BARUA mbili zinazokinzana zinazodaiwa kuhifadhi jina la ‘Ukombozi’ kwa makundi mawili tofauti zimeweka Ofisi ya Msajili wa Vyama vya Kisiasa (ORPP) katikati ya mzozo mpya unaowahusu kiongozi wa Wiper Patriotic Movement Kalonzo Musyoka na Seneta wa Nairobi Edwin Sifuna.

Washirika wa Bw Sifuna jana walidai kulikuwa na njama baada ya Bw Musyoka kuzindua The Ukombozi Alliance (TUA), baada ya kufanikiwa kuhifadhi jina hilo katika ORPP.

Bw Musyoka na viongozi wenzake wa upinzani wamebadilisha jina la Azimio La Umoja One Coalition kuwa TUA wanapojiandaa kwa uchaguzi wa urais wa 2027.

Barua ya Msajili wa Vyama vya Kisiasa John Cox Lorionokou ya Septemba 8, 2026 ilikataa ombi la kundi la Bw Sifuna la kubadilisha jina la United Democratic Party (UDP) kuwa ‘Ukombozi People’s Party (UPP),’ ikisema linafanana na ‘The Ukombozi Alliance (TUA).

Bw Lorionokou alisema TUA lilihifadhiwa Julai 20, 2026.

Hata hivyo, vuguvugu la Linda Mwananchi baadaye liliweka wazi barua nyingine ya ORPP ambayo inadaiwa kuidhinisha kuhifadhiwa kwa jina hilo na Bw Allan Akivaga.

“Maombi yenu yamezingatiwa kwa mujibu wa sheria na jina Ukombozi People’s Party (UPP) limeidhinishwa. Uhifadhi wa jina hilo utakuwa kwa kipindi kisichozidi siku 90 kuanzia tarehe ya barua hii,” ORPP ilisema katika barua ya Machi 13, 2025.

Katika mahojiano ya hivi majuzi na Taifa Leo, Bw Lorionokou alithibitisha kuwa UPP lilikuwa limehifadhiwa na Bw Akivaga.

“UPP ni chama ambacho nadhani kiliomba mwezi Machi 2025 kuwa chama cha kisiasa na kimekuwa katika mchakato. Katika rekodi zangu, UPP ni jina lililohifadhiwa kwa chama cha kisiasa ambacho kiko katika mchakato wa kusajiliwa,” Bw Lorionokou alisema.

Mbunge wa Funyula Oundo Midenyo alisema “mbinu za kuwapotosha watu zinazotumiwa na serikali” hazitazuia azma ya Bw Sifuna na akasema kundi hilo litakuwa na chama ifikapo Jumatatu ijayo.

“Tumepoteza Ukombozi Party lakini hata mtoto wako akifa unaendelea kuishi na hilo ndilo tutakalofanya. Kuna vyama vingi sana kwa hivyo hatuna wasiwasi. Nataka kuwahakikishia wafuasi wetu kwamba chama kipya bado kitakuwa na nembo ya Linda Mwananchi na pia rangi zake. Hatujakata tamaa hata kidogo,” Bw Oundo alisema.

Hata hivyo, msemaji wa Wiper Ndegwa Njiru alimtetea Bw Musyoka dhidi ya madai kwamba anapanga njama dhidi ya Bw Sifuna.

Alisema Bw Musyoka amekuwa akitumia kauli ‘Komboa Kenya’ tangu 2025.

“Rekodi zinaonyesha kwamba mapema Aprili 2025, wakati Sifuna bado alikuwa Katibu Mkuu wa ODM, Musyoka alikuwa tayari ametumia na kutangaza kauli hiyo. Neno Ukomboa ndilo limezaa Ukombozi,” Bw Njiru alisema.

Kiongozi wa Democratic Action Party-Kenya (DAP-K) Eugene Wamalwa pia aliambia Nation kwamba Azimio lilihifadhi jina hilo kabla ya Bw Natembeya kuanza mchakato wa kubadilisha jina la UDP.

“Jina hilo tayari limeidhinishwa na Msajili wa Vyama vya Kisiasa. Tuliomba kuhifadhi The Ukombozi Alliance zamani kabla ya mpango wa kubadilisha jina la chama cha Jirongo kuwa Ukombozi People’s Party,” Bw Wamalwa alisema.

Kuwepo kwa Gavana wa Siaya James Orengo na Mbunge wa Suba South Caroli Omondi wakati wa uzinduzi wa muungano huo mpya pia kumekuwa kukichunguzwa kwa karibu na baadhi ya washirika wa Bw Sifuna.

Gavana Orengo na Bw Omondi ni wanachama wa Linda Mwananchi. Hata hivyo, Bw Caroli pia ni Katibu Mkuu wa muungano wa Azimio, ambao sasa umepewa jina TUA.

Taifa Leo imefahamu kuhusu mipango ya kumteua Bw Orengo kuchukua nafasi ya Rais mstaafu Uhuru Kenyatta kama mwenyekiti wa muungano huo.

Bw Kenyatta Jumanne alijiuzulu rasmi kama kiongozi wa Jubilee Party. Pia anatarajiwa kujiuzulu kama mwenyekiti wa muungano huo ili kutoa nafasi kwa mabadiliko zaidi.

“Linda Mwananchi haitawahi kuwa sehemu ya Azimio na Edwin Sifuna bado ndiye mgombea wetu wa urais. Hakutakuwa na mchujo wa Orengo kwa sababu tumeamua mgombea wetu ni Sifuna,” Bw Oundo alisema.

“Orengo anaweza kuchukua nafasi yoyote katika Azimio lakini katika Linda Mwananchi tunajadili mambo kwanza kabla ya kuyaweka hadharani. Kwa hivyo Caroli na Orengo walipohudhuria mkutano wa Azimio, yaliyotokea huko si sehemu ya Linda Mwananchi na sisi si sehemu ya Azimio,” mbunge huyo alisema.