Amri ya kubomoa jengo la gavana yakoroga seneta

Na DENNIS LUBANGA

SENETA wa Kaunti ya Nandi, Bw Kiprotich Cherargei, ametishia kushtaki Mamlaka ya Kitaifa ya Ujenzi (NCA) baada ya kuagiza kubomolewa kwa afisi ya gavana kwa msingi kuwa jengo hilo si salama.

Bw Cherargei aliikashifu NCA kwa kutaka jengo hilo libomolewe ilhali mamlaka hiyo ndiyo iliidhinisha ujenzi wake.

“Nilidhani kuwa katika uhandisi, kila awamu ya ujenzi huidhinishwa na mhandisi pamoja na mwanakandarasi. Katika hali hii ni NCA iliyoidhinisha ujenzi wa jengo hilo na sasa inataka libomolewe. Nitawashtaki kama watachukua hatua hiyo ya ubomoaji,” akasema Bw Cherargei.

Kwenye ripoti ya mapema iliyoandikwa Machi 23, 2018, NCA ilitilia shaka uthabiti na usalama wa muundo uliotumiwa kwa ujenzi huo.

Ripoti hiyo inasema usanifu ujenzi wa awali wa jengo hilo ulibadilishwa wakati ujenzi ukiendelea ili kuongeza orofa zaidi, na hivyo basi msingi wa jengo uko hatarini kuwa hafifu.

Kwenye mahojiano na Taifa Leo Jumapili, seneta huyo alimkashifu pia Gavana Stephen Sang, kwa kukubaliana na msimamo wa NCA.

“Hili jengo lilitumia zaidi ya Sh150 milioni za mlipa ushuru. Ubomoaji wake utatumia karibu Sh20 milioni au zaidi,” akasema.

Alidai uamuzi wa NCA umechochewa kisiasa ili kunufaisha watu ambao watapewa kandarasi ya ujenzi upya, akasisitiza uamuzi kama huo lazima ufanywe kwa kushirikisha maoni ya wananchi.

Aliomba utawala wa Bw Sang ujishughulishe na ujenzi wa nyumba ya gavana badala ya kujiingiza kwa mipango ya kubomoa afisi yake.

“Tuko katika awamu ya mwisho ya kupeana fedha za kaunti ambazo zilitengwa katika mwaka wa kifedha uliopita kwa hivyo inafaa tujihadhari kuhusu jinsi tunavyotumia pesa za kaunti. Sitakubali jengo hilo libomolewe. Linahitaji tu kuimarishwa zaidi,” akasema.

Waziri wa miundomsingi katika kaunti, Bw Hillary Koech, alisema serikali ya kaunti iliwaalika maafisa wa NCA kuthibitisha uthabiti wa jengo hilo wakati lilipopata nyufa.

Kaunti ilikuwa imetumia Sh124 milioni kwa ujenzi wake, na Sh10 milioni zingine zimepangiwa kutumiwa kulikamilisha.

Bw Cherargei alikanusha madai kuwa pingamizi lake linatokana na sababu za kibinafsi dhidi ya gavana akasema hana nia ya kuwania ugavana bali anataka utumizi bora wa pesa za umma.

Majumba 1,437 jijini Nairobi ni hatari kuishi – NCA

Na BERNARDINE MUTANU

Katika kipindi cha miaka miwili na nusu iliyopita, Mamlaka ya Kusimamia Ujenzi nchini )(NCA) imebaini kuwa majumba 1,437 ni hatari kuishi Jijini Nairobi.

Hii ni baada ya utafiti kufanywa na mamlaka hiyo alisema soroveya mkuu Moses Nyakiongora.

Tangu Janauri, familia kadhaa zimepoteza makao baada ya majumba walimokuwa wakiishi kubomoka Pipeline na Kariobangi kusini.

Kutokana na hilo, serikali inalenga kubomoa majumba yaliyothibitishwa kuwa hatari katika mitaa ya Imara Daima, Zimmerman na Huruma.

Kulingana na mhandisi wa serikali Bw Samuel Charagu majumba mawili yatabomolewa Zimmermna na sita Huruma.

Majumba mengi yaliyolengwa kwa ubomoaji huo hayajafikia kiwango cha ubora kilichowekwa.

Kulingana na utafiti huo, majumba 650 ni hatari sana na mengine 826 yanaaminika kutokuwa salama.

Majumba 4,879 yamechunguzwa na mengine 651 yanahitaji kuchunguzwa mara moja. Majumba 185 yamewekwa katika ramani eneo la Pipeline.

Kufikia sasa majumba 34 yamebomolewa na mengine 40 yalipatikana kuwa na hitilafu ambazo haziwezi kurekebishwa, kumaanisha kuwa yatabomolewa. Baadhi ya wamiliki wa majumba wamepewa muda wa makataa kurekebisha majumba yao.

Mnamo Jumamosi asubuhi, jumba lingine la orofa nne lilibomoka eneo la Ruai.

KeMU kuuza jengo lake ili kujiimarisha kifedha

Na OUMA WANZALA

CHUO Kikuu cha Kenya Methodist (KeMU) kimetangaza hatua ya kuuza mojawapo ya majengo yake jijini Nairobi, katika mkakati wa kupata fedha za kutosha kuendeshea shughuli zake.

Hatua hiyo inaashiria mgogoro wa kifedha ambao unavikumba vyuo vikuu kadhaa vya kibinafsi nchini kutokana na kupungua kwa idadi ya wanafunzi wanaosoma kwa mfumo wa kujifadhili.

Kwa sasa, chuo hicho kimetangaza kuuza jengo kubwa la KeMU Hub, lililo katika Barabara ya Koinange, jijini Nairobi. Jengo hilo huwa muhimu, hasa katika shughuli zake za kimasomo.

Kwenye barua kwa Meneja wa Uuzaji katika Benki ya Co-operative, Bi Jacqueline Waithaka mnamo Machi 14, Naibu Chansela katika chuo hicho Prof Oduor Okoth anasema kwamba Baraza Kuu la Usimamizi wa Chuo limepitisha uuzaji wake.

Prof Okoth alisema kwamba hatua hiyo imepelekewa na hali mbaya ya kifedha ambayo inaikabili taasisi hiyo.

“Ni uamuzi wetu kwamba uuzaji wa jengo hilo utatupa kiasi cha fedha tunachohitaji ili kulainisha shughuli na utendakazi wa taasisi hii. Baada ya uuzaji wake, tutatumia sehemu ya fedha hizo kulipia mkopo wa Sh135 milioni ambazo tulichukua kutoka kwa benki yenu mnamo Juni 2017.

Fedha zitakazobaki tutalipia madeni yetu kwa Halmashauri ya Ukusanyaji Ushuru (KRA), malimbikizi ya wahadhiri kati ya asasi zingine,” ikasema barua hiyo.

Aidha, alisema kuwa jengo hilo ni mojawapo ya mali ambayo walitumia ili kupata mkopo wa Sh1.7 bilioni.
Na ikiwa jengo hilo halitamaliza kugharamia kiasi hicho, taasisi hiyo inapanga kuuza jengo la KeMU Towers ili kumalizia kulipa mkopo huo.

Mnamo Januari mwaka huu, Tume ya Elimu ya Juu Kenya (CUE) iliagiza ukaguzi wa katika chuo hicho na Chuo cha Kikatoliki cha Afrika Mashariki (CUEA).

Kwenye barua iliyotiwa saini na aliyekuwa Waziri wa Elimu Dkt Fred Matiang’i, barua hiyo ilipendekeza taasisi hizo mbili kupewa kipindi cha mwaka mmoja kulainisha shughuli zao.

Barua ilionya kwamba huenda vikanyang’anywa vibali vyao vya kuendesha shughuli zao, ikiwa hazingetimiza kanuni hizo.

Vyuo kadhaa vilikuwa vimetumia mabilioni ya fedha kununulia majengo katika miji mikuu ili kukidhi idadi kubwa ya wanafunzi ambao wamekuwa wakiongezeka.

Baadhi vilibuni mabewa mengi katika miji mbalimbali nchini. Hata hivyo, hilo limegeuka, baada ya CUE kuweka kanuni kali katika ufunguzi wa mabewa hayo.

 

Uchungu wa manusura ndani ya jengo Ruai

Na BERNARDINE MUTANU

WATU wawili walikwama ndani ya vifusi vya jumba lililoporomoka Jumamosi asubuhi mtaani Ruai, jijini Nairobi kwa zaidi ya saa kumi.

Wakati tukienda mitamboni, watu hao walikuwa bado hawajaokolewa kutoka kwa mabaki ya jumba hilo la orofa nne huku walioponea wakiendelea kupata matibabu hospitalini.

Katibu katika Wizara ya Nyumba Bw Patrick Bucha alisema jumba lililobomoka lilikuwa limejengwa vibaya kwa sababu “lilijengwa upesi kwa sababu limo katika eneo lililotengewa upanuzi wa barabara na chini ya nyaya za stima.”

Alisema kuwa ubora wa vifaa vilivyotumiwa kujenga jumba hilo vilikuwa vya kutiliwa shaka. Pia, lilikuwa limejengwa juu ya udongo mweusi, ambao ni maarufu kwa kuhifadhi maji.

“Tunawaonya wenye majumba kuhakikisha kwamba wanahusisha wanakandarasi waliosajiliwa, wataalam na michoro ambayo imeidhinishwa na mashirika husika,” alisema Bw Bucha.

Hilo ni jumba la tatu kuripotiwa kubomoka katika muda wa wiki moja. Jumamosi, jumba la orofa lilibomoka Kariobangi na katikati mwa wiki jana, jumba lingine lilibomoka eneo la Juja.

Bw Bucha alisema Serikali imebomoa manyumba 3,000 yaliyokuwa yamejengwa chini ya mfumo wa kupitisha umeme na karibu na reli.

“Wiki hii, tulibomoa majumba 3,000 yaliyokuwa yamejengwa chini ya nyaya za stima na juu ya reli. Wiki ijayo tutaanzisha operesheni kali ya kubomoa majumba hatari. Ni vyema kwa wamiliki wake kuyabomoa kabla hatujafika,” alisema.

“Hatuwezi kuendelea kuua wananchi kwa sababu majumba yanabomoka, lazima tuchukue hatua kali dhidi ya wamiliki wa majumba hayo,” alisema, na kuongeza kuwa wizara yake itahakikisha kuwa imebuni sheria ambayo inatoa faini na adhabu kali wamiliki wa majumba kama hayo, wataalamu waliohusika katika ujenzi na wanakandarasi.

Mwakilishi wa wadi hiyo, ambaye pia ni Naibu Spika wa Bunge la Kaunti la Nairobi, alisema jumba hilo lilianza kujengwa miaka minane iliyopita lakini likakwama kwa muda.

Alisema mmiliki alionywa kulibomoa lakini akapuuza. Jumatano, lilianza kuonyesha nyufa, lakini mmiliki wake, ambaye hajatambulishwa akalifanyia ukarabati kabla ya kulipaka rangi maeneo yaliyokuwa yamebomoka.

Watu hao walikuwa ni pamoja na mhudumu wa kuitunza orofa hiyo, aliyepelekwa katika Hospitali ya Mama Lucy.

Mashirika ya uokoaji likiwemo lile la Msalaba Mwekundu, Serikali ya Kaunti ya Nairobi na Shirika la Kukabiliana na Majanga yalifika upesi kuwasaidia watu hao. Juhudi za kuwaokoa waathiriwa hao zilikuwa zikiendelea kufikia jana usiku.