Habari

Afisa wa Gavana Natembeya aendelea kuuguza majeraha mabaya baada ya kushambuliwa

Na EVANS JAOLA November 18th, 2026 Kusoma ni dakika: 1

AFISA wa mawasiliano wa Gavana wa Trans Nzoia George Natembeya, Amos Boaz Masika, maarufu kama Hammer Hammer Ke, amelazwa hospitalini Eldoret baada ya kushambuliwa kwa mapanga na watu wenye silaha karibu na nyumbani kwake.

Bw Masika alijeruhiwa vibaya kichwani, mikononi na miguuni katika tukio lililotokea Jumatatu, Novemba 16, mwendo wa saa mbili na nusu usiku, eneo la Chebarus.

Washambuliaji pia walichoma gari lake.

Wakati wa shambulio hilo, alikuwa akirejea nyumbani akiwa na bintiye mdogo. Mtoto huyo aliokolewa na kupelekwa na mamake mahali salama.

Nduguye, Bw Sam Masika, alisema familia imeshtushwa na ukatili huo na kuwataka polisi kuwakamata wahusika.

“Jinsi alivyoshambuliwa inaonyesha washambuliaji walikuwa na nia ya kumuua. Ninataka polisi wawasake na kuwakamata,” alisema.

Tukio hilo limezua ghadhabu miongoni mwa viongozi, wanablogu na watumiaji wa mitandao ya kijamii.

Mkurugenzi wa mawasiliano wa chama cha Linda Mwananchi Pauline Njoroge, alilaani shambulizi hilo, akilihusisha na mazingira ya hofu kwa wanaotoa maoni ya kisiasa.

Hata hivyo, hakuna ushahidi uliowasilishwa kuthibitisha uhusiano huo.

Mnamo Oktoba 22 Masika alikamatwa karibu na Mahakama ya Kitale na baadaye kushtakiwa kwa unyanyasaji wa mtandaoni.

Polisi wamesema uchunguzi kuhusu shambulizi hilo unaendelea kubaini waliohusika na nia yao.