Uhuru alikosa kuhudhuria makumbusho ya Raila kwa sababu ya hofu ya kiusalama
RAIS mstaafu Uhuru Kenyatta alifuta ziara yake ya Bondo kuhudhuria kumbukumbu ya mwaka mmoja tangu kifo cha aliyekuwa Waziri Mkuu Raila Odinga kufuatia wasiwasi kuhusiana na usalama.
Timu ya maandalizi ya Bw Kenyatta ilikuwa tayari imewasili Bondo na kiti chake kutengwa katika jukwaa la wageni mashuhuri. Ndege yake pia ilikuwa tayari kuondoka kutoka Uwanja wa Wilson jijini Nairobi Alhamisi asubuhi, lakini hakufika.
Msemaji wake Kanze Dena-Mararo alisema kulikuwa na mabadiliko ya ratiba na suala lililohitaji kushughulikiwa, bila kufafanua zaidi.
Hata hivyo, hafla hiyo iligeuka jukwaa la malumbano ya kisiasa huku viongozi wakitofautiana kuhusu urithi wa Raila na uhusiano wao na Rais William Ruto.
Naibu kiongozi wa ODM Simba Arati alimshutumu Uhuru kwa kufadhili upinzani, huku Waziri wa Kawi Opiyo Wandayi akiwataka wakazi wa eneo hilo kumuunga mkono Rais Ruto.
Kutohudhuria kwa Uhuru kulivutia umakini kutokana na uhusiano wake wa kisiasa na Raila, hasa baada ya maridhiano yao ya Machi 2018 na uungwaji mkono wake kwa azma ya Raila kuwania urais mwaka 2022.
Kiongozi wa wachache katika Bunge la Kitaifa Junet Mohamed alisema hakuhudhuria kwa sababu ya uwepo wa jina la aliyekuwa Naibu Rais Rigathi Gachagua kwenye orodha ya walioalikwa.
Gachagua naye hakuhudhuria kwa sababu alikuwa Amerika.
Mjane wa Raila, Ida Odinga, alisema familia haikuwa na kinyongo na walioalikwa lakini wakakosa kufika. Hata hivyo, alikashifu vitendo vya kuzomea, kupiga kelele na kutisha wageni wakati wa hafla hiyo.
Bi Ida alionya dhidi ya kugeuza eneo la mazishi ya Raila kuwa uwanja wa mapambano ya kisiasa, akisema urithi wake ni mkubwa kuliko tofauti za viongozi.