Serikali imeanza maandalizi ya kuwaondoa wakazi katika maeneo hatari kwa mafuriko Nairobi huku mvua kubwa inayotarajiwa kuanza wiki ya pili au ya tatu ya Oktoba ikikaribia.

Naibu Rais Kithure Kindiki alisema maeneo yanayoweza kuathiriwa yametambuliwa na vituo vya muda vya kuwahifadhi watu wanaoweza kuhamishwa vimeandaliwa.

Takriban watu 100,000 Nairobi wanatarajiwa kuathiriwa, huku Mukuru, Mathare, Kibra, Embakasi, Dagoretti South, Makadara na Westlands yakitajwa kuwa miongoni mwa maeneo yaliyo hatarini.

Barabara kuu kama Uhuru Highway, Jogoo Road, Bunyala Road na Mombasa Road pia zinatarajiwa kukumbwa na mafuriko.

Prof Kindiki alisema serikali imejiandaa kutoa chakula, dawa na misaada mingine kwa watu watakaohamishwa.

Alisema maagizo ya kuondoka yatatolewa wakati utakapofika na serikali itahakikisha wananchi wanaondolewa kwa utu na kupewa taarifa mapema.

“Utabiri wa hali ya hewa unaonyesha uwezekano wa mvua nyingi Nairobi, na inatarajiwa kuwa wiki ya pili na ya tatu ya Oktoba ndipo mvua itaanza,” alisema.

Idara ya kukabiliana na majanga ya Kaunti ya Nairobi imeanza kusafisha mabomba na njia za maji ya mvua ili kupunguza hatari ya mafuriko.

Prof Kindiki alisema maeneo yote yanayozuia maji yametambuliwa na kazi ya kuyafungua na kuondolea uchafu inaendelea.

Kaunti inashirikiana na Tume ya Mto Nairobi, huku vijana wa Green Army na Climate Works wakishiriki katika zoezi hilo.

Wakati huo huo, Waziri wa Maji Erick Mugaa amewataka wanaoishi kando ya mito kuwa waangalifu kutokana na uwezekano wa viwango vya maji kupanda.

Akizungumza wakati wa sherehe za Mara Day huko Bomet, Bw Mugaa alisema wataalamu wa hali ya hewa wanatarajia mvua nyingi kuliko kawaida.

Alisema serikali inashirikiana na Jumuiya ya Afrika Mashariki na Tume ya Bonde la Ziwa Victoria katika maandalizi.

Kamishna wa Wilaya ya Tarime nchini Tanzania, Meja Edward Golowe, alisema tope linalosababishwa na shughuli za binadamu sehemu za juu za Mto Mara limebadilisha mkondo wa mto huo na kuongeza hatari kwa familia zinazoishi kando yake.

Serikali pia imeanza kukagua njia za umeme ili kupunguza kukatika kwa umeme wakati wa mvua.

Bw Mugaa alisema vituo vya kupima viwango vya maji vinaendelea kutoa taarifa za wakati halisi ili kusaidia kutoa tahadhari na kuhamisha watu hadi maeneo salama.

Kituo cha Kitaifa cha Kushughulikia Majanga (NDOC) kinaratibu maandalizi hayo kote nchini.

Maafisa wa serikali za kaunti wamepewa jukumu la kutambua maeneo hatari kwa mafuriko na maporomoko ya ardhi, njia za uokoaji na vituo vya kuwahamishia waathiriwa.

Tahadhari pia itatolewa kupitia mikutano ya hadhara, makanisa, misikiti na vituo vya redio vya kimaeneo.

Serikali imesema makundi yaliyo katika hatari zaidi, wakiwemo wazee, watoto, wajawazito na watu wenye ulemavu, watapewa kipaumbele wakati wa uokoaji.

Wakati huo huo, viongozi wa dini kupitia Association of Religious Practitioners Professionals (AREPP) wamejiunga na maandalizi hayo.

Mkurugenzi wake, Dkt Ezekiel Muendo, alisema waumini 470 na wajitolea 940 wamehamasishwa kusaidia katika maandalizi na shughuli za uokoaji.

Alisema maeneo ya ibada yako tayari kutumika kama vituo vya uokoaji na shughuli za dharura kuanzia Oktoba 2026 hadi Machi 2027.