KWA miezi 10 iliyopita, Naibu Rais Kithure Kindiki amefanya zaidi ya ziara 30 katika eneo lake la nyumbani Mlima Kenya, kukagua miradi ya maendeleo au kufuta ushawishi wa wapinzani katika eneo hilo.

Akiandamwa na mashambulizi kutoka kwa viongozi kadhaa wa upinzani katika eneo la Mlima Kenya, Prof Kindiki, ambaye kwa kiasi kikubwa anapambana peke yake, amejikita katika kuonyesha na kuharakisha miradi ya serikali.

Miongoni mwa vigogo wa kisiasa wa Mlima Kenya wanaompigana vita kisiasa ni Rigathi Gachagua, John Methu, Ndindi Nyoro, Martha Karua, Justin Muturi, Gitonga Mukunji, Peter Munya, Mithika Linturi na Kawira Mwangaza.

Hata hivyo, kwa mujibu wa Prof Kindiki, nguvu yake kuu ni kwamba “ana kazi nyingi za kuonyesha katika Mlima Kenya akiwa naibu rais, ilhali Bw Gachagua hana rekodi ya maendeleo wakati alikuwa ofisini.”

Katika hafla mbalimbali, Prof Kindiki amekuwa akisisitiza kuwa wapigakura wanapaswa kuwahukumu viongozi kwa kuzingatia rekodi yao ya maendeleo.

“Imesemwa kuwa taji huwa na thamani mradi tu linavaliwa. Likiondolewa, linakuwa kipande cha chuma kisicho na thamani. Msidanganywe na watu ambao hawakuwahi kuja kwenu wala kuwafanyia lolote walipokuwa mamlakani,” Prof Kindiki amekuwa akisema.

Kati ya ziara nyingi alizofanya katika eneo la Mlima Kenya, amezuru Meru zaidi ya mara 15, Tharaka Nithi takriban mara saba na Embu karibu mara saba, huku akizuru Kirinyaga mara nne.

Katika upande wa magharibi wa Mlima Kenya, Prof Kindiki amefanya ziara mara tisa, sita kati ya hizo akiwa ameandamana na Rais William Ruto.

Katika eneo la Mashariki mwa Mlima Kenya, Naibu Rais amekuwa akikagua miradi, kukutana na viongozi wa mashinani, kufanya mikutano na maafisa wa United Democratic Alliance (UDA) au kupokea uungwaji mkono kutoka kwa wazee.

Pia amekuwa akihudhuria ibada za kanisa na kuandaa mikutano ya kuwawezesha wananchi, ambapo amekuwa akieleza rekodi ya maendeleo ya utawala wa sasa.

Prof Kindiki amekuwa akiorodhesha miradi ya mabilioni ya fedha, ikiwemo masoko, barabara, usambazaji wa umeme mashambani na nyumba za gharama nafuu, kama ushahidi wa kazi anazofanya Rais.

Katika Kaunti ya Meru, Prof Kindiki anasema serikali inajenga zaidi ya kilomita 500 za barabara kwa gharama ya zaidi ya Sh42 bilioni, inaboresha hospitali mbili kwa zaidi ya Sh1.1 bilioni na kujenga masoko 21 ya kisasa.

Alisema Kituo cha Kukusanya na Kuchakata Mazao ya Kilimo cha Kaunti ya Meru kimekaribia kukamilika, huku viwanja viwili vya michezo vya Maua na Urru vikiboreshwa kwa zaidi ya Sh350 milioni.

“Washindani wetu wanajua tu kutukana na kubuni kauli mbiu. Lakini Wakenya wanataka barabara, masoko ya kisasa, maji na hospitali bora na hili ndilo tunalolenga,” Naibu Rais alisema Meru wiki iliyopita.

Katika Kaunti ya Embu, Naibu Rais Kindiki alisema serikali inajenga masoko 12, inatekeleza miradi 10 ya barabara na kuboresha uwanja wa Embu.

Alisema serikali pia inaendelea na mradi wa maji wa Kiambere pamoja na kuboresha Hospitali ya Embu Level Five.

“Wanaotuambia tuondoke serikalini wanapaswa kuelewa kwamba miradi hii yote ya maendeleo, hasa barabara, isingeweza kutekelezwa bila nguvu tuliyo nayo tukiwa ndani ya serikali,” Prof Kindiki aliwaambia maafisa wa UDA.

Katika Kaunti ya Tharaka Nithi, Naibu Rais anasema takriban miradi 13 ya barabara inaendelea, huku serikali ikiwa imejitolea kuunda upya daraja la Nithi kwa gharama ya Sh7 bilioni.

“Kwa karibu miaka 40, daraja la Nithi limekuwa likigharimu maisha ya watu. Ni Rais Ruto aliyejitolea kukomesha vifo hivyo. Mkandarasi wa daraja la Nithi tayari yuko katika eneo la ujenzi akisubiri fidia ya ardhi,” Naibu Rais alisema.

Prof Kindiki sasa anategemea miradi hiyo kuhamasisha watu wa eneo lake kumuunga mkono huku akikabiliana na ushindani wa ndani kuhusu nani atakuwa mgombea mwenza wa Rais Ruto.