Ruto aambia wakazi wa Gusiiland kususia upinzani kwa ‘kukosa ajenda’
RAIS William Ruto jana aliwakejeli viongozi wa upinzani kutokana na mivutano yao ya ndani, akisema utabiri wake kwamba umoja wao ungesambaratika kabla ya uchaguzi mkuu wa 2027 umetimia.
Akicheka kuhusu malumbano ya hivi majuzi miongoni mwa viongozi hao, Rais alisema migogoro hiyo inathibitisha madai yake kuwa hawana ajenda ya kuwatumikia Wakenya.
Akihutubia wakazi wa Nyamira katika vituo mbalimbali wakati wa ziara yake eneo la Gusii, Dkt Ruto alisema ana uhakika atawashinda wapinzani wake kutokana na rekodi yake ya maendeleo, huku akiutaja upinzani kuwa usiokuwa na mwelekeo.
Nyamira ni ngome ya kisiasa ya Kiongozi wa Jubilee na mgombea mtarajiwa wa urais wa upinzani, Dkt Fred Matiang’i, aliyekuwa Nyeri, ambako alisisitiza kuwa upinzani utaendelea kuwa na umoja katika azma yao ya kumwondoa Rais mamlakani.
Rais alisema kazi kuu ya upinzani ni kumkosoa na kumtusi kwa majina kama Kasongo na kueneza chuki.
“Watu hao hawajui barabara zitajengwa vipi, nyumba zitakuzwa vipi au bima ya afya itatolewa vipi. Hawana mpango, hawana ufahamu kuhusu hali yetu ya sasa, hawana mpango wa kesho wala maono ya mustakabali wetu,” akaongeza.
Aliwataka wakazi wa Nyamira wasichezee mustakabali wa nchi kwa kuwaunga mkono viongozi ambao hawana mwelekeo.
Rais yuko katika ziara ya siku nne eneo la Gusii, kuanzia Jumapili hadi Jumatano, akitafuta uungwaji mkono wa muhula wake wa pili.
Alisema viongozi wanaowania nyadhifa za kisiasa lazima waeleze rekodi yao ya maendeleo na mipango yao kwa wananchi badala ya kuwahadaa.
Katika ziara hiyo, alihudhuria ibada ya pamoja katika uwanja wa Nyamaiya kabla ya kuzindua kituo cha kidijitali cha eneobunge la Mugirango Magharibi.
Pia alizindua ujenzi wa barabara ya Bondeni-Magombo na mradi wa kusambaza umeme katika maeneo ya mashinani.
Pia alizindua ujenzi wa barabara ya Tombe-Isinta-Mokomoni katika eneobunge la Mugirango Kaskazini.
Ziara hiyo inafanyika wakati muungano wa upinzani unakabiliwa na migawanyiko kutokana na kutokubaliana kuhusu mgombeaji mmoja wa urais, maslahi ya maeneo na mikakati ya kisiasa.