RAIS William Ruto amewataka vijana kumuunga mkono akidai viongozi wa upinzani wamekuwa mamlakani kwa miaka mingi bila kuleta mabadiliko.

Akiendeleza ziara yake katika eneo la Gusii kwa siku ya tatu, Dkt Ruto aliwashambulia viongozi hao akiwalaumu kwa kuwazuia wanasiasa vijana wanaochipuka wakihofia kupoteza ushawishi wao.

Rais aliahidi kuwa ifikapo 2032, ataachia kizazi kipya cha viongozi nafasi ya kuongoza nchi.

“Nyinyi vijana na mimi, hawa wote ni watu wa rika langu. Ninawahakikishia vijana kwamba nitawaweka pamoja viongozi hawa na kuhakikisha tunaondoka mamlakani 2032 ili kukabidhi nchi kwa vijana,” alisema.

Hakuwataja viongozi aliowalenga kwa majina, badala yake akatumia majina ya utani kuwakosoa.

Alitaja wabunge vijana kama Osoro wa South Mugirango na Zaheer Jhanda wa Nyaribari Chache, akisema wanapaswa kuachwa wakue kisiasa bila kuandamwa na wapinzani wao.

Alidai baadhi ya viongozi wamekuwa wakiwapiga vita wanasiasa chipukizi wakiwemo John Methu, Ndindi Nyoro, Kimani Ichung’wah na Aaron Cheruiyot.

Rais pia aliwahimiza vijana wa Gusii kujisajili katika mpango wa NYOTA ili kunufaika na nafasi za kujiajiri na kukuza biashara zao.

Alisema serikali yake imezalisha nafasi za ajira kupitia miradi mbalimbali, ikiwemo nyumba za gharama nafuu, ajira nje ya nje na kazi za kidijitali.

Kwa mujibu wake, mradi wa nyumba za gharama nafuu umezalisha ajira milioni 1.1, huku Wakenya 680,000 wakipata kazi nje ya nchi na wengine 350,000 wakijipatia riziki kupitia kazi za kidijitali.

Alisema vijana 130,000 wamepokea Sh50,000 kila mmoja chini ya NYOTA kuanzisha au kupanua biashara. Awamu ya pili itawalenga vijana 200,000.

Rais anajaribu kurejesha uhusiano wake na vijana, ambao ulidorora kufuatia maandamano ya 2024 na 2025 dhidi ya Mswada wa Fedha wa 2024, gharama ya maisha, ukosefu wa ajira na ukatili wa polisi.

Maandamano hayo yalilazimisha serikali kuondoa mswada huo, lakini yakafuatwa na kukamatwa kwa waandamanaji na polisi kukosolewa kwa jinsi walivyoshughulikia maandamano.

Katika siku hiyo ya tatu, Rais alizindua na kukagua miradi mbalimbali katika kaunti ya Kisii, akitembelea maeneo ya Bonchari, Kitutu Chache Kaskazini, Bobasi na South Mugirango.

Miradi hiyo ilihusisha ujenzi wa barabara, umeme, shule, soko la kisasa na chuo cha mafunzo ya matibabu (KMTC) cha Marani.