Kutana na waziri aliyehudumu miezi 9 pekee na kubanduliwa
Kimaiyo arap Sego aliingia katika siasa za kitaifa akiwa mwanasheria kijana mwenye matumaini makubwa, akampiku waziri Henry Kosgey katika kura za Kanu na kutwaa wadhifa wa Waziri wa Biashara. Lakini safari yake ya kisiasa ilikatizwa ghafla baada ya miezi tisa.
Mnamo Januari 1988, jina la Kimaiyo arap Sego halikuwa maarufu sana nje ya Nandi. Lakini ndani ya muda mfupi, mwanasheria huyo kutoka Kapsabet alikuwa ameingia katika siasa za kitaifa kwa njia ambayo wachache walitarajia.
Sego alizaliwa Septemba 1952 eneo la Kaptendon, Lessos, Nandi, katika familia ya Sylvester na Felister Sego. Baba yake alikuwa mwanajeshi wa Kings African Rifles (KAR) wakati wa Vita vya Pili vya Dunia kabla ya kustaafu na kuanza ukulima.
Baada ya masomo ya msingi Kalibwani, Sego alijiunga na Kapsabet High School kwa masomo ya Ordinary Level, kisha St Mary’s Yala kwa Advanced Level. Baadaye alisomea sheria katika Chuo Kikuu cha Nairobi.Alifanya mafunzo ya uwakili katika kampuni ya Amata & Company Advocates mjini Eldoret na kufanya kazi hapo kwa takriban miaka miwili kabla ya kuanzisha kampuni yake ya uwakili mjini Kapsabet.
Lakini mwaka 1983, mwanasheria huyo aliamua kuingia kwenye siasa kwa kumenyana na mwanasiasa aliyekuwa na nguvu, Henry Kosgey, katika uchaguzi wa ubunge wa Tinderet.Ilikuwa changamoto ngumu. Kosgey alipata kura 17,797 dhidi ya 1,045 za Sego.Hata hivyo, miaka mitano baadaye, mambo yalibadilika kabisa.Katika kura za mchujo za Kanu mwaka wa 1988, Sego alipata kura 14,499 huku Kosgey akipata 6,151.
Kwa mujibu wa kanuni za chama wakati huo, mgombea aliyepata zaidi ya asilimia 70 ya kura za mchujo aliweza kuingia Bunge moja kwa moja.Sego akawa mbunge mpya wa Tinderet.Ushindi huo ulimfungulia mlango wa Baraza la Mawaziri.
Aliteuliwa kuwa Waziri wa Biashara akiwa na umri wa miaka 32, umri ambao Kosgey alikuwa nao alipoingia serikalini.Lakini hadithi yake nzuri haikudumu.Jarida la The Weekly Review la Aprili 1989 lilieleza kuanguka kwake kisiasa kama “kupanda kwa kasi na kuanguka ghafla”, likisema matatizo yake yalianza baada ya kutofautiana na watu waliomsaidia kupata nafasi hiyo.
Sego alikuwa mwanasiasa mkuu zaidi kutoka Nandi baada ya kuingia Bunge, lakini jarida hilo lilisema huenda alikadiria kupita kiasi nguvu zake za kisiasa na kupuuza ushawishi wa Mark arap Too, ambaye alikuwa akionekana kuwa mlinzi mkuu wa kisiasa Nandi.
Ndani ya miezi tisa, Sego aliondolewa katika Baraza la Mawaziri na nafasi yake kuchukuliwa na mbunge mwingine wa Nandi, John Cheruiyot.Baadaye tawi la Kanu Nandi lilimlaumu kwa kutoshiriki harambee, kupuuza mikutano ya viongozi wa chama, kutoshiriki uchaguzi wa chama na kutofuatana na Rais Daniel arap Moi katika ziara zake Nandi.
Sego hakujibu madai hayo kwa kuomba msamaha, jambo lililozidisha mvutano kati yake na viongozi wa chama.Wakati mmoja alikosana hadharani na Too, akimlaumu kwa kuwasaidia wapinzani wake katika juhudi za kumvua ubunge. Too naye alijibu kwa kusema malalamiko ya Sego yalikuwa “mateke ya mwisho ya farasi anayekufa”.
Licha ya misukosuko hiyo, Sego aliacha alama katika Wizara ya Biashara. Alisimamia marekebisho ya Trade Licensing Act yaliyolenga kukuza viwanda vya humu nchini.Pia aliwakilisha Kenya katika mazungumzo ya biashara ya Uruguay Round chini ya GATT.
Siasa za vyama vingi vilipoanza miaka ya 1990, Sego aliondoka Kanu na kujiunga na Democratic Party ya Mwai Kibaki. Uamuzi huo haukupokelewa vyema Nandi, ngome ya Kanu wakati huo.Alipokuwa akipeleka karatasi zake za uteuzi kwa uchaguzi wa 1992, alishambuliwa na umati.
Alishindwa uchaguzini na baadaye akapinga ushindi wa Kosgey kama mbunge waTinderet, lakini akapoteza kesi hiyo pia.Sego alitoweka kwa muda kutoka siasa za mstari wa mbele hadi mwaka 2003 alipoingia katika mchakato wa mageuzi ya katiba kama mjumbe wa Kongamano la Kitaifa.
Mwaka 2005, aliteuliwa kuwa mwenyekiti wa National Anti-Corruption Campaign Steering Committee, taasisi iliyoundwa kuhamasisha umma kuhusu vita dhidi ya ufisadi.Alijiuzulu mwaka 2014 na kurejea katika taaluma yake ya uwakili.Safari ya Sego inabaki kuwa simulizi ya mwanasiasa aliyeingia Bunge kwa ushindi mkubwa, akapanda haraka hadi Baraza la Mawaziri, lakini akakutana mapema na upande mgumu wa siasa za wakati huo.