NA FLORAH KOECH

MCHUNGAJI mmoja Baringo Kaskazini anayehusishwa na Kanisa la African Inland Church (AIC) amekamatwa na polisi kwa madai ya kunajisi, kumpa ujauzito mwanafunzi wa Kidato cha Pili wa umri wa miaka 15 katika eneo bunge hilo.

Mshukiwa huyo, 38, ambaye anasimamia makanisa matatu anadaiwa pia kujaribu kumsaidia mtoto huyo kutoa mimba hiyo kwa kumnunulia na kumnywesha dawa, lakini ikashindikana.

Mwanafunzi huyo anayetoka katika malezi ya hali ya chini yuko chini ya uangalizi wa nyanyake mwenye matatizo ya kimwili, ambaye pia ana wanafamilia watatu wanaosumbuliwa na hali hiyo.

Kutokana na hali hiyo, mwanafunzi huyo aliyejiunga na Kidato cha Kwanza mwaka jana alipata ufadhili wa masomo na alikuwa akifadhiliwa elimu yake ya sekondari na mpango wa Benki ya Equity, Wings to Fly.

Kasisi huyo, kwa mujibu wa wanafamilia hao, aliheshimiwa sana kwa sababu alikuwa rafiki wa familia na pia waumini wa kanisa alilokuwa akihudumu.

Shule zilipofungwa mwezi Novemba kwa ajili ya sherehe za Desemba, walidai, kasisi huyo alikuwa akitembelea familia hiyo mara kadhaa kwa jina la ‘ushirika’ na kuangalia wanavyoendelea. Hawakujua kwamba ziara hiyo ya kirafiki ilikuwa njia ya kuwinda mtoto.

Kulingana na nyanyake mtoto huyo, pasta alikuwa akitembelea familia hiyo mara kwa mara tangu Novemba mwaka jana, na katika baadhi ya matukio aliendeleza ukarimu wake kwa kuwanunulia vitu vya nyumbani.

“Kasisi anasimamia makanisa matatu ya mtaa katika eneo hili na kwa sababu sisi ni washiriki wa kanisa lake, hatukuweza kusoma uovu wowote wa ziara zake za mara kwa mara. Tangu Novemba mwaka jana, alikuja nyumbani mara kwa mara, hata mchana akidai kuwa alikuwa akipita na alitaka kuuliza hali yetu,” alisema bibi huyo.

“Katika visa fulani, alizoea kuja jioni akionyesha kwamba tuna ushirika wa usiku kabla ya kuondoka na hata angeweza kuja na sukari. Sikufikiria ubaya wowote kwa sababu alikuwa mchungaji wa kanisa letu. Wakati fulani mnamo Desemba, alipita na kusimama kwenye lango letu kabla ya kumpigia simu mtoto huyo ili amuonyeshe njia ya kwenda kwa nyumba ya jirani fulani,” aliongeza.

Mlezi wa mtoto huyo pia alisema mara kadhaa amempata mchungaji huyo akishirikiana na mwanamke huyo mzee nyumbani.

“Kwangu mimi, nilikuwa nikimuona kama mchungaji mzuri kwa kujali ustawi wetu kwa kuleta bidhaa, ushirika na wakati mwingine hata kupita ili kuuliza hali yetu. Sikushuku kuwa alikuwa akifanya hivyo ili kutuvuta ili kuwinda mtoto. Ni nani hata katika akili zake angeweza kumshuku kasisi kwa vitendo hivyo kwa vyovyote vile? Hao ni watu tunaowaheshimu sana katika jamii,” alisema mlezi huyo.

Kulingana na wanafamilia hao, shauku yao ilianza Januari 8 wakati mwanafunzi huyo alipowafahamisha kuwa anataka kusafiri hadi mji wa Kabarnet, kuchukua vitu vya kutumia shuleni na nauli katika Benki ya Equity, kama kawaida, ili kwenda shule siku iliyofuata.

Hata hivyo, mtoto huyo alishindwa kufika nyumbani siku hiyo hiyo na nyanya yake aliyekuwa mzee akawa na wasiwasi kuhusu aliko.

“Tuliuliza kutoka kwa wanafamilia wengine ikiwa alikuwa amewatembelea lakini wote walisema hayupo. Siku iliyofuata, alitupigia simu kwamba alikuwa katika mji wa Migori na alitaka nauli ya basi arudi nyumbani. Baadaye tulikuja kujua kwamba alipokwenda Kabarnet, alikwenda kutafuta kazi ili kufanya kazi ya usaidizi wa nyumba na jinsi alivyokutana na mwanamume aliyejitolea kumpa kazi hiyo,” alisema.

Mwanamume huyo alimrejesha nyumbani kwake baada ya kugundua kuwa alikuwa mwanafunzi na pia alikuwa mjamzito.

“Baada ya kupata taarifa kutoka kwa mtu huyo kuwa mwanafunzi huyo ni mjamzito, tulimjulisha chifu wetu ambaye alishughulikia suala hilo. Alipofika alipelekwa katika kituo cha polisi cha Kabartonjo ili kurekodi taarifa na alipohojiwa zaidi alifichua kuwa ni mjamzito na pasta wa eneo hilo ndiye aliyehusika,” alisema mwanafamilia huyo.

Kulingana na mtoto huyo, mshukiwa huyo alimnajisi mara kadhaa Novemba na Desemba mwaka jana.

“Tunatoka katika hali duni na mtoto mdogo, ambaye alikuwa mwanafunzi mwerevu sana alikuwa akifadhiliwa na Benki ya Equity. Tumeshtushwa sana na mchungaji tuliyemwamini sana kuwajengea washiriki wake maadili mema aligeuka mbogo. Tunataka haki kwa mtoto huyu na mchungaji akipatikana na hatia akabiliane na sheria ili iwe funzo kwa wengine,” aliongeza.

Naibu wa chifu wa eneo hilo Christopher Chebon alithibitisha kuwa mtoto huyo alipimwa kwenya hospitali ya Kabartonjo na alithibitishwa kuwa ni mjamzito.

Kulingana na chifu, mtoto huyo alihojiwa katika kituo cha polisi na alikiri kuwa baada ya kumjulisha mshukiwa kuhusu matukio mapya mwezi Desemba, alikuja na kifaa cha kufanyia majaribio ili kuthibitisha yeye mwenyewe ikiwa mtoto huyo alikuwa na mimba kama alivyodai…. matokeo yaligeuka kuwa ukweli.

“Mtoto huyo alidai kuwa mtuhumiwa alipogundua kuwa makosa yake yatajulikana, alinunua dawa na kuzipeleka nyumbani kwa mtoto huyo Januari 6, ambapo alimuagiza kumeza ili kutoa ujauzito huo, lakini dawa hizo hazikufaulu. Kisha mtoto huyo alikimbilia kijijini kutafuta kazi kwingineko ili kuficha ujauzito huo baada ya kuavya mimba hiyo kushindikana,” akasema Bw Chebon.

Taifa Leo ilipozuru nyumba hiyo Jumamosi, mtoto huyo alikuwa amepelekwa katika hospitali ya Rufaa ya Kaunti ya Baringo huko Kabarnet baada ya kuugua. Kamanda wa polisi wa Kaunti ya Baringo Julius Kiragu alithibitisha kuwa mshukiwa amekamatwa na yuko chini ya ulinzi wao katika kituo cha polisi cha Kabarnet.

“Tumemkamata mchungaji kwa madai ya kumpa ujauzito mwanafunzi wa Kidato cha Pili aliyekuwa chini ya uangalizi wa nyanya akisomeshwa na Benki ya Equity. Mshukiwa anasemekana kumnajisi mtoto huyo katika msitu ulio karibu na nyumba yake, baada ya kumwomba amwonyeshe njia ya kwenda kwa nyumba ya jirani fulani,” akasema Bw Kiragu.

“Baada ya kupata taarifa kwamba mtoto huyo alikuwa mjamzito, alimnywesha baadhi ya dawa ili kumtoa mimba lakini hawakufanikiwa. Mshukiwa atafikishwa kortini Jumatatu,” akaongeza mkuu wa polisi wa kaunti hiyo.

Bw Kiragu alizua wasiwasi wa visa vilivyokithiri vya unajisi katika eneo hilo na kuonya kuhusu matokeo mabaya kwa wale watakaopatikana na hatia.

Tukio hilo lilitokea siku chache tu baada ya mwanafunzi mwingine wa Kidato cha Pili katika eneo bunge hilo hilo kudaiwa kunajisiwa na mwalimu wa shule ya msingi na mtuhumiwa kushirikiana na baadhi ya maafisa wa serikali kumpatia mtoto huyo kitambulisho kwa njia ya udanganyifu ili kuangusha kesi hiyo.