Ruto: Hata maziwa ya ngamia na mbuzi yako sawa sio lazima yawe ya ng’ombe
RAIS William Ruto amependekeza Kenya ipanue vyanzo vya maziwa kwa kujumuisha ngamia, mbuzi na kondoo baada ya upungufu wa maziwa ya ng’ombe kusababisha bei kupanda hadi Sh85 kwa lita katika baadhi ya maeneo.
Rais alisema ukame wa hivi majuzi umeathiri uzalishaji wa maziwa, hivyo kuna haja ya kutafuta njia mbadala ili kukidhi mahitaji ya wananchi.
“Tunahitaji kupanua vyanzo vyetu vya maziwa kutoka kwa ngamia, kondoo, mbuzi na hata nyati,” alisema Dkt Ruto na akawachekesha waliohudhuria mkutano alipotaja nyati.
Akizungumza Ijumaa katika kufungwa kwa kongamano la siku tatu la Mabadiliko ya Kilimo na Mifumo ya Chakula 2026, lililofanyika katika uwanja wa Jamhuri jijini Nairobi, Rais alimwagiza Katibu wa Mifugo Jonathan Mueke kuharakisha utafiti wa mifugo bora ya ngamia ili kuongeza uzalishaji.
Alisema jamii za wafugaji zinahitaji kuungwa mkono kwa kuwa zina mifugo hiyo na maarifa yanayoweza kusaidia kukuza biashara ya maziwa ya ngamia, ambayo pia yana soko mijini.
Ukaguzi wa Taifa Leo ulibaini kuwa lita moja ya maziwa ilikuwa ikiuzwa hadi Sh85 katika maeneo ya Kasarani, Githurai, Zimmerman, Kayole, Buruburu na Embakasi. Zimmerman, bei ilikuwa imepanda kutoka Sh75 hadi Sh85. Hata hivyo, Waziri wa Kilimo Mutahi Kagwe alipuuza madai ya uhaba mkubwa wa maziwa, akisema ni kupungua kwa ugavi.