BISSAU, Guinea Bissau: KIONGOZI Mkuu wa Mashtaka Guinea-Bissau ameunda kamati ya kuchunguza mauaji ya msanii wa nyimbo za kufokafoka na mwanaharakati Vigario Luis Balanta kufuatia shinikizo kutoka kwa upinzani na vyombo vya habari kutaka waliohusika wawajibishwe.

Balanta aliuawa Machi baada ya awali kueleza hofu kuwa maisha yake yalikuwa hatarini. Mauaji yake yalisababisha wanachama wa vuguvugu la kijamii na kisiasa aliloanzisha, Po’ di Terra wajifiche.

Vuguvugu hilo limeishutumu serikali inayoongozwa na wanajeshi kwa kuwalinda waliohusika na mauaji hayo.

Serikali hiyo ilitwaa mamlaka kupitia mapinduzi ya kijeshi mnamo Novemba 2025. Hata hivyo, awali ililaani mauaji ya Balanta na kusema haiwezi kutoa maelezo zaidi hadi uchunguzi ukamilike.

Katika taarifa Jumatatu, afisi ya mwendesha mashtaka ilisema kamati hiyo itakuwa na siku 60 kubaini washukiwa, makosa yaliyotendwa na kuwasilisha matokeo ya uchunguzi.

Po’ di Terra ilikaribisha hatua hiyo Jumanne, lakini ikataka uchunguzi huru, wa kina na ulio wazi kwa umma.

“Kamati hii ni ishara kwamba shinikizo la wananchi na matakwa ya kupata ukweli hayawezi kupuuzwa,” taarifa ya vuguvugu hilo ilisema.

Kiongozi mpya wa vuguvugu hilo, Nado da Cunha, alisema wataendelea kudai haki.

“Tunataka kamati hii isitumiwe kujinufaisha kisiasa au kuboresha taswira kuhusu taasisi za serikali,” alisema katika ujumbe kutoka Brazil, anakokaa kwa sababu za kiusalama.