HAFLA ya kuadhimisha mwaka mmoja tangu kifo cha aliyekuwa kiongozi wa ODM Raila Odinga iligeuka uwanja wa ushindani wa kisiasa kati ya viongozi wa upinzani na wale wanaounga mkono serikali jumuishi ya Rais William Ruto.

Sherehe hizo zilifichua tofauti kuhusu urithi wa kisiasa wa Raila na mwelekeo ambao ODM inapaswa kuchukua kuelekea uchaguzi mkuu wa 2027.

Viongozi wanaounga mkono serikali walisisitiza kuwa ushirikiano na Rais Ruto ndio njia bora ya kuendeleza miradi ya maendeleo Nyanza, huku wapinzani wakitaka kuungana ili kumwondoa madarakani mwaka ujao.

Waziri wa kawi Opiyo Wandayi alisema serikali ya Rais Ruto imeleta maendeleo katika eneo hilo na kutabiri kuwa upinzani utapata wakati mgumu kumshinda rais.

Naibu kiongozi wa ODM Simba Arati aliwaonya wanaofikiria kuondoka chama hicho kuwa wako huru kufanya hivyo, akisisitiza kuwa ODM bado ina nguvu katika eneo la Nyanza.

Hata hivyo, Gavana wa Siaya James Orengo, Seneta wa Nairobi Edwin Sifuna, Mbunge wa Embakasi Mashariki Babu Owino na kiongozi wa Wiper Kalonzo Musyoka walisisitiza kuwa kumuenzi Raila kunamaanisha kuendeleza mapambano ya kisiasa dhidi ya serikali.

Orengo alisema upinzani utaungana nyuma ya mgombea mmoja ili kumwondoa Rais Ruto madarakani, akitaja ukosefu wa ajira kama mojawapo ya changamoto zinazowakabili Wakenya.

Mvutano huo ulijitokeza pia miongoni mwa wafuasi waliokutana Migwena, ambapo vijana waliokuwa wameegemea mirengo tofauti walizozana na kuvuruga baadhi ya shughuli.

Kumbukumbu ya Raila iligeuka kuwa jukwaa la ushindani wa kisiasa, huku pande hizo zikijaribu kuonyesha ni nani anayefaa kuendeleza urithi wake kuelekea uchaguzi wa 2027.