Kalonzo awalilia vinara wa OKA wampe tiketi apeperushe bendera ya urais 2022

Na SAMMY WAWERU

KIONGOZI wa chama cha Wiper Kalonzo Musyoka amewalilia vinara wenza katika Okoa Kenya Alliance (OKA) kumpa tiketi ya muungano huo kupeperusha bendera ya urais uchaguzi mkuu ujao.

OKA inajumuisha Mabw Kalonzo, Musalia Mudavadi (ANC), Moses Wetangula (Ford-Kenya) na Gideon Moi (KANU).

Huku Bw Moi na ambaye ni seneta wa Baringo Alhamisi akitangaza azma yake kuwania urais 2022, Kalonzo amewahimiza vinara wenza katika OKA kumpa tiketi ya urais akihoji yeye ndiye tiba ya changamoto zinazozingira Wakenya.

“Muniombee niteuliwe kupeperusha bendera ya OKA kugombea urais. Nikiteuliwa tutafanya kazi pamoja na ndugu yangu Gideon Moi,” Bw Kalonzo akasema, akizungumza katika kongamano la KANU, Ukumbi wa Bomas, jijini Nairobi.

“Haya mambo mtuachie, mimi na Gideon,” kiongozi huyo wa Wiper akaonekana kurai vinara wenza katika OKA, akielezea uhusiano wake wa karibu na Rais wa zamani Daniel Arap Moi ambaye kwa sasa ni marehemu.

Mabw Raila Odinga (ODM), Mudavadi, Wetangula, na Isaac Ruto (Chama Cha Mashinani) ni kati ya wageni mashuhuri waliohudhuria hafla hiyo ya KANU.

Bw Odinga na Bw Mudavadi pia wameashiria kugombea urais 2022, kumrithi Rais Uhuru Kenyatta huku Naibu Rais Dkt William Ruto akiendeleza kampeni kusaka kura kuwa rais wa tano wa Jamhuri ya Kenya.

Kuongeza bei ya mafuta kunaongezea umaskini Kenya – Kalonzo

Na WINNIE ONYANDO

VIONGOZI wa kisiasa wakiongozwa na Kinara wa Wiper, Kalonzo Musyoka waliishutumu serikali vikali kwa kuongeza bei za mafuta ya taa, petroli na dizeli akiitaja kama mzigo kwa mwananchi wa kawaida.

Akihutubia wanahabari Alhamisi, Bw Musyoka alisema kuongezwa kwa bei ya mafuta, kutafanya nchi kushindwa kukabiliana na umaskini.

“Kuongezeka kwa bei za dizeli, petroli na mafuta ya taa kunaonyesha kuwa bei za bidhaa zingine pia zitapanda. Wakenya wengi tayari wanateseka na serikali inawafanya wateseke hata zaidi,” akasema Bw Musyoka.

Kwa upande mwingine, Katibu Mkuu wa Muungano wa Vyama vya Wafanyakazi (COTU), Francis Atwoli pia alisema kuwa rais anapaswa kubaini wazi kwanini bei ya mafuta imeongezwa.

“Tungependa Rais Kenyatta ajitokeze na kutoa taarifa juu ya ongezeko kwa bei za petrol, dizeli na mafuta ya taa. Anapaswa kuelezea Wakenya kwa nini bei zimepanda licha ya nchi kupambana na corona,” akasema Bw Atwoli.

Mfanyabiashara mashuhuri Jimmy Wanjigi pia aliwataka umma kuchukua hatua kuhusu kuongezeka kwa bei ya mafuta.

Haya yanajiri siku mbili baada ya Mamlaka ya Udhibiti wa Nishati na Petroli (EPRA), kutangaza bei mpya za petroli, dizeli na mafuta ya taa.

Ruto na Kalonzo kumenyana tena Ukambani

Na Pius Maundu

NAIBU Rais William Ruto anatarajiwa kumenyana tena kisiasa na kiongozi wa Wiper, Kalonzo Musyoka, kwenye uchaguzi mdogo wa wadi ya Nguu/Masumba, Kaunti ya Makueni.

Hili ni baada ya Tume Huru ya Uchaguzi na Mipaka (IEBC) kuwaidhinisha wawaniaji wa vyama vya UDA na Wiper kugombea nafasi hiyo.

Bw Eshio Mwaiwa anawania kwa tiketi ya Wiper huku Bw Daniel Musau akipigania kiti hicho kwa tiketi ya UDA.Hapo jana, wawili hao waliimarisha kampeni zao katika sehemu tofauti kwenye wadi hiyo.

Hata hivyo, waliendelea na juhudi zao huku Bw Timothy Maneno akiapa kurejea kwenye kinyang’anyiro hicho, baada ya kukosa kuidhinishwa na IEBC kuwania.

Alhamisi, tume ilikosa kumwidhinisha, ikitaja hitilafu kwenye stakabadhi zake.Kiti hicho kiliachwa wazi mnamo Juni kufuatia kifo diwani Harris Ngui kwenye ajali ya barabarani.

Kampeni za nafasi hiyo zinafanyika huku serikali ikiendelea kutekeleza kanuni za kudhibiti maambukizi ya virusi vya corona.

Jana, wawaniaji hao wawili na wafuasi wao walihudhuria ibada za maombi katika makanisa kadhaa katika wadi hiyo.

Bw Musau aliipigia debe UDA, akikitaja kuwa chama kinachokubalika na Wakenya kutokana na ushindi ambao kimepata kwenye chaguzi ndogo kadhaa ambazo zimefanyika katika sehemu tofauti nchini kwa miezi michache iliyopita.

Kalonzo amrai Shahbal arejee chamani Wiper

Na ANTHONY KITIMO

KIONGOZI wa Chama cha Wiper, Bw Kalonzo Musyoka amemrushia ndoano mfanyabiashara Suleiman Shahbal ambaye amepanga kuwania ugavana Mombasa mwaka ujao.

Akiwa katika ziara mjini humo wikendi, Bw Musyoka alisema chama chake kingependa wanachama waliokihama warudi ili washirikiane kukiimarisha.

Hayo yalitokea siku chache baada ya Taifa Leo kufichua kuwa Bw Shahbal bado hajajiunga rasmi na Chama cha ODM jinsi alivyokusudia.

Bw Musyoka alitoa wito huo pia kwa aliyekuwa Seneta wa Mombasa, Bw Hassan Omar ambaye hushirikiana na Naibu Rais William Ruto chini ya Chama cha United Democratic Alliance (UDA) anapopanga kuwania ugavana.

“Shahbal alikuwa mwaniaji wetu wa ugavana, tunamwomba arudi katika Wiper ili tuwe na chama cha nguvu. Wito wetu unamwendea pia Bw Omar ambaye amejiunga na chama kisicho na uongozi bora,” akasema Bw Musyoka.

Bw Shahbal alikuwa mwanachama wa Wiper ambacho alitumia kuwania ugavana 2013, lakini akahamia Jubilee wakati wa uchaguzi wa 2017.

Mapema mwezi uliopita, alitangaza kuhama Jubilee na kupanga kujiunga na ODM ambacho anatumai kutumia kushindania kiti cha Hassan Joho atakayekamilisha kipindi chake cha pili cha ugavana mwaka ujao.

Hata hivyo, wiki iliyopita ilifichuka kuwa bado hajajiunga rasmi na ODM.Katika mahojiano na Taifa Leo, Bw Shahbal alisema angali anaendeleza mpango wa kuhamia ODM lakini kuna masuala anayostahili kukamilisha kwa afisi ya msajili wa vyama.

Endapo atahamia chama hicho kinachoongozwa na Bw Raila Odinga, mfanyabiashara huyo atapigania tikiti ya kuwania ugavana dhidi ya Mbunge wa Mvita, Bw Abdulswamad Nassir.

Kiti hicho cha ugavana kimemvutia pia Mbunge wa Kisauni, Bw Ali Mbogo ambaye ni mwanachama wa Wiper.Ijapokuwa Bw Mbogo huegemea upande wa Dkt Ruto, alihudhuria mkutano wa kiongozi wa chama chake wikendi.Wakati huo huo,

Bw Musyoka ameashiria kufa moyo kuhusu marekebisho ya katiba kupitia Mpango wa Maridhiano (BBI).Hivi majuzi, Rais Uhuru Kenyatta na Bw Odinga wakizungumza katika hafla tofauti walisisitiza kuwa malengo ya BBI yatafanikishwa.

Mpango huo ulisitishwa baada ya Mahakama Kuu kuamua ulikuwa haramu, na waasisi wake wakakata rufaa ambayo ingali mahakamani.

“Hata ingawa BBI imepitwa na muda, tunavyoona jinsi baadhi ya viongozi wanazungumzia kuinua uchumi wa taifa kutoka kwa wananchi wa ngazi za chini inayonyesha kutakuwa na mijadala ya kisiasa ambayo itahakikisha pia madiwani wamefadhiliwa vyema ili kupanua uchumi kwa Wakenya walio mashinani,” akasema.

Bw Musyoka alikuwa amezuru Mombasa kwa maandalizi ya uchaguzi ujao ambapo alirai wanachama waliohama warudi.

Alisema chama hicho kitaendeleza mikutano kadhaa eneo la Pwani wiki hii kabla kuelekea kaunti nyinginezo nchini.

Vyama tofauti vya kitaifa vimekuwa vikikita kambi eneo hilo katika miezi ya hivi majuzi kujitafutia umaarufu huku juhudi za baadhi ya viongozi kuunda muungqno wa vyama vya Pwani zikizidi kuchelewa.

JAMVI: Kalonzo alivyowazidimaarifa magavana wa Ukambani

Na BENSON MATHEKA

Juhudi za magavana wa kaunti tatu za Ukambani kuzima kiongozi wa chama cha Wiper Kalonzo Musyoka asiwike kwenye ziara ya Rais Uhuru Kenyatta eneo lao ziligonga mwamba makamu rais huyo wa zamani alipomshawishi kiongozi wa nchi kubadilisha nia yake ya kufuta ziara hiyo.

Ikulu ilitangaza Jumatatu wiki hii kwamba Rais alikuwa ameahirisha ziara hiyo kwa sababu ya hofu ya kukiuka kanuni za kuzuia corona lakini ikasemekana ni tofauti za magavana hao na Bw Musyoka zilizofanya rais kuchukua hatua hiyo.

Magavana Alfred Mutua wa Machakos, Charity Ngilu wa Kitui na Kivutha Kibwana walikuwa wamedai kwamba Bw Musyoka alitaka kutumia miradi ambayo Rais alitembelea kupigia debe azima yake ya urais kwenye uchaguzi mkuu wa 2022 na wakaonya kuwa hawangemruhusu kufanya hivyo.

“Hatutarajii wanasiasa wasio na la kufanya kutumia ziara hiyo kuonekana wakitembea pamoja na rais,” Dkt Mutua alisema.

Inasemekana viongozi walitofautiana kuhusu miradi ambayo ilipaswa kufunguliwa na Rais, hatua ambayo ilichangia ikulu kuahirisha ziara hiyo japo ilisema ni kwa sababu ya hofu ya corona.

Duru zinasema kwamba magavana hao hawakutaka Rais Kenyatta kumuidhinisha Bw Musyoka kama msemaji wa jamii ya Wakamba.

Wamekuwa wakimlaumu Bw Musyoka kwa kutumia madiwani wa chama chake walio wengi katika mabunge ya kaunti zao kuhujumu ajenda za serikali zao.

Imeibuka kuwa baada ya Ikulu kutangaza kuwa ziara ya Rais katika kaunti za Ukambani ilikuwa imeahirishwa, Bw Musyoka alimpigia simu Rais Kenyatta na kumshawishi abadilishe nia.

Kulingana na mwandani mmoja wa kiongozi huyo wa Wiper, Rais Kenyatta alikubali na ndipo akaita mkutano wa viongozi wa Ukambani Jumanne jioni ambapo alikubali kuzuru eneo hilo kwa kuzingatia kanuni za kuzuia msambao wa corona.

“Bw Musyoka alihisi kwamba kuahirishwa kwa ziara ya Rais eneo la Ukambani mara ya tatu kungetoa taswira mbaya kwa uongozi wa eneo hilo na hasa kwake kama msemaji wa jamii na ndio sababu aliwasiliana na rais. Anafahamu kwamba magavana hao wana azima zao na wanafikiri anatumia miradi waliyoanzishwa kujipigia debe lakini sivyo,” asema mwandani huyo aliyeomba tusitaje jina lake.

Kwenye mkutano wa Jumanne jioni, Rais Kenyatta alikubali kuzuru miradi ya serikali ya kitaifa katika eneo hilo Ijumaa lakini kwa kuzingatia kanuni za corona.

Hii, kulingana na wadadisi wa siasa, ilihakikisha kwamba hatahutubia mikutano ya kisiasa jambo ambalo ni pigo kwa magavana waliotaka kumpiga kumbo Bw Musyoka.

“Kwa kufanya hivi, rais aliepuka hali ambapo viongozi wa eneo hilo wangeendeleza siasa zao za mgawanyiko mbele yake,” alisema.

Ingawa awali ziara hiyo ilipangiwa kuchukua siku mbili, ilipunguzwa kuwa ya siku moja. Rais Kenyatta alizuru jiji la kitekinolojia la Konza na bwawa la Thwake katika kaunti za Machakos na Makueni.

Ingawa ziara hiyo ilishirikisha viongozi wa kaunti hizo, Bw Musyoka alitekeleza wajibu muhimu hatua ambayo wadadisi wa siasa wanasema ilikuwa ujumbe kwamba rais anamtambua kama kigogo wa siasa eneo hilo.

“Kwa maoni yangu, magavana hao hawakuweza kuzima Bw Musyoka walivyonuia hasa Gavana Mutua na Gavana Kibwana ambao wananuia kugombea urais. Angalau Gavana Ngilu amekuwa akihimiza Musyoka kuungana na vinara wenzake wa NASA katika siasa za kitaifa,” asema mdadisi wa siasa za Ukambani Bw Nicholas Kitetu.

Mnamo Jumatano, Bw Musyoka aliungana na baadhi ya viongozi wanaomuunga mkono kuzuru miradi ya serikali ya kitaifa ambayo Rais alitembelea Ijumaa na kupuuza madai kwamba anaitumia kujipigia debe.

“Wanachoogopa ( wapinzani) ni umaarufu wa Wiper na azima yangu ya urais. Wanajua haturudi nyuma,” alisema Bw Musyoka na kuongeza kuwa ziara yake ilikuwa ya kukagua miradi hiyo kabla ya rais kuitembelea.

Kulingana na Bw Kitetu, japo Rais aliepuka kuvunja kanuni za kuzuia corona kwa kutohutubia mikutano ya kisiasa, magavana wanaompiga vita Bw Musyoka wamepata pigo.

“Hakuna kati yao anaweza kudhihirishia rais kwamba ameshinda Bw Musyoka kwa umaarufu. Hilo ni bayana. Ikiwa ni kweli Bw Musyoka alimpigia simu rais kumshawishi abadilishe nia na kuzuru eneo hilo bila kuhutubia mikutano ya kisiasa, aliwashinda magavana hao waliodhani angetumia mikutano hiyo kujipigia debe kwa umma,” asema.

Kalonzo, Kivutha waahidi kushirikiana katika maendeleo

BENSON MATHEKA NA PSCU

KIONGOZI wa chama cha Wiper, Kalonzo Musyoka, na Gavana wa Makueni Kivutha Kibwana, wamesema kwamba hawatakubali tofauti za kisiasa zivuruge miradi ya maendeleo ambayo serikali imeanzisha eneo hilo.

Viongozi hao walimwambia Rais Uhuru Kenyatta kwamba tofauti na inavyodaiwa, viongozi wa eneo la Ukambani hawajagawanyika na wanashirikiana pamoja kuimarisha maisha ya wakazi.

“Tunashukuru kwamba umekuja kuzindua na kukagua miradi katika eneo letu. Tunakuhakikishia kwamba hakuna siasa za pesa nane zitavuruga miradi hii. Tumeungana kama viongozi,” Gavana Kibwana akasema.

Rais Kenyatta alikuwa ameahirisha ziara yake Ukambani kufuatia tofauti kati ya Bw Musyoka na magavana Kibwana, Alfred Mutua(Machakos), na Charity Ngilu (Kitui). Magavana hao walimlaumu Bw Musyoka kwa kuwa na nia ya kutumia ziara hiyo kujipigia debe kisiasa hasa azima yake ya kugombea urais kwenye uchaguzi mkuu wa 2022.

Hata hivyo, aliamua kuzuru baadhi ya miradi na kuepuka mikutano ya hadhara kutokana na kanuni za kuzuia msambao wa corona.

Jana, aliandamana na magavana hao na viongozi wengine akiwemo kiongozi wa chama cha ODM Raila Odinga kukagua ujenzi wa bwawa kubwa la Thwake, kaunti ya Makueni.

Akihutubia viongozi wa Ukambani Rais Kenyatta alikariri umuhimu wa muundomsingi bora katika maendeleo akisema miradi inayoendelea ya barabara, maji na stima itasaidia kuimarisha uchumi wa Kenya.

Rais alisema kwamba kunapokuwa na muundomsingi bora, Wakenya wataweza kuendesha biashara zao, kuchuma utajiri na kubuni nafasi za ajira kwa vijana wa nchi hii.

Alishangaa kwa nini baadhi ya Wakenya wanapinga ongezeko la uwekezaji wa serikali katika miradi ya muundomsingi akisema wasiwasi wao hauna msingi.

Mizozo ya wanasiasa yaua ziara ya Uhuru Ukambani

Na CHARLES WASONGA

RAIS Uhuru Kenyatta ameahirisha ziara yake ya siku mbili eneo la Ukambani kwa kile ambacho Ikulu ilisema ni hofu ya kueneza virusi vya corona.

Hata hivyo, duru zilisema ziara hiyo amiliyoratibiwa kwanza leo, ilifutiliwa mbali kutokana na mivutano miongoni mwa viongozi wa Ukambani.

Pia viongozi hao walikuwa wametofautiana kuhusu maeneo ambako Rais Kenyatta angezuru na miradi atakayozindua.

‘Ziara hii imeahirishwa kwa sababu hatujaonyesha umoja wakati wa maandalizi yake. Tofauti hizi zinachochewa na baadhi ya wanasiasa ambao hawakuwa katika Ikulu ya Nairobi tulipokutana na Rais,’ Mbunge mmoja kutoka eneo hilo ambaye aliomba kutotajwa jina alisema jana.

Hata hivyo, kumekuwa na mgawanyiko kuhusu ziara hiyo miongoni mwa makundi mawili ya viongozi wa Ukambani.

Wao ni wanasiasa wanaoegemea mrengo wa kiongozi wa Wiper, Bw Kalonzo Musyoka na wale wanaounga mkono muungano wa kiuchumi wa Ukanda wa Kusini Mashariki mwa Kenya (SEKEB).

Wakati wa ziara hiyo, Rais Kenyatta alipangiwa kuzuru kaunti za Machakos, Makueni na Kitui. Makueni, kiongozi wa taifa alipangiwa kuzuru jiji la kiteknolojia la Konza kabla ya kukagua ujenzi wa bwawa la Thwake.

Baadaye angeongoza hafla ya uzinduzi wa barabara ya Kibwezi kwenda Kitui.Rais Kenyatta pia alikuwa ameratibiwa kukagua miradi kadhaa ya maendeleo katika kile wadadisi walisema ni kukita ushawishi wake kisiasa katika eneo hilo.

Mnamo Jumapili, Gavana wa Machakos Alfred Mutua alisema wao kama viongozi wa Ukambani wanamkaribisha Rais Kenyatta katika eneo hilo kwa matarajio ya ‘kuvuna’ maendeleo kutoka serikali kuu.

‘Tunamkaribisha Kiongozi wa Taifa kwa matarajio kwamba ziara yake italeta matunda katika eneo letu. Vile vile, hatutarajii kuwa wanasiasa wasio na kazi watatumia nafasi hiyo ili kuonekena wakitembea na Rais,’ akasema.

‘Hii ni nafasi bora kwa Rais kujionea mwenyewe changamoto ambazo zinatukumba hapa Ukumbani ili atusaidie kuzikabili chini ya muungano wa kiuchumi wa SEKEB. Ningeomba aongeze ziara hiyo ili idumu kwa siku tatu,’ akaongeza Dkt Mutua.

Mnamo Juni 25, Rais Kenyatta alizuru kaunti ya Kitui ambapo alizindua Kanisa Katoliki la Mariam Shrine of Our Lady of Protection katika eneo la Museve.

CECIL ODONGO: Tumjuavyo huyu Kalonzo, atakunja mkia tu

Na CECIL ODONGO

KINARA wa Wiper Kalonzo Musyoka anajipiga kifua bure kwa kudai kwamba, heri astaafu siasa kuliko kumuunga mkono Raila Odinga kwa mara nyingine katika uchaguzi mkuu wa 2022.

Matamshi haya ya Bw Musyoka yangetolewa na mwanasiasa mwingine, kama Naibu Rais Dkt William Ruto, basi yangekuwa na mashiko kwa kiasi fulani kutokana na umaarufu anaojivunia kwenye siasa za kitaifa.

Ingawa ni uhuru wa makamu huyo wa raia wa zamani kuwania cheo chochote cha juu kisiasa, kudai kwamba liwe liwalo lazima awe debeni kwa kutumia jina la Bw Odinga, ni kujipendekeza kwa raia kisiasa. Mwanzo, Bw Musyoka amekuwa akijisawiri kama kiongozi asiyekuwa na msimamo dhabiti; akiwasubiri wanasiasa wengine wafanye maamuzi kuhusu masuala magumu kisha afuate mkondo.

Wakati wa ghasia za baada ya uchaguzi wa 2007, Bw Musyoka – ambaye aliibuka katika nafasi ya tatu – alidai hadharani kwamba hangeungana na upande wa PNU, akitoa wito wa amani.

Siku chache baadaye, aliungana na mrengo wa Rais Mwai Kibaki na kuwaamuru wabunge wa chama chake wakati huo, ODM-Kenya, kuunga mkono serikali ya PNU.

Hadi leo wafuasi wa ODM hawajamsamehe, na wanaamini kwamba kuungana kwake na mrengo wa Bw Kibaki ndiko kulipunguza presha ya ODM kudai haki, baada ya kuhisi walipokonywa ushindi uchaguzini.

Kuelekea kura ya maamuzi ya 2010, Bw Musyoka alijizolea jina la tikitimaji baada ya kuchukua msimamo vuguvugu kuhusu mchakato wa kupata Katiba mpya ya sasa.Wakati huo akiwa waziri, mara alikuwa akisema anaipinga pamoja na mrengo wa ‘La’ wa Dkt Ruto; mara nyingine, akinukuliwa kuwa upande wa ‘Ndio’.

Haya matukio mawili ya 2007 na 2010 yanatosha kumsawiri Bw Musyoka kama kiongozi asiyekuwa na msimamo dhabiti kuhusu masuala muhimu Kitaifa. Hata yamechangia ubutu wake kisiasa hadi leo.

Ni kweli alimuunga mkono Bw Odinga 2013 na 2017, ila hilo halijamwongezea umaarufu wowote nje ya ngome yake ya Ukambani, ambako pia anakabiliwa na maasi makubwa.

Inashangaza kuwa kiongozi ambaye ana wabunge wasiozidi 20, anatangaza na kuapa hadharani kwamba hatamuunga mkono mpinzani wake; ambaye ana wabunge zaidi yake mara tatu, na ufuasi katika maeneo mengine kando na ngome yake ya Nyanza.

Aidha, Bw Musyoka kwa sasa hana gavana kwa tiketi ya Wiper eneo la Ukambani, baada ya Profesa Kivutha Kibwana kuvunja mkataba wa chama chake cha Muungano na Wiper.

Badala ya kujipiga kifua na hatimaye kulazimika kumeza maneno yake mwenyewe baadaye, Bw Musyoka anafaa kuweka mikakati ya kurejelea uongozi kwa kuwania angalau kiti cha ugavana, useneta au ubunge.

Japo wengi watafasiri hilo kama kujidunisha, angalau itamrejesha uongozini kwa mara ya kwanza tangu 2013; na kuzuia wanasiasa wengine wanaochipuka kwa nia ya kumaliza ushawishi wake Ukambani.

Ni jambo moja kutangaza kuwa unawania urais, na nyingine kushinda.Kutakuwa na faida gani Bw Musyoka awanie urais na aishie kushindwa kama 2007; au jinsi alivyobwagwa Musalia Mudavadi na ANC yake mnamo 2013?

Hata Muungano wao wa OKA pia hauna mashiko, na kumuuza kitaifa itakuwa kibarua.Heri hesabu zake zilenge kuunga mkono upande wa Dkt Ruto au Bw Odinga, kulingana na mrengo anaouona utashinda.

Hata Muungano wao wa OKA pia hauna mashiko na hata wenzake wakiamua awanie kiti cha Urais, kumuuza kitaifa kitakuwa kibarua kingine.

Siasa za sasa ni tofauti na alizozoea Bw Musyoka wakati wa utawala wa chama cha Kanu ambapo utiifu kwa Rais Daniel Arap Moi ndio ulimvunia kiongozi wadhifa wa kisiasa.

Nilikataa chanjo ya masonko nikachanjwa ile ya ‘mahasla’ – Kalonzo

Na SAMMY WAWERU

KIONGOZI wa Wiper Kalonzo Musyoka sasa amesema alipokea chanjo ya ‘mahasla’ na inayotolewa kwa kila Mkenya. Akionekana kulenga kundi fulani la wanasiasa na mabwanyenye, Bw Kalonzo alisema hakupokea chanjo ya ‘masonko’, kwa kuwa ana imani na ile ya AstraZeneca inayotolewa kwa Wakenya bila malipo.

“Nilipokea chanjo ya AstraZeneca, ya mwananchi. Niliona wengine wakipokea ya Sputnik ya Urusi ya Sh8,000. Ninahimiza Wakenya wajitokeze kuipokea, ili tushinde janga hili la Covid-19,” akasema.

Bw Musyoka alipokea chanjo Jumanne, kufuatia picha alizopakia katika kurasa zake za mitandao ya kijamii. Naibu wa Rais, Dkt William Ruto na mke wake Bi Rachael Ruto pia walipokea chanjo lakini haijabainika alichanjwa Sputnik au AstraZeneca.

Dkt Ruto alisema aliipokea pamoja na familia yake. Akitetea hatua ya kupata chanjo ya AstraZeneca, Bw Kalonzo alisema amepokea majibu ya kuridhisha wengi wakimhakikishia kwamba pia nao watafuata mkondo huo.

“Ninashangaa ikiwa mwananchi anayetegemea wilibaro kusukuma gurudumu lake la maisha atamudu chanjo iliyopokea na ‘wengine’ ya Sh17, 000,” kiongozi huyo wa Wiper akahoji, akiihimiza serikali kuzindua utoaji mkubwa wa chanjo ya AstraZeneca nchini.

‘Wilibaro’ ni kauli ambayo imekuwa ikitumiwa na kundi la Tangatanga linalohusishwa na Dkt Ruto, akisema sera zake hasa akiingia Ikulu 2022 zitakuwa kuinua mwananchi wa kawaida, yaani ‘Hasla’ ambaye mapato yake ni ya kiwango cha chini.

Bw Kalonzo ameitaka serikali kuhakikisha kufikia 2022 imechanja zaidi ya asilimia 30 ya idadi jumla ya Wakenya.

Chanjo ya AstraZeneca na inayoendelea kutolewa nchini ilizinduliwa rasmi Machi 5, 2021 na kuanza kusambazwa Machi 8.

Wahudumu wa afya, maafisa wa usalama na walimu ndio walitangulia. Serikali juma lililopita ilizindua utoaji wa chanjo hiyo kwa wazee waliofikisha miaka 58 na zaidi.

Hii kafyu inaumiza wananchi – Kalonzo

Na MWANGI MUIRURI

KINARA wa Wiper Democratic Movement amemtaka Rais Uhuru Kenyatta awajibikie utathimini upya kwa upana mikakati aliyoweka Ijumaa katika Kauntio tano akilenga kuzima makali ya Covid-19, akiitaja kuwa hasi.

Kaunti hizo ni Machakos, Nairobi, Nakuru, Kajiado na Kiambu zilizozimwa kutangamana na wengine katika Kaunti zingine 42 huku wakipewa ruhusa ya kutembea tu ndani ya mduara huo wa majimbo matano.

Bw Kalonzo alisema kuwa Rais anafaa kuelewa kuwa kuweka kafiu ya kuanzia saa mbili usiku haizingatii hali halisi ya maisha ya Wananchi wa kawaida ndani ya Kaunti hizo.

Alisema kuwa wengi katika Kaunti hizo wakifunga kazi saa kumi na moja jioni hufika kwa steji za uchukuzi wa wanakoishi mwendo wa saa kumi na mbili kisha wanangoja matatu hadi saa 12 na nusu na hatimaye msongamano wa magari unawaweka kwa barabara hadi saa mbili usiku na ina maana kuwa “unawagonganisha na maafisa wa polisi ukiwaambia wawe ndani ya nyumba saa mbili usiku.”

Alisema kuwa hakuna uchukuzi wa moja kwa moja ambao utakuweka ndani ya nyumba yako na hata madereva na makanga wa hayo magari ya uchukuzi watatatizika pakubwa wakijaribu kurejea makwao baada ya kuwasafirisha abiria katika hali hiyo.

Alisema kuwa kafyu hiyo inafaa kiusongeshwa hadi saa nne za usiku na pia kuwe na mikakati pana ya kuwapiga jeki wananchi ambao katika kaunti hizo watapoteza riziki.

“Baa zimefungwa sambamba na makanisa. Kuna kazi zimepotea na pia wanaotegemea watakaochunjwa kutoka ajira. Ni lazima kuwe na mikakati ya kuwapa kiinua mgongo kwa kuwa Katiba yetu inawapa haki ya maisha yasiyo na mahangaiko,” akasema.

Aidha, alisema kuwa raia katika kaunti hizo tano watakabiliwa na mfumko wa bei kufuatia kuzimwa kwa uchukuzi kutoka maeneo mengine hivyo basi kutatiza kupatikana kwa bidhaa muhimu sokoni hasa za kilimo.

Aidha, alisema kuwa rais anafaa kuamrisha upimaji wa halaiki kwa wenyeji katika kaunti hizo ili walio wagonjwa watambulike haraka na mapema kabla hawajasambaza virusi hivyo kwa wengine, na watibiwe bila kutozwa malipo kwa kuwa hili ni janga la kitaifa.

Aliosema kuwa Serikali inaonekana kutokuwa na sera maalum ya kupambana na janga la Covid-19 akisema kuwa hata chanjo yenyewe haina ile dharura inayofaa, huku pia kukiwa na ya mabwanyenye na ambayo inasemwa kuwa na uhakika wa utendakazi wa asilimia 91 huku ya walala hoi ikiwa na uhakika wa asilimia 76.

Bw Kalonzo alisema kuwa chanjo hiyo ya uhakika wa juu ikiuzwa kati ya Sh8, 000 na Sh11, 000 ina maana kuwa haitawezekana kufikiwa na masikini wa taifa hili hivyo basi kuzua mgawanyiko wa Wakenya kwa msingi wa hadhi katika haki ya kuafikia afya bora.

Alisema kuwa janga hili linafaa kuwa limethibitiwa kabla ya mwezi Mei kufika.

Mutua alia Kalonzo ameteka BBI Ukambani

Na Pius Maundu

GAVANA wa Machakos Dkt Alfred Mutua amemlaumu kinara wa Wiper, Bw Kalonzo Musyoka, kwa kuteka mchakato wa kurekebisha Katiba kupitia BBI katika kaunti hiyo.

Alibashiri kwamba Wakenya watakataa BBI iwapo Rais Uhuru Kenyatta na kiongozi wa ODM, Bw Raila Odinga, wataruhusu viongozi wanaootea siasa za urithi kwenye uchaguzi mkuu wa 2022 kuteka mchakato huo.

“Ikiwa yanayotendeka Machakos ndivyo ilivyo kote Kenya, basi nabashiri BBI itasambaratika. Tunatoa onyo kwa Rais na Raila Odinga kwamba viongozi wanahujumiwa katika kampeni za BBI, na wasipokuwa waangalifu Wakenya watakataa BBI. Ikiwa kitu ni kizuri kinafaa kufanywa vyema” alisema Alhamisi ofisini mwake.

Alikuwa ameandamana na madiwani 34 wa Kaunti ya Machakos ambao walilaumu kamati ya BBI kwa kuwapuuza magavana wa kaunti za Ukambani na kumtumia Bw Musyoka kupigia debe mswada wa kubadilisha katiba.

Wewe si ‘hasla’, ulikuwa karibu na Mzee Moi hata kuliko Gideon Moi, Kalonzo amwambia Ruto

Na SAMMY WAWERU

Kiongozi wa chama cha Wiper Bw Kalonzo Musyoka amemsuta Naibu wa Rais William Ruto kuhusu kauli yake ya ‘hasla’.

Makamu huyo wa zamani wa Rais amesema kutokana na jinsi Bw Ruto aliinuliwa na Rais Mstaafu, Mzee Daniel Arap Moi (ambaye kwa sasa ni marehemu) wakati akiwa Rais, hapaswi kujiweka katika kiwango cha mahasla – nembo ambayo Naibu wa Rais amekuwa akitumia kufanya kampeni kuingia Ikulu 2022 akidai ni mchakato wa kuinua walala hoi.

Bw Kalonzo alisema hayo mnamo Alhamisi katika hafla ya ukumbusho wa Mzee Moi, mwaka mmoja baada ya kufariki. Rais Uhuru Kenyatta na kiongozi wa chama cha ANC, Bw Musalia Mudavadi pia walihudhuria ukumbusho huo wa Mzee Moi.

Kulingana na Kalonzo, Dkt Ruto ni mwanasiasa ambaye alikuwa karibu sana na Rais Moi wakati akiwa mamlakani.

“Inashangaza kuona ukiendesha siasa potovu kati ya nasaba zilizowahi kuwa mamlakani na walalahoi. Ulikuwa kijana wa karibu wa Mzee Moi, hata kuliko Gedion Moi,” akasema, akielekezea Naibu Rais matamshi hayo.

Bw Kalonzo alisema joto la kisiasa linaloendelea kushuhudiwa nchini, linachangiwa na baadhi ya wanasiasa wanaoendesha siasa potovu.

Akirejelea kisa cha hivi majuzi ambapo wabunge wawili waliangushiana makonde hadharani katika hafla ya mazishi, Kalonzo amemlaumu Naibu Rais kwa kile amedai “amegeuza na kuteka mawazo ya wanasiasa wanaoendelea kumfanyia kampeni”.

Mapema juma hili, mbunge wa Mugirango Kusini, Sylvanus Osoro na mwenzake wa Dagoretti, Simba Arati walitwangana katika mazishi ya babake naibu gavana wa Kisii Joash Maangi, Mzee Abel Gongera.

Naibu wa Rais Dkt Ruto na kiongozi wa chama cha ODM, Bw Raila Odinga walihudhuria hafla hiyo ya mazishi.

Wafalme wa kudandia madaraka

Na BENSON MATHEKA

KINARA wa chama cha Amani National Congress (ANC) Wycliffe Musalia Mudavadi, anaweza kuwa mmoja wa wanasiasa wachache wanaosema ukweli wa hali halisi ya uchumi na utawala nchini.

Hata hivyo, wadadisi wanasema amezoea kudandia nyadhifa za uongozi badala ya kujitokeza kuzipigania kwa nguvu pamoja na kutetea maslahi ya Wakenya, wakiongeza kuwa kuwa Bw Mudavadi ana sifa zote za kuwa kiongozi bora lakini anachokosa ni ujasiri na mvuto wa kisiasa.

Bw Mudavadi alijiunga na siasa 1989 alipochaguliwa kuwakilisha eneobunge la Sabatia, Kaunti ya Vihiga, kufuatia kifo cha baba yake Moses Mudavadi, ambaye alikuwa mbabe wa siasa za eneo la Magharibi. Alisaidiwa katika uchaguzi huo na aliyekuwa rais, marehemu Daniel Moi ambaye alikuwa rafiki wa karibu wa baba yake.

“Musalia alitumia urafiki wa baba yake na Moi kujiunga na siasa. Ni Moi aliyemshika mkono na kumlea kisiasa,” asema mdadisi wa siasa Tom Maosa.

Anasema tangu wakati huo, Bw Mudavadi hajawahi kujisimamisha kivyake kisiasa akafaulu, na badala yake amekuwa akitegemea umaarufu wa wanasiasa wengine kuchaguliwa.

Kwenye chaguzi za 1992 na 1997, Musalia alichaguliwa kwa tiketi ya Kanu kutokana na umaarufu wa Mzee Moi. Umaarufu wa Kanu ulipofifia kwenye uchaguzi mkuu wa 2002 Moi alipokuwa akistaafu, Bw Mudavadi alipoteza kiti chake cha ubunge cha Sabatia. Wakati wa uchaguzi huo, alikuwa makamu wa rais na mgombea mwenza wa mwaniaji urais wa Kanu, Uhuru Kenyatta ambaye alikuwa chaguo la Moi.

“Ilibidi akae kwenye baridi hadi 2005 alipojiunga na Raila Odinga kupinga kura ya maamuzi ya katiba. Alikwamilia kwa Bw Odinga kwenye uchaguzi mkuu wa 2007 akiwa mgombea mwenza wake, na katika serikali ya muungano akateuliwa naibu waziri mkuu,” asema mchanganuzi wa siasa Raymond Kongo.

Kuachwa Kwenye Mataa

Kwenye uchaguzi mkuu wa 2013, Musalia alijitenga na Bw Odinga na kujiunga na chama cha United Democratic Party (UDP) alichotumia kugombea urais. Baadhi ya wadadisi wa siasa wanasema wakati huo alitarajia kunufaika na uungwaji mkono kutoka kwa Rais Kenyatta, ambaye alikuwa akikabiliwa na kesi katika Mahakama ya Kimataifa kuhusu Uhalifu (ICC).

“Kulikuwa na duru za kuaminika kwamba Uhuru alikuwa amezungumza na Mudavadi amuunge mkono kugombea urais kufuatia utata uliogubika kesi iliyomkabili ICC, lakini baada ya kushauriana kwa upana, Uhuru aliungana na Ruto,” asema Bw Kongo.

Rais Kenyatta baadaye alikiri kwamba alikuwa amepanga kumuunga mkono Bw Mudavadi lakini akabadili nia.

Kwenye uchaguzi huo wa 2013, Bw Mudavadi aligombea urais kwa tiketi ya UDP na akaibuka wa tatu nyuma ya Rais Kenyatta na Bw Odinga.

Kabla ya uchaguzi mkuu wa 2017, Bw Mudavadi aliunda chama cha ANC na akapata nguvu mpya Katibu Mkuu wa Muungano wa Wyama vya Wafanyakazi, Francis Atwoli alipomtawaza msemaji wa Waluhya na kumtwika jukumu la kupatia jamii hiyo mwelekeo wa kisiasa.

Aliungana na kiongozi wa chama cha Ford Kenya Moses Wetangula, Raila Odinga wa chama cha ODM na Kalonzo Musyoka wa Wiper kuunda muungano wa NASA kukabili Jubilee.

Kulingana na mkataba wa maelewano wa NASA, Bw Odinga angepeperusha bendera ya muungano huo kwa miaka mitano pekee na kuachia vinara wenzake kuamua mgombea urais wao kwenye uchaguzi mkuu wa 2022. Hii ingempatia Bw Musalia nafasi ya kutegemea umaarufu wa Bw Odinga iwapo angeteuliwa kupeperusha bendera ya muungano huo.

Hata hivyo, mambo yalibadilika Bw Odinga aliposikizana na Rais Kenyatta na kumuacha Bw Mudavadi na vinara wenzake kwenye mataa hadi BBI ikampa matumaini mapya.

“Musalia alijikokota kuunga mkono BBI hadi alipong’amua kwamba kuna uwezekano wa Rais Kenyatta kumuunga mkono kugombea urais baada ya mchakato huo kufaulu, au apate moja kati ya nyadhifa za uongozi zitakazobuniwa katiba ikifanyiwa mageuzi,” aeleza Bw Kongo.

Bw Mudavadi pia amekuwa akifurahia kauli ya Rais Kenyatta kwamba wakati umefika kwa jamii nyingine kuongoza mbali na Wakikuyu na Wakalenjin, na wadadisi wanasema ni kwa sababu hii anadhani anaweza kunufaika.

KALONZO ABURUTA RUTO TOPENI

Na BENSON MATHEKA

Vita vya maneno kati ya Naibu Rais William Ruto na kiongozi wa chama cha Wiper Kalonzo Musyoka kuhusu madai ya unyakuzi wa ardhi na ufisadi, vilichukua mkondo mpya jana baada ya Kalonzo kuwasilisha malalamishi kwa Mkurugenzi wa Uchunguzi wa Uhalifu (DCI).

Bw Kalonzo anataka Dkt Ruto achunguzwe kwa kueneza habari za uongo dhidi yake, matumizi mabaya ya afisi yake na kutoa matamshi ya uchochezi.

Mnamo Jumatatu, makamu wa rais huyo wa zamani alimlaumu Dkt Ruto kwa kudai alinyakua ardhi ya Idara ya Huduma ya vijana kwa Taifa (NYS) eneo la Yatta, Kaunti ya Machakos.

Alisema matamshi ya Dkt Ruto akiwa Bomet wiki jana yalikuwa ya kumchafulia jina na akaahidi kujiwasilisha kwa DCI na Tume ya Maadili na Kukabiliana na Ufisadi (EACC) achunguzwe.

Alimtaka Dkt Ruto kujiwasilisha pia ajitakase na kashfa kadhaa alizohusishwa nazo. Jana, Bw Musyoka na mawakili wake, wakiongozwa na maseneta James Orengo na Mutula Kilonzo Junior walifika katika makao makuu ya DCI kuandikisha taarifa kuhusu madai ya Dkt Ruto.

Bw Orengo alisema Bw Musyoka aliwasilisha stakabadhi kuthibitisha kwamba, alifuata sheria kupata ardhi aliyodaiwa alinyakua na ushahidi kwamba matamshi ya Dkt Ruto yalikuwa ya uchochezi.

“Ieleweke kwamba hii sio siasa na haya siyo malalamishi hewa. Ni kuhusu viongozi na maadili. Sheria inafaa kutumiwa dhidi ya viongozi wanaokiuka katiba bila kujali nyadhifa zao,” Bw Orengo alisema.

Alisema Bw Kalonzo anataka Dkt Ruto achunguzwe kwa uchochezi, kutoa matamshi ya uongo na kumchafulia jina.

“Naibu Rais ametenda kosa la uhalifu kwa kutoa matamshi ya kumchafulia jina aliyekuwa makamu wa rais. Hii ni sheria ambayo ni nadra kutumiwa. Hakuna anayeruhusiwa kupaka tope mtu mwingine katika nchi hii kwa kueneza uongo na madai yasiyo na msingi,” Bw Orengo alisema.

Wakili huyo alisema kwamba, matamshi ya Dkt Ruto yalinuiwa kuchochea Wakenya kumchukia Bw Kalonzo.

“Tabia zake ni sawa na za Trump ( aliyekuwa rais wa Amerika,Donald Trump). Lengo lake ni kusababisha migawanyiko katika nchi hii,” aliongeza Bw Orengo.

Alidai kwamba kufuatia matamshi ya Dkt Ruto, Kalonzo na seneta Mutula wamepokea vitisho wasikanyage baadhi ya maeneo nchini.

“Tumewasilisha ushahidi kwa njia ya kielektroniki pia na DCI imeahidi kumuita Naibu Rais kujibu malalamishi yetu,” Bw Orengo alisema.

Bw Kalonzo alisisitiza kuwa mtindo wa maisha wa Dkt Ruto unafaa kuchunguzwa na kwamba Naibu Rais anafaa kujieleza kuhusu madai ya unyakuzi wa ardhi na ufisadi.

“Sisi ni watu wadogo, Wakenya wa kawaida, hatumiliki ndege, ekari 100,000 za ardhi Taita Taveta, au ekari 5,000 Sugoi, hatumiliki mahoteli jijini na hatumiliki sehemu ya uwanja wa ndege wa Wilson kuegesha ndege zetu,” alisema Bw Orengo akigusia baadhi ya sakata ambazo Bw Kalonzo anataka Dkt Ruto achunguzwe dhidi yake.

Ingawa Bw Orengo alisema wanatarajia Naibu Rais kufunguliwa mashtaka katika muda wa wiki tatu, Dkt Ruto ametaja hatua ya Kalonzo kama njama ya kutumia DCI na EACC kumhangaisha kwa kutangaza azima ya kugombea urais 2022.

“Hatutawaruhusu watutishe kupitia DCI na EACC kwamba tusipofanya hivi, watafanya vile. Hii nchi ni yetu sote,” Dkt Ruto alisema.

Tuliteua Bi Kavindu kwa misingi ya sifa za uongozi – Kalonzo

Na CHARLES WASONGA

KIONGOZI wa Wiper Kalonzo Musyoka amefafanua kuwa chama hicho hakijaongozwa na nia ya kuvunja familia kwa Bi Agnes Kavindu Muthama kama mgombeaji katika uchaguzi mdogo wa useneta wa Machakos.

Akiongea alipompokeza rasmi Bi Kavindu cheti cha kuwania kiti hicho katika uchaguzi huo wa Machi 18, Bw Musyoka alisema kuwa Wiper ilizingatia tajriba na sifa za uongozi wa mwanasiasa huyo wala sio uhusiano wake wa kifamilia.

Kiti hicho kilisalia wazi kufuatia kifo cha aliyekuwa seneta wa Machakos Boniface Mutinda Kabaka.Bi Kavindu ni mke, aliyetengana, wa Seneta wa zamani wa Machakos Johnson Muthama ambaye ndiye mshirika mkuu wa Naibu Rais William Ruto kutoka eneo la Ukambani.

Bw Muthama ambaye ni kiongozi wa chama kipya cha United Democratic Alliance (UDA), ametangaza kuwa chama hicho kitadhamini mgombeaji katika uchaguzi huo mdogo.

“Tumemteua Bi Kavindu kwa sababu ni kiongozi mwenye sifa zinazolandama na sera zetu kama chama cha Wiper. Ni kiongozi mwadilifu ndio maana Rais Uhuru Kenyatta alimteua kama mwanachama wa Jopokazi la Mpango wa Maridhiano (BBI) na mwanachama wa Bodi ya Kampuni ya Maji ya Tana Athi. Hatukuongozwa na nia ya kuvuruga familia ya rafiki yetu wa zamani,” Bw Musyoka akawaambia wanahabari katika makao ya Wiper, Karen, Nairobi.

Mgombeaji wa Wiper katika uchaguzi mdogo wa wadi wa Kitise/Kithuke, Makueni Sebastian Muli Munguti pia alikabidhiwa cheti cha uteuzi na mwenyekiti wa Bodi ya Kitaifa ya Uchaguzi (NEB) ya Wiper Bi Agatha Solitei.

Bi Kavindu alipata idhini ya kupeperusha bendera ya Wiper katika uchaguzi huo mdogo wa useneta baada ya watu wengine waliotaka tiketi hiyo kujiondoa na kuapa kumuunga mkono.

Wao ni aliyekuwa Mbunge wa Kibwezi Kalembe Ndile, Mshirikishi wa kampeni za BBI Ukambani Jackson Kala na mjane wa marehemu Kabaka Bi Jeniffer Mutinda.

Bw Musyoka ambaye pia Balozi wa Serikali katika Mpango wa Amani nchini Sudan Kusini, alitumia jukwaa hilo kumshambulia Dkt Ruto kwa kupinga wazo la Rais Uhuru Kenyatta kuhusu urais wa mzunguko.

Bw Musyoka alidai kuwa Dkt Ruto alitumia asilimia 50 ya usemi aliyopewa katika serikali ya muungano wa Jubilee mnamo 2013 kuteua watu kutoka jamii yake pekee, tofauti na Rais Kenyatta.

Bi Kavindu ambaye aliwania kiti cha Mwakilishi wa Wanawake Machakos kwa tiketi ya Jubilee katika uchaguzi wa 2017 alisema kuwa alihamia Wiper kwa idhini ya Rais Kenyatta.

Tayari Chama cha Maendeleo Chap Chap (CCM), chake Gavana Alfred Mutua, kimemteua aliyekuwa Waziri wa Maji na Mbunge wa Mwala Mutua Katuku, kuwa mgombeaji wake. Nacho chama cha UDA kinapania kuteua aliyekuwa Naibu Gavana wa Machakos Benard Kiala.

Kalonzo amponda Ruto kwa kupinga wazo la urais wa mzunguko

Na CHARLES WASONGA

KIONGOZI wa Wiper Kalonzo Musyoka ndiye kiongozi wa hivi punde kuunga mkono pendekezo la Rais Uhuru Kenyatta kwamba jamii zingine, isipokuwa Wakikuyu na Wakalenjin, zinapasa kupewa nafasi kuliongoza taifa hili 2022.

Akiongea Jumatano alipoongoza hafla fupi ya kumzindua mgombeaji wa chama hicho katika uchaguzi mdogo wa useneta wa Machakos Agnes Kavindu Muthama, Bw Kalonzo alisema ni unafiki mkubwa kwa Naibu Rais William Ruto kupinga wazo hilo ilhali limewahi kuibuliwa na mwandani wake, Johntone Muthama.

Bw Musyoka pia alimkosoa Dkt Ruto kwa kudai pendekezo hilo linaendeleza ukabila ilhali yeye (Ruto) hajawahi kupendekeza uteuzi wa watu kutoka makabila mengine katika serikali hii ya Jubilee.

“Ni unafiki kwamba Ruto anapinga wazo hili zuri kutoka kwa Rais Kenyatta ilhali mheshimiwa Muthama ambaye ni rafiki yake sasa ndiye alitoa pendekezo hilo mwanzoni. Isitoshe, yeye mwenyewe alidhihirisha ukabila kati ya 2013 na 2017 wakati aligawana serikali nusu bin nusu na Rais Kenyatta,” akawaambia wanahabari.

Akaongeza: “Mheshimiwa Rais Uhuru Kenyatta alitoa kauli yenye mashiko aliposema kuwa Kenya ni taifa lenye jamii 43 ambazo zote zina haki ya kuongoza wala sio jamii mbili pekee ambazo zimetuongoza tangu uhuru 1963. Kwa hivyo, ni unafiki kwa Naibu Rais kupinga kauli hiyo na kudai anatetea Kenya isiyo na ukabila ilhali amekuwa akiendeleza ukabila huo tangu Jubilee ilipoingia mamlakani 2013,”

Bw Musyoka alidai kuwa Dkt Ruto alitumia asilimia 50 ya usemi aliyopewa katika serikali ya muungano wa Jubilee mnamo 2013 kuteua watu kutoka jamii yake pekee, tofauti na Rais Kenyatta.

“Sasa ni wazi Rasis Kenyatta ni kiongozi asiyeongozwa na ukabila wala sio Ruto ambaye sasa atakuja katika kaunti ya Machakos kuwahadaa watu wetu kwa pesa ambazo zimepatikana kwa njia zisizo za ukweli. Ikiwa kweli anapenda watu wetu wa Ukambani mbona hakutupa hata nafasi moja ya uwaziri katika serikali ya Jubilee 2013?,” akauliza.

Wakati huo huo, Bw Musyoka alifafanua kuwa chama cha Wiper hakijaongozwa na nia ya kuvunja familia kwa Bi Kavindu kwa kuamua kumpokeza tiketi yake katika uchaguzi huo mdogo wa useneta wa Machakos.

Alieleza kuwa Wiper ilizingatia tajriba na sifa za uongozi wa mwanasiasa huyo wala sio uhusiano wake wa kifamilia. Kiti hicho kilisalia wazi kufuatia kifo cha aliyekuwa seneta wa Machakos Boniface Mutinda Kabaka.

Bi Kavindu ni mke, aliyetengana, wa Seneta wa zamani wa Machakos Johnstone Muthama ambaye ndiye mshirika mkuu wa Naibu Rais William Ruto kutoka eneo la Ukambana. Bw Muthama ambaye ni kiongozi wa chama kipya cha United Democratic Alliance (UDA), ametangaza kuwa chama hicho kitadhamini mgombeaji katika uchaguzi huo mdogo.

“Tumemteua Bi Kavindu kwa sababu ni kiongozi mwenye sifa zinazolandama na sera zetu kama chama cha Wiper. Ni kiongozi mwadilifu ndio maana Rais Uhuru Kenyatta alimteua kama mwanachama wa Jopokazi la Mpango wa Maridhiano (BBI) na mwanachama wa Bodi ya Kampuni ya Maji ya Tana Athi. Hatukuongozwa na nia ya kuvuruga familia ya rafiki yetu wa zamani,” Bw Musyoka akawaambia wanahabari katika makao ya Wiper, Karen, Nairobi.

Mgombeaji wa Wiper katika uchaguzi mdogo wa wadi wa Kitise/Kithuke, Makueni Sebastian Muli Munguti pia alikabidhiwa cheti cha uteuzi na mwenyekiti wa Bodi ya Kitaifa ya Uchaguzi (NEB) ya Wiper Bi Agatha Solitei.

Bi Kavindu alipata idhini ya kupeperusha bendera ya Wiper katika uchaguzi huo mdogo wa useneta baada ya watu wengine waliotaka tiketi hiyo kujiondoa na kuapa kumuunga mkono. Wao ni aliyek,uwa Mbunge wa Kibwezi Kalembe Ndile, Mshirikishi wa kampeni za BBI Ukambani Jackson Kala na mjane wa marehemu Kabaka Bi Jeniffer Mutinda.

Bi Kavindu ambaye aliwania kiti cha Mwakilishi wa Wanawake Machakos kwa tiketi ya Jubilee katika uchaguzi wa 2017 alisema kuwa alihamia Wiper kwa idhini ya Rais Kenyatta.

“Nilihamia Wiper kwa idhini ya kiongozi wa Jubilee Rais Kenyatta na nitasalia hapa kwa baraka za kiongozi wetu Stephen Kalonzi Musyoka,” akasema huku akielezea nia ya kushinda katika uchaguzi huo wa Machi 18.

Tayari Chama cha Maendeleo Chap Chap (CCM) chake Gavana Alfred Mutua tayari kimemteua aliyekuwa Waziri wa Maji na Mbunge wa Mwala Mutua Katuku kuwa mgombeaji wake. Nacho chama cha UDA kinapania kuteua aliyekuwa Naibu Gavana wa Machakos Benard Kiala.

Hafla hiyo ya uzinduzi wa Bi Kavindu ilihudhuriwa na viongozi katika wa Wiper. Miongoni mwao ni Waziri Msaidizi wa Uchukuzi Wavinya Ndeti, Naibu Katibu Mkuu Peter Mathuki, Mbunge Mwakilishi wa Machakos Joyce Kamene na wabunge Patrick Makua (Mavoko) na Daniel Maanzo.

Uchaguzi mdogo wa useneta Machakos mtihani kwa umaarufu wa Kalonzo

Na BENSON MATHEKA

Uchaguzi mdogo wa kiti cha useneta katika Kaunti ya Machakos utakuwa mtihani kwa umaarufu wa vyama na vigogo wa kisiasa eneo la Ukambani, wadadisi wanasema.

Kiti hicho kilibaki wazi kufuatia kifo cha wakili Bonface Kabaka aliyefariki baada ya kuugua kwa muda mfupi. Tume Huru ya Uchaguzi na Mipaka (IEBC) imetangaza kwamba uchaguzi mdogo utafanyika Machi 23.

Ingawa marehemu Kabaka alichaguliwa kwa tiketi ya Chama Cha Uzalendo (CCU), kinyang’anyiro cha kujaza kiti hicho kinatarajiwa kuwa kati ya vyama vya Maendeleo Chap Chap (MCC) cha Gavana wa kaunti hiyo, Dkt Alfred Mutua, Wiper cha aliyekuwa makamu wa rais Kalonzo Musyoka na United Democratic Alliance (UDA) kinachohusishwa na aliyekuwa Seneta wa Machakos, Bw Johnstone Muthama.

Tayari Maendeleo Chap Chap imemteua aliyekuwa waziri John Mutua Katuku kupeperusha bendera ya chama hicho kwenye uchaguzi huo mdogo na inasemekana kuwa Wiper inanuia kumkabidhi tiketi Bw Jackson Kala ambaye alishindwa na marehemu Kabaka kwenye uchaguzi mkuu wa 2017.

Bw Muthama ambaye alihama chama cha Wiper anataka UDA ambayo inahusishwa na Naibu Rais William Ruto, imsimamishe aliyekuwa naibu gavana wa Machakos Benard Kiala. Inasemekana wabunge washirika wa Dkt Ruto eneo la Ukambani wanataka aliyekuwa mbunge wa Kathiani Peter Kaindi kupeperusha bendera ya UDA.

Wadadisi wanasema ingawa UDA ilisajiliwa majuzi, inaweza kuwa mwiba kwa vyama vya Wiper na Maendeleo Chap Chap, si tu katika uchaguzi mdogo huo bali katika eneo zima la Ukambani kwenye uchaguzi mkuu wa 2022.

“Uchaguzi mdogo wa useneta katika Kaunti ya Machakos utakuwa mtihani kwa umaarufu wa vyama na viongozi wa kisiasa eneo la Ukambani. Lakini kwa kuzingatia idadi ya wawaniaji ambao UDA kimevutia, ni wazi kitapatia Wiper na Maendeleo Chap wakati mgumu sana,” asema mdadisi wa siasa John Kisilu.

Chama hicho kimevutia wawaniaji kumi wakiwemo Kiala, Kaindi, mfanyabiashara wa Nairobi Gilbert Maluki na mwanasiasa Patrick Mathuki.

Wengine ni aliyekuwa diwani wa wadi ya Matungulu Magharibi Magdaline Ndawa, mhadhiri wa Chuo Kikuu cha Nairobi, John Musingi, mtaalamu wa masuala ya Bima, Bw Urbanus Ngengele, Titus Ndambuki na mwanasiasa Winfred Mutua ambaye pia aliwania kiti hicho kwenye uchaguzi mkuu wa 2017.

Kulingana na Bw Kisilu, ushawishi na ukarimu wa Bw Muthama huenda ukanufaisha chama cha UDA ikiwa kitamsimamisha mgombeaji maarufu. Inasemekana kuwa ingawa Bw Muthama anamuunga Bw Kiala, wabunge washirika wa Dkt Ruto wanasema Bw Kaindi ndiye aliye na nafasi ya kuwabwaga wapinzani.

“Muthama anataka kudhihirisha kwamba ndiye jogoo wa siasa za Ukambani lakini itategemea na atakayepeperusha bendera ya chama hicho ikizingatiwa kwamba Wiper kingali chama maarufu eneo hilo na Dkt Mutua wa Maendeleo Chap Chap angali na ushawishi akiwa gavana wa Kaunti ya Machakos,” asema Kisilu.

Anasema UDA inaweza kushinda uchaguzi huo mapema iwapo Muthama atagombea kiti hicho.Dkt Mutua amekuwa akitaka kumbandua Musyoka kama msemaji wa jamii ya Wakamba naye Muthama amekuwa akijigamba kuwa umaarufu wa Wiper ulizimika alipokihama baada ya kutofautiana na Bw Musyoka mnamo 2017.

Muthama alijiunga na Dkt Ruto na ameapa kufadhili wagombeaji wa viti mbalimbali eneo la Ukambani kwenye uchaguzi mkuu ujao. Kulingana na mchanganuzi wa siasa za Ukambani, Silas Mutuku, uchaguzi mdogo wa useneta ktika Kaunti ya Machakos utaamua ni nani aliye maarufu katika eneo hilo.

“Ninaamini Wiper ingali maarufu Ukambani kwa sasa kwa kuwa ina idadi kubwa ya Wabunge na madiwani. Hata hivyo, wimbi la kisiasa linabadilika na uchaguzi mdogo wa useneta wa Machakos utaweka umaarufu wa chama hicho kwenye mizani. Ikiwa kitashinda, itakuwa pigo kwa Muthama na washirika wa Dkt Ruto Ukambani na iwapo UDA itashinda, itakuwa pigo kwa Wiper,” asema.

Bw Musyoka anaamini kwamba Wiper kitashinda uchaguzi huo kwa kura nyingi. “ Kuna kelele nyingi za watu wanaodai eti watashinda. Hatuna wasiwasi kwamba kiti hicho ni chetu. Propaganda zao zitaambulia patupu,” asema Bw Musyoka.

Kulingana na Bw Kisilu, ushindi wa UDA utaimarisha umaarufu wa Dkt Ruto eneo hilo na kudhihirisha Muthama kuwa jogoo wa siasa Ukambani.

CECIL ODONGO: Muungano wa Kalonzo hauna ushawishi kisiasa

Na CECIL ODONGO

MUUNGANO wa kisiasa unaopangwa kati ya baadhi ya viongozi wanaoongozwa na Kinara wa Wiper Kalonzo Musyoka na mwenzake wa ANC Musalia Mudavadi hautakuwa na ushawishi wowote hapa nchini kuelekea uchaguzi wa 2022.?

Kando na Mabw Musyoka na Mudavadi, muungano huo pia unajumuisha Gavana wa Kitui Charity Ngilu kupitia chama chake cha Narc na Seneta wa Bungoma Moses Wetang’ula ambaye ni nyapara wa Ford Kenya.

Pia kuna fununu kwamba Seneta wa Baringo na kiongozi wa chama kongwe zaidi nchini Kanu Gideon Moi, yupo katika muungano huo.? Ukweli ni kwamba ushirikiano wa wanasiasa hawa japo ni mzuri kwa umoja wa nchi, si lolote si chochote kwa umaarufu wanaojivunia Naibu Rais Dkt William Ruto na Kinara wa ODM Raila Odinga.

Kwanza, itakuwa vigumu kwa wanasiasa hao kumchagua moja wao kuwania Urais mnamo 2022 kwa kuwa kila moja wao ashatangaza kuwa atakuwa debeni na hawaonekani kuwa watalegeza msimamo.

Hata iwapo wameungana kwa kweli na ushirikiano wao udumu, ubashiri uliopo ni kwamba huenda wakamchagua Bw Musyoka au Bw Mudavadi kupeperusha bendera ya muungano huo.

Wengine kama Mabw Wetang’ula na Moi pamoja na Bi Ngilu hawana ufuasi wowote wa kushinda Urais kote nchini hata wakiungwa mkono na utawala uliopo.

Kulingana na utathmini ambao umekuwa ukitolewa na wadadisi wengi wa kisiasa Mabw Musyoka na Mudavadi hawana nafasi ya kushinda urais wakilinganishwa na Bw Odinga na Dkt Ruto.

Bw Musyoka hauziki nje ya ngome yake ya kisiasa ya Ukambani ambako pia umaarufu wake unatishiwa na magavana Dkt Alfred Mutua wa Machakos na Prof Kivutha Kibwana wa Makueni.

Bw Musyoka bado anasulubishwa na Wakenya hasa wafuasi wa ODM kutokana na kitendo chake cha kuungana na Rais Mstaafu Mwai Kibaki baada ya uchaguzi tata wa 2007 ambacho kilionekana kama usaliti mkubwa.

Wafuasi wa ODM bado wanaamini Bw Odinga alipokonywa ushindi kwenye kura hiyo na hatua ya Bw Musyoka kushirikiana na PNU na kuteuliwa Makamu wa Rais ulivuruga hesabu yao zaidi.? Bw Mudavadi naye hana umaarufu wa maana Magharibi mwa nchi japo tangu uchaguzi wa 2017, amekuwa akijikakamua kujijenga kama mwanauchumi wa kuokoa taifa hili kutoka kwa kiasi kikubwa cha deni linalodaiwa.

Kwa hivyo, Mabw Mudavadi na Musyoka wana kibarua kigumu kujijenga kisiasa ili umaarufu wao uhisiwe nje ya Magharibi na Ukambani mtawalia ambako wanadai ni ngome zao.

Aidha inadaiwa kwamba msingi wa kuungana kwao ni kumzuia Dkt Ruto kuingia Ikulu. Je, wataweza hili kivipi ilhali muungano wao hata haujatangaza mwaniaji wao wa kiti cha Urais?

Kwa sasa walio na nafasi ya kushinda urais ni Bw Odinga na Dkt Ruto kutokana na umaarufu si tu katika ngome zao za Nyanza na Bonde la Ufa, bali hata katika maeneo mengine nchini.

Ingawa siasa hubadilika na husemekana siku moja ni ndefu sana kwenye ulingo wa kisiasa, huu muungano wa Mabw Musyoka na Mudavadi bado hautoshi kuzidi umaarufu wa Dkt Ruto na Bw Odinga.

Msinidharau Mswambweni – Kalonzo

Na CECIL ODONGO

KINARA wa Chama cha Wiper, Kalonzo Musyoka jana alipuzilia mbali wanaodai kwamba kiny’ang’anyiro cha kuwania ubunge wa Msambweni ni kati ya Naibu Rais Dkt William Ruto na Kinara wa ODM Raila Odinga, akisema watashanga chama chake kikinyakua kiti hicho.

Bw Musyoka alieleza imani yake kwamba mwaniaji wa Wiper, Sheikh Mohmoud Abdurahman ni mgombea maarufu ambaye atapita katikati ya mwaniaji wa ODM Omar Boga na mgombeaji huru Feisal Bader, ambaye anavumishwa na Dkt Ruto.

Uchaguzi huo utafanyika Disemba 15 huku wadadisi wakidai kuwa utakuwa jukwaa la Dkt Ruto na Bw Odinga kupimana nguvu, jinsi ilivyokuwa Kibra mwaka jana.

Chama cha Jubilee kilijiondoa kwenye uchaguzi huo ili kumuunga mkono Bw Boga, kikitaja ushirikiano wa ‘handisheki’ kati ya Bw Odinga na Rais Uhuru Kenyatta.

ODM nayo haitakuwa na wagombeaji katika chaguzi ndogo za udiwani kwenye wadi za Kahawa Wendani katika Kaunti ya Kiambu na Lake View katika Kaunti ya Nakuru.

“Tuna mgombeaji ambaye ni maarufu sana na tutampigia kampeni kali. Wale ambao wanaona ushindani huu kama kati ya Raila na Ruto watashangaa. Sisi pia ni Wakenya na tupo tayari kuhakikisha mapenzi ya raia yanatimia kwa kuwashinda wagombeaji wao. Watashangaa kwa sababu mwaniaji wetu ni mtu wa watu,” akasema.

Bw Musyoka alitoa kauli hiyo alipotoa cheti kwa Bw Abdurahman katika makao makuu ya chama hicho mtaani Karen, Nairobi.

Pia alitoa cheti hkwa mwaniaji wa Wiper kwenye uchaguzi mdogo wa wadi ya Kahawa Wendani, Derrick Mbugua na mwenzake wa Wundanyi Mbale katika Kaunti ya Taita Taveta, Stephen Charo.

‘Tutafanya kampeni kwa wawaniaji wote. Tuna kikosi imara na tutashinda,” akaongeza makamu huyo wa rais wa zamani.

Tayari kampeni katika zimeanza mapema Msambweni, huku wawaniaji wakitafuta uungwaji mkono kuchukua nafasi ya aliyekuwa mbunge marehemu Suleiman Dori aliyeaga dunia kutokana na ugonjwa wa saratani mnamo Machi mwaka huu.

Kalonzo akaangwa kwa kuchochea ukabila

Na LUCY MKANYIKA

KIONGOZI wa chama cha Wiper, Kalonzo Musyoka, amekashifiwa vikali kwa matamshi yake kwamba watu kutoka jamii ya Wakamba hawapaswi kuwania ugavana Taita Taveta.

Bw Musyoka alikuwa amesema jamii yake inafaa kuacha nafasi hiyo Wataita na Wataveta.Akihutubu katika miji ya Mwatate na Wundanyi jana, kiongozi huyo alisema watu kutoka Ukambani wanaoishi humo wanapaswa kuwania nafasi za naibu gavana, ubunge, seneta na udiwani.

“Sitamruhusu Mkamba yeyote kuwania ugavana Taita-Taveta. Hilo haliwezekani. Lazima mwonyeshe heshima na shukrani kwa nafasi mlizopewa.

“Hamuwezi kutoka Kitui, Machakos ama Makueni na kutaka kuchukua nafasi za uongozi hapa ilhali mnajua wenyeji ni Wataita na Wataveta,” akasema.

Hata hivyo, kauli yake ilikosolewa vikali na wakili Bernard Mwinzi, ambaye ashatangaza nia ya kuwania ugavana katika kaunti hiyo.Bw Mwinzi aliyataja matamshi ya Bw Musyoka kuwa yenye uchochezi na yasiyo na msingi wowote.

“Matamshi hayo ni tishio kwa umoja wa taifa hili,” akasema Bw Mwinzi.Wakili huyo alisema kuwa wakazi wa kaunti hiyo wana haki ya kumchagua yeyote wanayemtaka kuwa kiongozi wao ifikapo 2022. Alisema kuwa kikatiba, ana haki kuwania kila nafasi aitakayo kokote nchini.

“Wakazi wa kaunti hii wanajua wanachotaka. Si Bw Musyoka aliyeniambia kuwania wadhifa huo. Vivyo hivyo, hataniagiza kutowania. Sijawahi kutafuta ushauri kutoka kwake, na wala hawajawahi kutafuta ushauri wowote kutoka kwangu kuhusu jambo lolote,” akasema.

Alipuuza hisia kwamba kauli ya Bw Musyoka ililenga kuleta mshikamano miongoni mwa wenyeji.

Kalonzo atetea Uhuru kukopa mabilioni

Na LUCY MKANYIKA

KINARA wa Chama cha Wiper Kalonzo Musyoka ametetea hatua ya serikali kuendelea kuchukua mIkopo kutoka nchi za nje licha ya deni la taifa kufikia kiwango cha kutisha cha Sh6.6 trilioni.

Bw Musyoka alisema fedha zinazokopwa zitaelekezwa kwenye miradi mbalimbali na kuisaidia serikali kutimiza ajenda zake nne kuu.

Kati ya miradi ambayo Bw Musyoka aliitaja ni ujenzi na uimarishaji wa miundomsingi itakayosaidia kukuza uchumi wa nchi hii.Kauli ya Bw Musyoka ilijiri wakati ambapo Rais Uhuru Kenyatta ameelekea Ufaransa kutia saini mkopo wa kufadhili miradi ya ujenzi wa barabara unaokisiwa kuwa mabilioni ya fedha.

Akitetea ziara ya Rais Kenyatta Ufaransa na mikopo iliyotolewa kwa nchi, Bw Musyoka ambaye chama chake kimeingia ushirikiano na Jubilee, alisisitiza kwamba hela zilizokopwa miaka ya nyuma zimesaidia taifa kujiendeleza kiuchumi.

“Tumeona miradi mingi ambayo imetekelezwa nchini ikiwemo ujenzi wa reli ya kisasa (SGR) na miradi mingine ya ujenzi wa barabara Nairobi na maeneo mengine. Miradi iliyotekelezwa ina umuhimu sana kwa kuimarisha uchumi wa nchi,” akasema akizungumza na wanahabari mjini Wundanyi.

Kenya imekuwa ikichukua mikopo ya mabilioni ya fedha hasa kutoka China, hali ambayo imezua wasiwasi kwamba huenda taifa likazama kwenye lindi la deni na kushindwa kujikwamua.

“Sidhani kwamba Ukoloni wa China utatimia nchini kwa sababu ya madeni haya. Kile ambacho tunahitaji ni serikali kujadiliana upya na kurefusha muda unaofaa kuilipa,” akaongeza.

Baadhi ya viongozi wamekuwa wakikashifu Rais Kenyatta kwa kukopa hela nyingi huku sehemu ya pesa ikiporwa na miradi iliyolengwa kukosa kukamilika.

Bw Musyoka ambaye amekuwa katika ziara ya kujivumisha Pwani, tangu wikendi jana aliandaa misururu ya mikutano katika Kaunti ya Taita Taveta. Aliandamana na mwenyekiti wa Wiper Chirau Mwakere, Naibu Gavana Majala Mlaghui, mbunge wa Wundanyi Danson Mwashako na viongozi wengine wa chama hicho.

Lazima niwanie urais 2022 – Kalonzo

NA WANDERI KAMAU

KIONGOZI wa chama cha Wiper, Bw Kalonzo Musyoka, amesisitiza kuwa atawania urais mnamo 2022 licha ya chama chake kuwa kwenye mkataba wa kisiasa na Chama cha Jubilee (JP).

Bw Musyoka alitoa tangazo hilo jana baada kukamilika kwa kikao cha siku mbili cha Baraza Kuu la Chama kwenye hoteli moja, Kaunti ya Machakos.

Huenda kauli ya Bw Musyoka ikazua hali ya suitafahamu, hasa baada ya chama chake kutia saini mkataba wa ushirikiano na JP mnamo Juni.

Mkataba huo pia ulitiwa saini na vyama vya Kanu na Chama cha Mashinani (CCM).Bw Musyoka alisema kwamba tayari, chama kimeanza harakati za kujitayarisha kwa uchaguzi huo, kwa kuweka mfumo wa kidijitali kwenye usajili wa wanachama wake.

“Tumeimarisha mfumo wa usajili wa wanachama wapya tukiwalenga vijana, kwani ndio wengi nchini,” akasema.

Tangazo la Bw Musyoka pia linatarajiwa kuongeza ushindani wa kisiasa katika eneo la Ukambani, hasa baada ya baadhi ya viongozi kuanza kumpigia debe Naibu Rais William Ruto, wakiongozwa na aliyekuwa Seneta wa Machakos, Johnstone Muthama.

Wiki mbili zilizopita, Dkt Ruto alizuru katika eneo la Athi River na kuwarai wenyeji kuunga mkono azma yake. Magavana Alfred Mutua (Machakos) na Kivutha Kibwana (Makueni) pia wametangaza azma zao kuwania urais kwenye uchaguzi huo.

Licha ya tangazo hilo, Bw Musyoka alisema chama hicho kinaunga mkono kikamilifu Mpango wa Maridhiano (BBI) na kitashiriki kwenye kampeni za kuupigia debe.

“Wiper itazuru kila sehemu nchini kuipigia debe BBI kwa kuwashirikisha wananchi. Tunaona hitaji kuu la mpango huo, hasa wakati huu ambapo baadhi ya viongozi wameanza kueneza taharuki za kisiasa. Tunaunga mkono mpango wa Rais Uhuru Kenyatta kuacha nchi yenye msingi thabiti kisiasa,” akasema.

Bw Musyoka pia alikosoa taswira inayosawiriwa kwenye mpango huo kama ushindani wa kisiasa kati ya Dkt Ruto na kiongozi wa ODM, Raila Odinga.

Wawili hao wamekuwa wakielekezeana lawama za kisiasa, Dkt Ruto akishikilia kuwa lazima mageuzi yoyote ya kikatiba yakitwe kwenye maslahi ya wananchi, lakini si kuwatengenezea viongozi nyadhifa za kisiasa.

Hata hivyo, Bw Odinga amekuwa akisisitiza mpango huo utakuwa njia mwafaka ya kuondoa migawanyiko ambayo imekuwa ikishuhudiwa nchini.

Chama pia kilipinga pendekezo la kubuniwa kwa serikali za kikanda, badala yake kikisema Serikali ya Kitaifa inapaswa kuweka mikakati kuimarisha mfumo wa ugatuzi.Kilitaja kubuniwa kwa Hazina ya Kuzistawisha Wadi kama njia mwafaka zaidi ya kuimarisha mfumo huo.

Mabwanyenye wa Ukambani mbioni kupimana ubabe

KITAVI MUTUA na PIUS MAUNDU

SIASA za Ukambani zinaendelea kuchukua mwelekeo mpya huku uhasama mkubwa ukiibuka kati ya mabwenyenye wawili wakuu wanaounga Naibu Rais Dkt William Ruto kwa upande moja na kigogo wa siasa za eneo hilo Kalonzo Musyoka.

Bwanyenye Peter Muthoka na aliyekuwa Seneta wa Machakos Johnstone Muthama mwenye mfuko mzito, sasa wanarindima ngoma ya Bw Musyoka na Dkt Ruto mtawalia, wakilenga kudhibiti siasa za eneo hilo.

Matajiri hawa wawili wamekuwa wakimwaga fedha ili kuamua mkondo wa siasa za Ukambani.

Kuingia kwa Bw Muthoka kwenye siasa za Ukambani kunaonekana kumkasirisha Bw Muthama ambaye alikuwa mfadhili mkubwa wa chama cha Wiper kabla ya uchaguzi wa 2017 na sasa amejitenga na mrengo huo wa Bw Musyoka.

Katika uchaguzi wa 2017, Bw Muthoka aliunga mkono mrengo wa Rais Uhuru Kenyatta na Dkt Ruto huku Seneta Muthama akivumisha injili ya kigogo wa ODM Raila Odinga na Bw Musyoka.

Hata hivyo, sasa mambo yamebadilika, Bw Muthoka akihamia upande wa Musyoka huku Seneta Muthama akipata hifadhi kwenye kambi ya Naibu Rais.

Mapema mwaka jana, Bw Muthoka aliandaa mkutano wa viongozi wote kutoka Ukambani katika hoteli ya Stoni Athi ambao ulihidhuriwa na wabunge 24, maseneta na magavana wote wa Ukambani pamoja na Bw Musyoka.

Hata hivyo, Bw Muthama hakuhudhuria mkutano huo wala sherehe za Krismasi katika Shamba la Bw Musyoka la Yatta ambao ulihudhuriwa na Bw Muthoka ambapo wanasiasa hao walipokezwa kitita kizito baada ya kukamilika kwake.

Bw Muthoka ni tajiri mkubwa anayemiliki kampuni ya Acceler Global Logistics inayohusika na usafirishaji wa bidhaa.

Naye Bw Muthama anashiriki kwenye biashara ya madini.Kinyume na Bw Muthama ambaye ni mkakamavu na hutoa cheche kali kwenye mikutano ya kisiasa, Bw Muthoka ni mpole sana na ni nadra sana aonekane akihudhuria wala kuhutubu kwenye mikutano ya kisiasa.

Huku uchaguzi mkuu wa 2022 ukikaribia, mabwenyenye hao wawili wanashiriki ubabe wa kuamua mwaniaji ambaye atanufaikia kura milioni mbili na zaidi za Ukambani.

Katika uchaguzi wa 2017, Bw Muthoka aliwafadhili wawaniaji wa Jubilee Ukambani kulikokuwa ngome ya kisiasa ya Muungano wa NASA. Alisaidia chama hicho kutwaa viti vitatu vya ubunge Ukambani.

Kwa sasa Bw Muthoka ndiye mshirika mkuu wa Rais Kenyatta eneo hilo huku akiaminika kusukuma ajenda ya kuhakikisha Bw Musyoka anakuwa rais 2022.

Bw Muthama naye ameahidi kuvumisha uwanizi wa Dkt Ruto eneo la Ukambani na maeneo mengine ya nchi.

Kwenye mahojiano na Taifa Jumapili, Bw Muthoka alikiri kwamba alihusika pakubwa kuhakikisha kwamba Wiper inaingia kwenye mkataba wa kisiasa na Jubilee.

“Wakati wa uchaguzi wa marudio 2017, Bw Musyoka alikuwa Ujerumani akimshughulikia mkewe aliyekuwa mgonjwa. Hata hivyo, alipiga simu na kuwaamuru wananchi wasusie uchaguzi wa pili licha ya kikosi changu kuendesha kampeni kali mashinani ili raia washiriki kura hiyo,” akasema Bw Muthoka.

Kwake, hiyo ilikuwa ishara ya kutosha kwamba Bw Musyoka ndiye kigogo wa siasa za eneo hilo ndiyo maana alimfikia baada ya kura hiyo kumshawishi ashirikiane na Jubilee ili kunufaisha jamii hiyo kwenye utawala wa sasa.

“Kuna watu wanaoshangaa kwa nini najihusisha na siasa ilhali mimi ni mfanyabiashara. Nafanya kwa manufaa ya jamii yangu,” akasema.

‘Tutaendelea na majadiliano na ni vyema ifahamike kwamba tushapiga hatua nzuri hasa na majirani wetu kutoka Mlima Kenya ambao wana kura nyingi mno. Bado tutaendelea na sitakimya Wakamba wakielekezwa visivyo kisiasa,’ akasisitiza.

Bw Muthoka ndiye alikuwa Mwenyekiti wa kamati ya kujadili ushirikiano kati ya Wiper na Jubilee.? Upande wa Wiper ulihusisha Maseneta Boniface Kabaka (Machakos), Enock Wambua (Kitui) na Mutula Kilonzo Jnr ( Makueni).

Jubilee nao waliongozwa na Spika Justin Muturi, Naibu Mwenyekiti David Murathe na Njee Muturi.

Juhudi za Bw Muthama za kumtaka Bw Musyoka aunde muungano na Dkt Ruto nazo zimekosa kutia baada ya Makamu huyo wa Rais wa zamani kuegemea mrengo wa Rais.

Muthama aapa kuzima Kalonzo kisiasa 2022

WYCLIFF KIPSANG na GASTONE VALUSI

CHECHE za maneno kati ya kiongozi wa chama cha Wiper Kalonzo Musyoka na aliyekuwa seneta wa Machakos, Bw Johnston Muthama, zimeongezeka, huku Bw Muthama akiapa kumwonyesha Bw Musyoka kivumbi ifikapo 2022.

Katika mahojiano ya redio jana, Bw Muthama alihoji kuwa hajuti kugura chama cha Wiper na akasisitiza kuendelea kumpigia debe Naibu Rais William Ruto kwa azma yake ya urais mwaka wa 2022.

“Kalonzo anaendeleza chama kama mali yake binafsi. Mwaka wa 2022 atajua hajui. Hii itakuwa mara yake ya mwisho kushindana kisiasa,’ alisema Bw Muthama.

Alihoji kuwa hata kama Dkt Ruto hatapewa tiketi ya kugombea urais na chama cha Jubilee mwaka wa 2022, kuna vyama vingi vya kisiasa anavyoweza kutumia.

Alipuuzilia mbali pia mahasimu wake wanaodai ameungana na Dkt Ruto kwa sababu za kifedha.

“Sitaki hela za Ruto kwani niko na zangu za kunitosha. Maoni yangu tu ni kwamba wakati umefika mtoto wa maskini kuchaguliwa kuwa rais,’ alisema Bw Muthama. 

Juma lililopita, Bw Muthama alitofautiana na Bw Kalonzo baada ya kumsihi kumuunga mkono naibu rais 2022. Bw Musyoka alimwambia Bw Muthama kuwa yeye anaweza kujiamulia kisiasa na mtu yeyote hataongea kwa niaba yake.

Alimlaumu Bw Muthama kwa kutokuwa na shukrani licha ya yeye kumlea kisiasa. Hata hivyo, Bw Muthama jana alidai kuwa ni yeye ambaye amemsaidia Bw Kalonzo akihoji kuwa yeye alikuwa miongoni mwa viongozi waliomwongelesha aliyekuwa rais Mwai Kibaki kumteua kama makamu wa rais mwaka wa 2002.

Baadhi ya wanasiasa wa eneo la Ukambani wameonya kuwa mizozo hiyo ya viongozi wa eneo hilo ni hatari kwa maazimio yao ya kuwa na nafasi bora katika uongozi wa taifa.

Mbunge wa Matungulu, Bw Stephen Mule, jana aliwataka viongozi wa Ukambani kushirikiana ili kuimarisha umoja wa wakazi ndipo waongee kwa sauti moja katika uchaguzi mkuu wa 2022.

Bw Mule alisema kuwa viongozi ni lazima wakome kutusiana kwa kuwa inaaibisha eneo hilo.

Alisema hali ya viongozi kutusiana kila mara kunaonyesha kuwa hawajakomaa na hawawezi kujadili maswala muhimu ya kitaifa. Aliongeza kuwa mizozo hiyo imeathiri maendeleo ya Ukambani.

“Wanachotaka wakazi si kuambiwa watakayempigia kura mwaka wa 2022 bali ni nani atakayeweza kuwahudumia ipasavyo kabla ya uchaguzi ujao,” akasema.

Alisema hayo alipokuwa akikagua Mbunge huyo alipokuwa akikagua mradi wa CDF katika lokesheni ya Katwanyaa, eneo Bunge la Matungulu.

Wiper yaishtaki ODM kuhusu uongozi bungeni

Na Collins Omullo

MVUTANO kuhusu wadhifa wa naibu kiongozi wa wachache katika Bunge la Kaunti ya Nairobi umechukua mkondo mpya, huku chama cha Wiper kikishtaki ODM kwa jopo la kutatua mizozo ya vyama vya kisiasa.? 

Wiper ilikimbilia kwa jopo hilo baada ya diwani wake, Bw Patrick Musili, kupokonywa wadhifa wa naibu kiongozi wa wachache.

Nafasi hiyo ilipokezwa diwani maalum wa ODM, Melab Atema.Bw Musili ambaye ni diwani wa Wadi ya Hospital, alilitaka jopo hilo kusitisha utekelezwaji wa mabadiliko hayo ya uongozi yaliyofanywa na chama cha ODM mnamo Agosti 18, mwaka huu, hadi kesi hiyo itakaposikilizwa na kuamuliwa.

Jopo hilo linaloongozwa na Bi Desma Mungo, lilikubaliana na ombi lake na kusitisha kutekelezwa kwa mabadiliko hayo hadi kesi hiyo itakapoamuliwa.

Agizo la jopo hilo la kusitisha mabadiliko hayo lilitolewa Agosti 25, mwaka huu. Kesi hiyo itatajwa Septemba 8, mwaka huu, kuthibitisha ikiwa maagizo yaliyotolewa na jopo hilo yalitekelezwa.

Wafaa kunishukuru, Muthama ajibu Kalonzo

Na GASTONE VALUSI

SENETA wa zamani wa Machakos, Johnson Muthama, amejibu madai ya kiongozi wa chama cha Wiper Kalonzo Musyoka kuwa amekuwa akimwelekeza njia zisizofaa za kisiasa.

Bw Muthama alikejeli kauli hiyo ya Bw Musyoka, na kusema inamfanya aonekane kuwa mtu asiyeweza kusimama imara anapojiunga na mirengo ya kisiasa.

Akijibu kauli ya Bw Musyoka kuwa alishurutishwa na yeye (Muthama) kujiunga na mrengo wa Raila Odinga mara mbili, seneta huyo wa zamani alisema amefurahi kuwa ametambuliwa kama kigogo wa siasa za Ukambani.

“Mimi ni dume kamili kama ninao uwezo wa kumbeba Makamu wa Rais na kumpeleka pahali ambapo hataki. Nimefurahi sana kwamba ananitambua kuwa kigogo wa siasa za eneo hili,” akasema.

Mnamo Ijumaa, akiwa nyumbani kwa kigogo wa zamani wa siasa za Ukambani, marehemu Mulu Mutisya, Bw Musyoka alidai kuwa kwenye Uchaguzi Mkuu wa 2013 na 2017, alishurutishwa na Bw Muthama kuwa mgombea mwenza wa Bw Odinga.

“Naapa kuwa sitakubali Muthama anishawishi tena kuwa mgombea mwenza wa mtu yeyote. Nitafanya uamuzi wangu mimi mwenyewe kuhusu hatima ya maisha yangu ya kisiasa,” akasema Bw Musyoka.

Lakini Bw Muthama aliyezungumza Jumamosi kijijini Mbilini, Kangundo kwenye mazishi ya Masaku Ngei, mwanaye mpigania-uhuru, waziri na kigogo wa siasa wa zamani marehemu Paul Ngei, alisema Bw Musyoka si mtu wa kujituma kisiasa.

“Anapaswa kunishukuru badala ya kunikashifu. Kama si kupitia juhudi zangu, Kalonzo hangepata wadhifa wa Makamu wa Rais. Ni mimi nimekuwa nikimsukuma kufanya kazi na Raila,” akasema.

Gavana wa Nairobi, Mike Sonko aliwataka viongozi wa Ukambani wakomeshe uhasama kati yao, akisema uadui wao utaikosesha jamii ya Wakamba kiti cha urais mwaka wa 2022.

“Ninawaomba viongozi wote katika eneo hili kuweka kando tofauti zao na kuungana kutatua shida za wakazi kama vile umaskini, maji, huduma za afya na masomo badala ya mashindano yasiyo na msingi,” akasema Bw Sonko.

ODM yakana Raila ana mkataba wa siri na Kalonzo

Na BENSON MATHEKA

CHAMA cha Orange Democratic Movement (ODM), kimekanusha kwamba kiongozi wake Raila Odinga ana mkataba wa siri na kiongozi wa Wiper, Bw Kalonzo Musyoka kuhusu uchaguzi mkuu wa 2022.

Kwenye mahojiano na gazeti la Sunday Nation, Kalonzo alidai kwamba licha ya muungano wa NASA kusambaratika na chama chake kuamua kuungana na Jubilee, ana mkataba wa siri na Bw Odinga, ambao hawakuhusisha vinara wengine wa muungano huo, Musalia Mudavadi wa Amani National Congress ANC na Moses Wetangula wa Ford Kenya.

Hata hivyo, Katibu Mkuu wa ODM, Bw Edwin Sifuna alitaja kauli ya Bw Kalonzo kama ndoto ya mchana.

“Tumeshangazwa na madai yaliyotolewa na Mheshimiwa Stephen Kalonzo Musyoka kwamba ana mkataba wa siri kati yake na kiongozi wa chama chetu Mheshimiwa Raila Odinga. Tunataka kusema wazi kwamba hakuna mkataba kama huo,” Bw Sifuna alisema kwenye taarifa.

Alisema ni kawaida ya Bw Kalonzo kutaka kuvuna asikopanda na kunufaika na juhudi za watu wengine.

“Tunajua kwamba katika mkataba wa NASA, Bw Kalonzo alijaribu kumsukuma Bw Odinga kumuunga kugombea urais kwenye uchaguzi mkuu wa 2022 lakini kama chama, tulikataa. Hii ndio sababu mkataba wa muungano huo uliachia chama kuunga mshirika yeyote iwapo muungano huo ungedumu 2022. Kauli kwamba kuna mkataba ni ndoto za Kalonzo,” alisema Bw Sifuna.

Katika mahojiano yake na Sunday Nation, Bw Kalonzo alisema kwamba hakuna kipengele kinachohitaji ODM kumuunga mkono kwenye uchaguzi mkuu wa 2022.

“Kwa kuwa nilikuwa mgombea mwenza Bw Odinga (kwenye uchaguzi mkuu wa 2017), sitarajii ODM itaniunga mkono 2022. Hata hivyo, nina mkataba binafsi na Bw Odinga ambao washirika wengine katika muungano huo hawahusiki,” alisema na kukataa kufafanua zaidi.

Alikariri kwamba chama chake kiliamua kuungana na Jubilee baada ya NASA kusambaratika na akalaumu ODM kwa kuua muungano huo ili isigawie washirika wake pesa kutoka hazina ya vyama vya kisiasa.

Hata hivyo, Bw Sifuna alisema ODM ilikataa kugawa pesa hizo kwa sababu kilisimamia shughuli za ofisi ya NASA baada ya vyama vingine tanzu kukataza wabunge wake kuchanga Sh10,000 kwa mwezi kulipa mishahara ya wafanyakazi.

Bw Sifuna alisisitiza kwamba muungano wa NASA ulivunjika Bw Kalonzo, Wetangula na Mudavadi, walipokataa kuhudhuria sherehe ya Bw Odinga kujiapisha kama rais wa wananchi Uhuru Park mnamo Januari 30, 2018.

“Hao waliua NASA peke yao,” alisema.

Alikanusha madai ya Bw Kalonzo kwamba chama cha ODM kilichangia kuvunjika kwa muungano huo kwa kususia mikutano ya kamati tekelezi akisema ni wawakilishi wa vyama vingine waliohepa.

“ODM na Raila Odinga haina deni la Kalonzo,” alisema Bw Sifuna.

Alisema kwa kuungana na Jubilee, Kalonzo anataka kinga kutoka kwa magavana wa kaunti tatu za ngome yake ya Ukambani Charity Ngilu (Kitui), Profesa Kivutha Kibwana (Makueni) na Dkt Alfred Mutua wa Machakos, ambao wameungana kumpiga vita.

Alikitaka chama cha Jubilee kutomwamini Bw Kalonzo akidai makamu rais huyo wa zamani huwa anatumia miungano ya kisiasa kujifaidi pamoja na wandani wake.

Komesha ‘utikitimaji’, Kalonzo afokewa

NA JUSTUS OCHIENG

VYAMA vya Orange Democratic Movement (ODM), Amani National Congress (ANC) na Ford Kenya, sasa vinataka chama cha Wiper kiachilie vyeo vyote kinachoshikilia katika Bunge la Kitaifa na Seneti.

Hii ni baada ya Wiper kuidhinisha kuhama muungano wa NASA na kuingia kwenye mkataba wa kisiasa na Jubilee.

Suala hilo huenda likazua mgongano kati ya kiongozi wa Wiper Kalonzo Musyoka na wenzake Musalia Mudavadi wa ANC na Raila Odinga wa ODM.

Viongozi wa ODM na ANC wanahoji kwamba kulingana na sheria za vyama vya kisiasa, Wiper haiwezi kuwa na wawakilishi bungeni ilhali imeingia kwenye makubaliano na Jubilee inayoongozwa na Rais Uhuru Kenyatta.

Katibu Mkuu wa ODM Edwin Sifuna alishutumu kitendo cha Wiper akisema chama chochote hakiwezi kuunga mrengo wa wengi na wachache kwa wakati mmoja.

‘Wiper ijiondoe kwenye vyeo vyote vya upande wa wachache baada ya kuungana na mrengo wa wengi. Hata hivyo, jinsi nimjuavyo kiongozi wao, huenda wana nia ya kunufaika na mrengo wa wengi na ule wa wachache kwa wakati mmoja,’ akasema Bw Sifuna.

Naibu Kiongozi wa ANC Ayub Savula na Katibu wa Ford Kenya Dkt Eseli Simiyu, pia walisema hawatakubali Wiper ikwamilie nafasi za uongozi zilizotengewa wachache ilhali imehamia mrengo wa wengi.

‘ANC na ODM zitaandika barua kwa msajili wa vyama vya kisiasa kuondoa Wiper kwenye NASA,’ akasema Bw Savula.? Mnamo Jumanne, mkutano wa Baraza Kuu la Wiper ulitoa idhini kwa Bw Musyoka kuingia kwenye mkataba na Jubilee na kuiunga mkono ndani na nje ya Bunge.

‘Kama Wiper wameondoka, basi nafasi za uongozi wanazoshikilia bungeni pia lazima waziache,’ akasema Dkt Eseli.

Watakaopoteza nafasi zao ni Kiranja wa wachache kwenye Seneti Mutula Kilonzo Jnr na Naibu Kiranja wa wachache katika Bunge la Taifa Robert Mbui.

Bw Kilonzo alikiri kwamba kisheria watapoteza nafasi zao wakirasmisha uhusiano wao na Jubilee.

Katibu wa Wiper Judith Sijeny alisema uamuzi huo uliafikiwa baada ya kubainika kwamba muungano wa NASA umekufa. Ili Muungano wa NASA uvunjwe, washirika watatu lazima wajiondoe.

Vyama wanachama ni ODM, Wiper, ANC, Ford Kenya ya Moses Wetang’ula na CCM cha aliyekuwa gavana wa Bomet Isaac Ruto