UJAUZITO NA UZAZI 

WANAWAKE wenye mimba wanashauriwa kuzingatia lishe bora na salama kiafya ikiwemo kula aina tofauti za samaki (seafood) mara kwa mara ili kuzuia baadhi ya matatizo sugu yanayowaathiri watoto wachanga. 

Utafiti mpya umehusisha chango (colic) na eczema, matatizo yanayoathiri watoto wachanga, na chakula anachokula mwanamke mjamzito kabla ya kujifungua. 

Watoto wachanga waliozaliwa na kina mama waliozingatia lishe bora kiafya, wana kiwango cha chini cha tishio la kuugua chango na eczema, kulingana na wataalam. 

Aidha, utafiti huo uliashiria ulaji wa seafood mara kwa mara kwa wanawake wajawazito husaidia kupunguza tishio la watoto wachanga la kuathiriwa na matatizo haya. 

Tafiti za awali zimeonyesha kuwa watoto wanaoathiriwa na chango wana uwezekano mkubwa wa kuugua matatizo sugu kiafya baadaye maishani ikiwemo mzio wa chakula, mzio wa pua na ugonjwa wa pumu. 

Katika utafiti mpya ambao ni wa kwanza kuchunguza uhusiano huu, wanasayansi walitathmini jjinsi lishe wakati wa ujauzito inavyoweza kuchangia chango, na hususan mseto wa chango na eczema. 

Professor wa Matibabu ya Watoto katika Chuo cha Harvard Medical School, Jenifer Lightdale, anafafanua kuwa watoto wachanga wanaoathiriwa na mchanganyiko wa chango na eczema wana tishio la juu zaidi la kukumbwa na maradhi ya mzio wanapokua. 

Wanawake wajawazito zaidi ya 1,300 walishirikishwa katika utafiti huu ambapo lishebora kiafya ilijumuisha ulaji kwa wingi wa matunda, mboga, nafaka isiyosafishwa, maharage, viwango vya chini vya mafuta, protini na maziwa. 

Vyakula vya nyama nyekundu au iliyopakiwa, vinywaji vilivyoongezwa sukari, chumvi na nafaka iliyosafishwa vilijumuisha lishe duni kiafya. 

Washiriki pia waliripoti kuhusu ulaji wa vyakula vinavyofahamika kuchochea mzio ikiwemo njugu karanga, samli ya njugu karanga, mayai, maziwa, samaki wenye mapezi na wasio nayo. 

“Matokeo yetu yanatoa sababu nyingine ya kusaidia wanawake wenye mimba kufanikisha lishe bora inayowiana kiafya, hasa kusisitiza ulaji wa seafood,” alisema kiongozi wa utafiti Emily Oken. 

Alifafanua kuwa, ingawa kina mama hutamani kufanya kila wawezalo kwa manufaa ya watoto wao wachanga, aghalabu hukumbana na vizingiti kifedha na vinginevyo katika juhudi za kupata lishebora kiafya.