NA FLORAH KOECH

MASHIRIKA yanayotetea haki za binadamu katika Kaunti ya Baringo yamewashutumu maafisa wa serikali kwa kushirikiana na washukiwa wa unajisi kuadhibiwa.

Kundi hilo lilidai kuwa visa kadhaa vimeripotiwa ambapo maafisa hao wanadaiwa kughushi vyeti vya kuzaliwa vya waathiriwa wa unajisi kwa kubadilisha tarehe zao za kuzaliwa ili kuonyesha kuwa si watoto.

Wakiongozwa na mjumbe wake Isaiah Biwott, walieleza wasiwasi wao kuwa visa vya unajisi vimeripotiwa katika mkoa ambao watuhumiwa wanakamatwa, kufikishwa mahakamani lakini baadaye kesi zinasambaratika kwa madai kuwa waathiriwa ni watu wazima na si watoto kama ilivyoripotiwa awali.

Hatua hiyo walisema imesababisha kuongezeka kwa matukio ya ukatili wa kijinsia hasa miongoni mwa watoto wadogo mkoani humo kwa sababu watuhumiwa wanapata mwanya mahakamani baada ya kushirikiana na maafisa hao.

Jukwaa la asasi za kiraia lilitoa mfano wa tukio lililotokea Mei 2023 ambapo mwanafunzi wa kidato cha kwanza mwenye umri wa miaka 15 aliyedaiwa kunajisiwa na mwalimu wa shule ya msingi, alikosa kupata haki baada ya mshukiwa kushirikiana na polisi na maafisa wa usajili kuficha tukio hilo na kesi kusambaratika.

“Yule mtoto ambaye wakati huo alikuwa kidato cha kwanza alinajisiwa na mtu anayemfahamu, mwalimu wa shule ya msingi.

“Mshukiwa alikamatwa kufuatia taarifa kutoka kwa wenyeji lakini hakufikishwa kortini kama ilivyotarajiwa baada ya kudaiwa kutoa hongo ili atoke nje. Tuliamua kuandika barua kwa afisi ya Mkurugenzi wa Mashtaka ya Umma (ODPP) kujua ni kwa nini mshukiwa hakuwa amefikishwa kortini,” akasema Bw Biwott.

“Tulishangaa kujua kwamba wakati tulipokuwa tukiwasilisha malalamishi yetu kwa ODPP, mshukiwa alishirikiana na baadhi ya maafisa kutaka mtoto huyo apewe kitambulisho, ili kusingizia kwamba hakuwa na umri mdogo.

“Tulifahamishwa na baadhi ya maafisa wa polisi kuhusu shughuli hizo za kichinichini na tukachukua kitambulisho kabla ya kukabidhiwa mwathiriwa,” aliongeza.

Kwa mujibu wa cheti halisi cha kuzaliwa, mwanafunzi huyo alizaliwa mwaka 2008 lakini kitambulisho kilichotolewa na kinadaiwa kuwa ni cha kughushi na kuashiria kuwa mwathirika huyo alizaliwa mwaka 2004.

Kitambulisho kilichotolewa Septemba 22, 2023 kinaonyesha kuwa mwathirika, alizaliwa Februari 10, 2004.

Wanaharakati wa haki za binadamu walisema, mtoto huyo hajaripoti shuleni tangu wakati huo na inadaiwa amefichwa na yuko katika mawasiliano ya mara kwa mara na mtuhumiwa ili asipelekwe mahakamani tena.

“Maafisa hao wamepewa jukumu la kulinda haki za watoto lakini badala yake wameamua kushirikiana na washukiwa wa unajisi ili kulinda washukiwa na kutatiza kesi mahakamani. Tumepokea malalamishi mengi kutoka kwa wakazi katika kaunti hii kwamba maafisa wa serikali waliopewa jukumu la kulinda watoto na raia kwa jumla sasa wanakiuka sheria na kushirikiana na washukiwa,” akaongeza Bw Biwott.