MLO MTAMU: Wali, kuku na mkate aina ya naan

NA MARGARET MAINA

IKIWA unatafuta njia ya kubadilisha utaratibu wako wa kuandaa chakula basi shughuli nzima ya kupika wali, kuku na mkate aina ya naan itakupa tabasamu usoni.

Muda wa kuandaa: Dakika 2o

Muda wa mapishi: Dakika 40

Walaji: 4

Vinavyohitajika

vijiko 2 vya mafuta
kitunguu maji 1 kilichokatwa
kijiko 1 cha tangawizi safi iliyokatwa vizuri au iliyokunwa
kitunguu saumu punje 10 iliyosagwa
nyama ya kuku yenye uzani wa pauni 1 ½ na isiyo na mfupa na iliyokatwa vipande vipande
nyanya 7 au mchuzi wa nyanya
kijiko 1 cha garam masala
kijiko 1 cha paprika
kijiko 1 cha fenugriki ya unga (hiari)
kijiko ½ cha cumin
chumvi
kijiko ¼ pilipili nyeusi
kikombe ½ cha krimu nzito na ½ mtindi
kikombe 1 ½ mchele wa Basmati au Jasmine
maji kiasi
kinyunya cha unga wa ngano
kikombe cha majani ya giligilani na ambayo yamekatwakatwa
vijiko 3 vya siagi iliyoyeyuka

Maelekezo

Kupika kuku kwa siagi

Pasha moto wa wastani kisha injika sufuria. Mimina mafuta kwenye sufuria halafu utumbukize ndani vitunguu. Kaanga vitunguu hadi viwe na rangi ya dhahabu; itakuchukua muda wa kama dakika nne. Ongeza tangawizi na kitunguu saumu kiasi na upike kwa sekunde 30 huku ukikoroga ili visiungue. Ongeza kuku, nyanya, na viungo. Pika kwa muda wa dakika sita au mpaka kila kitu kiive. Ongeza krimu nzito na chemsha kwa dakika 10 huku ukikoroga mara kwa mara.

Kupika naan

Mkate aina ya naan. PICHA | MARGARET MAINA

Changanya vitunguu, siagi, na giligilani kwenye bakuli ndogo. Weka kando. Gawanya kinyunya cha unga sehemu nane sawa. Pinda unga uchukue umbo la mduara mdogo kwa kutumia mpini wa kusukumia. Pasha kikaangio kwa moto wa juu na upake mafuta kidogo kwenye kikaangio ili unga usishikamane na sufuria. Weka naan kwenye kikaangio na pindua kisha ueneze mchanganyiko wa siagi, majani ya giligilani na vitunguu. Pika hadi mkate aina ya naan uive kisha rudia mpaka unga wote uishe.

Wali

Osha mchele kisha suuza. Katika sufuria, yaache maji yachemke kisha ongeza mchele. Punguza moto, funika na upike kwa muda wa robo saa. Zima moto na wali utulie kwa dakika tano.

Pakua mlo wako na ufurahie.