IDADI ndogo ya vijana jana walijitokeza kwenye zoezi la kusajili makurutu kote nchini huku wengi wakikosa ari ya kuwa maafisa wa usalama.

Wengine nao walitamauka kutokana na amri kuwa waliopata alama ya D+ pekee ndio walikuwa wakihitajika.

Mjini Narok, vituo vingi vilishuhudia maafisa wakisubiri kwa saa kadhaa kutokana na idadi ndogo ya waliojitokeza kushiriki. Hali kama hiyo ilishuhudiwa pia Bomet.

Mhudumu wa Shirika la Huduma ya Vijana kwa Taifa (NYS) Victor Kipkirui alifungiwa nje ya zoezi hilo kwa kukosa cheti halisi cha kumaliza shule ya upili.

Katika Kaunti ya Nyandarua, wachache waliojitokeza walilalamikia muda mdogo na nafasi chache, ingawa Kamanda wa Polisi wa Kaunti, Stella Cherono, alisema zoezi hilo liliendelea vizuri.

Mjini Nakuru, zaidi ya vijana 200 walifika mapema katika uwanja wa Kapkures kujaribu bahati yao, miongoni mwao alikuwa Evans Sibuko aliyekosa kuendelea na elimu ya chuo kikuu kutokana na ukosefu wa karo baada ya kupoteza baba yake.

Katika Kaunti ya Laikipia, Afisa Mkuu Monica Berege alihusisha idadi ndogo ya waliojitokeza na ukosefu wa habari kuhusu usajili huo. Wengi walikataliwa kwa kushindwa kutimiza viwango vya urefu na uzani.

Mjini Murang’a,  chini ya vijana 200 walijitokeza, na takribani 60 pekee walikidhi mahitaji yaliyowekwa, kwa mujibu wa mwenyekiti wa jopo, Bw. Geofrey Ruheni.

Katika ya Garissa, idadi ndogo ya waliojitokeza ilihusishwa na ukosefu wa mawasiliano, kwani baadhi ya vijana waligundua kuwepo kwa zoezi hilo kwa bahati tu. Bishar Mohamed alijiunga baada ya kuona umati na kukimbia nyumbani kuchukua vyeti vyake.

Hata hivyo, Kamanda wa Kaunti Amos Ambasa alisisitiza kuwa mawasiliano yalifanywa ipasavyo.

Mjini Turkana, Bi. Veronica Ekoi alikataliwa kwa kupata alama D (Plain) katika Kiingereza na Kiswahili badala ya angalau D+ katika moja ya masomo hayo. Mwenyekiti wa uajiri Peter Wahome alisema zoezi hilo lingesalia huru na la haki.

Katika kaunti ya Trans Nzoia, mamia ya vijana walilalamika kuhusu idadi ndogo ya nafasi, hususan wahitimu wa NYS waliodai kupuuzwa.  Solomon Wanyonyi alibainisha kuwa licha ya eneo lake kuwa kaunti ndogo mpya, nafasi tano pekee zilitolewa.

Katika eneobunge la Kwanza, Mwenyekiti Daniel Chumo alisema shughuli iliendelea vizuri, huku Kapenguria vijana wakidai nafasi zaidi.

Katika Kaunti ya Homa Bay, vijana wengi walikosoa kile walichoita “sababu ndogo” za kuwakataa, ikiwemo kushindwa kufumba jicho moja au kukosa cheti cha tabia njema. Baadhi ya wahitimu wa NYS hawakuwa na stakabadhi kuthibitisha wanatoka NYS.

Mkuu wa Polisi, Daniel Ashikobe, alisema zoezi liliendelea bila shida.

Mjini Kisii, idadi ya waliofika uwanjani Gusii ilikuwa ndogo ikilinganishwa na miaka iliyopita. Wale waliofika baada ya saa mbili asubuhi au bila vyeti vya KCSE walifungiwa nje.

Katika kaunti ya Siaya, mamia walipanga foleni kuanzia saa moja asubuhi.

Mjini Kisumu, ni vijana 19 pekee kati ya 105 ndio waliotarajiwa kufuzu wakisubiri vipimo vya kiafya. Mwenyekiti Khamala Maende alisema wahitimu watano kati ya 12 wa NYS walikosa alama ya chini ya D+, huku wawili wakizidi umri wa miaka 28.

Inspekta Jenerali Douglas Kanja, ambaye alisimamia zoezi la Machakos baada ya kuzunguka Narok, alionyesha matumaini kwamba lengo la kitaifa la kuajiri maafisa 10,000 litafikiwa. Alisema zoezi hilo ni muhimu kuelekea Uchaguzi Mkuu wa 2027, kufuatia kusitishwa kwa kipindi cha miaka mitatu katika uajiri wa polisi.