuniliza hadi kisima changu cha machozi kikakauka. Nimekwishazungumza na mkuu wa shule ya Baraka kule Sidindi. Akaniambia umwone.

Mwinyi aliposema wewe wa nini kumbe kunao wanaojiuliza watakupata lini?” Farida alimliwaza kwa misemo ya kikwao.

Pengo alimshukuru Farida kwa fadhila zake. Shilingi mia tatu zikamtoka kulipia chakula chao. Wakaagana na kuahidiana wakutane kesho yake Pengo atakaporejea kutoka Sidindi.