MAMLAKA za usalama eneo la South Rift zimeonya kuhusu ongezeko la visa ambapo umati unachukua sheria mikononi mwao badala ya kutegemea michakato rasmi ya kisheria.

Haya yanajiri siku chache baada ya James Maina, aliyekuwa mfungwa, ambaye alishtakiwa kwa kumnyanyasa kingono mtoto mdogo katika eneo la Sunrise Estate, Njoro, Kaunti ya Nakuru kuuawa na umati.

“Huenda haki ya papo hapo ikaonekana kuwa nzuri, lakini ni kinyume cha sheria na ni hatari sana. Ni lazima washukiwa wapelekwe kwa polisi ili washtakiwe,” alisema Mkuu wa Mkoa wa Rift Valley Dkt Abdi Hassan.

Wanaharakati wa haki za binadamu pia wanaelezea wasiwasi kuhusu hatua ya umati kuchukua sheria mikononi.

Mkurugenzi wa Mtandao wa Haki za Kibinadamu wa Nakuru (Nahurinet) David Kuria, aliwataka wananchi kuepuka kujichukulia sheria mkononi.

“Washukiwa wote wanapaswa kukabidhiwa kwa polisi kwa ajili ya kufunguliwa mashtaka,” alisema.

Aliongeza kuwa kampeni za uhamasishaji zinahitajika ili kuelimisha umma juu ya hatari ya kuchukua hatua mikononi.

Kaunti ambazo visa kama hivyo vya umati kuchukua sheria mikononi ni Nakuru, Bomet, Kericho na Narok.

Washukiwa wengi wanatuhumiwa kwa wizi, mauaji, na uporaji wa simu au mabegi.

Mjini Nakuru pekee, washukiwa watano wameuawa na umati katika muda wa mwezi mmoja uliopita.

Mnamo Desemba 21, washukiwa watatu waliuawa kwa kuchinjwa Naivasha baada ya kunaswa wakiiba kuku katika eneo la Kayole Estate.

Wawili walifariki katika eneo la tukio, na wa tatu alifariki dunia kutokana na majeraha hospitalini. Matukio hayo yalifuatia wimbi la uhalifu unaolenga wafanyakazi wa kampuni ya maua.

Isaac Kiama, Mkuu wa Idara ya Upelezi (DCI) Ukanda wa Bonde la Ufa Kusini aliwataka wakazi waache kuchukua sheria mikononi.

“Hatutaruhusu kuuawa kwa washukiwa kwa tuhuma peke yake. Huu ni mtindo hatari,” alisema.

Steve Kabita alibainisha kuwa wahalifu wanaweza kukabiliwa na kifungo cha maisha au hukumu ya kifo.

Mnamo Aprili 2017, wahalifu 10 waliohusika katika mauaji ya Elikana Gondi Syongoh, dereva wake na mfanyakazi wa shambani katika Kaunti ya Migori walihukumiwa kifungo cha maisha baada ya kupatikana na hatia ya mauaji.

Waathiriwa hao watatu walidhaniwa kimakosa kuwa wezi wa mifugo, walipigwa na kuchomwa ndani ya gari lao.