ASUBUHI kabla ya safari yake ya mwisho, Scholastica Ochieng alimwambia kasisi wake, Padri Patrick Maingi, kuwa kukamilisha sala za Novena kulikuwa kumempa amani ya moyoni.

Baadaye siku hiyo, alijiunga na waumini wengine wa Kanisa Katoliki la St Mathias Mulumba, Mikindani, Mombasa, waliokuwa wakijiandaa kusafiri hadi Subukia, Kaunti ya Nakuru, kwa Siku ya Kitaifa ya Maombi.

Scholastica na mwenzake Ann Mwanthi pia walikuwa wamelipa zaka zao siku chache kabla ya safari.

“Hatuitaki kuenda mbele za Mungu tukiwa na madeni. Tunataka kumaliza madeni yetu ili tukienda, twende tukiwa na dhamira safi,” waliambia Padri Maingi.

Hawakujua hayo yangekuwa miongoni mwa mazungumzo yao ya mwisho.

Saa tisa alasiri Ijumaa, Padri Maingi aliwaaga mahujaji 17 wakipanda magari mawili kuelekea Subukia.

“Walikuwa na furaha sana na walikuwa wakitarajia safari njema,” akasema.

Miongoni mwao alikuwa Veronica Ngandi, ambaye alikuwa akijiandaa kufunga ndoa baada ya familia yake kufanya mazungumzo ya mahari Kitui.

Padri Maingi alisema Veronica alipanga kuanza maandalizi ya mwisho ya harusi baada ya kurejea kutoka kwa safari hiyo.

“Alikuwa anatazamia harusi yake. Aliniambia baada ya hija angeanza maandalizi lakini sasa harusi yake itakuwa mbinguni,” akasema.

Sarapia, kutoka Taita Taveta, pia alikuwa na furaha kwa sababu alikuwa hajawahi kusafiri mbali na Voi.

Hata hivyo, saa chache baadaye, magari hayo yalihusika katika ajali Salama kwenye barabara ya Nairobi-Mombasa na mahujaji wote 17 wakafariki.

Padri Maingi alijulishwa kuhusu ajali hiyo na afisa wa trafiki John Mrei, aliyewatambua waathiriwa kutokana na kofia walizovaa zilizokuwa na jina la kanisa.

Miili hiyo ilipelekwa Hospitali ya Sultan Hamud, Makueni, ambako ndugu walitambua waathiriwa 14 wanawake na wanaume watatu.

Askofu Mkuu wa Kanisa Katoliki Dayosisi ya Mombasa Dominic Kimengich alitaka barabara ya Nairobi-Mombasa ibadilishwe na ijengwe kuwa ya njia mbili, akisema eneo la Salama limekuwa hatari kwa wasafiri.

Gavana wa Makueni Mutula Kilonzo Junior pia alitaka serikali ichukue hatua za haraka kuzuia vifo zaidi katika eneo hilo hatari.