KAMPUNI zinazozalisha bidhaa za plastiki zimeshauriwa kuchukua jukumu la kupunguza uchafuzi wa mazingira baharini kutokana na plastiki huku Siku ya Kimataifa ya Usafi wa Fuo za Bahari ikiadhimishwa.

Akizungumza na wanahabari katika Ufuo wa Umma wa Jomo Kenyatta, Bw Alex Kubasu kutoka Hazina ya wanyamapori duniani (WWF) alisisitiza kuwa, biashara hazikupaswa tu kuingiza bidhaa sokoni, bali pia kuhakikisha kuwa bidhaa hizo zinaweza kutumika tena kupitia mchakato wa kufanywa upya.

“Leo, ulimwengu unaangazia tatizo la uchafuzi wa plastiki kwenye bahari zetu kwa kuadhimisha Siku ya Kimataifa ya Usafi wa Fuo za Bahari,” alisema Bw. Kubasu.

Tukio hili la kila mwaka linaleta pamoja wadau kutoka sekta mbalimbali kukusanya plastiki na taka nyingine zinazoweza kurejelewa kwenye maeneo ya fukwe.

Bw Kubasu alisisitiza umuhimu wa kampuni kutengeneza bidhaa zao kwa njia zinazohimiza matumizi ya mara kadhaa, ili kupunguza matumizi ya plastiki za matumizi moja.

“Tunahitaji kampuni hizi kukubali mifumo ya matumizi ya mara kadhaa ili kupunguza taka za plastiki. Taka ni jukumu lililohamishiwa kwa miji na kaunti, kama vile Mombasa, ambazo zinahitaji kuboresha mifumo ya ukusanyaji vifaa, na uhamasishaji wa wadau,” alieleza.

Bw Kubasu alibainisha kuwa baadhi ya taka za plastiki zilizopatikana kwenye fuo za Kenya huenda zilitoka katika nchi jirani kama vile Tanzania, Msumbiji, au hata kutoka India, ikiashiria haja ya ushirikiano wa kimataifa katika usimamizi wa taka.

Aidha, alibainisha kuwa hali ya usimamizi wa uchafuzi wa plastiki kwenye fuo za Kenya umeboreshwa kwa kiasi kikubwa kutokana na juhudi za uhamasishaji.

Ripoti ya mwaka 2014 ilionyesha kuwa Ufuo wa ‘Pirates’ huko Mombasa ulikuwa umejaa taka za plastiki, lakini juhudi za usafi zimeboresha hali hiyo kwa kiasi kikubwa.

Mkurugenzi wa Utekelezaji na Kukabiliana na Dharura wa Kenya Coast Guard Service, Bw John Wanyoike, alisisitiza umuhimu wa Siku hiyo.

“Fuo ni sehemu muhimu ya mazingira yetu, zikitoa maeneo ya kuzaliana kwa kasa, makazi ya kaa, na maeneo ya kulisha ndege. Pia, ni muhimu kwa uchumi wetu wa utalii. Hii ni siku muhimu kwani inaashiria juhudi za kimataifa za kusafisha fukwe zetu,” alisema.

Bw Wanyoike alibainisha kuwa iwapo fuo hazitadumishwa, athari hasi za kimazingira na kiuchumi zitakuwa kubwa.

Usafi huo, aliongeza, unashirikisha wanafunzi wa Kaunti ya Mombasa, maafisa wa Huduma ya Walinzi wa Pwani wa Kenya, Huduma ya Wanyamapori ya Kenya, na Jeshi la Wanamaji la Kenya.