Na JOSEPH OPENDA

FAMILIA ya Kapteni Hillary Shirekule Litali, aliyeangamia katika ajali ya ndege Alhamisi, imemtaja kama mchangamfu, mwenye nidhamu na kujituma, mcha Mungu na aliyeiweka familia yake mbele.

Kapteni Litali, 29, ambaye ni kifungua mimba wa Bw Dickson na Bi Evelyn Litali kutoka eneo la Shabab, Kaunti ya Nakuru, alikumbana na mauti pamoja na Mkuu wa Majeshi, Francis Ogola, katika ajali iliyofanyika kwenye mpaka kati ya Kaunti za Elgeyo Marakwet na Pokot Magharibi.

Kabla ya kifo chake, Kapteni Litali aliyejiunga na jeshi mnamo 2013, alikuwa anasubiri kupandishwa cheo kama Meja.

Alihudumu kama msaidizi chini ya majenerali wawili wa jeshi, Jenerali Robert Kibochi na Jenerali Ogolla.

“Nilikuwa na matarajio makuu kwake. Tulikuwa na uhusiano wa karibu mno, tuliwasiliana kila siku na alikuwa na ari ya kubadilisha maisha ya familia,” alisema Bw Litali kuhusu mmoja wa wanawe wawili.

Bw Litali aliwasiliana na mwanawe Jumatatu ambapo alimfahamisha kuhusu kazi ya Elgeyo Marakwet pasipo kujua yangekuwa mazungumzo yao ya mwisho.