WAUMINI 16 wa Kanisa Katoliki kutoka parokia ya St Mathias Mulumba, Mikindani, Mombasa, wamefariki katika ajali ya barabarani eneo la Salama, Kaunti ya Makueni.

Waumini hao walikuwa safarini kuelekea Subukia, Nakuru, kuhudhuria Siku ya Kitaifa ya Maombi) katika Madhabahu ya Kitaifa ya Subukia.

Askofu Mkuu wa Dayosisi ya Mombasa, Martin Kivuva Musonde, alithibitisha kifo cha mahujaji hao kupitia taarifa aliyotuma kwa mapadre, watawa na waumini.

“Tunasikitika kwa huzuni kubwa kutangaza kifo cha ghafla cha mahujaji 16 kutoka St Mathias Mulumba, Mikindani, katika ajali iliyotokea Salama,” alisema Askofu Kivuva.

Alisema mahujaji hao walikuwa njiani kuelekea Madhabahu ya Kitaifa ya Subukia kwa ajili ya Siku ya Kitaifa ya Maombi.

Askofu Kivuva aliwataka waumini kuombea roho za marehemu, familia zao, Parokia ya St Mathias Mulumba na Dayosisi ya Mombasa kwa ujumla ili wapate faraja katika kipindi hiki kigumu.

“Tuombe kwa ajili ya pumziko la roho zao tunapoombea familia zao, parokia ya St Mathias Mulumba na Dayosisi nzima ili tupate faraja na utulivu kutoka kwa Bwana,” alisema.

Alimalizia taarifa hiyo kwa kuwaombea marehemu, akisema: “Roho zao zipumzike kwa amani. Amina.”

Kamishna wa Kaunti ya Makueni, Abdullahi Khalif, amethibitisha ajali hiyo.