Na CHARLES WASONGA

KIONGOZI wa ODM Raila Odinga amepuuzilia mbali madai kuwa hakufahamu kuhusu mabadiliko ndani ya ripoti ya mpango wa maridhiano (BBI) na mswada wa marekebisho ya Katiba.

Kwenye taarifa kwa vyombo vya habari, Odinga amesisitiza Alhamisi kuwa hotuba yake katika hafla ya uzinduzi wa sahihi za kuunga mkono mswada aliyoitoa katika ukumbi wa KICC iliangazia masuala ambayo yaliibua utata katika mswada wa BBI uliozinduliwa Oktoba 26.

“Hiyo haikumaanisha kuwa Bw Odinga hakuwa na habari kuhusu marekebisho yaliyofanyiwa ripoti ya BBI na mswada wa marekebisho ya Katiba,” ikasema taarifa iliyotumwa na msemaji wa Bw Odinga, Dennis Onyango.

Kulingana Bw Odinga, hotuba yake wakati wa hafla hiyo iliyofanyika katika jumba la KICC, ilinuiwa kufafanua kuwa “sio mapendekezo yote, hata yangu, yalijumuishwa katika mswada wa mwisho utakaowasilishwa kwa kura ya maamuzi.”

Mojawapo ya mapendekezo yaliyopingwa ni lile linalovipa vyama vya kisiasa nafasi ya kuteua makamishna wa Tume Huru ya Uchaguzi na Mipaka (IEBC).

Pendekezo hilo liliondolewa. Lakini katika hotuba yake Bw Odinga alitetea wazo la kuruhusiwa kwa vyama vya kisiasa kuteua makamishna wa IEBC ilivyofanyika mnamo 1997.

“Uchaguzi mkuu wa 2002 utakumbukwa kama ambao ulioendeshwa kwa njia huru na haki kwa sababu baadhi ya makamishna wake waliteuliwa na Rais Moi (Daniel) na wengine wakapendekezwa na vyama vikuu vya kisiasa. Hii ilibuni mazingira ambapo makundi yote mawili ya makamishna yalikuwa yakikosoana,” akasema Bw Odinga.