Na THOMAS MATIKO

KWA waigizaji wa kike hatari wenye asili ya mtu mweusi, yupo Angela Bassett.

Haiishii hapo tu kwani pia yupo katika orodha ya waigizaji wa kike weusi wenye utajiri mkubwa; ukwasi alioweza kujilimbikizia kupitia filamu.

Hata hivyo, hadi anafikia upeo huo, imekuwa ni safari ndefu kwa mama huyu mwenye umri mkubwa wa miaka 60 ila mwenye mwonekano wa ‘slay queen’.

UIGIZAJI
Ama kwa hakika kajijengea jina katika ulimwengu wa uigizaji lakini hata zaidi kwa kuwa ni mtu mweusi.
Sanaa yake alianza miaka mingi iliyopita hata kabla wengi wa mashabiki zake kuzaliwa. Mara ya kwanza jina lake kupata umaarufu ilikuwa ni kwenye miaka ya tisini japo alianza kuigiza katika miaka ya 80. Katika miaka hiyo, uigizaji wake ulihusu zaidi uhusika wa mtu mweusi na utamaduni wake.
Unaambiwa toka 1990 mpaka leo, kila mwaka ametokea kwenye filamu angalau moja. Ameigiza sana katika filamu za James Bond na mwaka jana alikuwepo katika filamu ya Black Panther iliyotengeneza historia ya kuwa sinema ya kwanza kuigizwa na zaidi ya asilimia 90 ya watu weusi akiwemo Lupita Nyong’o.
Kwa ufanisi wa filamu hiyo pekee ambapo alikuwa mmoja kati ya wahusika wakuu, alipiga posho ndefu si mchezo.
Vile vile alihusika kwenye Olympus has Fallen na London has Fallen.
Lakini pia ni produsa mkali na amefanikisha kazi kadhaa kama vile The Rosa Parks Story na pia 9-1-1 kati ya nyinginezo.

MKWANJA

Utajiri wake unakadiriwa kuwa kiasi kisichopungua dola 28 milioni za Kimarekani.

Lakini hizi ni takwimu za miaka sita iliyopita kwa mujibu wa majarida mengi. Hii ina maana kuwa hesabu zake za miaka ya hivi karibuni bado hazijabainika.

Lakini pamoja na hayo, unaweza kuwa na uhakika wa kuwa utajiri huo lazima utakuwa umeongezeka kwa kiwango kikubwa kwani toka kipindi hicho, ameendelea kuigiza kwenye filamu nyingi tu na kadha zimeishia kufanya vizuri.

Kwa mfano, kwenye Black Panther, alilipwa dola 400,000 (Sh40 milioni).

FAMILIA

Angela amekuwa kwenye ndoa na mumewe Courtney Bernard Vance ambaye pia ni mwigizaji kwa miaka 22.

Wawili hao walioana mwaka 1997 na wamejaliwa watoto wawili tu, wa kike na kiume ambao ni pacha waliozaliwa mwaka 2006. Wanandoa hao walikutana kwa mara ya kwanza mwaka 1980 kwenye shughuli zao za uigizaji.

MJENGO

Pamoja na mumewe wanamiliki mjengo wa nguvu maeneo ya Fermont Palace, Los Angeles wenye thamani ya dola 6 milioni.

Jumba hilo lina vyumba sita vikuu vya kulala na bafuu kadhaa. Pia ‘gym’ ya kisasa, ikiwa ni sababu tosha ya mwonekano mchanga licha ya umri wake.

USAFIRI

Anamiliki magari kadhaa ya maana. Ni staa mkubwa mwenye hadhi na heshima zake hivyo hata kwenye usafiri wake lazima hilo lijidhihirishe.

Miongoni mwa mikebe yake ya maana ni pamoja na Range Rover, Bentley Continental, BMW Z4, na Mercedes Benz E-Class.