UBABE wa kudhibiti ODM umeanza kuchipuka huku viongozi wakitumia kutoonekana kwa kinara wa chama hicho Seneta Oburu Oginga katika shughuli za umma, kujijengea ushawishi ndani ya chama.

Waziri wa Vyama vya Ushirika Wycliffe Oparanya, Gavana wa Kisii Simba Arati na Mwenyekiti wa ODM Gladys Wanga ni miongoni mwa viongozi ambao wamekuwa mstari wa mbele kuendesha shughuli za chama wakati Dkt Oginga bado anaugua.

Mwishoni mwa wiki, wabunge Raphael Wanjala (Budalang’i), Christopher Aseka (Khwisero) na Bernard Shinali (Ikolomani), pamoja na Msemaji wa Serikali Charles Owino, walimtaka Bw Oparanya kusawazisha majukumu yake ya uwaziri na yale ya chama ili kumsaidia Dkt Oginga kuendesha ODM.

“Tunataka uwe na afisi mbili, moja ya ODM ambako Dkt Oburu anafanya kazi na nyingine katika wizara yako. Tunataka utenge muda na umsaidie Dkt Oginga kufanya kazi. Tunataka utenge muda ili asilemewe na kazi. Akilemewa, tunaweza kumpoteza kwa urahisi,” akasema Bw Wanjala.

Alikuwa akizungumza nyumbani kwa Bw Oparanya wakati wa ziara ya ukoo wa Kawuor, ambao ulikuwa ukoo wa marehemu Raila Odinga.

Mwanawe Raila na mgombea ubunge wa Kibra, Raila Junior pamoja na mgombea ubunge wa Bondo Jaoko Oburu, mwanawe Dkt Oginga, walihudhuria hafla hiyo.

Bw Wanjala pia alimtaka Bw Oparanya kuunganisha jamii za Waluo na Waluhya baada ya kifo cha Bw Raila, wakati jamii hizo zikijiweka tayari kisiasa kuelekea kwa uchaguzi mkuu wa 2027 ambapo Rais William Ruto anawania muhula wa pili, na uchaguzi wa 2032.

“Tafadhali kuwa karibu sana na Oburu ili kumsaidia kiongozi wetu ambaye bado tunamhitaji licha ya umri wake mkubwa. Una uzoefu, umekuwa naibu kiongozi wa chama kwa muda mrefu na watu wako salama ukiwa karibu na Oburu,” akaongeza Bw Wanjala.

Bw Owino pia aliunga pendekezo hilo, akimtaja Oparanya kuwa mwanasiasa mwenye uzoefu mkubwa zaidi katika eneo hilo na kusema uhusiano wake wa karibu na Bw Odinga kwa zaidi ya miaka 25 unamweka katika nafasi nzuri ya kumsaidia Dkt Oginga.

“Umekuwa naibu kiongozi wetu wa chama kwa muda mrefu na umeachia nafasi hiyo kwa sababu wewe ni waziri, kwa hivyo usisahau kwamba bado una nafasi huko. Muunge mkono mlezi wa chama chetu. Msaidie kwa sababu hujui kitakachotokea kesho,” akasema Bw Owino.

“Lazima uwe karibu sana na Dkt Oginga ili ufanye sehemu kubwa ya kazi yake. Anaendelea kuzeeka, kwa hivyo mfanyie kazi zaidi. Umetushika na sisi tutakushika mkono kwa sababu hakuna mtu mwenye cheo cha juu kukuliko katika eneo hili.”

“Najua sisi watu wa Nyanza tuko tayari kuachilia nafasi yoyote katika chama na hakuna kinachotuzuia kumuunga mtu yeyote kutoka Magharibi kwa sababu mlimuunga Raila kwa miaka mingi,” akaongeza .

Bw Shinali naye alisema Oparanya yuko katika nafasi nzuri zaidi ya kuwaunganisha viongozi kutoka Magharibi na Nyanza na anafaa kushirikishwa katika kuendesha shughuli za ODM.

“Oparanya ndiye kiongozi mwenye uzoefu mkubwa zaidi kutoka eneo hili na ndiye atakayetuweka pamoja sisi sote kutoka Magharibi na Nyanza. Oparanya ndiye anayetuunganisha na kushikilia ODM Magharibi. Tumeona watu wa Nyanza wako pamoja nasi na wako tayari kumuunga mkono Oparanya kama mmoja wetu,” akasema Bw Shinali.

Wakati Bw Oparanya akiendelea kuimarisha ngome yake, huku akitajwa kuwa miongoni mwa wanaoweza kuwa mgombea mwenza wa Rais Ruto, Bw Arati na Bi Wanga pia wamekuwa mstari wa mbele katika shughuli za ODM.

Ijumaa iliyopita, Bi Wanga ambaye pia ni Gavana wa Homa Bay, aliongoza maelfu ya wafuasi wa ODM katika bustani ya Uhuru, Nairobi, katika hafla ya kuwasha mishumaa ya kumkumbuka Bw Odinga.

Umati huo uliwakumbusha wengi nyakati na idadi kubwa ya watu waliohudhuria mikutano ya kisiasa ambayo Raila aliandaa katika safari yake ya kisiasa.

Wiki mbili zilizopita, Bi Wanga alifanya ziara ya siku tatu katika Kajiado, Narok Kusini na Narok Kaskazini, ambako alihimiza ODM kuimarisha uungwaji mkono wake miongoni mwa jamii ya Maa.

Bi Wanga anazidi kuonekana kama sura ya ODM Nyanza, huku Gavana wa Siaya James Orengo akiegemea mrengo wa Linda Mwananchi na akiwa katika harakati za kuunda chama chake.

Gavana wa Kisumu Anyang’ Nyong’o, mwanasiasa mwengine mkongwe wa Nyanza, pia hashiriki sana katika shughuli za ODM, Bi Wanga akisalia sura ya chama Luo Nyanza.

Prof Nyong’o aliwahi kuwa kiongozi wa ODM wakati Raila alikuwa akiwania uenyekiti wa Tume ya Umoja wa Afrika mapema mwaka jana.

Bw Arati, kwa upande wake, amekuwa akiongoza shughuli za ODM wakati Dkt Oginga hayupo, hali ambayo imezua hisia kwamba sasa ni wakati wa Luo Nyanza kulipa fadhila kwa jamii ya Gusii kwa uungwaji mkono iliompa Bw Odinga kwa miaka mingi.

Mji wa Kisii ulikuwa miongoni mwa maeneo yaliyoshuhudia umati mkubwa wa wafuasi wa ODM wakati wa hafla ya kuwasha mishumaa, iliyoandaliwa kwa usaidizi wa gavana huyo anayehudumu muhula wa kwanza.

Bw Arati pia amekuwa akishinikiza ODM kuingia katika muungano wa kisiasa utakaohakikisha chama hicho kinapata nafasi sawa na UDA.