UMAARUFU wa Kiongozi wa Linda Mwananchi, Edwin Sifuna, umemtikisa Kinara wa Mawaziri Musalia Mudavadi, ambaye kwa muda mrefu amekuwa kigogo wa siasa za eneo la Magharibi huku siasa za 2027 zikiendelea kuchacha.

Bw Mudavadi ambaye amedumu katika siasa za Magharibi kwa kipindi kirefu, anakabiliwa na ushindani mkali kutoka kwa wanasiasa chipukizi, akiwemo Bw Sifuna na Gavana wa Trans Nzoia, George Natembeya, ambao wanalenga kubadilisha mwelekeo wa kisiasa wa eneo hilo kuelekea Uchaguzi Mkuu wa 2027.

Bw Mudavadi tayari ametangaza kuwa halengi kiti cha urais katika uchaguzi wa 2027 bali anaunga mkono azma ya Rais William Ruto ya kusalia afisini hadi 2032.

Hata hivyo, tangazo la Bw Sifuna kuwa analenga urais wa nchi linaonekana kutishia uwepo wa Bw Mudavadi katika siasa za eneo la Magharibi.

Pia uamuzi wa Bw Mudavadi wa kuvunja chama chake cha ANC na kukiunganisha na UDA ya Rais Ruto unaonekana kumponza kisiasa kwa kuwa sasa hana chama.

Ili kutimiza azma yake ya muda mrefu ya kumrithi Rais Ruto mnamo 2032 na kuendelea kuwa na ushawishi serikalini kwa sasa, Bw Mudavadi amekuwa akijitahidi kuhakikisha eneo la Magharibi linamuunga mkono Rais.

Kuna hofu kuwa akishindwa kumpa Rais kura za Magharibi, hatua hiyo inaweza kumwondoa katika hesabu za urithi wa uongozi wa taifa.

Aidha, kuingia kwa ODM katika kambi ya Rais Ruto pia kumemweka pabaya Bw Mudavadi huku chama hicho kikishauriana na Rais kuhusu mkataba wa kugawana viti. Tayari ODM inashinikiza ipewe nafasi ya naibu wa rais, huku baadhi ya viongozi wake wakizungumzia kupata asilimia 50 ya nafasi serikalini.

Iwapo chama hicho hakitapata nafasi hiyo, huenda kikataka nyadhifa nyingine muhimu, zikiwemo za Bw Mudavadi au Spika wa Bunge la Kitaifa, nafasi inayoshikiliwa kwa sasa na kiongozi wa Ford Kenya Moses Wetang’ula.

Ingawa hivyo, wachanganuzi wa siasa wanaamini itakuwa vigumu kwa Bw Mudavadi kuhakikisha Magharibi inampigia kura Dkt Ruto iwapo upinzani utamteua Bw Sifuna kuwa mgombeaji wake wa urais.

Wikendi, Bw Mudavadi alionekana kukiri kuwa eneo la Magharibi lilimpuuza mnamo 2022 alipotangaza kumuunga mkono Dkt Ruto.

Wakati huo, eneo hilo kwa kiasi kikubwa lilimpigia kura aliyekuwa Waziri Mkuu Raila Odinga wa muungano wa Azimio la Umoja-One Kenya, huku ODM ikishinda viti vingi vilivyowaniwa.

Kaunti ya nyumbani kwa Bw Mudavadi ya Vihiga ilichagua gavana na seneta wa ODM.

“Nilipowaambia kuwa Ruto angeshinda, mlidhani ninawatania. Sasa mnasema tumlaumu Musalia ile asilimia 30 ya barabara iko wapi! Mlikuwa wapi nilipokuwa naelekea huko? Nilipowaomba mjiunge nami, mlikataa, lakini sasa mnataka vitu vya bure kutoka kwangu,” akasema Bw Mudavadi.

Pia alikashifu uungwaji unaodaiwa kutolewa na Rais Mstaafu Uhuru Kenyatta kwa Bw Sifuna, akiuliza kwa nini hakumpa seneta huyo wa Nairobi chama chake cha Jubilee iwapo kweli anaunga mkono azma yake.

Bw Mudavadi alisema atahakikisha Rais Ruto ameupata muhula wa pili, huku akihimiza wakazi wa Magharibi kuwachagua wabunge wengi zaidi wa UDA katika uchaguzi wa 2027.

Alielezea uchaguzi wa 2027 kuwa wakati muhimu wa kuamua mustakabali wa kisiasa wa Magharibi.

Bw Mudavadi alitaja upinzani wa sasa kuwa usio na mpangilio, uliogawanyika na usio na mwelekeo wa pamoja.

Aliwataka viongozi wanaotaka kuchukua hatamu za uongozi wa serikali kueleza wazi wanachokusudia kuwafanyia Wakenya.

Aidha aliwataka viongozi wa upinzani kuweka wazi manifesto zinazoeleza mipango yao kwa nchi, akisisitiza kuwa Wakenya wanahitaji uongozi unaozingatia uadilifu, uwajibikaji na ajenda ya wazi ya maendeleo.

Hivi majuzi, Katibu Mkuu wa muungano wa vyama vya wafanyakazi (COTU), Francis Atwoli alitangaza kuwa mwishoni mwa mwaka huu, viongozi wakongwe wa Magharibi wataandaa mkutano mkubwa wa kisiasa katika eneo hilo kumvumisha Ruto, katika hali inayoonekana kama mbinu ya kukabiliana na wimbi la Sifuna.

Pia alitetea uamuzi wake wa kuunganisha ANC na UDA, akisema ulikuwa mikakati ya kisiasa iliyolenga kukuza umoja wa nchi.

Wakati Bw Mudavadi akijaribu kukabiliana na wimbi hilo la kisiasa, pia anakabiliwa na upinzani kutoka kwa wanasiasa wakongwe ambao wametangaza kumuunga mkono Bw Sifuna.

Miongoni mwa wanasiasa hao ni mawaziri wa zamani Musikari Kombo, Fred Gumo, Noah Wekesa na Philip Masinde, pamoja na aliyekuwa Mbunge wa Webuye Magharibi Joash Wamang’oli na aliyekuwa Mbunge wa Bumula Bifwoli Wakoli.