KDF wajengea Waboni shule ya bweni

Na Kalume Kazungu

WANAJESHI wa Kenya (KDF) wanaoendeleza operesheni ya usalama kwenye msitu wa Boni, Kaunti ya Lamu wamekabidhi shule ya kwanza ya msingi ya bweni kwa jamii ya Waboni wanaoishi eneo hilo.

Shule hiyo iliyo katika kijiji cha Mangai ni ya mseto na ina ukubwa wa kusajili karibu wanafunzi 400 kwa wakati mmoja.

Shule hiyo imekuwa ikijengwa na kikosi cha KDF kinachoshughulika na masuala ya ujenzi na miundomsingi tangu Juni mwaka huu.

Akizungumza wakati wa hafla ya kukabidhi majengo hayo yaliyojumuisha madarasa manane na mabweni mawili, Kamanda Msimamizi wa Operesheni Amani Boni, Kanali Meshack Kishoyian aliwasihi wakazi wa jamii ya Boni kutumia nafasi hiyo kutia fora masomoni.

Wakati huo huo, Bw Kishoyian alikabidhi majengo mawili mengine ya wanafunzi kusomea kwenye shule ya Bodhei Junction ambayo pia iko ndani ya msitu wa Boni.

Jumla ya shule sita hupatikana ndani ya msitu huo ulioko Lamu Mashariki. Shule hizo hata hivyo zimekuwa zikihudumia wanafunzi wa chekechea hadi darasa la nne pekee ilhali wale wa madarasa ya juu wakilazimika kusafirishwa hadi shule ya msingi ya bweni ya Mokowe Arid Zone iliyoko Lamu Magharibi.

Mwalimu Mkuu wa Shule ya Mangai, Khamis Mwaleso alisema furaha yake ni kuona wanafunzi wakisoma na kumaliza masomo yao ya msingi wakiwa shule moja badala ya kuhamishwahamishwa kwenye shule za mbali kila wanapofikia madarasa ya juu.

Mwalimu Mkuu wa Shule ya Msingi ya Bodhei Junction, Mohamed Menya, alisema kuimarishwa kwa usalama na miundomsingi kwenye shule za msitu wa Boni kumewasukuma walimu wengi kuwa na ari ya kufunza kwenye shule hizo.

Kwa upande wake aidha, Mkurugenzi wa TSC kaunti ya Lamu, Riziki Daido alisema mipango tayari inaendelea katika ofisi yake kuona kwamba idadi ya walimu wanohudumu kwenye shule za msitu wa Boni inaongezwa.

Dai serikali ilihadaa kuhusu miradi Boni

Na KALUME KAZUNGU

SERIKALI ya kitaifa imelaumiwa kwa kutokamilisha miradi mikuu iliyokuwa imepangwa kutekelezwa kwenye maeneo ambako operesheni ya usalama ya Linda Boni inaendelezwa, Kaunti ya Lamu.

Licha ya serikali kutangaza kutumia zaidi ya Sh50 bilioni katika kuendeleza operesheni ya Linda Boni kwenye msitu wa Boni, wakazi wanalalamika kuwa miradi mingi waliyoahidiwa kwamba ingetekelezwa bado imebakia kuwa ndoto.

Mnamo Septemba, 2015, serikali kuu ilizindua operesheni ya usalama ya Linda Boni, dhamira kuu ikiwa ni kuwafurusha au kuwamaliza magaidi wa Al-Shabaab wanaoaminika kujificha ndani ya msitu wa Boni.

Serikali pia ilikuwa imeahidi kwamba ingejenga barabara, kukarabati shule, viwanja vya ndege, kuwachimbia wakazi visima na hata kuwapa chakula msimu wote ambapo operesheni hiyo ingetekelezwa.

Utafiti uliofanywa na Taifa Leo kwenye vijiji mbalimbali ambako operesheni ya Linda Boni inaendelea ulibaini kuwa miundomsingi maeneo hayo bado ni duni.

Mwakilishi wa Wadi ya Basuba, ambaye pia ni msemaji wa Jamii ya Waboni, Barissa Deko aliuliza serikali zilikokwenda Sh50 bilioni za Operesheni ya Linda Boni, ikizingatiwa kuwa miundomsingi eneo lao bado ni ya kusikitisha.

“Wanasema walitumia Sh50 bilioni katika shughuli za operesheni ya Linda Boni. Fedha hizo zilienda wapi kwani barabara, shule na miundomsingi mingine bado iko katika hali duni? Waboni wanateseka kwa kukosa maji. Madarasa kwenye shule zetu za Bodhai, Pandanguo, Milimani, Basuba, Mangai, Mararani na Kiangwe yana nyufa. Hatuna madawati. Serikali ijukumike kuinua miundomsingi eneo letu,” akasema Bw Deko.

Bi Hawa Abdi alisema wanawake kwenye vijiji vya Waboni hurauka kila siku na kutembea mwendo mrefu wakitafuta maji.

Bi Abdi alisema licha ya serikali kuahidi kuchimba visima eneo lao, ahadi hiyo bado haijatimizwa.

Aliisihi serikali kuacha kucheza na maisha ya mwananchi na kuhakikisha wananchi wanaoishi kwenye maeneo ya operesheni wanainuliwa kimiundomsingi.

“Wanawake hapa msitu wa Boni tumechoka kutembea zaidi ya kilomita 20 tukitafuta maji kila siku. Watuchimbie visima kama walivyotuahidi miaka saba iliyopita,” akasema Bi Abdi.

Wakazi pia waliishinikiza serikali kukarabati barabara na viwanja vya ndege eneo hilo ili kurahisisha usafiri, ikiwemo ule wa maafisa wa usalama eneo lao.

Bw Ahmed Salim alisema wamechoka kutumia fedha nyingi wakisafiri kwa kutumia boti na mashua baharini.

Kwa upande wake aidha, Kamishna wa Kaunti ya Lamu, Irungu Macharia, alishikilia kuwa serikali inafanya kila jitihada ili kuboresha miundomsingi na maisha ya wakazi kwa jumla kwenye maeneo yote ambako oparesheni ya Linda Boni inaendelezwa.

“Hivi majuzi nilikuwa kwenye kivuko cha Kwa Omollo kilichoko msitu wa Boni. Tunajikakamua kuona kuwa kivuko hicho na pia barabara ya Witu hadi Pandanguo vinakarabatiwa. Wananchi wasiwe na shaka,” akasema Bw Macharia.

Afueni kwa shule 6 kufunguliwa baada ya miaka saba

NA KALUME KAZUNGU

AFUENI imepatikana kwa zaidi ya wanafunzi 400 wa shule sita zilizoko msitu wa Boni zilizofungwa kwa miaka saba, Kaunti ya Lamu baada ya serikali kupeleka walimu na kuzifungua shule hizo.

Katika kipindi cha juma moja tangu shule kufunguliwa kote nchini, wanafunzi wa shule za Bodhai, Basuba, Milimani, Mangai, Mararani na Kiangwe walilazimika kusalia nyumbani baada ya walimu kukosa kufika shuleni kufuatia changamoto ya usalama barabarani inayochangiwa na magaidi wa Al-Shabaab.

Mwishoni mwa juma, serikali ilipeleka zaidi ya walimu kumi kwenye shule hizo na kuamuru shule zote kufunguliwa ili wanafunzi wa msitu wa Boni wasome kama wengine.

Walimu hao walisafirishwa shuleni kupitia usafiri wa angani.

Katika mahojiano na Taifa Leo Jumatatu, Kamishna wa Kaunti ya Lamu, Irungu Macharia, alisema wameweka mikakati kabambe, ikiwemo kudhibiti vilivyo usalama kwenye vijiji vyote vya msitu wa Boni katika juhudi za kuhakikisha masomo yanaendelea eneo hilo.

Kwa zaidi ya miaka saba, shule za msitu wa Boni zimekuwa zikifungwa kila mara na kulazimu watoto kubaki nyumbani na wazazi wao kutokana na utovu wa usalama ambao umekuwa ukichangiwa na magaidi wa Al-Shabaab.

Bw Macharia aidha alishikilia kuwa msimamo wa serikali ni kuhakikisha maisha na shughuli za kawaida zinarejelewa msituni Boni, hivyo akawahimiza wazazi kuwapeleka watoto wao shuleni ili wasome kama wengine nchini.

“Tumewasilisha walimu zaidi ya kumi kwenye shule za msitu wa Boni. Kila shule inahudumiwa na walimu wawili kwani wanafunzi wengi msituni Boni ni wa chekechea hadi darasa la nne. Tumeamuru shule zifunguliwe na tunashukuru kwani wanafunzi tayari wamefika shuleni kusoma. Usalama pia umedhibitiwa vilivyo kote Boni, ikizingatiwa kuwa serikali bado inaendeleza operesheni ya usalama eneo hilo. Wazazi na wanafunzi wasiwe na shaka,” akasema Bw Macharia.

Baadhi ya wazazi,walimu na wanafunzi waliozungumza na Taifa Leo hawakuficha furaha yao baada ya shule zao kufunguliwa.

Abdallah Wakati ambaye ni mzee wa jamii ya Waboni eneo la Kiangwe alisema ombi lake ni kuona shule za eneo hilo zikiendelea kuhudumu nyakati zote ili wanafunzi wao wasome na kuhitimu kama wengine.

Kijiji cha Kiangwe kilichoko msitu wa Boni, Kaunti ya Lamu. Hatimaye watoto waliokuwa wakirandaranda vijijini eneo hilo warudi madarasani baada ya serikali kuzifungua shule sita. PICHA/KALUME KAZUNGU

“Kuna watoto wengi vijijini hapa ambao walianza kusoma zamani na walistahili wawe wamekamilisha masomo yao ya shule ya msingi. Hilo halijawezekana kutokana na kwamba shule zimekuwa zikifungwa mara kwa mara. Nafurahi kwamba hatimaye shule zetu zimefunguliwa japo kuchelewa. Ni matumaini yetu kwamba shule hizi zitaendelea kuhudumu ili wanafunzi wetu wabaki madarasani kusoma hadi wahitimu kama wengine nchini,” akasema Bw Wakati.

Farida Kokane aliisisitizia serikali kuongeza idadi ya walimu wanaohudumia shule za msitu wa Boni kwani walimu kumi pekee hawatoshi.

Bi Kokane pia aliiomba serikali kuboresha miundomsingi kwenye baadhi ya shule ili wanafunzi wawe na mahali pazuri pa kusomea.

“Shule zetu hapa msituni Boni zina changamoto ya majengo na mahali pa kukalia. Madarasa yako na nyufa zinazoficha nyoka. Pia madarasa hayana milango, ambapo wanyama wa msituni wamekuwa wakitafuta makao madarasani.  Serikali irekebishe hali duni ya shule zetu wakati inapozifungua,” akasema Bi Kokane.

Akizungumza wakati wa ufunguzi wa shule hizo, Diwani wa Basuba, Barissa Deko alishikilia kuwa ipo haja ya serikali kuanzisha kituo cha pamoja cha elimu eneo la Kiangwe ili kuhudumia wanafunzi kutoka vijiji vyote sita vya msitu wa Boni.

Alisema anaamini kuanzishwa kwa kituo hicho ambacho kitakuwa cha bweni kutamaliza kabisa matatizo ya kielimu kwenye msitu wa Boni.

“Badala ya kila mara kufungua na kisha kufunga shule zetu, ni vyema kuanzishwe kituo cha pamoja cha elimu eneo la Kiangwe. Eneo hilo linafikika kwa urahisi ikilinganishwa na vijiji vingine eneo hili la msitu wa Boni. Walimu wa kutosha wapelekwe pale. Walinda usalama pia wasambazwe pale. Wanafunzi wawe wanasoma na kulala pale. Wakifanya hivyo sidhani watoto wa jamii yetu ya Waboni watahangaika kwa kukosa masomo kila mara kama ilivyo sasa,” akasema Bw Deko.

KDF wavamia kambi ya Al Shabaab msituni Boni, waua wanne

MOHAMED AHMED NA KALUME KAZUNGU

KIKOSI maalum cha wanajeshi wa Kenya jana kilivamia kambi ya kundi la magaidi wa Al Shabaab katika msitu wa Boni, Kaunti ya Lamu, na kuwaua wapiganaji wanne na kumkamata mmoja.

Wanajeshi hao waliharibu kambi hiyo kulingana na ripoti za wadokezi wa usalama.Uvamizi huo pia ulipekea kupatikana kwa vilipuzi, maelfu ya risasi pamoja na vifaa vya mawasiliano vilivyoaminika kutumika na magaidi wa kundi hilo haramu ambao wamekuwa wakihangaisha wakazi wa Lamu.

Gaidi aliyekamatwa anahojiwa na maafisa wa usalamaKulingana na duru katika vitengo vya usalama ambao pia walitutumia picha na video ya operesheni hiyo, kundi la Al Shabaab lilizidiwa wakati wa uvamizi huo wa ghafla katika kambi hiyo msituni.

Baada ya kuwaua magaidi hao, wanajeshi wa Kenya walichoma baadhi ya vitu walivyovipatikana ndani ya kambi hiyo.

Operesheni hiyo imefanyika wiki moja tu baada ya wanachama wa Al Shabaab kujaribu kuvamia gari la maafisa wa polisi waliokuwa wakisindikiza magari ya uchukuzi wa umma eneo la Lamu.

Shambulizi hilo la Jumapili wiki jana lilizimwa na maafisa hao waliokuwa wanasafiri katika barabara ya Lamu-Gamba, eneo la Nyongoro.Tangu kutokea kwa shambulizi hilo, maafisa wa usalama wamekuwa wakiwasaka washukiwa hao wa Al shabaab, ambao waliaminika kutoka Somalia kupitia Garissa hadi Tana River.

Mshirikishi wa Kanda ya Pwani, John Elungata alithibitisha kuwa washukiwa hao wanasakwa na maafisa kufuatia tukio hilo la Nyongoro.

Akizungumza kuhusiana na hali ya usalama wakati wa msimu huu wa likizo, Bw Elungata alisema kuwa usalama umeimarishwa na kuwahakikishia wakazi wasiwe na hofu ya kundi hilo la kigaidi.

‘Vitengo vyetu vyote vimo ngangari kuhakikisha kuwa usalama upo sawa. Juzi mlisikia vile maafisa walipambana na wanamgambo. Hiyo ni kuonyesha kuwa tuko macho na tusiwe na hofu,’ akasema Bw Elungata.

Shambulizi hilo lilijiri siku chache baada ya magaidi kumteka na kumkata kichwa chifu mmoja Kaunti ya Wajir.

Sh50 bilioni zaishia msituni

Na KALUME KAZUNGU

SERIKALI imetumia zaidi ya Sh50 bilioni kukabiliana na magaidi wa Al-Shabaab katika Msitu wa Boni, Kaunti ya Lamu.

Katibu wa Wizara ya Usalama Dkt Karanja Kibicho, alifichua Alhamisi kuwa fedha hizo zimetumika katika ununuzi wa silaha ambazo zimekuwa zikitumiwa na vitengo mbalimbali vya usalama katika kukabiliana na magaidi hao.

Mnamo Septemba, 2015, serikali ilizindua operesheni kwa jina ‘Linda Boni,’ kwa lengo la kuwafurusha magaidi wa Al-Shabaab waliokuwa wakijificha ndani ya msitu huo mkubwa.

Akihutubia mkutano wa hadhara eneo la Hindi jana, Dkt Kibicho alisema kutokana na oparesheni hiyo usalama katika Kaunti ya Lamu umedhibitiwa vilivyo.

Lakini licha ya oparesheni hiyo ya usalama na miradi ya maendeleo kuanzishwa, wakazi wa Lamu bado wanakumbwa na changamoto tele.

Katika Msitu wa Boni, wakazi ambao wengi wao ni wa jamii ya walio wachache ya Waboni bado wanahangaika kwa kukosa chakula cha kutosha.

Mapema wiki hii Taifa Leo ilizuru eneo hilo na kugundua kuwa wakazi wamekuwa wakiingia msituni kujitafutia matunda ya mwitu na mizizi kwa sababu ya kukosa chakula.

Kabla ya oparesheni hiyo, shule kadha zikiwemo Milimani, Basuba, Mangai, Mararani na Kiangwe zilifungwa kutokana na mashambulizi ya Al-Shabaab.

Baada ya hali ya usalama kurejea na shule hizo kufunguliwa, masomo yamekuwa hayaendelei kikamilifu kutokana na uhaba wa walimu.

Shule hizo zinahudumia wanafunzi wa chekechea hadi darasa la nne pekee, ilhali wale wa madarasa ya juu hulazimika kuhamishwa hadi eneo la Mokowe ambalo ni mbali na Msitu wa Boni.

Changamoto nyingine inayokumba wakazi wa vijiji vingi vya Lamu ni ukosefu huduma za mawasiliano ya simu. Hii imefanya wakazi kuendelea kuishi maisha ya zamani bila kutangamana na wenzao kwenye mitandao kwani mawasiliano eneo hilo ni duni.

“Tunaziomba kampuni za mawasiliano kuweka milingoti ya mawasiliano eneo hili ili nasi tuweze kuungana na wengine katika utandawazi. Hatuwezi kujadili mambo muhimu yanayotuathiri kwani mawasiliano hapa ni duni,” akasema Bi Khadija Abatika, mkazi wa Mangai.

Vijana nao wamekuwa wakiililia serikali kuwapa ajira hasa kwenye mradi wa Lapsset kwani licha ya Lamu kuwa mwenyeji wa mradi huo, idadi kubwa ya wanaofanya vibarua ni watu kutoka kaunti zingine.

Elimu pia imekuwa tatizo kwa vijana wengi, ikizingatiwa kuwa wengi wao wameathiriwa na dawa za kulevya.

Spika wa Bunge la Kaunti ya Lamu, Bw Abdul Kassim Ahmed aliiomba serikali kuwanasua vijana wa eneo hilo kupitia kuwafadhili kimasomo.

“Rais Mstaafu Mwai Kibaki alikuwa ameahidi kwamba vijana 1,000 wa Lamu watafadhiliwa kusomea kozi zitakazowawezesha kuajiriwa katika Lapsset. Miaka mingi imepita na ni vijana 400 pekee waliofadhiliwa. Ombi letu ni kwamba vijana 600 waliobakia wateuliwe kwa awamu moja na wote wawe ni kutoka Lamu ili wafadhiliwe kusomea kozi za Lapsset,” akasema Bw Kassim.

Suala la ardhi pia bado ni changamoto kwa wakazi wa Lamu.

Lakini akihutubu jana, Dkt Kibicho aliwataka wakazi kuacha propaganda kuhusu masuala ya uongozi na badala yake kuungana na serikali ili kuhakikisha miradi ya maendeleo inayolengwa Lamu inafaulu.

“Ningewasihi wananchi wajitenge na matamshi ya kuwagawanya ambayo yanaonyesha kana kwamba serikali haifanyi kazi eneo hili. Ikumbukwe miaka mitano iliyopita, sehemu nyingi za Lamu, ikiwemo hapa Hindi, Mpeketoni na Boni zilikuwa hazikaliki kutokana na mashambulizi ya kila mara ya Al-Shabaab. Nashukuru kwamba kwa sasa Lamu ni salama,” akasema Dkt Kibicho.

Kauli yake iliungwa mkono na Mbunge wa Lamu Magharibi, Stanley Muthama, ambaye alimshukuru Rais Uhuru Kenyatta kwa kujitolea kuona kwamba watu wa Lamu wanapata maendeleo na usalama.

“Tumejionea barabara zikijengwa. Bandari yetu ya Lamu pia inaendelea kujengwa. Ningewasihi watu wangu kwamba tusidanganywe,” akasema Bw Muthama.

Himizo serikali na mashirika kuwapelekea msaada wakazi wa vijiji vya Boni wanaokabiliwa na baa la njaa

Na KALUME KAZUNGU

WAKAZI wapatao 3,000 wa vijiji vya msitu wa Boni, Kaunti ya Lamu wanakabiliwa na njaa, hali ambayo imewasukuma wengi wao kujitafutia matunda na mizizi msituni kutumika kama chakula.

Vijiji vinavyokabiliwa na tatizo hilo ni pamoja na Milimani, Basuba, Mangai, Mararani, Pandanguo, Madina na Kiangwe.

Vijiji hivyo hukaliwa na jamii ya walio wachache ya Waboni.

Taifa Leo ilizuru vijiji hivyo juma hili na kubaini kuwa wakazi wengi wanalazimika kuingia msituni kuchuma matunda ya mwitu ili kulisha familia zao kutokana na uhaba wa chakula unaoshuhudiwa eneo hilo.

Wakazi walisema licha ya kujitahidi kulima mashamba yao mwaka huu, hakuna mavuno yoyote walipata kutokana na wadudu pamoja na wanyama pori waliovamia na kuharibu mimea yao.

“Hatuna chakula na maji hivyo tunalazimika kuingia msituni kuchuma matunda ili kulisha wake na watoto wetu na tusipofanya hivyo tutakufa njaa kwa sababu hakuna mavuno yoyote tulipata eneo hili,” akasema mkazi wa Milimani Bw Musa Abatika.

Naye Bi Fatma Barissa alisema watoto wao huenda wakaugua utapiamlo kutokana na kukosekana kwa lishe bora.

Ameiomba serikali na wahisani kujitolea na kupeleka misaada ya chakula vijijini mwao.

Kwa upande wake, Msemaji wa Jamii ya Waboni, Ali Sharuti ameielekezea serikali lawama kwa kukosa kutimiza ahadi ya kuwasambazia wakazi wanaoishi msitu wa Boni chakula katika kipindi chote ambacho operesheni inayoendelea – Operesheni Linda Boni – inayolenga kuangamiza na kusambaratisha wapiganaji wa al-Shabaab.

Operesheni hiyo ilizinduliwa Septemba 2015.

“Serikali ilituahidi kwamba tungepewa misaada ya chakula na mahitaji mengine ya kibinadamu kipindi chote cha operesheni. Jamii yetu kwa sasa haisaidiwi. Msitu pia wameukataza sisi kuingia kujitafutia matunda. Tungeomba wazingatie hilo na watusaidie,” akasema Bw Sharuti.

Waboni walia maisha magumu huenda yakaangamiza jamii yao

NA KALUME KAZUNGU

WAZEE kutoka jamii ya Waboni, Kaunti ya Lamu, wanaitaka serikali ya kitaifa kufikiria kuangazia sekta nyingine muhimu za maendeleo zilizolemaa eneo hilo badala ya kujikita katika suala la usalama pekee.

Wazee hao kutoka vijiji vya Pandanguo, Jima, Bar’goni na Basuba wanasema sekta nyingi, ikiwemo ile ya elimu, ukulima, uchukuzi na miundomsingi zinazidi kusambaratika kila kuchao, hatua ambayo imepelekea umaskini kukithiri miongoni mwa Waboni.

Wakizungumza na Taifa Leo katika kijiji cha Pandanguo wakati wa kikao maalum cha kujadili hali na mwelekeo wa jamii hiyo Jumanne, wazee walieleza hofu kwamba huenda jamii yao imezwe na jamii nyingine na kuangamia kabisa siku za usoni iwapo serikali haitawapiga jeki katika masuala ya maendeleo endelevu.

Mwenyekiti wa Elimu katika jamii hiyo, Bw Ali Sharuti, alisema idadi kubwa ya wanafunzi kutoka jamii ya Waboni wamefukuzwa shule na wamelazimika kubakia nyumbani na wazazi wao kwa kukosa karo.

Alieleza haja ya serikali na wafadhili kuwadhamini Waboni, ikizingatiwa kwamba tangu operesheni ya usalama ilipoamriwa vijijini mwao, wakazi hawajaweza kujiendeleza kwa namna yoyote.

Operesheni hiyo ilizinduliwa Septemba, 2015, dhamira kuu ikiwa ni kuwafurusha magaidi wa Al-Shabaab wanaoaminika kujificha ndani ya msitu wa Boni.

“Kuna zaidi ya wanafunzi 20 wa shule ya upili kutoka jamii yetu hapa Pandanguo pekee ambao wamekaa nyumbani kwa zaidi ya wiki mbili sasa baada ya kufukuzwa shuleni kwa sababu ya karo.Umaskini umekithiri. Hofu yetu ni kwamba huenda jamii yetu isambaratike kwa kukosa wa kuiendeleza siku za usoni. Kaunti na serikali kuu iangazie suala hili kwa uzito,” akasema Bw Sharuti.

Wazee wa jamii ya Waboni wakiongzwa na Bw Adan Golja wakati wa kikao cha awali kijijini Pandanguo. Wanaitaka serikali kuwasaidia. Picha/ Kalume Kazungu

Mmoja wa wazee hao, Bw Adan Golja, alisema tangu operesheni ya usalama ilipozinduliwa kwenye msitu wa Boni, wakazi hawajaweza kuruhusiwa kujitafutia kwenye msitu wao, jambo ambalo limezidisha ufukara na hali ngumu ya maisha kwa jumla.

Tangu jadi, Waboni hutambulika kwa maisha yao ya kutegemea msitu, ikiwemo kuchuma matunda ya mwituni, kuvuna asali na kuwinda wanyama pori.

“Serikali imeelekeza fikra na nguvu zake zote kwa suala la usalama ilhali sekta nyingi hapa zimefeli. Tunashukuru kwamba usalama umerejea. Watambue kuwa sisi tunahitaji kula, njaa imekithiri, watoto wetu wamekosa karo na pia barabara zetu ni mbaya. Haya ni mambo yanayofaa kuangaziwa pia,” akasema Bw Golja.

Naye Bw Hamisi Msuo aliiomba serikali kuhakikisha shule zao tano za msingi ambazo zilifungwa miaka minne iliyopita eneo la Basuba zinafunguliwa ili watoto wao waendeleze masomo kama wengine.

Shule za Basuba, Milimani, Mangai, Mararani na Kiangwe zimesalia kufungwa tangu 2014 kufuatia visa vya mashambulizi ya mara kwa mara kutoka kwa magaidi wa Al-Shabaab.

Hali hiyo ilipelekea walimu waliokuwa wakihudumu kwenye shule hizo kutoroka kwa kuhofia usalama wao.

Waboni pia waliisisitizia serikali kuboresha barabara zao, ikiwemo ile ya Witu hadi Pandanguo na ile ya Hindi, Basuba hadi Kiunga ambazo ziko katika hali duni.

Wakazi wafokewa kuficha Al Shabaab msituni Boni

NA KALUME KAZUNGU

WAKAZI wa maeneo ambako kumekuwa kukitekelezwa mashambulizi na mauaji ya mara kwa mara na magaidi wa Al-Shabaab kaunti ya Lamu na sehemu za mpakani mwa Lamu na Somalia wamekashifiwa kwa kuwaficha magaidi wanaoendeleza mashambulizi hayo.

Afisa wa operesheni ya usalama inayoendelezwa kwenye msitu wa Boni ambaye pia ni Kamishna wa Lamu, Joseph Kanyiri, anasema wakazi kwenye maeneo husika wamekuwa wakificha taarifa kuhusu kuonekana kwa magaidi kwenye maeneo yao ilhali wengine wakiwaficha magaidi hao kwenye nyumba zao.

Katika mahojiano ya kipekee na Taifa Leo Jumatano, Bw Kanyiri alisema hatua hiyo ni kizingiti kikuu katika kukabiliana na kuwamaliza Al-Shabaab ndani ya msitu wa Boni.

Alisema hulka ya wakazi ya kushirikiana na wahalifu pia inalemaza juhudi za kuafikiwa kwa amani na utulivu kaunti ya Lamu.

Alisema inasikitisha kwamba baadhi ya wakazi hasa kwenye sehemu za Bar’goni, Bodhei, Milihoi na maeneo mengine ambayo Al-Shabaab wamekuwa wakishambulia wamekuwa wakijidai kutokuwa na ufahamu na wale wanaoendeleza mashambulizi hayo.

Bw Kanyiri akihutubia umma mjini Lamu. Anasema wakazi wanashirikiana na Al-Shabaab na kukataa kutoa ripoti kwa walinda usalama. PICHA/KALUME KAZUNGU

Alisema idara ya usalama iko na ripoti kuwahusu majasusi na wafadhili wa Al-Shabaab miongoni mwa jamii za maeneo husika.

Alitaja shambulizi la hivi majuzi dhidi ya gari la maafisa wa jeshi (KDF) eneo la Kwa Omollo kwenye barabara kuu ya Bodhei kuelekea Bar’goni kuwa dhihirisho tosha kwamba jamii imekuwa ikihusika moja kwa moja katika kuwasaidia Al-Shabaab kutekeleza mashambulizi.

Jumla ya maafisa sita wa KDF waliuawa ilhali wengine watano wakijeruhiwa vibaya wakati wa shambulizi hilo la kilipuzi cha kutegwa ardhini.

Bw Kanyiri alitoa tahadhari kwa jamii kujiepusha kushirikiana na Al-Shabaab.

“Ukitafakari jinsi shambulizi hilo lilivyotekelezwa utatambua bayana kwamba jamii inahusika moja kwa moja. Wao ndio wanaopeana habari punde gari la KDF au polisi linapopita maeneo husika ili kuwapa nafasi Al-Shabaab kuandaa mashambulizi yao.

Hayo ni mambo yasiyofaa. Ni vyema jamii kushirikiana na walinda usalama. Watoe ripoti kwa walinda usalama wetu ili kudhibiti usalama wa eneo hili. Ikiwa hakuna ushirikiano basi itakuwa vigumu kukabiliana na kumaliza vita dhidi ya Al-Shabaab Lamu,” akasema Bw Kanyiri.

Red Cross yawafadhili Waboni kwa biashara na kilimo

NA KALUME KAZUNGU

SHIRIKA la Msalaba Mwekundu limezindua mpango maalum unaolenga kuisaidia jamii ya Waboni katika kaunti ya Lamu kubadili maisha kwa kuwafadhili kibiashara, kilimo na uvuvi.

Tangu jadi, wakazi wa jamii ya Waboni wamekuwa wakitegemea maisha ya msituni, ambapo shughuli zao ni kuwinda wanyama pori, kuvuna asali pamoja na kuchuma matunda ya mwituni.

Aidha tangu 2015 baada ya serikali ya kitaifa kuzindua operesheni ya Linda Boni inayolenga kuwafurusha au kuwamaliza magaidi wa Al-Shabaab ndani ya msitu wa Boni, jamii hiyo haijaruhusiwa kuendeleza shughuli kama kawaida kutokana na sababu za kiusalama.

Akizungumza na Taifa Leo ofisini mwake Jumatano, Mshirikishi Mkuu wa Shirika la Msalaba Mwekundu tawi la Lamu, Bi Kauthar Alwy, alisema tayari wamelenga zaidi ya familia 1000 kutoka vijijiji vyote vya Waboni ili kuzifadhili kibiashara, ukulima na uvuvi.

Vijiji vinavyolenga ni Basuba, Milimani, Mararani, Mangai, Kiangwe, Bodhei, Pandanguo,  Ndununi, Ingini, Ishakani, Madina na Bar’goni.

Kulingana na Bi Kauthar, mradi huo unalenga hasa kuwawezesha Waboni kuacha maisha ya kuwinda wanyama, kutafuta asali na kuchuma matunda ya mwituni na badala yake kugeukia maisha ya kisasa, ikiwemo kilimo, biashara na uvuvi.

“Waboni wamekuwa wakiteseka hasa tangu kuzinduliwa kwa operesheni inayoendelea ya Linda Boni. Hawawezi kutegemea msitu wao tena ili kuendeleza uvunaji asali, uwindaji wanyama pori au matunda ya mwituni kama desturi yao.

Hii ndiyo sababu Shirika la Msalaba Mwekundu likaibuka na mpango huo wa kuwafadhili Waboni kwa uvuvi, kilimo na biashara. Lengo letu ni kuiwezesha jamii ya Waboni kujikimu maishani badala ya kutegemea misaada ya serikali. Mradi pia unalenga kuinua maisha ya Waboni kwa jumla,” akasema Bi Kauthar.

Ufadhili wa kilimo unatekelezwa kwenye vijiji vya Basuba, Milimani, Mararani, Mangai, Kiangwe, Bodhei na Pandanguo ilhali ule wa biashara unatekelezwa kwa Waboni wanaoishi kijijini Bar’goni.

Shirika hilo pia limetoa vifaa vya uvuvi kwa Waboni wanaoishi vijiji vinavyopakana na Bahari Hindi, ikiwemo Ishakani, Kiangwe, Ndununi, Ingini na Madina.

Mradi huo aidha umepongezwa na wakazi wa jamii ya Waboni ambao hawakuficha furaha yao kufuatia ufadhili huo.

Mzee wa kijiji cha Pandanguo, Bw Aden Golja, alisema wamepokea chakula, mbegu na pembejeo kutoka kwa shirika hilo na tayari wameanza shughuli za upanzi.

“Tumefurahia ufadhili huo na kila mmoja wetu tayari anaendelea kujituma mashambani. Pia tumepokea msaada wa chakula kitakachotusaidia kuendeleza kilimo eneo letu,” akasema Bw Golja.

Waboni waitaka serikali iwajengee shule ya bweni

NA KALUME KAZUNGU

JAMII ya Waboni sasa inaitaka serikali kubuni shule moja ya bweni itakayohudumia zaidi ya wanafunzi 400 kutoka vijiji vyote vya wadi ya Basuba, Kaunti Ndogo ya Lamu Mashariki.

Kwa zaidi ya miaka mine sasa, wanafunzi wa Wadi ya Basuba, ambao wote ni kutoka jamii ya walio wachache ya Waboni hawajakuwa wakisoma ipasavyo kutokana na hali duni ya usalama eneo hilo inayochangiwa na magaidi wa Al-Shabaab.

Licha ya serikali kufanya juhudi na kupeleka walimu eneo hilo, hali ya masomo haijaweza kuendelea kama ilivyotarajiwa huku shule zote tano za msingi, ikiwemo Basuba, Milimani, Mangai, Mararani na Kiangwe zikihudumia wanafunzi wa chekechea (ECDE) pekee.

Wakizungumza na wanahabari mwishoni mwa juma, Mwakilishi wa Wadi ya  Basuba, Bw Deko Barissa na wazee wa jamii hiyo walisema ni changamoto kwa wanafunzi kutoka jamii ya Waboni kuendeleza masomo yao, ikizingatiwa kuwa eneo lao limekuwa likikabiliwa na changamoto za usalama zinazochangiwa na Al-Shabaab.

Mwakilishi wa Wadi ya Basuba, Bw Deko Barissa wakati wa mahojiano na Taifa Leo. Picha/ Kalume Kazungu

Waliitaka serikali kuanzisha shule ya bweni eneo la Kiangwe ili kuhudumia wanafunzi wa vijiji vitano vya Basuba.

Kadhalika waliitaka serikali kubuni kambi ya polisi au jeshi karibu na kituo hicho cha elimu ili kukiwezesha kuendelea kuhudumia wanafunzi eneo hilo na kuzuia kituo hicho kufungwa kama inavyoshuhudia kwa shule tano za Basuba.

“Ni dhahiri kwamba serikali imeshindwa kabisa kudhibiti usalama Basuba. Shule zetu hazifanyi kazi. Wanafunzi wengi bado wako majumbani. Walimu wenyewe walioajiriwa  na Tume ya Kuajiri walimu (TSC) hakuna.

Ombi letu kwa serikali ni kwamba ibuni kituo kimoja pekee cha elimu katika eneo la Kiangwe ili kuhifadhi wanafunzi wote kutoka Wadi ya Basuba. Ulinzi wa kutosha uwekwe ili wanafunzi wetu pia wasome kama wenzao kutoka maeneo mengine ya Kenya,” akasema Bw Deko.

Mkuu wa Polisi, Joseph Boinnet wakati alipotembelea jamii ya Waboni wanaoishi eneo la Basuba, Kaunti Ndogo ya Lamu Mashariki. Picha/ Kalume Kazungu

Naye Mwenyekiti wa Baraza la Wazee wa jamii ya Waboni, Ali Gubo, alisema anaamini ikiwa kituo hicho kimoja cha elimu kitabuniwa kitasaidia kutatua tatizo la walimu kudinda kuhudumu eneo la Basuba.

Alisema eneo la Kiangwe litakuwa rahisi kufikiwa hasa kwa kupitia usafiri wa boti baharini ikilinganishwa na wakati huu ambapo usafiri wa barabarani ni changamoto.

Kwa mara kadhaa,maafisa wa usalama na raia wamepoteza maisha wakati wanapotumia barabara kuu ya Hindi kuelekea Basuba na Kiunga kutokana na hulka ya Al-Shabaab ya kutega magari barabarani na kuyalipua kwa mabomu ya ardhini.

“Ikiwa kituo cha elimu kitabuniwa Kiangwe itakuwa rahisi kwa walimu kukubali kuhudumu huko.Eneo lenyewe ni salama ikilinganishwa na sehemu zingine za Basuba. Serikali ibuni kituo hicho ili watoto wetu wasome kwa dhati,” akasema Bw Gubo.

Bi Khadija Gurba pia aliitaka serikali kuanzisha mpango wa lishe shuleni kwa wanafunzi wa Basuba hasa iwapo ombi la kujengwa kwa kituo kimoja cha elimu litakubalika.

Mwenyekiti wa Baraza la Wazee wa jamii ya Waboni, Ali Gubo wakati wa mahojiano na Taifa Leo. Picha/ Kalume Kazungu

Alisema watoto wengi eneo hilo hutoka kwa familia zisizojiweza. Jamii ya Waboni hutegemea msitu, ambapo huwinda wanyama, kuvuna asali na kuchuma matunda ya mwituni kama kitega uchumi chao.

Aidha tangu serikali ilipoanzisha operesheni ya Linda Boni ili kuwafurusha Al-Shabaab wanaoaminika kujificha msituni, jamii ya Waboni imekatazwa kuendeleza shughuli ndani yam situ wao.

Bi Gura alisema mpango wa lishe shuleni utawezesha wanafunzi kubakia shuleni kusoma na pia kuongeza idadi ya mahudhurio darasani.

“Sisi hutegemea uwindaji wanyama pori,uchumaji matunda ya mwituni na uvunaji asali.Serikali bado imetufungia nje ya msitu wetu wa Boni.Watoto wetu hawana chakula. Ikiwa serikali iko na nia njema kwa Waboni,basi ianzishe mpango wa lishe shuleni kwa wanafunzi wetu.

Watoto wetu kwa sasa hawawezi kubaki darasani kumsikiza Mwalimu akiwafundisha wakati njaa inawasumbua tumboni,” akasema Bi Gurba.

Msako dhidi ya Al-Shabaab msituni Boni waanzishwa

NA KALUME KAZUNGU

MAAFISA wa usalama kwen-ye msitu wa Boni, Kaunti ya Lamu wameanzisha msako mkali dhidi ya magaidi wa Al-Shabaab waliojaribu kuvamia kambi ya polisi wa kushika doria mpakani (RBPU) mnamo Jumanne.

Wakati wa uvamizi huo uliotekelezwa majira ya saa nane unusu alfajiri, magaidi wapatao 20 wa Al-Shabaab waliokuwa wamejihami kwa silaha hatari walivamia kambi hiyo ya RBPU iliyoko eneo la Mangai na kuanza kufyatua risasi kila upande.

Maafisa waliokuwa kambini walijibu, hivyo ufyatulianaji mkali wa risasi ukazuka kati ya magaidi na polisi na kudumu kwa zaidi ya robo saa.

Akizungumza na Taifa Leo Jumatano asubuhi, Naibu Inspekta Mkuu wa Polisi ambaye pia ni Kamanda wa Operesheni ya Linda Boni, Douglas Kirocho, alisema afisa mmoja wa polisi alijeruhiwa begani wakati wa makabiliano hayo.

Bw Kirocho alisema baadaye magaidi walishindwa nguvu na kutorokea kwenye msitu wa Boni.

“Ilikuwa yapata majira ya saa nane unusu asubuhi ambapo magaidi wa Al-Shabaab walivamia kambi ya RBPU ya Mangai na kuanza kufyatua risasi kila upande.

Maafisa wetu walijibu mara moja na kuwashinda nguvu magaidi hao waliotokomea kwenye msitu wa Boni. Mmoja wa maafisa wetu wa polisi alijeruhiwa begani na tayari amesafirishwa kwa ndege kwa matibabu ya dharura,” akasema Bw Kirocho.

Shambulizi hilo pia lilithibitishwa na Afisa Mkuu wa Polisi (OCPD) wa Lamu Mashariki, Gideon Mugambi aliyesema usalama umeimarishwa vilivyo kwenye eneo husika na hata sehemu zingine zinazokaribiana na msitu wa Boni.

Alisema shughuli ya kuwatafuta waliotekeleza shambulizi hilo pia inaendelea kwa sasa.

Aliwataka wakazi eneo hilo kushirikiana na maafisa wa usalama na kupiga ripoti iwapo watashuhudia tukio au mtu yeyote wanayemshuku kuwa kero kwa usalama wa taifa.

“Maafisa wa usalama ni wengi kabisa ndani ya msitu wa Boni na maeneo yanayokaribiana. Ningewasihi wananchi kuwa macho na kutupasha ripoti iwapo watashuhudia wahalifu wakikaribia maeneo yao,” akasema Bw Mugambi.

Juhudi za kukabiliana na Al-Shabaab msituni Boni ziongezwe – Viongozi wa Lamu

Mbunge wa Lamu Mashariki, Sharif Athman akiohijwa na Taifa Leo. Picha/ Kalume Kazungu

NA KALUME KAZUNGU

VIONGOZI wa kaunti ya Lamu wanaitaka serikali ya kitaifa kuongeza jitihada zaidi katika makabiliano dhidi ya Al-Shabaab kwenye msitu wa Boni.

Naibu Gavana wa Lamu, Abdulhakim Aboud na Mbunge wa Lamu Mashariki, Athman Sharif, wameeleza haja ya serikali kutia makali vita dhidi ya Al-Shabaab ili kurejesha amani na utulivu katika Wadi ya Basuba na sehemu zote za mpakani mwa Lamu na Somalia.

Wakizungumza na wanahabari Jumapili, viongozi hao walikiri kuwa masuala mengi ya kimsingi, ikiwemo elimu hayajakuwa yakitekelezwa ipasavyo hasa kwenye eneo la Basuba kufuatia hali duni ya usalama inayochangiwa na Al-Shabaab.

Bw Aboud alisema shule zote tano za Basuba, ambazo ni Milimani, Mangai, Mararani, Kiangwe na Basuba hajizaweza kuendeleza masomo muhula wote kama inavyofanyika sehemu nyingine za nchi kufuatia ukosefu wa walimu na taharuki ya kila siku inayochangiwa na Al-Shabaab.

Alisema masomo yanayoendelea kwenye shule hizo kwa sasa ni yale ya chekechea (ECDE) pekee ilhali kaunti ikilazimika kuwahamisha baadhi ya wanafunzi hadi Kiunga na Mokowe ili kuendeleza masomo yao.

Naibu Gavana wa Lamu, Abdulhakim Aboud. Picha/ Kalume Kazungu

“Tunaloomba ni serikali kuzidisha nguvu makabiliano dhidi ya Al-Shabaab kwenye msitu wa Boni. Magaidi hao wamepelekea masomo kusambaratika eneo la Basuba.

Walimu hawataki kupelekwa kuhudumia eneo la Basuba na hiyo ni changamoto kubwa. Shule nyingi eneo hilo bado hazijafunguliwa ilhali wanafunzi wa ECDE pekee ndiop wanaendelea na masomo. Usalama ukiimarishwa, maisha ya wakazi wa Basuba pia yatarejelewa kama kawaida,” akasema Bw Aboud.

Naye Bw Sharif alieleza haja ya ushirikiano kati ya wadau wote ili kufanikisha vita dhidi ya Al-Shabaab hapa nchini.

Alisema anaamini ushirikiano uliopo kati ya serikali ya kitaifa na viongozi wa kaunti utasaidia kumaliza vita dhidi ya Al-Shabaab kote Lamu.

Bw Sharif alisema tayari wamefanya mazungumzo na idara ya usalama katika kuhakikisha usalama unadhibitiwa Basuba na Lamu kwa jumla.

“Tuzidi kushirikiana ili kuiwezesha serikali kuu kufaulisha vita dhidi ya Al-Shabaab. Ninaamini ugaidi ukimalizwa eneo hili, masomo na shughuli nyingine za maisha zitarejelewa kama kawaida,” akasema Bw Sharif.

Shule tano za Basuba zilifungwa tangu 2015 baada ya walimu waliokuwa wakihudumu eneo hilo kutoroka vitisho vya Al-Shabaab.

Aidha mapema mwaka huu, serikali kuu ilikuwa imeagiza kufunguliwa kwa shule zote za Basuba, japo kufikia sasa hatua hiyo haijatekelezwa kutokana na ukosefu wa walimu na miundomsingi duni ya elimu eneo hilo.

Wakazi wa Lamu watakiwa kupanda miti maeneo wanakoishi

NA KALUME KAZUNGU

SHIRIKA la Uhifadhi wa Misitu (KFS) katika Kaunti ya Lamu limehimiza wakazi kujihusisha na upanzi wa miti kwenye maeneo wanayoishi.

Afisa Msimamizi wa KFS eneo la Lamu, John Mbori, anasema hatua hiyo itasaidia pakubwa kupunguza visa vya uharibifu wa misitu na mazingira kwa jumla hata baada ya kuondolewa kwa marufuku iliyopo dhidi ya ukataji  miti kote nchini.

Afisa wa KFS wa kaunti ya Lamu, John Mbori. Amewataka wananchi kupanda miti kwenye makazi yao ili kukabiliana na uharibifu wa misitu ya serikali. Picha/ Kazungu Kalume

Akizungumza na Taifa Leo, Bw Mbori alisema ranchi na misitu mingi ya serikali na hata ile ya kijamii imekuwa ikiharibiwa na wakataji miti eneo la Lamu kutokana na kwamba wakazi hao hawana miti kwenye sehemu zao wanazoishi.

Alisema ikiwa kila mkazi atajitahidi kupanda na kumiliki miti yake mwenyewe, basi azma ya serikali ya kupiga marufuku ukataji miti kote nchini itafaulu hata zaidi.

Magunia ya makaa yaliyonaswa na kupelekwa katika kituo cha KFS mjini Witu. Picha/ Kalume Kazungu

“Ukataji miti ambao umekuwa ukiendelezwa kwenye misitu ya serikali na ile ya kijamii pamoja na ranchi mbalimbali hapa nchini unatokana na sababu kwamba watu hawana miti kwenye makazi yao.

Ningewahimiza wakazi kupanda miti yao wenyewe majumbani. Wakifanya hivyo itakuwa rahisi kwao kufikia asasi husika za serikali na kuomba kibali ili waweze kukata miti yao na kuuza. Ikiwa hili litaafikiwa, ninaamini ukataji miti kiholela kwenye misitu yetu ya serikali utapungua au hata kusitishwa kabisa,” akasema Bw Mbori.

Wachomaji makaa wakipakia magunia ya makaa kwenye lori la polisi baada ya kukamatwa msituni Boni. Picha/ Kalume Kazungu

Kauli ya afisa huyo inajiri siku chache baada ya idara ya usalama ya Lamu kunasa magunia zaidi ya 240 ya makaa na shehena za mbao ndani ya msitu wa Boni.

Majuma mawili yaliyopita, maafisa wa usalama pia walinasa mbao za mti aina ya Bambaru ambazo thamani yake ilikadiriwa kuwa Sh 800,000.

Mbao hizo zilinaswa eneo la Maisha Masha, tarafa ya Witu, Kaunti ya Lamu.

Mapema juma lililopita, idara ya usalama ya kaunti ya Lamu, ikiongozwa na Kamanda Mkuu wa Polisi wa eneo hilo, Muchangi kioi, ilizindua operesheni maalum inayolenga kuwasaka wachomaji makaa na wapasuaji mbao ndani ya msitu wa Boni.

Biashara haramu ya makaa inayowafaidi Al-Shabaab msituni Boni yazimwa

NA KALUME KAZUNGU

MAAFISA wa usalama katika kaunti ya Lamu wamefichua kuwa biashara haramu ya makaa na upasuaji mbao unaoendelezwa kwenye msitu wa Boni inatumika kufadhili magaidi wa Al-Shabaab.

Akizungumza wakati alipozindua operesheni kali ya kuwasaka wachomaji makaa na wapasuaji wa mbao kwenye msitu wa Boni Jumanne, Kamanda Mkuu wa Polisi wa Kaunti ya Lamu, Bw Muchangi Kioi, alisema wanabiashara wa makaa na mbao wanaoendeleza shughuli zao ndani ya msitu wa Boni wamekuwa wakiwafadhili Al-Shabaab kwa chakula na maji kupitia mapato ya biashara yao.

Hapa ndipo makaa yamekuwa yakichomewa ndani ya msitu wa Boni. Picha/ Kalume Kazungu

Bw Kioi alisema sehemu nyingi ambazo biashara ya makaa na mbao imekuwa ikiendelezwa ndani ya msitu wa Boni  na vijiji vinayokaribiana na msitu huo, ikiwemo Maleli, Pandanguo na Poromoko zimekuwa zikishuhudia uvamizi wa mara kwa mara kutoka kwa Al-Shabaab.

Wakati wa operesheni hiyo, jumla ya magunia 240 ya makaa na tani kadhaa za mbao zilinaswa kwenye maeneo ya Ziwa la Kengo, Ziwa la Taa na Maisha Masha ambayo yote yanayopatikana ndani ya msitu wa Boni.

Polisi wasimamia wakataji miti kupakia makaa ambayo wamekuwa wakichoma kwa gari lao. Picha/ Kalume Kazungu

Wachomaji makaa na wapasuaji mbao wanne pia walinaswa kwenye msako huo ilhali wengine wakifaulu kukwepa mtego wa polisi.

Bw Kioi alisema maafisa wa polisi wako macho na kwamba watashirikiana na vitengo vyote vya usalama vinavyoendeleza operesheni ya Linda Boni ili kumaliza biashara ya makaa na ukataji miti kwenye misitu yote inayopatikana Lamu.

Afisa ashtukia jinsi miti imekuwa ikikatwa kiholela katika msitu wa Boni kwa ajili ya uchomaji wa makaa kuwafaidi magaidi wa Al-Shabaab. Picha/ Kalume Kazungu

“Leo tumeamua kuzindua operesheni ya kuwasaka wachomaji makaa na wapasuaji mbao ndani ya msitu wa Boni. Tayari tumenasa magunia 240 na shehena kadhaa za mbao. Tumegundua kuwa biashara ya makaa na mbao ndani ya msitu wa Boni ndiyo inayotumiwa kuwanunulia magaidi wa Al-Shabaab chakula na maji.

Operesheni itaendelea hadi pale biashara hiyo itakapomalizwa kabisa ndani ya msitu wa Boni. Watu lazima wafahamu kwamba uchomaji makaa na ukataji mbao ni kinyume cha sheria. Marufuku ipo na lazima iheshimiwe,” akasema Bw Kioi.

Wakataji miti hawa walazimishwa kupakia magunia ya makaa ambayo wamekuwa wakichoma kwa gari la polisi. Picha/ Kalume Kazungu

Afisa huyo aidha alitoa onyo kali kwa maafisa wa usalama dhidi ya kushirikiana na wachomaji makaa na mbao katika kuendeleza biasahara hiyo kisiri.

Kwa upande wake, Afisa Msimamizi wa Shirika la Uhifadhi wa Misitu (KFS) eneo la Witu, Bw John Mbori, aliwataka wakazi, viongozi na maafisa wa usalama kushirikiana vilivyo ili kufaulisha vita dhidi ya wachomaji makaa na wakataji mbao.

Wakataji miti hawa walazimishwa kupakia jumla ya magunia 240 ya makaa ambayo wamekuwa wakichoma kwa gari la polisi. Picha/ Kalume Kazungu

“Tukiwa na ushirikiano wa dhati, ninaamini marufuku iliyopo ya ukataji mbao na uchomaji makaa itafaulu,” akasema Bw Mbori.

Operesheni hiyo imezinduliwa mwezi mmoja baada ya serikali kupitia kwa Naibu wa Rais, William Ruto, kupiga marufuku ukataji miti na uchomaji makaa kote nchini kwa siku 90 ili kuzuia athari za ukosefu wa mvua na kuhifadhi chemichemi za maji ambazo zimekuwa zikihatarishwa na kuendelezwa kwa shughuli hizo hapa nchini.

Wakazi, viongozi na maafisa wa usalama wametakiwa kushirikiana vilivyo ili kufaulisha vita dhidi ya wachomaji makaa na wakataji mbao. Picha/ Kalume Kazungu