Atletico Madrid wapiga Real Valladolid na kutia kapuni ufalme wa La Liga

Na MASHIRIKA

ATLETICO Madrid waliwanyima Real Madrid fursa ya kuhifadhi ubingwa wa Ligi Kuu ya Uhispania (La Liga) baada ya kutoka nyuma na kuwapepeta Real Valladolid 2-1 katika mechi ya mwisho msimu huu.

Chini ya kocha Diego Simeone, Atletico walijipata chini katika dakika ya 18 baada ya Oscar Plano kufungia Valladolid kabla ya Angel Correa kusawazisha mambo katika dakika ya 57.

Nyota wa zamani wa Barcelona, Luis Suarez alizamisha kabisa chombo cha Valladolid katika dakika ya 67 na kuvunia Atletico taji lao la kwanza la La Liga tangu 2013-14.

Chini ya kocha Zinedine Zidane, Real pia walitoka nyuma na kuwapiga Villarreal 2-1. Hata hivyo, walikosa kutwaa taji kwa sababu walihitaji Atletico wapoteze alama ndipo wao watawazwe wafalme. Taji hilo lililonyanyuliwa na Atletico lilikuwa lao la kwanza chini ya kipindi cha miaka saba na la 11 kwa jumla.

Ushindi dhidi ya Valladolid uliwawezesha Atletico kukamilisha kampeni za La Liga msimu huu kwa alama 86, mbili zaidi kuliko Real Madrid waliokamilisha muhula bila ya taji lolote.

Baadhi ya mashabiki wa Atletico Madrid nje ya uwanja wa Jose Zorilla mjini Valladolid, Mei 22, 2021. Picha/ AFP

Bila ya kujivunia huduma za nahodha Lionel Messi, Barcelona waliwapiga Eibar 1-0 kupitia fowadi Antoine Griezmann. Messi alipewa na waajiri wake lilkizo ya mapema ili kujiandaa kwa fainali za Copa America zitakazoandaliwa na Argentina mwaka huu.

Ushindi huo ulidumisha Barcelona ya kocha Ronald Koeman katika nafasi ya tatu kwa alama 79, tano kuliko Sevilla waliofunga orodha ya nne-bora. Chini ya kocha Julen Lopetegui, Sevilla watapepetana na Alaves mnamo Mei 23, 2021.

Bao la Villarreal ambao kwa sasa wanajiandaa kwa fainali ya Europa League dhidi ya Manchester United mnamo Mei 26 lilifungwa na Yeremi Pino kabla ya Karim Benzema na Luka Modric kufungia Real.

TAFSIRI NA: CHRIS ADUNGO

Miamba Atletico Madrid watolewa mapema kwenye kivumbi cha Copa del Rey

Na MASHIRIKA

VIONGOZI wa Ligi Kuu ya Uhispania (La Liga), Atletico Madrid waliduwazwa na limbukeni UE Cornella ambao waliwapokeza kichapo cha 1-0 kilichowabandua kwenye raundi ya pili ya kampeni za kuwania taji la Copa del Rey msimu huu wa 2020-21.

Adrian Jimenez aliwafungia UE Cornella bao la pekee na la ushindi kwenye mechi hiyo katika dakika ya saba alipokamilisha kwa ustadi krosi aliyopokezwa na Agustin Medina. Cornella hushiriki soka ya Ligi ya Daraja la Tatu nchini Uhispania.

Chini ya kocha Diego Simeone, Atletico walijipata wakicheza mechi 27 za mwisho wa mchuano huo wakiwa na wachezaji 10 pekee ugani baada ya Ricard Sanchez kuonyeshwa kadi nyekundu baada ya makosa mawili yaliyompa kadi mbili za manjano.

Pigo kubwa zaidi kwa Atletico ambao kwa sasa wanaongoza jedwali la La Liga kwa alama 38, ni jeraha la kifundo cha mguu litakalomweka nje beki matata Jose Gimenez.

Huu ni msimu wa pili mfululizo ambapo Atletico wamebanduliwa mapema kwenye soka ya Copa del Rey na kikosi cha Ligi ya Daraja la Tatu nchini Uhispania. Mnamo 2019-20, miamba hao walidenguliwa na Cultural Leonesa.

Atletico wapiga Barcelona na kufikia Real Sociedad kileleni mwa jedwali la La Liga

Na MASHIRIKA

ATLETICO Madrid walipiga Barcelona 1-0 na kupaa hadi kileleni mwa jedwalini kwa Ligi Kuu ya Uhispania (La Liga) kwa alama 20 sawa na viongozi Real Sociedad.

Ushindi uliosajiliwa na Atletico uliwasaza Barcelona katika nafasi ya 10 kwa alama 11 sawa na Valencia, Getafe na Osasuna. Ni pengo la pointi tisa ambalo kwa sasa linatamalaki kati ya Barcelona na viongozi wawili wa jedwali la La Liga.

Yannick Carrasco ndiye alikuwa mfungaji wa bao la pekee na la ushindi dhidi ya Barcelona mwishoni mwa kipindi cha kwanza baada ya kumwacha hoi kipa Marc-Andre ter Stegen.

Pigo kubwa zaidi kwa Barcelona ni jeraha alilolipata beki Gerard Pique aliyelazimika kuondoka uwanjani katika kipindi cha pili.

Kwa mujibu wa Barcelona, Pique alipata jeraha la goti la kulia na sasa wanasubiri tathmini zaidi ya madaktari ili kubaini urefu wa muda atakaohitaji mkekani kuuguza jeraha hilo.

Ingawa hivyo, kocha Ronald Koeman amefichua kwamba huenda nyota huyo akalazimika kusalia nje kwa kipindi cha miezi sita kabla ya kurejea ugani.

Barcelona walionekana kuzidiwa maarifa kwenye takriban kila idara katika mchuano huo huku jaribio lao la pekee langoni pa Atletico kupitia kwa Clement Lenglet likidhibitiwa vilivyo na kipa Jan Oblak.

Barcelona kwa sasa wamejizolea alama 11 pekee kutokana na mechi nane za La Liga, tisa nyuma ya Sociedad ambao wameorodheshwa mbele ya Atletico kutokana na wingi wa mabao ambayo wamefunga.

Kichapo ambacho Barcelona walipokea kiliendeleza rekodi nzuri ya kutoshindwa kwa Atletico hadi kufikia sasa msimu huu na wanajivunia kutopigwa katika jumla ya mechi 24 zilizopita kwenye mashindano yote. Kwa upande wao, hicho kilikuwa kichapo cha tatu kwa Barcelona kupokezwa kutokana na mechi nane zilizopita za La Liga.

Nyota Lionel Messi aliyepangwa katika kikosi cha akiba cha Barcelona hakuchezeshwa dhidi ya Atletico ikizingatiwa kwamba alikuwa tu amerejea kambini mwa miamba hao wa Uhispania baada ya kuwa sehemu ya kikosi kilichotegemewa na Argentina kwenye mechi za kimataifa za kufuzu kwa fainali za Kombe la Dunia za 2022 nchini Qatar.

“Ulikuwa wakati wetu kushinda na hatutaruhusu sifa ambazo tutamiminiwa na vyombo vya habari kutokana na ushindi huo kutupotezea dira. Malengo yetu ya msimu huu yako dhahiri na tuko tayari kupigana hadi mwisho,” akatanguliza kocha Diego Simeone wa Atletico.

“Tuliingia ugani tukijua cha kufanya katika safu ya ulinzi ili kuzuia mashambulizi ya Barcelona na safu ya mbele ili kutatiza mabeki wao. Tulifaulu katika mpango wetu,” akaongeza raia huyo wa Argentina.

Kwa upande wake, Koeman alisema: “Kikosi cha haiba kubwa kama Barcelona hakiwezi kufungwa bao la kiaibu namna hiyo. Wachezaji walizembea na wakafanya masihara mengi katika kila idara. Hatuwezi kuruhusu utepetevu wa aina hiyo kuendelea kikosini.”

Mkufunzi huyo amewahi kuinoa timu ya taifa ya Uholanzi na klabu ya Everton.

Kivumbi Atletico Madrid wakialika Liverpool leo Jumanne

Na MASHIRIKA

MADRID, UHISPANIA

ATLETICO Madrid watakuwa leo Jumanne wenyeji wa Liverpool katika mkondo wa kwanza wa hatua ya 16-bora ya kipute cha Klabu Bingwa Ulaya (UEFA) uwanjani Wanda Metropolitano, Uhispania.

Ni patashika ambayo kocha Diego Simeone wa Atletico ameonya kwamba itatawaliwa na hisia kali kwa kuwa itawapa masogora wake jukwaa la kupima ubabe wao dhidi ya pengine kikosi bora zaidi duniani.

Katika kivumbi kingine Jumanne, Borussia Dortmund watawakaribisha Paris Saint-Germain (PSG) ugani Signal Iduna Park, Ujerumani.

Itakuwa ni mara ya tatu kwa miamba hawa kukutana tangu waambulie sare tasa kwenye mechi za mikondo miwili ya UEFA katika msimu wa 2010-11.

Dortmund waliobanduliwa na Tottenham Hotspur katika hatua hii ya 16-bora msimu jana, walikamilisha kampeni zao za Kundi F muhula huu nyuma ya Barcelona watakaovaana na Napoli wiki ijayo.

Licha ya kwamba huu ni msimu wao wa 14 katika gozi la UEFA, wanajivunia kutinga fainali mara moja (2013) na kuonja robo-fainali mnamo 2016-17.

Kufikia sasa, Atletico wanashikilia nafasi ya nne kwenye msimamo wa Ligi Kuu ya Uhispania (La Liga) kwa alama 40 sawa na Sevilla. Ingawa hivyo, ndicho kikosi cha tatu bora zaidi jijini Madrid baada ya viongozi Real na Getafe.

Kwa upande wao, Liverpool wanajivunia msimu wa kuridhisha sana ambapo kwa sasa wanahitaji alama 15 pekee kutokana na mechi 12 zilizosalia ili kutawazwa mabingwa wa Ligi Kuu ya Uingereza (EPL) kwa mara ya kwanza baada ya miaka 30.

Pengo la alama 25 linatamalaki kati ya Liverpool na mabingwa watetezi Manchester City ambao kesho watawaalika West Ham United kwa kivumbi cha EPL ugani Etihad kabla ya kunoa kucha za kuwakwaruza Real ugani Santiago Bernabeu wiki ijayo katika UEFA.

Ingawa Atletico wanapigiwa upatu wa kutikisa uthabiti wa Liverpool ambao ni mabingwa watetezi wa UEFA, huenda kibarua hicho cha leo kikawa kigumu hasa ikizingatiwa wingi wa visa vya majeraha kambini mwa kocha Simeone.

Mbali na Kieran Trippier anayeuguza jeraha la paja, nyota Joao Felix pia atakosa kuwasakatia Atletico kutokana na tatizo la goti. Chipukizi huyo mwenye umri wa miaka 20 alisajiliwa kutoka Benfica kwa kima cha Sh16 bilioni mwishoni mwa msimu uliopita.

Kutokuwepo kwa Diego Costa atakayesalia mkekani kwa wiki tatu, kutamweka Simeone katika ulazima wa kumtegemea pakubwa fowadi wa zamani wa Chelsea, Alvaro Morata ambaye amepachika wavuni zaidi ya robo moja ya mabao yote yanayojivuniwa na Atletico kwa sasa katika mapambano yote msimu huu.

Kinyume na wenyeji wao, Liverpool watakosa huduma za beki Nathaniel Clyne pekee.

HALI TETE: Roho mkononi Spurs wakialika Bayern Uefa

Na CHRIS ADUNGO

TOTTENHAM Hotspur watakuwa leo Jumanne wenyeji wa Bayern Munich katika mchuano wa Klabu Bingwa Ulaya (UEFA) ambao wanalazimika kushinda ili kuweka hai matumaini ya kutinga hatua ya 16-bora bila presha ya dakika ya mwisho.

Katika michuano mingine, mabingwa watetezi wa Ligi Kuu ya Uingereza (EPL) Manchester City watawaalika GNK Dinamo Zagreb ya Croatia huku Real Madrid wakivaana na Club Brugge ya Ubelgiji uwanjani Santiago Bernabeu, Uhispania.

Lokomotiv Moscow kutoka Urusi watamenyana na Atletico Madrid mbele ya mashabiki wao wa nyumbani, Leverkusen wawaendee Juventus jijini Turin, Italia huku PSG wakiwa wageni wa Galatasaray nchini Uturuki.

Kinyume na Bayern waliowapepeta Red Star Belgrade 3-0 katika mchuano wao wa kwanza nchini Ujerumani, Tottenham walilazimishiwa sare ya 2-2 na Olympiacos nchini Ugiriki.

Bayern ambao wamejivunia ukiritimba wa soka ya Ujerumani kwa kipindi kirefu watajibwaga ugani wakijivunia kupigwa jeki na marejeo ya wavamizi Lucas Hernandez na Ivan Perisic ambao kocha Nico Kovac amefichua kwamba atawapanga katika kikosi cha kwanza.

Hernandez aliondolewa uwanjani katika kipindi cha kwanza dhidi ya Paderborn mnamo Jumamosi baada ya kuanza kuhisi maumivu kwenye goti lake la kulia.

Japo alitarajiwa kusalia mkekani kwa kipindi kirefu zaidi, madaktari walimruhusu kushiriki vipindi viwili vya mazoezi mnamo Jumapili.

Kwa upande wake, Perisic alikosa mechi dhidi ya Paderborn kutokana na mafua. Hata hivyo, kwa sasa ameruhusiwa kuunga kikosi kitakachoelekea Uingereza kwa kibarua kizito dhidi ya Tottenham.

Perisic na Hernandez waliojiunga na Bayern msimu baada ya kuagana na Inter Milan, walikuwa sehemu ya kikosi cha kwanza cha Bayern kilichochuana na Red Star Belgrade. Mabao ya Bayern katika mchuano huo yalifumwa wavuni na Kingsley Coman, Robert Lewandowski na Thomas Muller.

Bayern na Spurs ni vikosi viwili vinavyopigiwa upatu wa kutawala kilele cha Kundi B na kusonga mbele kwa hatua ya 16-bora. Presha ya kudumisha uhai wa matumaini hayo ni jambo ambalo linatarajiwa kumkosesha kocha Mauricio Pochettino usingizi.

Chini ya Pochettino, Spurs walitinga fainali ya UEFA msimu jana ila wakazidiwa maarifa na Liverpool ambao walizamishwa 2-0 na Napoli katika mchuano wao wa kwanza.

Hivyo, ushindi kwa Bayern katika mchuano wa leo utawasaza Spurs pabaya zaidi kundini na katika hatari ya kuondolewa mapema sawa na walivyoshuhudia katika kivumbi cha Carabao Cup wiki iliyopita baada ya kudenguliwa na limbukeni Colchester.

Matokeo duni ya Spurs tangu mwanzoni mwa msimu huu kwa sasa yanamweka Pochettino katika hatari ya kutimuliwa huku waajiri wake wakifichua mipango ya kumpokeza mikoba kocha Gareth Southgate wa timu ya taifa ya Uingereza.

Dalili zote zinaashiria kwamba Pochettino anayehusishwa na uwezekano mkubwa wa kutua Manchester United, yuko tayari kuagana na Tottenham baada ya kuanza kuwa na mazoea ya kuwalaumu wachezaji wake kila mara kikosi kinaposajili matokeo duni.

Ni mara ya pili kwa Spurs kuziwania huduma za Southgate, 49, hasa ikizingatiwa kwamba waliwahi kuyataka maarifa ya mkufunzi huyo kwa mara nyingine mwishoni mwa msimu uliopita.

Hatua hiyo ilichochewa na suitafahamu kuhusu mustakabali wa Pochettino aliyekuwa akiandamwa sana na Real Madrid huku naye akisitasita kusalia Spurs kwa mwaka wa tano.

Ubovu wa mbinu

Baadhi ya wachezaji waliotaka kuondoka Spurs mwishoni mwa msimu uliopita baada ya kuchoshwa na ‘ubovu wa mbinu’ za ukufunzi za Pochettino ni Christian Eriksen, Danny Rose na Toby Alderweireld.

Chini ya Southgate, makali ya nyota Harry Kane, Dele Alli, Harry Winks, Danny Rose na Eric Dier yameimarika sana kiasi kwamba kwa sasa ndio tegemeo kubwa kambini mwa Tottenham.

Huku Bayern wakiselelea kileleni mwa jedwali la Bundesliga kwa alama 14 kutokana na mechi sita hadi kufikia sasa, Tottenham wanashikilia nafasi ya tano kwa alama 11 huku pengo la pointi 10 likitamalaki kati yao na viongozi Liverpool ambao hawajapoteza mchuano wowote kati ya saba ya ufunguzi wa kampeni za msimu huu.

Zaidi ya kutegemea maarifa ya Perisic, Bayern wanatazamiwa pia kuchuma nafuu kutokana na ukubwa wa ushawishi wa mshambuliaji Robert Lewandowski anayetarajiwa kushirikiana vilivyo na sajili mpya Philippe Coutinho aliyetokea Barcelona kwa mkopo mwanzoni mwa msimu huu.

Bayern na Tottenham wamewahi kukutana mara nne katika mapambano ya awali ya Uefa.

Miamba hao wa soka ya Ujerumani walipokeza Spurs kichapo cha jumla ya mabao 5-2 katika kivumbi cha Uefa Cup Winners Cup mnamo 1982. Walipokutana tena katika raundi ya tatu ya Uefa Cup mnamo 1983-84, Spurs waliwalaza Bayern kwa jumla ya magoli 2-1.

Walipepetana tena katika kivumbi cha Audi Cup kilichoshuhudia Tottenham wakisajili ushindi wa 5-4 kupitia mikwaju ya penalti.