Ibada iliyoangusha kampuni za kamari za Betin, SportPesa

Na PAUL WAFULA

MASAIBU ya kampuni ya SportPesa na kampuni nyingine za uchezaji kamari yalianza Mei mwaka uliopita, baada ya ibada moja ya kanisa iliyohudhuriwa na Rais Uhuru Kenyatta.

Kwenye hafla hiyo, iliyofanyika katika kanisa la Christ is the Answer Ministries (CITAM), Nairobi, aliyekuwa kiongozi wa kanisa hilo, Askofu Mstaafu David Oginde, alishangaa ni kwa nini Rais Kenyatta alikuwa akiongoza nchi iliyozongwa na uchezaji kamari.

Baada ya ibada hiyo, Rais Kenyatta alikutana na Waziri wa Usalama wa Ndani, Dkt Fred Matiang’i, ambapo alimtaka kuchunguza na kumweleza yaliyokuwa yakiendelea katika sekta ya uchezaji kamari nchini.

Baada ya muda, Dkt Matiang’i alirejea kwa Rais Kenyatta, akiwa na maelezo ya kutamausha kuhusu hali ilivyokuwa ikiendelea nchini.

Miongoni mwa maelezo hayo ni kwamba, vifo vya matineja nchini vilikuwa vikiongezeka kila kuchao.

Vile vile, ilibainika kuwa zaidi ya vijana 500,000 walio kati ya umri wa miaka 18 na 25 walikuwa wameadhibiwa na Halmashauri ya Kudhibiti Ulipaji Mikopo (CRB) kwa kushindwa kulipa mikopo waliyokuwa wamekopa kama ada za uchezaji kamari.

Kwenye ufichuzi huo, Shirika la Watengenezaji Bidhaa Kenya (KAM) lililalamika kwamba matumizi ya baadhi ya bidhaa muhimu yalikuwa yakipungua.

Wakuu wa vyuo vikuu pia walilalamika kuwa wanafunzi wengi hawakuwa wakihudhuria masomo yao, kwani walikuwa wakitumia muda wao mwingi katika uchezaji kamari.

Cha kushtua ni kuwa, walipohudhuria, walikuwa wakitumia muda wao mwingi kwenye simu zao wakishiriki kwenye uraibu huo.

Dkt Matiang’i pia alieleza kuwa kiwastani, mapato ya washiriki wengi yalikuwa kati ya Sh5,000 na Sh10,000 kwa mwezi. Baada ya hali hiyo kuibuka, waziri alimwagiza Inspekta Jenerali wa Polisi Hilary Mutyambai kufanya uchunguzi kwa muda wa saa 24 kuhusu wakurugenzi wa kampuni hizo. Alisema alikuwa tayari kutia saini stakabadhi za kuwarejesha makwao mara moja.

Kwenye mahojiano na ‘Taifa Leo’, Dkt Matiang’i alisema alilazimika kuchukua hatua hiyo ili kulainisha hali kwenye sekta hiyo.

Miongoni mwa wakurugenzi waliofurushwa nchini ni Bw Domenico Giovando na mwanawe, Leandro Giovando. Wawili hao walikuwa wakurugenzi wa kampuni ya Betin.

Vile vile, alimfurusha Bw Nikolai Barnwell, ambaye alikuwa mkurugenzi wa kampuni ya BetPawa. Watatu hao ni raia wa Bulgaria.

SportPesa yarejea

Na CHARLES WASONGA

SEKTA ya kamari imepata mwamko mpya baada Bodi ya Kudhibiti Kamari Nchini (BCLB) kurejesha leseni ya kuhudumu ya kampuni ya kamari ya SportPesa ambayo sasa itahudumu chini ya mwavuli wa kampuni ya Milestone Games Ltd.

Kwenye taarifa kwa vyombo vya habari Ijumaa, bodi hiyo pia imetangaza kuwa imefutilia mbali mkutano ambao ingeongoza Novemba 26 kujadili suala hilo.

“Kwa mujibu wa kipengele 4 (1) (b) cha Sheria kuhusu Michezo ya Kamari, ibara ya 131 ya Sheria za Kenya, uamuzi wa kufutiliwa mbali kwa leseni yenu ya mwaka wa kifedha wa 2020/2021 umesitishwa,” bodi hiyo ikasema kwenye taarifa ambayo nakala yake ilitumiwa SportPesa.

Ikaongeza, “Vile vile barua yetu ya Oktoba 30 na inayotajwa hapa imeondolewa sawa na kufutiliwa kwa mkutano ambao ulipangiwa kufanyika mnamo Novemba 26.”

Hayo yanajiri siku moja baada ya Jaji mmoja kupinga hatua ya kuzimwa kwa matumizi ya jina la kibiashara, SportPesa.

Jaji Paul Nyamweya aliruhusu kampuni ya Milestone Games Ltd kutumia nambari za Safaricom za malipo (Pay Bill Numbers) pamoja na nembo ya SportsPesa.

Uamuzi wa jaji huyo ulitolewa kufuatia kesi iliyowasilishwa na Milestone Games Ltd ikipinga hatua ya bodi ya BCLB kuizuia kutumia nembo ya SportPesa na nambari zake za malipo iliyopewa na kampuni ya mawasiliano ya Safaricom. BCLB ilitoa uamuzi wake mnamo Oktoba 30, 2020.

Bodi hiyo pia ilizuia Milestone Games Ltd kutumia wavuti www.ke.sportpesa.com, nambari ya kodi 29050, 79079 na nambari za “pay bill”.

Hiyo ndiyo maana kampuni hiyo ilielekea kortini kutaka kubatilisha uamuzi huo wa bodi ya BCLB. Mahakama iliamua kuwa bodi hiyo ilichukua hatua hiyo kinyume cha mamlaka yake.

Kurejeshwa kwa leseni ya SportPesa kando na kufufua ari ya kamari miongoni mwa Wakenya, uraibu ambao una madhara yake, pia ni habari njema kwa sekta ya michezo nchini ambayo ilikuwa ikipata udhamini kutoka kwa kampuni hiyo maarufu ya kamari.

Mabilioni ya SportPesa yanarejea?

Na GEOFFREY ANENE

KAMPUNI ya kamari ya SportPesa imeashiria inapanga kurejea katika soko la Kenya, saa chache tu baada ya Rais Uhuru Kenyatta kusaini mswada wa fedha Juni 30, 2020.

Baada ya serikali kulegeza msimamo wake hapo Juni 30 kuhusu ushuru wenye utata unaotozwa kampuni hizo na watu wanaobashiri mechi na ambao ulichangia kampuni nyingi kujiondoa soko la Kenya, SportPesa ilichapisha ujumbe kwenye mtandao wake wa Twitter wa kupatia wateja wake matumaini.

Ikijibu mteja AChevinar aliyeuliza kama itarejea Kenya, SportPesa ilisema, “Hatuna tarehe rasmi tutakayorejelea shughuli zetu, lakini tuna matumaini ya kufanya hivyo.”

Mswada huo, ambao umefanyiwa marekebisho, unaondoa ushuru utata uliochangia SportPesa na ile ya Betin na nyinginezo kujiondoa Kenya miezi tisa iliyopita.

Kabla ya kujiondoa kabisa katika soko la Kenya mnamo Septemba 2019, SportPesa ilikuwa ikidhamini Gor Mahia, AFC Leopards, Ligi ya Ndondi, Shirikisho la Raga Kenya, Kenya Harlequin, Ligi Kuu ya Soka ya Kenya na pia mashindano ya kimataifa kati ya klabu za soka za Kenya na Tanzania pamoja na kuleta klabu ya Uingereza Everton nchini Kenya na Tanzania na Hull City nchini Kenya, miongoni mwa shughuli zingine. Pia, ilikuwa imeajiri mamia ya Wakenya katika afisi zake jijini Nairobi.

SportPesa ilikuwa mstari wa mbele kupinga sheria kali za kutozwa ushuru wa asilimia 35 zilizopitishwa na serikali. Kampuni hiyo inasemekana ilipokea Sh20 bilioni kila mwezi kutokana na beti ambazo Wakenya walikuwa wakiwekeza wanapobashiri mechi za Kenya na mataifa mengine, wakitafuta kujishindia fedha.

Kampuni hiyo, ambayo ilianza shughuli zake Kenya mwaka 2014, ilikuwa ikitawala asilimia 64 ya soko la humu nchini. Ilisalia na katika mataifa ya Tanzania, Afrika Kusini, Italia, Ireland, Isle of Man na Uingereza baada ya kujiondoa Kenya.

Betin inaaminika ilitawala soko la Kenya kwa asilimia 20 ikifuatiwa na Betika, Betpawa Sportybet, mtawalia. Kampuni hizi zilikuwa katika orodha ya 27 za kamari zilizopokonywa leseni Julai 2019 na Bodi ya Kudhibiti na Kutoa Leseni nchini (BCLB) kwa masuala yanayohusiana na ushuru.

Betika haikuondoka Kenya. Kwa sasa, inaongoza soko hili ikijiuza kupitia kwa Ligi ya Supa. Betsafe ilijitosa nchini Kenya wiki chache zilizopita ilipotangaza kusaini kandarasi na klabu mbili kongwe za soka Gor Mahia na AFC Leopards kwa kuzidhamini Sh55 milioni na Sh40 milioni kila mwaka kwa kipindi cha miaka mitatu.

Sportpesa watemwa EPL na klabu ya Everton

Na GEOFFREY ANENE

WADHAMINI wa zamani wa Gor Mahia, AFC Leopards pamoja na Ligi Kuu ya Kenya (KPL), SportPesa wamepata pigo jingine baada ya klabu ya Everton nchini Uingereza kutema kampuni hiyo ya kamari.

SportPesa ilikatiza udhamini wake wote nchini Kenya mnamo Julai 2019 baada ya serikali kuwekea kampuni za kamari sheria kali.

Iikuwa ikifadhili Everton, inayoshiriki Ligi Kuu ya Uingereza (EPL), kwa karibu Sh1.3 bilioni kila mwaka kuambatana na mkataba wa 2017.

Kampuni hiyo iliyoanzishwa 2014 inamilikiwa na watu kutoka Kenya, Bulgaria na Marekani.

Ilikuwa ikidhamini Shirikisho la Raga nchini (KRU) kwa Sh607 milioni, KPL kwa Sh450 milioni, klabu za soka za Gor (Sh325 milioni) na Leopards (Sh225 milioni), pamoja na kombe la SportPesa kati ya klabu za Kenya na Tanzania, ambayo mshindi alipata fursa ya kukabiliana na Everton.

Washindi wa kombe la SportPesa mwaka 2017 na 2018, Gor Mahia walilimana na Everton jijini Dar es Salaam, Tanzania kabla kukutana tena uwanjani Goodison Park mjini Liverpool.

Mabingwa wa mwaka 2019, Kariobangi Sharks walialika timu hiyo ya Uingereza jijini Nairobi mwaka jana.

Katika taarifa Jumapili, Everton ilisema kuwa uhusiano kati yake na na SportPesa utakatizwa mwisho wa msimu huu wa 2019-2020.

Klabu hiyo ya EPL ilikuwa imesaini kandarasi kubwa ya miaka mitano na SportPesa mnamo Mei 2017 baada ya kandarasi yake ya shati na kampuni ya vinywaji ya Chang nchini Thailand kutamatika.

Katika tovuti ya Everton, taarifa ilieleza: “Ni uamuzi mgumu, lakini unatupatia nafasi ya kufanya mipango bora ya kibiashara. Tunashukuru SportPesa kwa kazi tuliyofanya pamoja. Ushirikiano wetu uliwezesha kikosi cha kwanza kuzuru Afrika mara mbili.

“Aidha, ulituwezesha kukuza umaarufu na uhusiano wetu barani Afrika,” msemaji huo aliongeza.

Kabla ya kuondoka soko la Kenya, SportPesa inasemekana ilikuwa ikiunda Sh201 bilioni kila mwaka kutokana na beti ambazo Wakenya walicheza.

Tangazo hilo ni muziki mtamu kwa mashabiki wa Everton ambao hawakufurahia klabu hiyo kushirikiana na kampuni ya kamari mwaka 2017, hasa kwa sababu ya tatizo kubwa la uchezaji wa kamari dunia nzima.

Katika Ligi Kuu ya Uingereza, Brighton & Hove Albion, Sheffield United na Southampton ndizo klabu zisizo na udhamini wowote kutoka kampuni za kamari.

Kabla ya kuondoka soko la Kenya, SportPesa inasemekana ilikuwa ikiunda Sh201 bilioni kila mwaka kutoka kwa Wakenya.

Kujiondoa kwa Sportpesa na Betin kutaisaidia nchi pakuu – Kanini Kega

Na Stephen Munyiri

MBUNGE wa Kieni Bw Kanini Keega ameunga mkono hatua ya kampuni za kamari za Sportpesa na Betin kusimamisha shughuli zake nchini.

Mbunge huyo, ambaye pia ni mwenyekiti wa Kamati ya Bunge kuhusu Biashara, alisema kuwa uchezaji kamari umewaathiri sana vijana wengi na kuwafanya wazembee katika utafutaji pato.

Bw Kega alisema kwamba ijapokuwa serikali huwa inawaunga mkono wawekezaji wa kigeni, mchipuko wa kampuni za kucheza kamari haukuzi uchumi wa nchi.

Alisema kuwa kampuni hizo hazikuchangia lolote kuwawezesha Wakenya kujikuza kiuchumi.

“Kama serikali, tunaunga mkono kampuni ambazo zitawezesha Wakenya kujikuza kiuchumi. Hata hivyo, baadhi ya wawekezaji kama wale wanaojihusisha kwenye biashara ya uchezaji kamari hawachangii lolote,” akema mbunge huyo.

Alisema hayo kwenye kikao na wanahabari katika Kanisa la PCEA Kabiru-ini wakati wa kutawazwa kwa Kaasisi Peter Maikumi mnamo Jumapili.

 

SportPesa, Betin zasitisha shughuli Kenya

Na MARY WANGARI

KAMPUNI za ubashiri wa matokeo ya michezo za SportPesa na Betin, zimefunga shughuli nchini kwa sababu ya mvutano usiyoisha baina yao na serikali kuhusu ushuru na sheria.

Kupitia ilani kwa wafanyakazi wake, Mkurugenzi wa Betin kwa niaba ya kampuni ya Gamecode, pia alitoa notisi ya kuwafuta kazi wafanyakazi wote akitaja changamoto za kifedha.

“Kutokana na kuzorota kifaida, usimamizi umelazimika kufikiria upya kuhusu mfumo wake wa utendakazi na kuendelea na hatua ya kuwafuta wafanyakazi kwa kuwa hawahitajiki tena,” ilisema sehemu ya memo hiyo.

Kulingana na Betin, juhudi za kutafuta suluhu kati ya Julai na Septemba mwaka huu zimegonga mwamba na kuifanya kuwa vigumu kudumisha wafanyakazi.

Kwa upande wake, SportPesa ilielezea kutamaushwa kwao na uamuzi wa serikali wa kutoza ushuru wa asilimia 20 kwa kila ushindi.

Katika taarifa kwa vyombo vya habari, SportPesa ilimshutumu aliyekuwa Waziri wa Fedha Henry Rotich kwa hatua hiyo.

“Hadi wakati ambapo kutozwa ushuru wa kutosha na mazingira mema ya sheria yatakaporejeshwa, SportPesa itasitisha shughuli zake nchini Kenya,” ikasema sehemu ya taarifa.

Sportpesa yaruhusiwa kerejelea biashara

NA BRIAN OKINDA

bokinda@ke.nationmedia.com

KAMPUNI ya Sportpesa imejiunga na baadhi ya kampuni zingine za kamari nchini zilizoruhusiwa kurejelea kutekeleza shughuli zao za bahati nasibu baada ya kuzuiliwa kufanya hivyo kwa muda.

Mamlaka ya Ukusanyaji Ushuru nchini, KRA Jumanne iliidhinisha kurudishwa kwa leseni ya kampuni hiyo baada ya kuzimwa kwa muda wa miezi miwili.

Katika ujumbe uliotumwa kwa vyombo vya habari, kampuni hiyo ilisema kuwa imekuwa ikijadiliana na washikadau, na pia wadhibiti wa ushuru kutoka kwa serikali kuhusu leseni yake, majadiliano ambayo yalinuia kueleza vyema madhumuni na sheria ambazo zinahitajiwa kufuatwa, ikiwemo ile ya kulipa ushuru.

“Tumekuwa na majadiliano ambayo yamenawiri na tuna furaha kuwa shirika la kutoza ushuru nchini limekubali kutupea upya leseni yetu. Tuna imani kuwa majadiliano haya yote yatakamilika hivi karibuni ili tuweze kuendelea na shughli zetu za awali,” ujumbe wa Sportpesa ulisema.

Taarifa hiyo ilizidi kueleza kuwa kampuni hiyo inawashukuru wafanyikazi na mashabiki wake wote, na hivi karibuni, itatoa ujumbe kueleza itakapokua ikirejelea shughli zake.

“Sportpesa inaahidi kujitolea kwake kusaidia jitihada za serikali kutekeleza maendeleo nchini, kwa kuendeleza shugli zake ikizingatia sheria za serikali ikiwemo ile ya kutoa ushuru,” taarifa hiyo ilisema.

Kampuni hiyo ya kamari ilikua miongoni mwa zingine zikiwemo Betin, Betway, Betpawa, Premierbet, Lucky 2U, 1XBet, Mozzartbet, Dafabet, World Sport Bet, Atari Gaming, Palmsbet, Bet Boss, Betyetu, Elitebet, Bungabet, Cysabet, Nestbet, Easybet, Kick Off, Millionaire Sports Bet, Kenya Sports Bet na Eastleighbet, ambazo leseni zao zilifutiliwa mbali na serikali mwezi Julai, kwa shutuma za kutolipa ushuru.

Serikali ilidai kuwa kampuni hizi zilikuwa zinapata faida ya kiasi cha Sh200 bilioni kila mwaka ila yalitoa ushuru wa shilingi Sh4 bilioni tu, mwaka uliopita.

Mkurugenzi mkuu wa Sportpesa, Ronald Karauri, hata hivo alikana madai haya, hasa ile inayohusu kiwango cha ushuru.

 

Ligi yatarajiwa kuanza ila kombe la kuwaniwa halijanunuliwa

Na CECIL ODONGO

HUKU yakisalia majuma mawili pekee kabla ya msimu mpya wa Ligi Kuu ya Kenya (KPL) kuanza, kampuni inayoendesha ligi hiyo bado haijanunua kombe jipya la kuwaniwa na klabu 18 zinazoshiriki kipute hicho.

Mwenyekiti wa KPL Jack Oguda alieleza kuwa wadhamini wa ligi hiyo, SportPesa bado wanaendelea kuirai serikali kubatilisha agizo la kuzimwa kwa biashara zake nchini na ni baada ya hapo ambapo kombe hilo litanunuliwa.

“Kwa sasa bado tunasubiri japo siku zinazidi kusonga na kulingana na sheria, kombe hilo lazima linunuliwe kabla ya msimu wa 2019/20 kung’oa nanga Agosti 30. Linagharimu Sh1 milioni na tuna matumaini ya kulipata baada ya utata kati ya SportPesa na serikali kutatuliwa,” Oguda akasema kwenye mahojiano.

Aidha, alibainisha kwamba hawawezi kukumbatia mdhamini mpya kwa sababu SportPesa bado inamiliki, kisheria, haki ya kutumia jina la KPL na tayari imelipa ada ya kupeperushwa kwa mechi kadhaa za ligi hiyo.

“Tumekuwa tukishauriana na kampuni nyinginezo kuona iwapo zitachukua jukumu la kufadhili ligi lakini hatujaafikiana. SportPesa wameonyesha nia ya kuendelea kudhamani KPL na hata wamelipia fedha za kugharimia upeperushaji wa mechi. Tunasubiri washauriane na serikali kisha wamalize sehemu iliyosalia ya ufadhili na kununua kombe,” akaongeza Oguda.

KPL imelazimika kununua kombe jingine baada ya mabingwa mara 18 Gor Mahia kushinda taji hilo kwa mara ya tatu mfululizo kuanzia mwaka wa 2017, 2018 na 2019.

Hii itakuwa mara ya pili kampuni hiyo kuhitajika kununua kombe jipya tangu 2010, ya juzi kabisa ikiwa mwaka wa 2016 ilipolazimika kujitosa sokoni baada ya Gor kulishinda kuanzia 2013 hadi 2015.

Afisa huyo vilevile alikiri kwamba itakuwa vigumu kwa KPL kuongeza Sh4.5 milioni ambazo mshindi wa ligi hutunukiwa, akisema pandushuka za kifedha na masaibu yanayowakumba wafadhili hao yanadidimizi kupandishwa kwa kiwango cha sasa.

“Bajeti yetu sasa imebanwa kabisa ukizingatia hali ya sasa ya kiuchumi na masaibu yanayowakumba wafadhili wetu. Tulikuwa tumetafakari kuhusu nyongeza hiyo hasa baada ya malalamishi kutanda kwamba kiasi hicho ni cha chini mno lakini tuna matumaini hali itabadilika na ipo siku hayo yatatimia,” akasema Oguda.

Msimu mpya wa KPL utaanza Jumamosi Agosti 30 kwa mechi kati ya Kariobangi Sharks na Western Stima.

Mechi tano zitasakatwa siku inayofuatia na nyingine tatu siku ya Jumatatu Septemba 1, 2019.

Sportpesa yafichua imekuwa ikipata faida ya Sh54 milioni kila siku

Na PETER MBURU

KAMPUNI ya michezo na Kamari Sportpesa 2018 ilikuwa ikipata faida ya Sh38, 051.75 kila dakika, ama Sh634 kila sekunde kutoka kwa watu waliotumia pesa zao kubashiri michezo.

Kiwango hicho ni sawa na kusema Sportpesa kila saa ilikuwa ikipata Sh2.28 milioni, ama Sh54.8 milioni kila siku.

Hesabu hizi ni kutokana na chapisho la kampuni hiyo katika gazeti la Standard Jumatatu kuonyesha jinsi iliingiza na kutumia pesa mwaka 2018, ambapo ilisema kuwa ilipata Sh20 bilioni.

Sportpesa katika tangazo hilo ilisema kutokana na pesa hizo ilipata faida ya Sh9 bilioni kwa jumla, na ikalipa ushuru wa Sh6.4 bilioni.

Vilevile, kampuni hiyo ilisema ilitumia kiwango kikubwa cha pesa kusaidia jamii, hasa kuinua michezo, elimu na kilimo.

Sportpesa ilisema ilitumia Sh693 milioni kufadhili michezo ya kandanda, Sh600 milioni kufadhili michezo ya raga, Sh75 milioni kufadhili michezo ya ubondia, Sh73 milioni kufadhili kilimo, Sh57 milioni kufadhili elimu na miundomsingi na Sh41 milioni kufadhili afya ya jamii.

Matumizi haya, kulingana na kampuni hiyo, ni licha ya ufadhili ambao ilitoa kwa michezo, mashirika na timu zingine, kama AFC Leopards, FKF, Sportspesa Shield na kwa mwanabondia Fatuma Zarika.

Kinaya Sportpesa kutuzwa na serikali kisha kuzimwa

Na VALENTINE OBARA

NIA halisi ya serikali kupiga marufuku kampuni za uchezaji kamari nchini, imeanza kutiliwa shaka kutokana na maelezo ya sababu zake kukosa umakinifu.

Hii ni baada ya wananchi kushangaa kwa nini kampuni ya SportPesa ni miongoni mwa zinazodaiwa kukiuka sheria za ulipaji ushuru ilhali ilituzwa na Mamlaka ya Ushuru Kenya (KRA) kama mlipaushuru bora zaidi mwaka uliopita.

Hatua ya kuzima kampuni hizo imesababisha kusimamishwa kazi kwa wafanyikazi wa kampuni husika, suala ambalo limetilia shaka kujitolea kwa utawala wa Jubilee kuwasaidia vijana kupata kazi.

Kampuni hizo za kamari hasa Sportpesa na Betin pia zimekuwa mstari wa mbele kufadhili michezo nchini, jambo ambalo litapata pigo kubwa ikiwa serikali haitabadilisha uamuzi wake.

Hatua hiyo itaathiri zaidi vijana ambao ndio hushiriki michezo.

Afisa Mkuu Mtendaji wa SportPesa, Bw Ronald Karauri jana alisisitiza kampuni hiyo haijakiuka sheria zozote za ulipaji ushuru na inatumai kurejelea biashara yake hivi karibuni.

“Tumejitolea kushauriana na wadau wote husika ili tupate suluhisho litakalofaa pande zote mbili na kusaidia serikali kwenye ajenda zake za maendeleo na pia kutoa nafasi kwa mandhari bora ya kufanyia biashara,” akasema Bw Karauri kwenye taarifa kwa vyombo vya habari.

Kando na madai ya kutolipa ushuru, serikali pia imekuwa ikidai inachukua hatua kali dhidi ya kampuni za kamari ili kulinda masilahi ya maelfu ya vijana waliotekwa na michezo hiyo kwa kiwango cha kujiharibia maisha.

Lakini wananchi kwenye mitandao ya kijamii walitilia shaka sababu hizi na kutaka serikali ijitokeze wazi kueleza sababu halisi ya kupiga marufuku kampuni hizo 27.

Mapema mwaka huu, KRA iliibua madai kwamba kampuni hizo zilifaa kulipa ushuru wa mabilioni ya fedha zinazoshindwa na wachezaji.

Mnamo Jumamosi, Rais Uhuru Kenyatta alisema serikali haitalegeza msimamo wake kwa kuwa hatua zilizochukuliwa ni kwa manufaa ya nchi.

Droo ya timu za Afrika Mashariki kuchuana na Everton yatajwa

Na GEOFFREY ANENE

DROO ya soka ya Afrika Mashariki ya kufuzu kukutana na klabu ya Everton ya Uingereza ya SportPesa Super Cup imefanywa Jumatatu, huku mabingwa Gor Mahia wakikutanishwa na Mbao FC ya Tanzania katika mojawapo ya mechi za robo-fainali zitakazosakatwa Januari 23, 2019.

Katika makala ya mwaka huu, ambayo yanarejea Tanzania baada ya Kenya kuandaa makala ya mwaka 2018, Bandari (Kenya) itavaana na Singida United (Tanzania) katika mechi ya ufunguzi Januari 22 mjini Dar es Salaam.

Washindi wa Kombe la Ngao nchini Kenya mwaka 2015 Bandari ni moja ya timu mbili zitakazoshiriki mashindano haya kwa mara ya kwanza kabisa.

Mabingwa mara 27 wa Tanzania, Young Africans almaarufu Yanga watalimana na washindi wa Kombe la Ngao nchini Kenya mwaka 2018 Kariobangi Sharks baada tu ya Bandari na Singida kukabana koo.

Wafalme wa Kenya mara 17 Gor, ambao walishinda makala ya kwanza ya SportPesa Super Cup mwaka 2017 nchini Tanzania na kuhifadhi taji mwaka 2018, watachapana na washiriki wapya Mbao katika mechi ya kwanza ya siku ya pili.

Robo-fainali hii ya tatu itapisha mechi kati ya washindi wa Tanzania mara 19 Simba SC na mabingwa wa Kenya mara 13 AFC Leopards. Mechi za nusu-fainali ni Januari 25, huku mchuano wa kuamua nambari tatu pamoja na fainali zikisakatwa Januari 27.

Mshindi atapokea Sh3 milioni na tiketi ya kumenyana na Everton katika mechi ya kirafiki nchini Uingereza.

Gor ilibwaga Leopards 3-0 katika fainali ya mwaka 2017 na kulima Simba 2-0 mwaka 2018.

Jackpot ya Sh208 milioni kwa mwanasiasa aliyewania ubunge na kubwagwa

NA MWANDISHI WETU

ALIYEKUWA mwaniaji wa ubunge wa Konoin, Kaunti ya Bomet amejiunga na kundi la mamilionea baada ya kushinda Sh208 milioni katika shindano la Sportpesa.

Bw Cosmas Korir, mkurugenzi wa sasa wa Kilimo katika Kaunti ya Pokot Magharibi alishinda Sh208,733,619 milioni, mnamo Jumapili.

“Ni kweli nimeshinda Jackpot ya Sportpesa. Nasubiri kuambiwa na Sportpesa kuhusu jinsi ya kuchukua fedha hizo,” Bw Korir aliambia Taifa Leo kwa njia ya simu.

Alipoulizwa atakachofanyia fedha hizo, Bw Korir alisema “Sijaanza kufikiria namna ya kutumia fedha hizo. Bado sijaamini kwamba nimeshinda kiasi hicho cha fedha.”

Aliongeza, “Namshukuru Mungu kwa kunipatia kiasi hicho cha fedha; nina furaha isiyo na kifani.”

Bw Korir alisomea Kilimo katika Chuo Kikuu cha Egerton.

Amewahi kuhudumu kama Mkurugenzi wa Kilimo katika Kaunti ya Bomet chini serikali ya gavana wa zamani Isaac Ruto.

Bw Korir aliwania ubunge kwa kutumia Chama cha Mashinani (CCM) lakini akabwagwa na Bw Brighton Yegon wa Jubilee.

Gor yaibwaga Ingwe kuchuana na Hull City Mei 13

Na GEOFFREY ANENE

GOR Mahia imeimarisha rekodi yake ya kutoshindwa na AFC Leopards hadi mechi tano baada ya kuichapa kwa njia ya penalti 5-4 Jumanne na kunyakua tiketi ya kumenyana na Hull City hapo Mei 13, 2018.

Mabingwa mara 16 wa Kenya, Gor na mabingwa mara 13 Leopards walimaliza dakika 90 za mchuano huu wa kusisimua bila kufungana uwanjani Afraha mjini Nakuru.

Gozi hili la 85 katika ya klabu hizi kongwe nchini Kenya lilishuhudia Mrwanda Jacques Tuyisenge akipoteza penalti ya kwanza kwa upande wa Gor sawa na mwenzake kutoka Leopards, Whyvonne Isuza.

Gor haikupoteza tena penalti, huku Mrwanda Meddie Kagere, Mganda Godfrey Walusimbi na George ‘Blackberry’ Odhiambo, Joachim Oluoch na Ben Ondiek wakimwaga kipa wa Leopards, Ezekiel Owade. Kipa wa Gor, Shaban Odhoji alipangua penalti ya Isuza, lakini akashindwa kupangua penalti za mchezaji bora wa mwezi Machi, Ezekiel Odera pamoja na Duncan Otieno, Robinson Kamura na Mganda Baker Lukooya. Penalti ya mwisho ya Leopards ilipigwa nje na Vincent Oburu.

Hull, ambayo inashiriki Ligi ya Daraja ya Pili ya Uingereza, itasakata mechi yake ya mwisho ya ligi hiyo Mei 6 dhidi ya Brentford kabla ya kuzuru Kenya.

Itakabiliana na Gor katika uwanja wa kimataifa wa Kasarani jijini Nairobi mnamo Mei 13.

Ni mara ya pili Gor inacheza dhidi ya timu kutoka Uingereza baada ya kulemewa 2-1 na Everton jijini Dar es Salaam, Tanzania, mwaka 2017.

Gor ilinyuka Leopards 3-0 na kunyakua tiketi ya kumenyana na Everton.

Hull pia si timu geni kwa Wakenya. Ilizaba timu ya mstaa kutoka Ligi Kuu ya Kenya (SportPesa All Stars) 2-1 uwanjani K-COM nchini Uingereza mnamo Februari 27, 2017.

Hull, Gor na Leopards zinapata udhamini kutoka kwa kampuni ya bahati nasibu ya SportPesa. Mwaka 2016, SportPesa ilitangazwa wadhamini wakuu wa Hull baada ya kusaini kandarasi ya misimu mitatu (2016/17, 2017/18 na 2018/19).

Leopards na Gor zilisaini kandarasi ya miaka mitatu na SportPesa zaidi ya wiki moja iliyopita ya udhamini wa Sh156.4 milioni na Sh198.6 milioni, mtawalia.

SportPesa kufadhili FKF, KPL, Gor na Ingwe

Na BERNARDINE MUTANU

Hatimaye klabu za kandanda vya humu nchini zinaweza kusherehekea baada ya kampuni ya uchezaji kamari, Sportpesa kuingia katika mkataba nazo.

Pia watakaonufaika katika mkataba huo ni vyama vya humu nchini vya kandanda.

Kampuni hiyo ilitangaza kuingia katika mkataba huo wa Sh682 milioni siku chache baada ya Hazina ya Fedha kuchapisha mapendekezo ya kubadilisha sheria kuhusu ushuru unaotozwa kampuni za uchezaji kamari.

Katika pendekezo hilo, kampuni hizo huenda zikaruhusiwa ushuru wa asilimia 15 kutoka asilimia 35.

Kuambatana na mkataba huo, Ligi Kuu ya Kenya (KPL) itapata Sh295 milioni ilhali Shirikisho la Kandanda (FKF) litapata Sh69 milioni.

Vilabu vya Gor Mahia na AFC Leopards zipata Sh198 milioni na Sh156 kulingana na mfuatano huo.

“Tumetia sahihi mkataba wa miaka mitatu na FKF, KPL, Gor Mahia na AFC Leopards,” alisema Mkurugenzi Mkuu wa SportPesa Ronald Karauri Jumatatu wakati wa mkutano na wanahabari.

SportPesa mnamo Januari ilisitisha ufadhili wake wa vilabu vya kandanda baada ya serikali kuzitaka kampuni za uchezaji kamari kulipa ushuru wa asilimia 35.