Serikali sasa yapiga marufuku wanasiasa kukanyaga guu shuleni
WIZARA ya Elimu imepiga marufuku wanasiasa na watu wengine wenye nia ya kutoa misaada kutembelea shule na kuwagawia wanafunzi zawadi, ikionya kuwa huenda shughuli hizo zikatumiwa kujinufaisha kisiasa kuelekea uchaguzi mkuu wa 2027.
Waziri wa Elimu Julius Ogamba alisema baadhi ya watu wamekuwa wakitumia misaada shuleni kama njia ya kujipatia umaarufu na kuendeleza maslahi yao binafsi.
Alisema ziara hizo pia huvuruga ratiba ya masomo na kuhatarisha haki za watoto, hasa pale picha zao zinapopigwa na kusambazwa mitandaoni bila idhini ya wazazi au walezi.
Bw Ogamba alisema agizo hilo linatumika kote nchini, ingawa linatekelezwa kaunti moja baada ya nyingine.
Katika barua iliyotumwa kwa maafisa wa elimu Nyamira, wakuu wa shule za upili, wizara ilisema baadhi ya watu wamekuwa wakitembelea shule, kutoa misaada midogo kisha kupiga picha na wanafunzi.
“Tumeshuhudia watu wanaojitolea kutembelea shule na kuruhusiwa kuvuruga shughuli za masomo, kupiga picha na video za wanafunzi kwa sababu tu wametoa mchango mdogo,” ilisema barua iliyotiwa saini na Mkurugenzi wa Elimu Nyamira, Joshua Kaga.
Wizara ilionya kuwa shule hazipaswi kutumiwa na wanasiasa kujitafutia umaarufu wakati wa msimu wa kampeni.
Akizungumza katika Shule ya Upili ya Senator Kebaso wakati wa maandalizi ya mtihani wa KCSE, Bw Kaga alisema baadhi ya wanasiasa wamekuwa wakiwapa wanafunzi mikate na soda, kisha kuchapisha picha zao mitandaoni.
Alisema tabia hiyo inakiuka miongozo ya elimu na huenda ikavunja sheria zinazolinda faragha za watoto.
Hata hivyo, baadhi ya wakazi wa Nyamira wamedai kuwa agizo hilo linalenga kuwazuia wanasiasa wa upinzani ambao wamekuwa wakiwapa wanafunzi chakula.