PAPA Francis ana ugonjwa wa nimonia mara mbili, Vatican ilisema Jumanne, na kufanya matibabu  kuwa magumu kwa papa huyo mwenye umri wa miaka 88 na kuashiria kudorora zaidi kwa afya yake dhaifu.

Francis amekuwa na matatizo ya kupumua kwa zaidi ya wiki moja na alilazwa katika Hospitali ya Gemelli  jijini Roma mnamo Februari 14.

Vatican ilisema katika taarifa kwamba papa alifanyiwa uchunguzi wa kifua siku ya Jumanne mchana ambao umefichua “ana nimonia mara mbili ambayo inahitaji matibabu zaidi”.

Nimonia mbili ni maambukizi makubwa ambayo yanaweza kuwasha mapafu yote mawili, na kufanya kupumua kuwa vigumu zaidi.

“Vipimo vya maabara, eksirei ya kifua, na hali ya kiafya ya Papa inaendelea kutoa picha tata,” Vatican ilisema.

Taarifa ilisema  kiongozi huyo wa kanisa katoliki ulimwenguni anahitaji tiba mseto ambayo “inafanya matibabu kuwa magumu zaidi”.

“Hata hivyo, Papa Francis bado yuko katika hali nzuri,” taarifa hiyo ya Vatican iliongeza.

Akiwa kijana mdogo alipata ugonjwa wa mapafu na sehemu ya pafu moja ikaondolewa.

Afisa mmoja wa Vatican, ambaye alikataa kutajwa jina kwa sababu ya uzito wa suala hilo, alisema mapema Jumanne kwamba papa hakuwa amewekwa kwenye mashine ya kupumua na alikuwa akipumua peke yake.

Kabla ya taarifa ya hivi punde, Vatican ilikuwa imetangaza kwamba shughuli zote za hadhara kwenye kalenda ya papa zilisitishwa hadi Jumapili.

Papa alipaswa kuongoza matukio kadhaa mwishoni mwa juma kwa Mwaka Mtakatifu wa Kikatoliki  2025, ambao utaendelea hadi Januari ijayo.

Vatican ilisema Jumatatu kwamba madaktari walibadilisha matibabu ya papa kwa mara ya pili akiwa hospitalini ili kukabiliana na “hali tata ya kiafya”.

Madaktari wanasema maambukizi ya polymicrobial hutokea wakati viumbe vidogo viwili au zaidi vinahusika, na vinaweza kusababishwa na bakteria, virusi, au fungi.

Vatican imesema Francis atakaa hospitalini kwa muda mrefu iwezekanavyo.

Papa amekuwa akisumbuliwa na afya mbaya katika miaka ya hivi karibuni, ikiwa ni pamoja na mafua ya mara kwa mara, maumivu ya neva ya sciatica na hernia ya tumbo ambayo ilihitaji upasuaji mwaka wa 2023.

Taarifa ya Vatican siku ya Jumanne ilisema anashukuru kwa uungwaji mkono wote ambao amepokea katika siku za hivi majuzi. “Kwa moyo wa shukrani, (yeye) anaomba dua zinazoendelea kwa niaba yake,” iliongeza.