WABUNGE wametishia kufanya mabadiliko yatakayoweka vizuizi kwa uhuru wa vyombo vya habari kutokana na uchapishaji wa madai ambayo hayajathibitishwa kuhusu ukiukaji wa taratibu za uchaguzi kuelekea Uchaguzi Mkuu wa mwaka 2027.

Wabunge hao walitaka Baraza la Habari Kenya (MCK) kuchukua hatua dhidi ya vyombo vya habari wanavyolaumu kwa kuwapotosha wananchi kupitia taarifa kuhusu maandalizi ya uchaguzi ujao.

Kwa mujibu wa wabunge hao, baadhi ya vyombo vya habari vimekuwa vikichapisha madai yasiyo na ushahidi kuhusu mfumo wa uchaguzi, jambo ambalo linaweza kudhoofisha imani ya wananchi katika matokeo ya uchaguzi na hata kuchochea vurugu.

Wakilenga hasa shirika la habari la Standard Group, walidai kuwa limekuwa likitumia majukwaa yake kuendeleza ajenda za kisiasa kupitia taarifa zake za uchaguzi.

Hata hivyo, katika toleo lake la Septemba 30, Standard Group ilisema haitatishwa wala kulegeza msimamo wake katika kutekeleza majukumu ya uandishi wa habari.

“Kiwango chochote cha vitisho hakitatuzuia kuendelea kutekeleza uandishi wa habari wa hali ya juu. Hatutatishwa wala kulazimishwa kunyamaza,” ilisema kampuni hiyo katika taarifa.

Kiongozi wa Wachache katika Bunge la Kitaifa, Junet Mohamed, alisema ingawa uhuru wa vyombo vya habari unalindwa na Katiba, kuna wajibu wa kuhakikisha wananchi wanapata taarifa za kweli.

“Sote tunatambua uhuru wa vyombo vya habari, lakini hakuna uhuru wa kueneza propaganda zinazowapotosha Wakenya. Kila mwaka tunapitisha bajeti ya MCK lakini taasisi hiyo inaendelea kutazama bila kuchukua hatua,” alisema mbunge huyo wa Suna Mashariki.

Alisema madai yasiyothibitishwa kuhusu uchaguzi wa 2027 yanaweza kuwafanya wananchi kukosa imani na matokeo ya uchaguzi.

Kwa upande wake, Mbunge wa Homa Bay Town, Peter Kaluma, alitaka hatua kali zichukuliwe dhidi ya vyombo vya habari vinavyosambaza taarifa za kupotosha.

“Tukiacha hali hii iendelee, tunaweza kujikuta tukifuata mkondo uliosababisha mauaji ya kikabila nchini Rwanda mwaka 1994. Tunahitaji hatua kali na hata uhuru wa vyombo vya habari unaweza kuwekewa mipaka,” alisema.

Naibu Spika wa Bunge la Kitaifa, Gladys Boss, alisema madai ya mara kwa mara kuhusu wizi wa kura yanaweza kusababisha taharuki na vurugu baada ya uchaguzi.

“Tunapoanza kueneza madai kwamba mfumo wa uchaguzi una mianya, wananchi wataacha kuamini matokeo ya mwisho na hali hiyo inaweza kusababisha machafuko,” alisema.

Bi Boss pia alipinga madai kuwa uchaguzi uliopita uliibwa, akisema aliwahi kushiriki katika uhakiki wa matokeo kwa niaba ya Mahakama ya Juu alipokuwa Msajili Mkuu wa Idara ya Mahakama.

Wakati huo huo, mwenyekiti wa Tume Huru ya Uchaguzi na Mipaka (IEBC), Erastus Ethekon, alikanusha madai yaliyosambazwa na baadhi ya vyombo vya habari kwamba tume hiyo imekuwa ikisajili raia wa Uganda kuwa wapigakura nchini Kenya.

Bw Ethekon alisema tume imepokea kwa masikitiko taarifa hizo ambazo hazina ushahidi na ambazo zinaweza kudhoofisha imani ya umma katika uadilifu wa uchaguzi.

“Hakuna mtu, kundi au taasisi ambayo imewasilisha ushahidi wa kuaminika unaothibitisha madai hayo ya ukiukaji wa sheria,” alisema.

Aliongeza kuwa ikiwa ushahidi wa kweli utawasilishwa, IEBC itachukua hatua za kinidhamu na za kisheria dhidi ya yeyote atakayebainika kuhusika.