FATAKI 

MPAKA kati ya mapenzi na chuki ni finyu sana. Mtu anayempenda mwingine sana na kuwa radhi kumfanyia lolote hata ‘kumpa maisha yake,’ ndiye yuleyule anayeweza kumchukia mwenzake kwa ari na hamasa sawia kiasi cha kumfanyia maovu yasiyoelezeka. 

Matukio yanayoshuhudiwa katika miaka ya karibuni kuhusu wanandoa na wapenzi waliopendana na kuendana kama pacha wa toke nitoke kabla ya kuchukiana, kutendeana uhayawani zaidi ya wanyama wenyewe, ni ithbati tosha. 

Uhalisia huu unasisitiza haja ya kuhakikisha kuwa, iwapo ni lazima uwe na mpenzi au kufunga ndoa, unafanya hivyo na mtu mkarimu, mwenye maadili na utu! 

Iwe ni mwanamke au mwanamme, umuhimu wa kuwa na uhusiano wa kimapenzi au kufunga ndoa na mtu anayekuthamini kwanza kama binadamu mwenye fikra zake razini na hisia, mwenye moyo wa huruma na msingi wa kimaadili au imani inayojikita kwenye kumwogopa Rabuka, hauwezi ukasisitizwa vya kutosha. 

Sifa hizi zitakufaa mno wewe binafsi pamoja na mwenzako baadaye wakati kwa bahati mbaya, au nzuri, msisimko wa mapenzi utadidimia, ashiki kufifia na macho kufunguka na kukabiliana ana kwa ana na uhalisia wa mtu unayeishi au kuchumbiana naye. 

Hakuna anayeingia kwenye mahusiano ya kimapenzi au kwenye ndoa akiwa na matumaini kwamba haitadumu. Wengi huwa na taswira ya jinsi watakavyoishi pamoja kwa furaha hadi uzeeni wao bila kutarajia kwamba mahusiano yao yatasambaratika. 

Si ajabu kuwa ndoa huitwa kufunga pingu za maisha baada ya kulishana kiapo cha kuwa pamoja hadi wote au mmoja wao atakapomuaga mwenzake buriani. 

Hata hivyo, mambo ni kangaja huenda yakaja na wakati mwingine, uchumba au ndoa husambaratika na wapenzi au wanandoa walioshibana wakakinaiana na kuchukiana vibaya. 

Hapo ndipo baadhi ya wahasiriwa, katika juhudi za kulipiza kisasi au kuponza machungu kwa usaliti, kutemwa, huanza kumwaga mtama kuhusu mambo yao ya siri huku umma ukilazimishwa kutazama kwa mshangao sinema wasiofahamu ndewe wala sikio. 

Ni katika kipindi hiki ambapo sifa za utu, huruma, na maadili huchangia pakubwa kumwezesha mtu binafsi kujizuia kumdhalilisha mwenzake baada ya mahusiano kuvunjika.