Mbadi, Mwanasheria Mkuu hatarini kuadhibiwa kwa kukosa kufichua mikataba ya mikopo ya Serikali
WAZIRI wa Fedha John Mbadi na Mwanasheria Mkuu wa Serikali Dorcas Oduor wameamriwa kufika katika Mahakama Kuu Novemba 27, 2026, kusikilizwa kabla ya kupewa adhabu kwa kupuuza amri za mahakama kuhusu ufichuzi wa mikataba ya mikopo ya kimataifa.
Jaji Patricia Nyaundi aliwapata wawili hao na hatia ya kudharau mahakama baada ya serikali kukosa kutoa maelezo kuhusu mikopo ya kimataifa na jinsi fedha hizo zilivyotumika.
Jaji alisema wawili hao watawasilisha sababu za kupunguziwa adhabu kabla ya hukumu kutolewa.
Kesi hiyo inatokana na uamuzi wa Desemba 2024 ambapo Mahakama Kuu iliamua kuwa serikali ilikiuka haki ya wananchi kupata habari kwa kukataa kutoa maelezo kuhusu mikopo kwa kipindi cha miaka tisa.
Jaji Lawrence Mugambi aliamuru serikali kutoa stakabadhi hizo ndani ya siku 45 kufuatia ombi la Tume ya Haki za Kibinadamu Kenya na Wanjiru Gikonyo.
Jaji Nyaundi alisema ushahidi ulionyesha kuwa amri ya mahakama ilifikishwa kwa maafisa hao, lakini hawakuwasilisha majibu kupinga ombi la kuwatangaza kuwa walidharau mahakama.
Alionya kuwa amri za mahakama ni lazima ziheshimiwe na kwamba kuziacha kukiukwa bila hatua kunadhoofisha utawala wa sheria.