MWALIMU mmoja amepoteza gari lake la thamani ya Sh1.7 milioni baada ya Mahakama Kuu kuamua kuwa lilinunuliwa kwa pesa zinazohusishwa na biashara ya ulanguzi wa watu kinyume cha sheria.

Jaji B.M. Musyoki aliamuru gari hilo, Toyota Axio KDN 780J, litwaliwe na serikali baada ya kupata kwamba Evans Kimtai Sichei hakueleza vizuri alikopata fedha za kulinunua.

Mahakama ilisema Mamlaka ya Kurejesha Mali (ARA) ilionyesha kuwa kuna uwezekano mkubwa gari hilo lilinunuliwa kwa mapato ya uhalifu.

Kesi hiyo ilitokana na uchunguzi kuhusu madai ya Wakenya kusafirishwa hadi Thailand kwa ahadi za ajira zenye mishahara mizuri, lakini baadaye kupelekwa Myanmar ambako walilazimishwa kufanya uhalifu wa kimtandao katika mazingira magumu.

Kulingana na mpelelezi, baadhi ya waathiriwa walilipa kati ya Sh50,000 na Sh150,000 kama “gharama za kuwezesha safari” kupitia nambari ya M-Pesa iliyokuwa ya Sichei na nyingine iliyohusishwa na mshukiwa mwenzake, Emmah Bonareri Rosana.

Familia za baadhi ya waathiriwa pia zilidaiwa kulipa kati ya Sh70,000 na Sh100,000 kama fidia ya kuwaokoa wapendwa wao.

Mahakama iliambiwa waathiriwa Evans Kipyegon Kironget, Isaac Kipruto Mering, Phillip Ruto Cheptot, Jonathan Kusimba, Felix Kwemoi Cheptinde na Daniel Simotwa walipoteza jumla ya Sh616,700.

Sichei na Rosana walikamatwa Machi 11, 2025 na kufikishwa katika Mahakama ya Kahawa ambako walishtakiwa kwa makosa ya usafirishaji haramu wa watu miongoni mwa mashtaka mengine.

Baadaye ARA ilichunguza miamala ya Sichei, ikilenga akaunti yake ya M-Pesa na uhusiano wake na waathiriwa.

Mamlaka hiyo ilisema iligundua miamala ya kutia shaka, ikiwemo pesa nyingi kuingia kwenye akaunti na kutolewa karibu mara moja.

Kwa mujibu wa wachunguzi, hali hiyo ilizua shaka kuwa kulikuwa na juhudi za kuficha chanzo cha fedha hizo.

Gari hilo lilikuwa sehemu muhimu ya uchunguzi baada ya mahakama kuambiwa lilinunuliwa katika kampuni ya Ramna International Motors, Mombasa, kwa Sh1.7 milioni.

Mwakilishi wa kampuni hiyo, Arif Saleh Subeya, aliwaambia wachunguzi kuwa malipo yalifanywa kwa awamu kupitia miamala ya M-Pesa kutoka kwa nambari iliyosajiliwa kwa jina la Sichei.

Nambari hiyo pia ilidaiwa kupokea pesa kutoka kwa baadhi ya watu waliosafirishwa katika mpango huo.

Sichei alipinga kutwaliwa kwa gari hilo, akisema kesi ya jinai dhidi yake ilikuwa na nia mbaya na ililenga kuchafua jina lake.

Alisema alikuwa mwalimu, mkulima na mfanyabiashara na kwamba shughuli hizo zilimwezesha kupata pesa za kununua gari hilo.

Pia alisema gari hilo lilikuwa likitumiwa kama teksi na kutwaliwa kungemnyima yeye na familia yake chanzo cha mapato.

Hata hivyo, Jaji Musyoki alikataa hoja kwamba tarehe ya gari kununuliwa ilitosha kumwondolea mashaka.

Jaji alisema kesi ya jinai na ile ya kutwaliwa kwa mali ni mambo mawili tofauti, kwani kesi ya mali inalenga zaidi chanzo cha mali hiyo.

“Mshtakiwa ameonyeshwa kuwa alipokea pesa kutoka kwa baadhi ya waathiriwa waliotambuliwa. Ukweli huu unaonyesha zaidi ya tuhuma,” jaji alisema katika uamuzi wake uliotolewa Nairobi Oktoba 2, 2026.

Jaji pia alikataa madai ya Sichei kwamba ushahidi dhidi yake ulikuwa wa tuhuma pekee.

Alisema waathiriwa walitambuliwa na walitoa taarifa zilizomhusisha mwalimu huyo.

“Siwezi kuamini kwamba watu watajitokeza tu na kutoa taarifa za kumhusisha mtu wasiyemjua na kosa zito kama ulanguzi wa watu,” jaji alisema.

Mahakama ilisema baada ya ARA kuwasilisha ushahidi ulioibua sababu za msingi za kuamini gari hilo lilinunuliwa kwa pesa za uhalifu, Sichei alipaswa kueleza chanzo halali cha fedha hizo.

Lakini hakufanya hivyo.

Ingawa alisema alikuwa mwalimu, mkulima na mfanyabiashara, hakueleza kiasi alichokuwa akipata kutokana na shughuli hizo wala kuwasilisha ushahidi wa mshahara wake.

Jaji pia alishangaa kwa nini hakueleza ikiwa Sh1.7 milioni za kununua gari zilitokana na mshahara, faida za biashara au kilimo.

“Bado hajafichua aina ya biashara anayofanya wala anacholima,” jaji alisema.

Mahakama pia ilikosoa kushindwa kwake kueleza mapato aliyokuwa akipata kutokana na kulifanya gari hilo teksi.

Jaji alisema gari lililonunuliwa kwa pesa za uhalifu haliwezi kuwa halali kwa sababu tu baadaye limetumiwa katika biashara halali.

“Mali iliyonunuliwa kwa mapato ya uhalifu haiachi kuwa na doa kwa sababu baadaye imeingizwa katika biashara halali,” alisema.

Alisema alitembea takriban mita 500 akiwa anachechemea kutokana na majeraha ya miguu kabla ya kumkuta mkewe akiwa amelala kwenye damu.

“Yote ninayotaka ni haki, sasa kwa kuwa kuna ushahidi kwamba mke wangu aliuawa kwa njia ya kikatili,” alisema.

Muturi alisema alipata majeraha mikononi na miguuni baada ya kutupwa kutoka kwenye gari. Alitibiwa katika Zahanati ya Murinduko na kuruhusiwa.

Baadaye aliripoti tukio hilo katika Kituo cha Polisi cha Piai na kurekodi taarifa katika Idara ya Upelelezi wa Jinai (DCI), Wang’uru.

Baada ya tukio hilo, wakazi walifanya maandamano wakitaka haki, wakifunga Barabara ya Piai-Murinduko.

Hata hivyo, utulivu ulirejea baada ya Kamanda wa Polisi wa Mwea, Henry Gitonga, kuwahakikishia wakazi kuwa suala hilo linachunguzwa na hakutakuwa na kufichwa kwa ukweli.