Hujambo shangazi. Mume wangu amekuwa na msimamo mkali wa kisiasa, ambao umesababisha ugomvi mkubwa kati yetu na hata kati yake na watoto wetu. Naomba msaada wa jinsi ya kudumisha amani.

Msimamo wa kisiasa hautakiwi kugawanya familia. Anafaa kujua kuweka siasa kando wakati wa mazungumzo ya kifamilia na badala yake, mzingatie masuala yanayowaunganisha.

Mume aliacha kazi sasa amebaki kula kulala

Kwako shangazi. Mume wangu aliacha kazi miaka miwili iliyopita na hana nia ya kutafuta kazi mpya. Familia yetu imelemewa kabisa kifedha. Nifanye nini?

Mwanaume hafai kuwa mzembe kiasi kwamba hataki kutafuta kazi. Anafaa kuwajibika.

Mwana apenda raha na kazi hataki kufanya

Hujambo shangazi. Mwanangu wa miaka 25 anapenda maisha ya kifahari lakini hataki kufanya kazi. Anategemea kila kitu kutoka kwetu kama wazazi. Naomba ushauri.

Mfunze umuhimu wa kujitegemea na kufanya kazi kwa bidii ili kudumisha maisha anayoyatamani. Muwekee mipaka ya kifedha ili kumtia motisha wa kujitegemea. Ikiwa inawezekana, msaidie kutafuta nafasi za ajira.

Ndugu zangu hawataki kumtumza mama

Shikamoo shangazi. Ndugu zangu wameniachia jukumu lote la kumtunza mama yetu mzee, ingawa wote wana uwezo wa kifedha. Sijui nifanyeje.

Wasiliana na ndugu zako kwa uwazi na ueleze changamoto unazokumbana nazo peke yako. Pendekeza mpango wa kugawana majukumu kifedha. Ikiwa hawako tayari, tafuta msaada wa mshauri wa familia au viongozi wa jamii.