Schalke 04 wamtimua kocha Wagner baada ya timu kufungwa mabao 11 mechi mbili za ufunguzi wa Bundesliga

Na MASHIRIKA

KOCHA wa zamani wa Huddersfield, David Wagner ametimuliwa na Schalke 04 baada ya kikosi hicho kinachoshiriki Ligi Kuu ya Ujerumani (Bundesliga) kupoteza mechi mbili za kwanza za msimu huu wa 2020-21.

Kupigwa kwa Schalke katika michuano hiyo miwili ligini, kunaendeleza rekodi duni ambayo imewashuhudia wakikosa kusajili ushindi katika jumla ya mechi 18 zilizopita tangu mwisho wa muhula wa 2019-20.

Schalke walipondwa 8-0 na mabingwa watetezi Bayern Munich katika mechi ya ufunguzi wa msimu huu kabla ya kupepetwa 3-1 na Werder Bremen mnamo Septemba 26.

Wagner, 48, alijiunga na Schalke mnamo 2019 baada ya kushawishiwa kuagana na Huddersfield aliowanoa kwa zaidi ya miaka mitatu.

Wasaidizi wake Christoph Buhler na Frank Frohling pia wamefurushwa na Schalke uwanjani Veltins Arena.

Haya yamethibitishwa na mkurugenzi wa spoti wa Schalke, Jochen Schneider.

DORTMUND MOTO: Schalke 04 yapata kichapo ‘saizi’ ya jina lake

Na GEOFFREY ANENE

BORUSSIA Dortmund imepata ushindi wake wa kwanza tangu mwaka 2015 katika uwanja wake wa nyumbani wa Signal Iduna Park dhidi ya Schalke baada ya kutitiga wageni hao 4-0, huku Ligi Kuu ya Ujerumani ikirejea kwa kishindo baada ya kusimama kwa miezi miwili kwa sababu ya janga la virusi hatari vya corona.

Mabingwa hao wa mataji matano ya Bundesliga, ambao walishinda ligi hii mara ya mwisho msimu 2011-2012, waliingia mchuano dhidi ya Schalke na motisha kubwa ya kushinda Eintracht Frankfurt 4-0, Werder Bremen 2-0, Freiburg 1-0 na Borussia Monchengladbach 2-1 ligini katika mechi nne zilizopita.

Hata hivyo, walikuwa wamepiga Schalke mara moja tu katika mechi nane zilizopita, na ilikuwa ugenini walipolaza timu hiyo 2-1 mwezi Desemba 2018.

Ushindi wa mwisho wa Dortmund uwanjani Iduna dhidi ya Schalke ulikuwa 3-2 Novemba 8, 2015.

Dortmund ilimaliza nuksi hizo kwa kupitia mabao ya mshambuliaji matata Erling Haaland dakika ya 29, beki Mreno Raphael Guerreiro dakika ya 45 na 63 na kiungo Mbelgiji Thorgan Hazard.

Hazard, ambaye ni nduguye nyota wa zamani wa Chelsea Eden Hazard, alimegea Haaland krosi safi kutoka pembeni kulia kufungua ukurasa wa magoli.

Mjerumani Julian Brandt alipasia Guerreiro, ambaye aliadhibu kipa Markus Schubert aliyekuwa ameanzisha mpira vibaya kwa kupigia mpinzani baada ya Haaland kumwekea presha ndani ya kisanduku.

Hazard aliongeza bao la tatu baada ya kupokea krosi kutoka kwa Brandt pembeni kushoto na kusukumia kipa kiki zito hadi wavuni.

Brandt alikuwa amepokea mpira kutoka kwa Haaland, ambaye alikuwa amechezewa visivyo, lakini refa akaacha mpira uendelee baada ya Brandt kuufikia.

Guerreiro alihitimisha kwa kufunga bao safi kupitia mguu wake hatari wa kushoto kutoka pembeni kulia baada ya kuanzisha shambulio na kisha kukamilisha pasi kutoka kwa Haaland.

Dortmund sasa ana alama 54, moja nyuma ya mabingwa watetezi Bayern Munich, ambao watavaana na Union Berlin hapo Jumapili.

Katika mechi zingine ambazo zimesakatwa leo Jumamosi, Augsburg imepoteza nyumbani 2-1 dhidi ya Wolsfburg, Dusseldorf na Paderborn zikaumiza nyasi bure katika sare ya 0-0 nayo Hoffenheim ikalizwa 3-0 na Hertha Berlin.

Mechi kati ya RB Leipzig na Freiburg imetamatika 1-1.

Pep Guardiola alia masihara licha ya ushindi

Na MASHIRIKA

GELSENKIRCHEN, Ujerumani

PEP Guardiola anaamini kuwa Manchester City haitaenda mbali katika kipute cha Klabu Bingwa Ulaya msimu huu isipojifunza kutokana na ushindi wake wa mabao 3-2 dhidi ya Schalke ambapo ilimaliza mechi hiyo na wachezaji 10 siku ya Jumatano usiku.

“Sioni tukienda mbali katika mashindano haya tusipoimarika,” alisema kocha huyu wa City.
“Mwishowe, kujituma kwa (Leroy) Sane na (Raheem) Sterling ndiko kulileta tofauti katika mchuano huu.
“Matokeo haya ni mazuri, ingawa tulipeana penalti mbili na pia kuonyeshwa kadi moja nyekundu. Kwa hivyo hatuko makini sana kupigania taji la Klabu Bingwa Ulaya.”
City ilikuwa mashakani ilipojipata chini mabao 2-1 zikisalia dakika 22 kipenga cha mwisho kilie wakati Nicolas Otamendi alilishwa kadi nyekundu kabla ya mabao kutoka kwa Sane na Sterling katika dakika tano za mwisho kuiwezesha kushinda mchuano huo wa raundi ya 16-bora.
Schalke iliongoza dakika 45 za kwanza 2-1 ikinufaika mara mbili kupata penalti kupitia teknolojia ya kuangalia matukio ya uwanjani kwenye video (VAR), ambazo Nabil Bentaleb alifunga baada ya Sergio Aguero kufungua akaunti ya magoli mjini Gelsenkirchen.

Sane, ambaye alianza kutumiwa dakika 12 za mwisho, alipachika frikiki safi iliyofanya mabao kuwa 2-2 na hakuficha furaha yake kupata bao dhidi ya waajiri hao wake wa zamani.

“Nilitaka kuvuta shuti kutoka mahali hapo kwa sababu nimewahi kupata bao sehemu sawa na hiyo na bao hilo lilitufanya tujiamini na kutupa msukumo wa kushinda,” alisema Mjerumani huyu aliyejiunga na City mwaka 2016 akitokea Schalke.

“Hatukuwa na mwanzo mzuri, lakini nafurahia tulipata ushindi na kufunga mabao matatu ugenini, hiyo ni hatua muhimu sana.”

City bado ina kazi kubwa ya kufanya katika mechi ya marudiano Machi 12 uwanjani Etihad, huku Fernandinho, ambaye alionyeshwa kadi ya njano akisababisha penalti na Otamendi wote wakitumikia marufuku.

Licha ya mechi kusimamishwa kwa dakika tatu baada ya hitilafu ya kimitambo kuchelewesha refa Carlos del Cerro Grande kutoa uamuzi kuhusu Otamendi kunawa mpira ndani ya kisanduku, Guardiola alisema yeye ni shabiki wa VAR.

“VAR inahitaji muda, wahusika waitaimarika, skrini ilikuwa imevunjika, watakuwa bora wakati ujao,” alisema Guardiola.

“Naunga mkono teknolojia hii kwa sababu marefa wanahitaji usaidizi.”

Kilichomkera Guardiola sana kuhusu mchezo wa vijana wake ni kufungwa mabao mawili licha ya kuwa Schalke ililenga goli mara mbili katika dakika 90.

Wachezaji wa Schalke 04 kabla ya kucheza dhidi ya Manchester City. Picha/ AFP

“Walilenga goli mara chache sana na walipata mabao mawili kwa hivyo bado tuna kibarua kikubwa,” alisema Mhispania huyo.

“Ninaonea fahari kuenda ugenini na kupata mabao matatu, lakini hilo halitoshi katika kiwango hiki.

“Tuliwapa nafasi za kutawala mechini na hatuna budi kuimarisha mchezo wetu.”

Kwa jumla, Guardiola alikuwa na cha kujivunia zaidi kuliko kulalamika kutokana na ushindi huo wa dakika ya mwisho.

Baada ya kuwaongoza viongozi wa Ligi Kuu ya Uingereza na hata kukaribia kupata ushindi wa kihistoria kwenye Klabu Bingwa Ulaya, kocha wa Schalke, Domenico Tedesco alisikitika mno.

“Kichapo cha mabao 3-2 bila shaka kinasikitisha,” alisema Tedesco, ambaye vijana wake wako karibu na maeneo hatari ya kutemwa kutoka Ligi Kuu ya Ujerumani katika nafasi ya 14.

Schalke 04 yaikaribisha Manchester City

BERLIN, Ujerumani

MANCHESTER City watazuru jijini Gelsenkirchen leo Jumatano usiku kupambana na wenyeji Schalke 04 katika mechi ya duru ya kwanza ya gozi la Klabu Bingwa Ulaya (UEFA), hatua ya 16-bora.

Vijana hao wa kocha Pep Guardiola walipoteza mechi moja pekee katika Kundi G na kumaliza katika nafasi ya kwanza.

Klabu hii imekuwa katika kiwango kizuri tangu mwezi Desemba ambapo imeshinda mechi 11 kati ya 12 katika mashindano mbalimbali, huku ikifunga jumla ya mabao 46.

Schalke kwa upande wao, wanajivunia wachezaji kadhaa walio na ujuzi wa mechi kubwa, na pia wamekuwa na rekodi nzuri ugani Veltina Arena ambako ndiko mechi hiyo itachezewa.

Kocha Domenico Tedesco wa Schalke 04 ahutubia wanahabari Februari 19, 2019, mjini Gelsenkirchen, Ujerumani. Picha / AFP

Walimaliza ligi katika nafasi ya pili, nyuma ya Bayern Munich, lakini msimu huu hali imekuwa ngumu kiasi cha kushindwa kuondoka katika eneo la hatari.

Katika kiwango cha Klabu Bingwa Ulaya (UEFA), klabu hiyo maarufu kama Die Konigsblauen ilimaliza ya pili, na pia sawa na City, walimaliza mechi ya makundi kwa kupoteza mechi moja pekee.

City wataingia uwanjani siku chache baada ya kuicharaza Newport County 4-1 wakati ambapo Schalke waliagana 0-0 na Freiburg kwenye Ligi Kuu ya Ujerumani.

Wenyeji chini ya kocha Domenico Tedesco watacheza mechi ya leo bila nyota kadhaa kutokana na majeraha, lakini Kinda Rabbi Matondo atapata fursa ya kucheza dhidi ya klabu yake ya zamani, Manchester City kabla ya kuyoyomea Bundesliga mapema mwaka 2019.

Kadhalika, itakuwa fursa nzuri kwa mlinzi Matija Nasralic kucheza dhidi ya Manchester City, timu yake ya zamani.

Sebastian Rudy ambaye majuzi alihusishwa na mpango wa kujiunga na mabingwa hao wa EPL pia atakuwa kikosini kusaidia Schalke kupata matokeo mema kwenye mechi hii ya mkondo wa kwanza.

Wachezaji wengine wanaotarajiwa kupewa nafasi kikosini ni pamoja na Amine Harit na Weston McKennie.
Suart Serdar aliyeonyeshwa kadi nyekundu mwishoni mwa wiki hatakuwa kikosini, pamoja na Omar Mascarell atakayesubiri hadi mkondo wa pili kutokana na kadi alioonyeshwa katika mechi ya awali.

Benjamin Stambouli na Rudy watakosa kucheza mechi ya marudiano iwapo wataonyeshwa kadi ya pili ya manjaoi katika mechi hiyo.

Kwa upnade mwingine, Nicolas Otamendi, Sergio Aguero na Fermandinho watakosa kucheza mkondo wa pili iwapo wataonyeshwa kadi za njano.

Benjamin Mendy na Vincent Kompany wanasumbuliwa na majeraha na huenda wasijumuishwe kikosini.

Danilo au Oleksandr, mmoja wao ataanza kama beki wa kushoto katika kikosi hiki cha kocha Pep Guardiola.
Huenda Leroy Sane akaanza kama mchezaji wa akiba dhidi ya klabu hiyo yake ya zamani (Schalke).