Dimba

Man United waponea kipigo na kubomoa Crystal Palace kwao

Na GEOFFREY ANENE, MASHIRIKA November 30th, 2025 Kusoma ni dakika: 1

LONDON, Uingereza

MANCHESTER United wamepunguza presha iliyokuwa ikiongezeka kambini mwake na kuinua ari ya mashabiki wao baada ya kuponea kipigo wakilemea Crystal Palace 2-1 katika Ligi Kuu ya Uingereza ugani Selhurst Park, Jumapili.

Baada ya wiki yenye misukosuko iliyojaa lawama kufuatia kipigo cha aibu kutoka kwa Everton, ushindi huo mbichi umempa kocha Ruben Amorim na kikosi chake nafuu kubwa na kuamsha tena imani, huku wakionyesha uthabiti kupata pointi tatu muhimu ugenini.

Kipindi cha kwanza kilitawaliwa zaidi na Palace, ambao walionekana kuwa wakali, watulivu na hatari walipokaribia lango la United.

Jean-Philippe Mateta (kushoto) wa Palace na Leny Yoro wa United wakati wa mechi hiyo. PICHA | REUTERS

Ubora wao ulizaa matunda katika dakika ya 36 baada ya straika Jean-Philippe Mateta kuangushwa ndani ya kisanduku na kufunga penalti iliyopatikana.

Mfaransa huyo aliangushwa ndani ya kisanduku baada ya Leny Yoro kumvyoga, na kumlazimu refa kuashiria mkwaju wa penalti. Mateta alifunga kwa utulivu, akimwaga kipa Senne Lammens na kuipa Palace uongozi waliostahili.

Mashetani wekundu wa United walitatizika kuuunda nafasi muhimu kabla ya mapumziko, pasi zao zikikosa mwelekeo, huku safu yao ya ushambuliaji ikizuiwa vizuri na ulinzi wa Palace uliokuwa imara.

Hata hivyo, wageni walirejea kipindi cha pili wakiwa na kasi mpya na mchezo mkali zaidi. Hatimaye juhudi zao zilizaa matunda wakati Joshua Zirkzee alipokamilisha shambulizi vizuri akisawazisha 1-1, jambo lililowapa mashabiki wa United matumaini mapya na kugeuza mwelekeo wa mchezo.

Ushindi ulitiwa muhuri katika dakika za mwisho baada ya Mason Mount kufunga kwa utulivu. Bruno Fernandes alichangia asisti za mabao hayo ya United.

Raha ya wachezaji wa Man United baada ya kubamiza wenyeji Palace. PICHA | REUTERS

Baada ya hapo, United walilinda uongozi wao kwa nidhamu na umakini hadi dakika ya mwisho.

Mchezo huo wa kutoka nyuma haukuzuia tu wiki isizidi kuwa mbaya, bali pia ulirejeshea United motisha ya kujiamini wanapojaribu kurejesha uthabiti katika msimu wao. –Imetafsiriwa na Geoffrey Anene