KUPATA maarifa ya vitabu na kwenda shule ni kitu kizuri sana na kwa vyovyote vile, kadri ya uwezo wako, jitahidi kupata au kujiendeleza kielimu. 

Elimu haina umri uwe mtoto, kijana au umepevuka kiumri, unachohitaji tu ni motisha na moyo wa kujituma.

Elimu humwezesha mtu kuchanganua, kutathmini mambo, kupanua mawazo na kuwa na mtazamo tofauti kabisa, kwa njia chanya, kuhusu masuala anuai. Hukupa ujasiri wa aina yake kudadisi mambo na kuuliza maswali mazito kuhusu masuala nyeti.

Hatahivyo, uhalisia unaopuuzwa mara kwa mara ni kwamba elimu ya vitabu haitakufunza kila kitu. Kwenda shule ni muhimu kwa sababu kutakuwezesha kutangamana ma watu mbalimbali. Lakini elimu pekee haitoshi kukupa ujuzi wa kukabili maisha.

Kando na maarifa ya kitabu, umuhimu wa kuwa na maarifa kihisia na maarifa kijamii hauwezi ukasisitizwa vya kutosha. Maarifa haya hukuwezesha kujielewa na kujithamini kwanza kama mtu binafsi ili uweze kutangamana na binadamu wenzako iwe ni jamaa wa familia, majirani, marafiki, wafanyakazi wenza na jamii kwa jumla.

Ni maarifa haya yanayokuwezesha kung’amua wakati wa kuzungumza au kukaa kimya, kukaa au kuondoka, kukubali, au kukataa jambo fulani licha ya ushawishi au shinikizo kutoka kwa wanarika au marafiki. Hukuwezesha kuamua ama kuendeleza au kukatiza mahusiano,kuchapisha picha au la.

Matukio tunayoshuhudia katika siku za majuzi kuhusu vijana wa shule yanadhihirisha uhalisia wa kutisha kuhusu kuwepo pengo la maarifa kihisia na kijamii.

Katika kipindi cha miezi miwili, video zimesambazwa mitandaoni zikiwaonyesha mabinti katika hali za kutatanisha ambazo bila shaka wataishia kujilaumu na kujutoa maisha yao yote.

Video nilizokumbana nazo kuhusu mwanafunzi wachuo kikuu mojawapo nchini katika tamasha ya burudani kuwakaribisha wanafunzi wapya. Binti huyo anayeonekana mlevi asiyejifahamu alirekodiwa akijamiiana hadharani na mvulana wakiwa wamezingirwa na wanafunzi wenzao. Katika video nyingine ilimwonyesha binti mchanga aliyelewa chakari akivuliwa nguo na kupapaswa uchi wake katika tamasha ya burudani iliyofurika watu.

Katika jamii iliyojaa visa tele kuhusu tishio zinazowakabili wanawake na wasichana, matukio hayo yanazua wasiwasi kuhusu uwajibikaji binafsi wa mabinti kuhusu usalama wao.