Man-City watwanga Wolves na kufungua pengo la alama 15 kileleni mwa jedwali la EPL

Na MASHIRIKA

KOCHA Pep Guardiola amepongeza wanasoka wake kwa kujituma vilivyo na kusajili matokeo ya kuridhisha katika kipindi ambapo walikuwa wakikabiliwa na ratiba ngumu.

Ushindi wa 4-1 uliovunwa na viongozi hao wa jedwali la Ligi Kuu ya Uingereza (EPL) dhidi ya Wolves mnamo Jumanne usiku ulikuwa wao wa 21 mfululizo kwenye mashindano yote kufikia sasa msimu huu.

Mabingwa hao wa zamani wa EPL walifunga mabao matatu ya haraka chini ya kipindi cha dakika 10 za mwisho wa mchuano uliowakutanisha na Wolves ya mkufunzi Nuno Espirito.

Man-City kwa sasa hawajapoteza mechi yoyote tangu walazimishiwe sare na West Bromwich Albion mnamo Disemba 15. Kwa sasa wanaselelea kileleni mwa jedwali la EPL kwa alama 65 huku pengo la pointi 15 likitamalaki kati yao na nambari mbili Manchester United ya kocha Ole Gunnar Solskjaer.

Katika kipindi hicho cha michuano 21 iliyopita, Man-City walitinga fainali ya League Cup, robo fainali za Kombe la FA na kujiweka pazuri kuingia robo-fainali za Klabu Bingwa Ulaya (UEFA) baada ya kupiga Borussia Monchengladbach ya Ujerumani 2-0 katika mkondo wa kwanza wa hatua ya 16-bora mnamo Februari 24, 2021.

Miamba hao wa soka ya Uingereza sasa watakutana na Tottenham Hotspur kwenye fainali ya Carabao League Cup mnamo Aprili 25 ugani Wembley, Uingereza baada ya kuchuana na Everton kwenye mikondo miwili ya robo-fainali za Kombe la FA.

Wakicheza dhidi ya Wolves, Man-City waliweka uongozini na Leander Dendoncker aliyejifunga mwanzoni mwa kipindi cha kwanza kabla ya Conor Coady kusawazisha mambo. Mabao mengine ya Man-City katika mechi hiyo yalifumwa wavuni na Gabriel Jesus na Riyad Mahrez aliyefunga lake la saba kufikia sasa ligini msimu huu.

Man-City wanajiandaa sasa kupepetana na Man-United ugani Etihad mnamo Machi 7, 2021 katika mchuano utakaowapa jukwaa la kuajili ushindi wa 16 mfululizo ligini na wa 22 kutokana na mechi zote za hadi kufikia sasa muhula huu.

“Tuna muda mfupi wa kupumzika kabla ya kushuka dimbani kwa mechi ngumu. Ni mechi itakayotia kwenye mizani uwezo wetu wa kutwaa ubingwa wa EPL msimu huu. Tunatarajia kusajili matokeo ya kuridhisha hasa baada ya ratiba ngumu iliyotutia kigezoni,” akasema kocha huyo raia wa Uhispania ambaye pia amewahi kudhibiti mikoba ya Barcelona na Bayern Munich.

Wolves kwa upande wao watakuwa wageni wa Aston Villa katika mechi yao ijayo ligini.

TAFSIRI NA: CHRIS ADUNGO

Man-City wacharaza Burnley tena na kujiweka pazuri kutwaa taji la EPL msimu huu

Na MASHIRIKA

MANCHESTER City walifungua mwanya wa alama tatu kileleni mwa jedwali la Ligi Kuu ya Uingereza (EPL) mnamo Februari 3, 2021 baada ya kupiga Burnley 2-0 ugani Turf Moor na kuendeleza rekodi ya kushinda kikosi hicho cha kocha Sean Dyche mara 13 mfululizo.

Awali, ushindi wa 9-0 uliosajiliwa na Manchester United dhidi ya Southampton ulishuhudia Man-City wakitoshana alama na watani wao hao japo masogora wa kocha Pep Guardiola wana mchuano mmoja zaidi wa kusakata ili kufikia idadi ya mechi ambazo zimepigwa na washindani wao wakuu wakiwemo Man-United, Leicester City, Liverpool na West Ham United.

Man-City walifungua ukurasa wa mabao katika dakika ya tatu kupitia kwa Gabriel Jesus aliyechuma nafuu kutokana na masihara ya kipa Nick Pope aliyeshindwa kudhibiti ipasavyo kombora aliloelekezewa na Bernardo Silva.

Licha ya kuchezea ugenini, Man-City walitamalaki mchezo na kuwazidi maarifa wenyeji wao katika kila idara huku wakimiliki asilimia kubwa ya mpira. Man-City wanaopigiwa upatu kutwaa ubingwa wa EPL msimu huu, walipachika wavuni bao lao la pili katika dakika ya 38 kupitia kwa Raheem Sterling aliyeshirikiana vilivyo na kiungo Ilkay Gundogan.

Bao la Riyad Mahrez aliyefunga Burnley mabao matatu katika mchuano wa mkondo wa kwanza mnamo Novemba 2020 lilikataliwa kwa madai kwamba alikuwa ameotea. Burnley hawakuelekeza kombora lolote langoni pa Man-City.

Matokeo hayo yalishuhudia Burnley wakishuka hadi nafasi ya 17 jedwalini kwa alama 22 sawa na Newcastle United. Fulham waliopigwa na Leicester City 2-0 wako katika orodha ya vikosi vitatu vya mwisho kwa pamoja na West Bromwich Albion na Sheffield United.

Kutokuwepo kwa Kevin de Bruyne anayeuguza jeraha kulimpa Gundogan fursa ya kutamba kwenye safu ya kati huku ushirikiana wake na Silva ukimwezesha Sterling kufunga bao lake la 10 kufikia sasa msimu huu.

Man-City walishuka dimbani kwa ajili ya mechi hiyo wakijivunia rekodi ya kupiga Burnley 5-0 mara nne katika kipindi cha miaka mitatu ya awali.

Burnley kwa sasa wanajiandaa kuvaana na Brighton watakaoshuka dimbani kwa minajili ya mechi hiyo ya Februari 6 wakijivunia motisha ya kupiga Liverpool 1-0 mnamo Februari 3 uwanjani Anfield.

Kwa upande wao, Man-City watakuwa na kibarua kizito cha kuangusha Liverpool uwanjani Anfield mnamo Februari 7. Ushindi kwa Man-City katika gozi hilo dhidi ya masogora wa kocha Jurgen Klopp huenda ukawaweka pazuri zaidi kutwaa ubingwa wa EPL msimu huu.

MATOKEO YA EPL (Februari 3):

Burnley 0-2 Man-City

Fulham 0-2 Leicester City

Leeds 1-2 Everton

Aston Villa 1-3 West Ham Utd

Liverpool 0-1 Brighton

TAFSIRI NA: CHRIS ADUNGO

Hatima ya Man City kucheza UEFA kujulikana Julai

Na CHRIS ADUNGO

MAHAKAMA ya Mizozo ya Spoti Duniani (CAS) inatarajiwa kutangaza maamuzi ya kesi ya rufaa ya Manchester City dhidi ya marufuku ya kusalia nje ya kipute cha Uefa mnamo Julai 2020.

Mawakili watatu wa CAS sasa wana muda wa mwezi mmoja kutathmini mawasilisho yaliyotolewa kwa siku tatu zilizopita na Man-City dhidi ya vinara wa Shirikisho la soka la bara Ulaya (Uefa).

Kesi hiyo ilisikilizwa kupitia video kuanzia Juni 8-10, 2020.

“Pande zote husika zimeelezea kuridhishwa na jinsi kesi hiyo ilivyosikilizwa na sasa tunatazamia kutoa maamuzi katikati ya Julai,” ikasema sehemu ya taarifa ya CAS.

Mnamo Februari 14, 2020, Kitengo cha Uefa cha kudhibiti matumizi ya fedha miongoni mwa klabu za bara Ulaya (CFCB) kilipiga Man-City faini ya Sh3.5 bilioni baada kupatikana na hatia ya kukiuka sheria za Uefa zinazohusiana na masuala ya matumizi ya fedha (FFP) kati ya 2012 na 2016.

CFCB pia walishikilia kwamba Man-City walikosa kushirikiana vilivyo na vinara wa Uefa waliokuwa wakiwachunguza kuhusiana na kesi hiyo. Haya ni madai ambayo Afisa Mkuu Mtendaji wa Man-City, Ferran Soriano aliyakana.

Man City roho mkononi kesi dhidi yao ikianza

Na CHRIS ADUNGO

MANCHESTER City wanaanza mojawapo ya wiki ngumu zaidi katika historia yao wakifahamu uwezekano wa hadhi yao kushuka, ndoto za kujinyakulia ufalme wa Klabu Bingwa Ulaya (UEFA) kuvurugwa na kusambaratika kabisa kwa kikosi chao.

Hii ni kufuatia mwanzo wa kesi ya rufaa dhidi ya marufuku ya kusalia nje ya kipute cha UEFA kwa kipindi cha miaka miwili ijayo. Kesi hiyo itasikilizwa na Jopo la Mizozo ya Spoti Duniani (CAS) kuanzia Juni 8, 2020.

Mnamo Februari 14, 2020, Kitengo cha Uefa cha kudhibiti matumizi ya fedha miongoni mwa klabu za bara Ulaya (CFCB) kilipiga Man-City faini ya Sh3.5 bilioni baada kupatikana na hatia ya kukiuka sheria za Uefa zinazohusiana na masuala ya matumizi ya fedha na leseni (FFP) kati ya 2012 na 2016.

Kwa upande wao, CFCB pia walishikilia kwamba Man-City walikosa kushirikiana vilivyo na vinara wa vitengo vya Uefa waliokuwa wakiichunguza keshi hiyo dhidi yao.

Pindi baada ya kutolewa kwa marufuku hayo, Man-City walikata rufaa kusisitiza kwamba CFCB haikuendesha uchunguzi wake kwa haki kwa sababu nyingi za habari zilizotegemewa na idara hiyo hazikutolewa na klabu. Chini ya kocha Pep Guardiola, Man-City wana imani tele kwamba watafaulu katika kesi yao itakayosikiliwa na majaji watatu wa CAS kwenye vikao vya siku tatu vitakavyoendeshwa kwa njia ya video.

Maamuzi ya jopo la CAS yatafichuliwa mwishoni mwa msimu huu. Iwapo CAS itadumisha marufuku ya Man-City, basi kikosi hicho hakitashiriki kampeni za UEFA msimu ujao na hawatanogesha kivumbi cha Super Cup mwanzoni mwa muhula ujao hata kama wataibuka washindi wa taji la UEFA msimu huu.

Rais wa La Liga ameshikilia kwamba Man-City wanastahili kuadhibiwa vikali kwa sababu kwa pamoja na Paris Saint-Germain (PSG) nchini Ufaransa, wamekuwa wakishiriki ulaghai kwa kukiuka kanuni za FFP.

MBOGA YA MAN CITY: Manchester City kuanza kutetea ubingwa League Cup dhidi ya Preston

Na MASHIRIKA

LONDON, Uingereza

MANCHESTER City itaanza kampeni ya kutetea ubingwa wake wa soka ya League Cup dhidi ya klabu ya Preston kutoka Ligi ya Daraja ya Pili katika raundi ya tatu Septemba 2019.

Katika droo ya raundi hiyo iliyofanywa Jumatano, Liverpool italimana na MK Dons. Preston itakuwa timu ya kwanza kujaribu kuzuia City kushinda mataji matatu katika msimu mmoja.

City walio mabingwa wa Ligi Kuu ya Uingereza (EPL), Kombe la FA na League Cup, wataalikwa na Preston uwanjani Deepdale. Vijana wa Pep Guardiola walishinda 3-1 walipozuru Preston mara ya mwisho mnamo 2007 katika FA Cup.

Preston ya kocha Alex Neil ilijikatia tiketi ya raundi ya tatu baada ya kunyamazisha wanafainali wa mwaka 2013, Bradford 4-0 mnamo Jumanne.

Mabingwa wa Bara Ulaya, Liverpool, walibanduliwa nje na Chelsea katika raundi ya tatu ya League Cup msimu uliopita, lakini wanatarajiwa kuwaona kama ‘mswaki’ MK Dons wanaoshiriki Ligi ya Daraja ya Tatu.

Vijana hao wa Jurgen Klopp wanashikilia rekodi ya mataji mengi ya League Cup (manane).

Mahasimu wa tangu jadi Portsmouth na Southampton watafufua uadui wao uwanjani Fratton Park. Portsmouth inashiriki ligi ya daraja ya tatu. Ilifuzu kupepetana na washiriki hao wa Ligi Kuu baada ya kuchapa QPR ya Ligi ya Daraja ya Pili 2-0 mnamo Jumatano.

Chelsea, ambayo ilipigwa na City kwa njia ya penalti 4-3 katika fainali ya League Cup msimu uliopita, itaalika Grimsby ama Macclesfield, ambao mechi yao ilikatizwa na mvua kubwa Jumanne.

Arsenal itakaribisha Nottingham Forest uwanjani Emirates nayo Spurs itazuru Colchester.

Manchester United itatembelewa na majirani wao Rochdale uwanjani Old Trafford.

Mechi za raundi ya tatu zitasakatwa kuanzia Septemba 23.

Wakati huo huo, bao la kwanza la Alex Iwobi lilisaidia Everton kunyamazisha Lincoln kutoka ligi ya daraja ya tatu 4-2 katika raundi ya pili ya League Cup mnamo Jumatano.

Washiriki hawa wa Ligi Kuu waliponea kufungishwa virago katika mchuano huo.

Burnley, pia kutoka Ligi Kuu, haikuwa na bahati baada ya kuchapwa 3-1 na Sunderland.

Anderson acheka na nyavu

Everton, ambayo imefunga bao moja pekee katika mechi tatu za Ligi Kuu msimu huu na ilipoteza 2-0 dhidi ya Aston Villa juma lililopita, ilijipata bao moja nyuma dakika ya kwanza Harry Anderson alipocheka na nyavu.

Lucas Digne alisawazisha dakika ya 36 naye Gylfi Sigurdsson akaimarisha uongozi huo 2-1 kupitia penalti dakika ya 59.

Bruno Andrade alifungia Lincoln bao la pili dakika ya 70 kabla ya mchezaji wa zamani wa Arsenal, Iwobi kufuma wavuni kichwa kisafi dakika ya 81 na kisha Richarlison akahakikishia Everton ushindi dakika ya 88.

Sajili wengine wapya wa Everton, Moise Kean, Djibril Sidibe, Iwobi na Fabian Delph pia walishiriki mchuano huu.

Naye Kasper Schmeichel alipangua penalti mbili klabu yake ya Leicester ikiondoa Newcastle mashindanoni baada ya muda wa kawaida kutamatika 1-1 uwanjani St James Park.

Bournemouth iliponea tundu la sindano kuaga mashindano haya mapema ilipozidia ujanja Forest Green kutoka ligi ya daraja ya nne katika upigaji wa penalti.

Kombora nililopiga Leicester ni leseni ya kuondoka Etihad – Kompany

NA CECIL ODONGO

NAHODHA wa Manchester City Vincent Kompany amefichua kwamba aliamua kubanduka kambini mwa timu hiyo alipofunga bao kupitia kiki ya mbali kwenye mechi dhidi ya Leicester City mnamo Mei 6.

Bao hilo lililofungwa dakika ya 70 lilisaidia vijana wa kocha Pep Guardiola kuwashinda the Foxes 1-0 ugani Etihad na kuipiku Liverpool kwenye msimamo wa jedwali la Ligi Kuu ya Uingereza(EPL) .

“Nilipofunga bao hilo nilifahamu kwamba muda wangu katika timu ya Manchester City ulikuwa umekamilika. Singeweza kufanya mengine ya ziada na bao lilipoingia niliridhika kwamba nimeweza kutimiza malengo yangu Etihad,” akasema

Mbelgiji huyo vile vile alisema kwamba hasikitishwi na jitihada za Manchester City kushinda Klabu Bingwa Barani Ulaya (Uefa) kuambulia pakavu msimu huu wa 2018/19 akisema bado wana nafasi ya kushinda taji hilo msimu wa 2019/20.

“Kulingana nami, Mancity ndiye klabu bora zaidi duniani. Haijalishi iwapo walishinda Uefa au la kwa sababu ni klabu kubwa ambayo inazidi kuimarika kwa kasi,” akaongeza Kompany.

Jumapili Mei 19, mlinzi huyo matata alitangaza kwamba atajiunga na klabu yake ya utotoni ya Anderlecht kama mchezaji na mkufunzi.

Ilinikata maini kubanduliwa UEFA, afunguka Gundogan

NA CECIL ODONGO

KIUNGO wa Manchester City Ilkay Gundogan amesema kwamba kubanduliwa kwenye ligi ya mabingwa UEFA kulimkata maini.

“Kubanduliwa kwenye ligi ya mabingwa kulikuwa uchungu sana. Hata hivyo ni kazi bure kulilia hilo ilhali tumeshinda mataji matatu nyumbani. Kila ambacho nalenga katika siku za usoni ni kushinda Uefa,” akasema Gundogan.

Kiungo huyo yupo tayari kuanzisha mazungumzo na Manchester City ili kurefusha kandarasi yake ugani Etihad hasa baada ya kutwaa mataji matatu msimu uliokamilika wa 2018/19.

Gundogan yupo kwenye mkondo wa lala salama katika kandarasi yake na amekuwa akiaminiwa na kocha Pep Guardiola kikosini kwa kuwa amesakata mechi 31 za Ligi Kuu ya Uingereza msimu uliokamilika wa 2018/19 hasa kutokana na Fernandinho na Kevin De Bruyne kuuguza majeraha ya mara kwa mara.

“Sasa ni wakati wa kuangazia jinsi mambo yalivyo na kuhusisha klabu kwenye mazungumzo ya kurefusha kandarasi yangu,” akasema Gundogan ambaye alijiunga na Manchester City kutoka Dortumund ya Ujerumani misimu mitatu iliyopita.

Ingawa City iliandikisha historia nchini Uingereza kwa kushinda mataji matatu, Guardiola amedai mara kwa kipindi atakachohudumu kama kocha kitategemea ufanisi wake katika kipute cha Klabu Bingwa Barani Ulaya(Uefa).

Manchester City walibanduliwa katika Uefa msimu huu na Tottenham ambao watakutana na Liverpool kwenye fainali ya Uefa Julai 1 katika uga wa Juventus nchini Italia.

 

Man City watwaa ufalme wa EPL kwa mara ya pili mfululizo

NA MASHIRIKA

LONDON, UINGEREZA

MANCHESTER City waliweka historia katika soka ya Uingereza Jumapili kwa kunyanyua ubingwa wa taji la EPL kwa mara ya pili mfululizo.

Ushindi wa 4-1 uliosajiliwa na Man-City dhidi ya Brighton hapo jana uwanjani American Express Community uliwawezesha kuwapiga kumbo Liverpool ambao wamekuwa wapinzani wao wakuu katika kampeni za msimu huu.

Mvamizi Sergio Aguero aliwafungulia Man-City ukurasa wa mabao kunako dakika ya 28, sekunde chache baada ya Glenn Murray kuwapa Brighton bao la kwanza.

Licha ya kuwabamiza Wolves uwanjani Anfield, Liverpool ya kocha Jurgen Klopp ilisalia katika nafasi ya pili kwa alama 97, moja nyuma ya Man-City.

Kabla ya kuwaongoza masogora wake kuvaana na Brighton hapo jana, kocha Pep Guardiola alikiri kwamba ufanisi wa kunyanyua ufalme wa taji la EPL kwa msimu wa pili mfululizo ni hatua kubwa zaidi katika makuzi ya kikosi chake.

Isitoshe, aliwapa mashabiki wa Man-City uhakika wa kusalia uwanjani Etihad licha ya kuhusishwa na uwezekano mkubwa wa kutua kambini mwa Juventus.

Guardiola, 48, amekuwa akihemewa pakubwa na Juventus ambao kwa sasa wanatarajiwa kuanza kuwinda maarifa ya Mauricio Pochettino wa Tottenham Hotspur kwa nia ya kulijaza pengo la Allegri.

Kwa mujibu wa Guardiola, kubwa zaidi katika malengo yake kwa sasa ni kuhudumu kambini mwa Man-City kwa misimu miwili zaidi kwa matarajio ya kuwanyanyulia waajiri wake taji la Klabu Bingwa Ulaya (UEFA) kufikia 2021.

“Guardiola yuko radhi kurefusha mkataba wake ugani Etihad kwa kipindi cha miaka miwili zaidi kwa nia ya kutia kapuni taji la UEFA ambalo linastahiwa pakubwa na mmiliki wa Man-City, Sheikh Mansour.

Mchuano wa jana ulikuwa wa mwisho kwa nahodha Bruno Saltor kuwachezea Brighton kabla ya kustaafu mwishoni mwa msimu huu.

Man-City walijibwaga ugani kwa kipute hicho wakilenga kutia kapuni alama tatu ili kuhifadhi ufalme wa Ligi Kuu ya EPL na hivyo kuwapiga kumbo Liverpool ambao wamekuwa wakuwa wapinzani wao wakuu muhula huu.

Bao la nahodha Vincent Kompany dhidi ya Leicester City katika mechi ya iliyowakutanisha uwanjani Etihad mwanzoni mwa wiki jana lilidhihirisha ukubwa wa uwezo wa Man-City katika kivumbi cha EPL msimu huu.

Baada ya kutia kapuni jumla ya alama 100 msimu jana, Man-City walijizolea pointi 98 katika kampeni za muhula huu. Ufanisi huo una maana kwamba Man-City wamekuwa wakitia kapuni angalau alama 2.6 kutokana na kila mchuano kwa kipindi cha misimu miwili iliyopita.

Liverpool walioandamwa na mkosi kwa mara nyingine, kwa sasa wanapigiwa upatu wa kutia kibindoni ufalme wa Klabu Bingwa Ulaya (UEFA).

Man-City ambao wamesajili ushindi mara 32, kuambulia sare mara mbili na kushindwa mara nne wamepoteza jumla ya alama 16 kufikia sasa huku Liverpool wakipigwa mara moja pekee katika mechi iliyowakutanisha na Man-City uwanjani Etihad mwanzoni mwa Januari 2019.

“Ni fahari na tija tele kufikia hapa tulipo kwa sasa. Kampeni za msimu huu hazijakuwa rahisi kwa kikosi chochote. Ni muujiza kuona Man-City wakitawazwa mabingwa, hasa ikizingatiwa kwamba Liverpool waliwahi kujivunia pengo la alama saba kileleni mwa jedwali hadi kufikia Disemba 2018.

Chelsea ambao tayari wamefuzu kwa kipute cha UEFA msimu ujao, walikuwa wageni wa Leicester uwanjani King Power. Kikosi hicho cha kocha Maurizio Sarri hata hivyo kilihitaji kusajili ushindi ili kujipa hamasa ya kujitahidi vilivyo dhidi ya Arsenal katika fainali ya Europa League mnamo Mei 29 jijini Baku, Azerbaijan. Arsenal watafuzu kwa kampeni za UEFA msimu ujao iwapo watashinda Chelsea.

Tottenham ambao kwa sasa wanashikilia nafasi ya nne jedwalini walikuwa wenyeji wa Everton. Chelsea wanashikilia nafasi ya tatu kwa pointi 74, nne zaidi kuliko Arsenal ambao wanaorodheshwa mbele ya Manchester United wanaokamata nafasi ya sita chini ya mkufunzi Ole Gunnar Solskjaer.

Akihojiwa na wanahabari kabla ya Man-City kuchuana na Brighton, Guardiola alikiri kwamba ukubwa wa viwango vya ushindani katika kampeni za EPL msimu huu ulichangia mshindi wa EPL kuamuliwa katika siku ya mwisho.

Kwa upande wake, Guardiola alisema Liverpool wanajivunia kikosi imara kilicho na uwezo wa kutwaa ubingwa wa UEFA msimu huu. Aidha, alikiri kwamba uwepo wa Sadio Mane, Robert Firmino na Mohamed Salah kambini mwa Klopp ni sifa inayofanya Liverpool kuwa miongoni mwa klabu zenye safu bora zaidi za uvamizi katika ulimwengu wa soka.

“Wana kikosi imara ambacho kilijisuka vilivyo katika muhula uliopita wa uhamisho wa wachezaji. Wanajivunia uthabiti katika takriban kila idara. Hii ni sifa ya kikosi ambacho kinatawaliwa na kiu ya kunyanyua mataji ya haiba kubwa,” akasema Guardiola kwa kudokeza uwezekano wa Man-City kujitoma sokoni mnamo Januari 2019 na kusajili mabeki wa viwango vya juu zaidi.

“Ukitaka kutwaa mataji katika kampeni zozote, ni lazima usajili matokeo mazuri. Bila shaka Liverpool na Man-City wamedhihirisha kwamba wana huo uwezo katika soka ya Uingereza na bara Ulaya msimu huu,” akaongeza.

Katika misimu minane kati ya 10 iliyopita, klabu ambayo imekuwa ikiongoza jedwali la EPL baada ya kupigwa kwa nusu ya michuano yote kufikia wakati wa Krismasi imekuwa ikitwaa ubingwa. Hata hivyo, Liverpool iliwahi kuongoza mara mbili kufikia wakati kama huo mnamo 2008-09 na 2013-14 kabla ya kupitwa na kuambulia nafasi ya pili mwishowe baada ya kuzidiwa maarifa na Man-United na Man-City mtawalia.

Hili ni jambo ambalo Klopp ameshindwa pia kulirekebisha muhula huu kambini mwa Liverpool ambao walipoteza mchuano mmoja pekee kati ya 38 katika EPL msimu huu.

MATOKEO YA EPL

Tottenham 2-2 Everton

Man-United 0-2 Cardiff City

Watford 1-4 West Ham United

Southampton 1-1 Huddersfield

Leicester City 0-0 Chelsea

Fulham 0-4 Newcastle Utd

Liverpool 2-0 Wolves

Palace 5-3 Bournemouth

Brighton 1-4 Man-City

Burnley 1-2 Arsenal

Sababu zitakazowavunia Barcelona au City ufalme UEFA

NA MWANDISHI WETU

MECHI za maruadiano ya robo-fainali za kuwania taji la Klabu Bingwa Ulaya (UEFA) msimu huu zitasakatwa wiki hii huku Barcelona na Juventus zikitarajiwa kuwa timu za kwanza kutinga hatua ya nusu-fainali.

Miamba wa soka ya Uingereza, Manchester City watachuana na Tottenham Hotspur uwanjani Etihad mnamo Jumatano, siku ambapo Liverpool nao wanatazamiwa kutua nchini Ureno kurudiana na FC Porto.

Barcelona watakuwa kesho wenyeji wa Manchester United ugani Camp Nou huku Juventus wakialika Ajax ya Uholanzi jijini Turin, Italia.

Chini ya mkufunzi Ernesto Valverde, Barcelona watashuka dimbani wakitawaliwa na hamasa ya kusajili ushindi muhimu wa 1-0 uwanjani Old Trafford katika mchuano wa mkondo wa kwanza wiki jana. Kikosi hicho pia kinapigiwa upatu wa kutawazwa mabingwa wa Ligi Kuu ya Uhispania (La Liga) na Copa del Rey.

Japo kocha Ole Gunnar Solskjaer ana wingi wa imani kwamba vijana wake watatamba ugenini kama walivyofanya dhidi ya PSG katika hatua ya 16-bora, kibarua kichopo mbele yao ni kigumu na kizito zaidi.

Barcelona wanatazamiwa kulipiza kisasi kwa kukizamisha chombo cha Man-United kirahisi na kujikatia tiketi ya kuchuana na Liverpool kwenye hatua ya nne-bora.

Man-United wanajivunia kushinda Barcelona mara moja pekee katika jumla ya mechi nane zilizopita. Walitawazwa mabingwa wa UEFA mara ya mwisho mnamo 2008 baada ya kuwalaza Chelsea nchini Urusi. Mwaka huo, Man-United waliwabandua Barcelona? ambao ni mabingwa mara tano wa UEFA katika hatua ya nusu-fainali.

Liverpool ya kocha Jurgen Klopp watajibwaga uwanjani Estadio do Dragao mnamo Jumatano wakijivunia ushindi wa 2-0 waliousajili dhidi ya Porto ugani Anfield mapema wiki jana.

Liverpool ambao pia ni mabingwa mara tano wa UEFA, hawajapoteza dhidi ya Porto katika jumla ya mechi saba zilizopita.

Baada ya kuwadengua Porto, basi mtihani mgumu zaidi uliopo mbele ya Liverpool ni kuwakung’uta Barcelona ambao iwapo wataponea, basi watajiweka pazuri zaidi kunyanyua ubingwa wa UEFA msimu huu kwa kuwapiku ama Man-City au Juventus.

Historia inawaweka Barcelona katika nafasi nzuri zaidi ya kuwapepeta Liverpool na hivyo kutinga fainali ambayo kwa asilimia kubwa, inatazamiwa kuwakutanisha na Man-City wanaofukuzia mataji manne chini ya kocha Pep Guardiola.

Kikosi hicho kinatarajiwa kuwika zaidi mbele ya mashabiki wa nyumbani na kubatilisha matokeo ya 1-0 yaliyosajiliwa na Tottenham dhidi yao wiki jana.

Ushindi kwa Man-City utawapa hamasa zaidi ya kuwakomoa Juventus katika nusu-fainali. Chini ya mkufunzi Massimiliano Allegri, Juventus wanaojivunia huduma za Cristiano Ronaldo, wanatazamiwa kuwazima Ajax waliowalazimishia sare ya 1-1 katika mchuano wa mkondo wa kwanza.

Ajax ambao ni wafalme mara nne wa UEFA, hawana ushindi katika mechi nne zilizopita dhidi ya Juventus walionyanyua mabingwa mnamo 1985 na 1996.

Chelsea iliyopiga Bayern Munich 4-3 kupitia penalti mnamo 2011-12, ndiyo klabu ya mwisho inayoshiriki Ligi Kuu ya Uingereza (EPL) kuwahi kutia kapuni ufalme wa UEFA.

Man City, Barcelona, Liverpool au Juventus pazuri kunyakua UEFA

NA CHRIS ADUNGO

UPO uwezekano mkubwa kwa mshindi wa taji la Klabu Bingwa Ulaya (UEFA) muhula huu kutokea nchini Uingereza. Klabu hiyo ni ama Man-City au Liverpool. Si ajabu iwapo wawili hawa watakutana katika fainali.

Chelsea iliyopiga Bayern Munich 4-3 kupitia penalti mnamo 2011-12, ndiyo klabu ya mwisho inayoshiriki Ligi Kuu ya Uingereza (EPL) kuwahi kutia kapuni ufalme wa UEFA.

Droo ya robo-fainali ya UEFA itakayowakutanisha Manchester City na Tottenham Hotspur, Liverpool na FC Porto, kisha Manchester United na Barcelona msimu huu ni afueni kubwa kwa timu za EPL.

Mshindi kati ya Tottenham na Man-City atamenyana na atakayetamalaki mechi kati ya Ajax na Juventus katika nusu-fainali. Aidha, mshindi kati ya Barcelona na Man-United atavaana ama na Liverpool na au Porto katika nusu-fainali nyingine.

Historia inawaweka Barcelona katika nafasi nzuri zaidi ya kuwapepeta Man-United na kutinga nusu-fainali ambayo kwa asilimia kubwa, huenda iwakutanishe na Liverpool?

Man-United wanajivunia kushinda Barcelona mara moja pekee katika jumla ya mechi nane zilizopita. Vijana hawa wa kocha Ole Gunnar Solskjaer wataanza kampeni yao dhidi ya Barcelona ugani Old Trafford ili wasicheze mchuano wa mkondo wa pili kwa wakati mmoja na majirani zao wa jiji la Manchester.

Man-United walitawazwa mabingwa wa UEFA mara ya mwisho mnamo 2008 baada ya kuwalaza Chelsea nchini Urusi. Mwaka huo, waliwabandua Barcelona ambao ni mabingwa mara tano wa UEFA katika hatua ya nusu-fainali.

Man-City ambao wanafukuzia jumla ya mataji manne msimu huu wanapigiwa upatu wa kuendeleza ubabe wao dhidi ya Tottenham.

Mabingwa hawa watetezi wa taji la EPL tayari wanajivunia rekodi nzuri ambayo imewashuhudia wakiwachabanga Tottenham katika jumla ya mechi tatu zilizopita. Miamba hawa wawili wa EPL wanatafuta taji lao la kwanza la UEFA muhula huu.

Ushindi kwa Man-City utawapa hamasa zaidi ya kuwapepeta Juventus katika nusu-fainali. Juventus wanaojivunia huduma za Cristiano Ronaldo, wanatazamiwa kuwazima Ajax mapema katika robo-fainali.

Ajax ambao ni wafalme mara nne wa UEFA, hawana ushindi katika mechi tatu dhidi ya mabingwa wa zilizopita dhidi ya Juventus waliotawazwa mabingwa mnamo 1985 na 1996.

Liverpool ambao pia ni mabingwa mara tano wa UEFA, hawajapoteza dhidi ya Porto katika jumla ya mechi sita zilizopita. Makali ya Liverpool ambao pia wanatarajiwa kuwapiga kumbo Man-City kileleni mwa jedwali la EPL, yatawapa wakati mwepesi katika robo-fainali.

Hili la kushinda Porto likitimia, basi mtihani mgumu zaidi uliopo mbele ya Liverpool ni kuwapepeta Barcelona ambao iwapo wataponea, basi watajiweka pazuri kunyanyua ubingwa wa UEFA msimu huu kwa kuwapiku ama Man-City au Juventus.

De Bruyne mwingi wa mizungu, ana hela kama majani ya mkuyu

Na CHRIS ADUNGO

KEVIN De Bruyne, 27, ni kiungo mvamizi wa Manchester City na timu ya taifa ya Ubelgiji. Nyota huyo ni miongoni mwa wanasoka ambao wanapigiwa upatu kuivunia klabu ya Man-City mataji kadhaa nchini Uingereza pamoja na kuipigisha hatua kubwa katika gozi la Klabu Bingwa Ulaya (UEFA).

Uwezo wake wa kudhibiti mpira kwa miguu yote miwili na kutamba katika nafasi yoyote ni kiini cha makocha kumwajibisha nyuma ya mvamizi mkuu. Sogora huyo wa zamani wa Chelsea alitokea VfL Wolfsburg mnano 2015 na kutua uwanjani Etihad kwa Sh8.6 bilioni, uhamisho uliorasimishwa kwa kandarasi ya miaka sita.

Kiasi hicho cha pesa ni cha pili kwa wingi kuwahi kutolewana klabu ya Uingereza baada ya Sh9 bilioni na Sh14 bilioni zilizotumiwa na Manchester United kujinasia huduma za Angel Di Maria kutoka Real Madrid mnamo 2015 na Mfaransa Paul Pogba kutoka Juventus mnamo 2016.

ASILI: Japo alizaliwa Burundi, De Bruyne aliishi kwa pamoja na mama yake, Anne kwa zaidi ya miaka 10 nchini Ivory Coast baada mama kutemana na mumewe, Herwig. Kwa pamoja na mkubwa wake Stefanie, De Bruyne alilelewa jijini Drongen katika Manispaa ya Ghent, Ubelgiji kuanzia 1991.

UTAJIRI: Thamani ya mali ya De Bruyne inakadiriwa kufikiaSh3.6 bilioni na kiini kikubwa cha utajiri wake ni mshahara wa Sh11 milioni aliokuwa akipokezwa kwa juma na Wolfsburg kabla ya Manchester City kuzinyakua huduma zake kwa ahadi ya Sh35 milioni kila wiki. Kwa sasa, De Bruyne hutia mfukoni Sh49 milioni kwa wiki, malipo ambayo yanamfanya kuwa mchezaji ghali zaidi anayedumishwa kimshahara ugani Etihad kabla ya Sergio Aguero, David Silva na Raheem Sterling.

Mbali na mshahara huo, De Bruyne hujirinia fedha za ziada kutokana na marupurupu na bonasi za kushinda mechi. Pia anamiliki kampuni ya kutengeneza nguo aliyoianzisha kwa ubia na shirika la Cult Eleven mnamo 2012.

Japo utajiri wake haujatosha kuutikisa ulimwengu wa masogora wanaoogelea katika bahari ya fedha, De Bruyne ni mwingi wa hisani na mwenye moyo wa kutoa. Asilimia 30 ya mapato yanayovunwa na kampuni yake ya nguo kila mwaka hutolewa kama ruzuku kwa timu ya Olimpiki ya Walemavu nchini Ubelgiji.

MAPENZI NA FAMILIA: De Bruyne alimtema mchumba wake wa muda mrefu, Caroline Lijnen mnamo 2013 baada ya kipusa huyo kusaliti penzi lake alipomrhusu ‘nyani’ nambari moja wa Real Madrid, Thibaut Courtois kulidokoa tunda lake. Lililomkoroga nyongo zaidi De Bruyne ni kwamba yeye na Courtois walikuwa marafiki wakubwa.

na wakihudumu pamoja ugani Stamford Bridge walikokuwa wakivalia jezi za Chelsea.

Hata hivyo, ilimchukua De Bruyne miezi mitatu pekee kujinasia mrembo mwingine, Michele Lacroix aliyemzalia mtoto wa kiume mapema mwaka huu.

Alimvisha Michele pete ya uchumba mnamo Desemba 2016 katika mkahawa wa Eiffel Tower jijini Paris, Ufaransa kabla ya kufunga naye pingu za maisha nchini Italia mwishoni mwa Juni 2017. Michele kwa sasa anatazamia kumzalia De Bruyne mtoto wa pili kufikia Aprili 2019.

MAGARI: Mbali na kumiliki Peugeot RCZ yenye thamani ya Sh6 milioni na Audi A8 iliyomgharimu Sh8 milioni, De Bruynepia ana Mercedes Benz SV12 ya Sh22 milioni.

MAJENGO: Anamiliki kasri la Sh720 milioni jijini Hannover, takriban kilomita 70 kutoka Wolfsburg, Ujerumani. Moja kati ya majengo mawili ya kifahari aliyonayo jijini Brussels, Ubelgiji ni lile la Sh400milioni alilomjengea mama yake mnamo 2013.

Kichapo kutoka kwa Man-City hakina uwezo wa kuzima ari ya Liverpool EPL

NA CHRIS ADUNGO

INGAWA kichapo cha 2-1 ambacho Liverpool walipokezwa na Manchester City ligini Alhamisi iliyopita ni pigo kubwa, nahisi kwamba matokeo hayo hayatoshi kuzima ari ya kikosi cha kocha Jurgen Klopp kinachopania kunyanyua ubingwa wa taji la EPL msimu huu.

Ushindi wa Man-City haukuchangiwa kivyovyote na utepetevu wa Liverpool katika idara yoyote wala ukosefu wa kujiamini miongoni mwa wachezaji waliounga kikosi cha kwanza cha viongozi hao wa jedwali la Ligi Kuu.

Ilivyo, Liverpool walidiziwa maarifa na kikosi cha haiba kubwa ambacho kwa sasa ni miongoni mwa klabu bora za bara Ulaya.

Japo matokeo ya Liverpool dhidi ya Man-City yaliweka wazi kampeni za kuwania nafasi nne za kwanza kileleni mwa jedwali la EPL, Liverpool bado wanajivunia pengo la alama nne kati yao na Man-City baada ya kupigwa kwa jumla ya michuano 21 ligini.

Je, Manchester City wataweka historia ya kuwa kikosi cha kwanza baada ya miaka 10 kutetea kwa mafanikio ubingwa wa EPL, au Liverpool watakomesha ukame wa miaka 29 wa taji la hilo kabatini mwao msimu huu?

Ingawa baadhi ya wadadidi wa soka wanahisi kwamba hii itakuwa ni zamu ya Tottenham Hotspur kutawazwa wafalme wa soka ya Uingereza kwa mara ya kwanza tangu 1961, wengi wanawapigia Liverpool upatu wa kutia kapuni ubingwa wa EPL muhula huu.

Hata hivyo, nahisi kwamba vikosi vya pekee vyenye uwezo wa kuvuruga matumaini ya masogora hao wa Klopp ni Man-City na Tottenham.

Licha ya kupoteza mchuano wao wa kwanza katika kampeni za EPL msimu huu, naamini Liverpool watajinyanyua na kuweka kando mikosi ya 2008-09 na 2013-14 ambapo waliongoza jedwali la EPL hadi mwanzoni mwa Mwaka Mpya kabla ya kupitwa na kuambulia nafasi ya pili mwishowe.

Katika misimu minane kati ya 10 iliyopita, klabu iliyokuwa ikiongoza jedwali la EPL baada ya kupiga nusu ya michuano yote ya msimu, ilitwaa ubingwa.

Baada ya kutinga fainali za Klabu Bingwa Ulaya (UEFA) msimu jana na kuanza kampeni za msimu huu wa 2018-19 kwa matao ya juu, Liverpool ni mpinzani ambaye kwa sasa amedhihirisha kuwa ana uwezo mkubwa usiostahili kupuuzwa.

Kikosi hicho cha Klopp kwa sasa ni timu tofauti kabisa. Viwango vya wachezaji wengi wa Liverpool vimeimarika kiasi kwamba uwepo wa Sadio Mane, Momahed Salah na Roberto Firmino kambini mwao unawafanya kuwa miongoni mwa klabu zinazojivunia safu bora zaidi za uvamizi.

Zaidi ya hayo, wanajivunia huduma za difenda Virgil van Dijk na nyani Alisson Becker ambao wanashikilia rekodi za kuwa beki na kipa ghali zaidi duniani kwa sasa. Hadi kufikia mwisho wa msimu uliopita katika EPL, Liverpool na Manchester United ndizo timu za pekee ambazo ziliishinda Man-City ligini.

Silaha kubwa ya Liverpool imekuwa ni uwezo wao wa kuanzisha mashambulizi ya kushtukiza kupitia kwa wachezaji wao wenye kasi sana na ambao hawahitaji kupata nafasi nyingi za wazi ili wafunge mabao. Huu ndio upekee wa kikosi cha Klopp.

Kwa namna moja au nyingine, Liverpool ni timu ambayo ubora wake utadhihirika kila inapocheza na mpinzani aliye na mazoea ya kumiliki mpira kwa muda mrefu.

na ambaye anacheza soka ya kushambulia sana.

Mnamo 2013, Klopp aliwachochea Dortmund kutinga fainali ya UEFA baada ya kuwabandua Real Madrid kwenye nusu-fainali.

Ingawa kulikuwapo na klabu nyingi zenye vikosi bora zaidi kuliko Dortmund wakati huo, mfumo na upekee wa mbinu za ukufunzi wa Klopp uliwatambisha wapambe hao wa soka ya Ujerumani. Man-City na Liverpool kwa sasa ndizo timu zilizo na vikosi bora zaidi katika EPL. Hivyo, Liverpool kukomolewa 2-1 si kioja.

Muhimu zaidi ni kuyaweka kando maruerue hayo na kuendeleza ubabe wao kwa kuwa kutamatisha ligi bila ya kushindwa halikuwa mojawapo ya malengo yao makuu mwanzoni mwa msimu huu.

EPL: Breki kwa Liverpool Etihad

MANCHESTER, Uingereza

MANCHESTER, Uingereza: Pep Guardiola alivulia kofia nyota wake wa Manchester City kwa kuonyesha ujasiri mkubwa kwa kuvunja rekodi ya viongozi Liverpool kutoshindwa kwa kuwabwaga 2-1 na kuweka hai matumaini yao ya kutetea ubingwa wa Ligi Kuu.

Vijana wa Guardiola walikuwa na ulazima wa kushinda mchuano huo wa randi ya 21 kwa sababu kichapo kingeshuhudia Liverpool ikifungua mwanya wa alama 10 dhidi yao na kuwaweka katika hatari zaidi ya kuacha taji waliloshinda kwa rekodi ya alama 100 msimu uliopita.

Hata hivyo, walikuwa na ujasiri wa kutisha na kucharaza Liverpool kwa mara ya kwanza katika mechi tano kupitia kombora safi kutoka kwa Leroy Sane katika kipindi cha pili.

Sergio Aguero alifungua ukurasa wa magoli alipoweka wenyeji City kifua mbele dakika ya 40 na ingawa, Roberto Firmino alisawazisha dakika ya 64, City ilisalia tulivu na kwa ujasiri, haikupoteza mwelekeo wake na kumfanya Guardiola alimiminie sifa tele baada ya kipenga cha mwisho.

“Naona fahari katika kikosi hiki. Tulifahamu mechi hii ilikuwa fainali, tukiipoteza mambo yetu yatakuwa magumu zaid,” alisema Guardiola.

“Sifa zote zinawaendea wachezaji hawa ambao hawana kifani. Tulikuwa na shinikizo, lakini hatukuwa na uoga, hatukuogopa.

“Tulilemea timu kali. Tulikuwa sawa kutoka dakika ya kwanza.

“Liverpool hawafungwi mabao, na tulichana nyavu mara mbili. Tulisakata soka kwa ujasiri, tukiwania mipira na kubana wapinzani wetu.

“Tunafurahia ushindi huu kupunguza mwanya kati yetu na Liverpool. Kila kitu sasa kiko wazi.”

Guardiola alimiminia Aguero sifa za kipekee baada ya mshambuliaji huyu wa Argentina kupachika bao lake la 250 ligini kupitia shuti murwa kabla ya mapumziko.

Mfungaji huyu wa mabao mengi katika historia ya City sasa ameona lango katika mechi zake zote saba za nyumbani dhidi ya Liverpool.

“Tunahitaji Sergio Aguero katika mechi hizi, ufundi wake huleta tofauti kubwa,” alisema Guardiola.

“Kushinda mechi kama hizi, amefanya yote katika muda wake na mbinu aliyotumia kupata bao hilo ilikuwa ya kipekee.”

Akifahamu kipigo kingeweka mabingwa watetezi katika hatari zaidi, Guardiola aliomba wachezaji wake kutumia ushindi huu kama kichocheo cha kuongezea Liverpool presha.

“Sasa tuko alama nne nyuma yao na wao ndio viongozi. Lazima tuendelee kupigania kila pointi, lakini ushindi huu unatupa imani zaidi,” alisema.

“Tulifahamu kwamba tukishinda tutajirejesha katika vita vya kuwania ubingwa wa Ligi Kuu, tukipoteza mambo yetu kwisha.

“Sikumbuki ligi kali kama hii, kuna orodha ndefu ya wagombeaji wa taji. Vita ni vikali, kila mechi ni kama fainali.” Liverpool itazuru uwanjani Amex kumenyana na Brighton katika mechi yake ijayo ya ligi Januari 12 nayo City itaalika Wolverhampton Wanderers uwanjani Etihad siku mbili baadaye.

Liverpool itaanza mechi dhidi ya Brighton na rekodi nzuri ya kuishinda mara tano mfululizo katika mechi timu hizi zimekutana. Wolves haijashinda City katika mechi tano zilizopita, ingawa mshindi hakupatikana katika mechi mbili zilizopita.

MOKAYA: Man City ikipigwa tena, yake kwisha

NA JOB MOKAYA

KUNA msemo wa Uswahilini usemao kwamba kaa akiinua gando yamekatika. Kaa ni mnyama wa baharini mwenye gando au sehemu ngumu kama chuma inayofunika mwili wake kwa nje ili kujilinda.

Anaposhambuliwa, ni mwepesi wa kutumia gando lake kujificha hadi adui yake apite ndipo apate kujitokeza tena kama afanyavyo kobe.

Timu ya Manchester City ilipokea kichapo kwenye ligi kuu ya Uingereza kwa mara ya kwanza kabisa siku ya Jumamosi baada ya kulambishwa mabao mawili bila jawabu lolote kutoka kwa Chelsea, ngoma iliyochezwa Stamford Bridge.

Kichapo hiki cha City kiliwateremsha ardhini kutoka mbinguni ambako wamekuwa wakielea kwa muda sasa. Kabla ya mechi hii, wachanganuzi wengi wa soka walikuwa wamehoji kwamba City ingaliiadhibu Chelsea bila huruma wowote lakini mambo yakaenda kinyume sana na matarajio ya wengi.

Hali ina maana kwamba timu ya Liverpool imechukua uongozi wa ligi kuu ikiwa na pointi 42 baada ya kucheza mechi 16 huku ikifuatwa na Manchester City kwenye nafasi ya pili ikiwa na pointi 41. Tottenham ni ya tatu kwa pointi 36 nazo Chelsea na Arsenal zinafunga tano zikiwa na pointi 34 lakini Arsenal inadunishwa na mabao. Manchester United ni ya sita.

Endapo Manchester City itapoteza mechi nyingine nayo Liverpool kushinda, basi pengo kati yake na Livepool litakuwa alama 4 kwa dhana kwamba nayo Liverpool haitapoteza mechi.

La muhimu ni kwamba, endapo City watapoteza mechi nyingine basi kujiamini kwao kutakuwa kumeporomoka nao wataanza kupoteza mechi moja baada ya nyingine.

Matokeo yake yatakuwa Liverpool kushinda ligi kwa mara ya kwanza baada ya miongo mingi naye Pep Guardiola kuwekwa kwenye nafasi yake ambapo atakuwa anang’ang’ania nafasi ya nne bora wenzake wakiwa Arsenal na Manchester United.

Manchester City wamekuwa wakicheza mchezo mzuri sana hususan kwenye ligi na kushinda mechi nyingi mno. Ni kushinda huko ambako kumewafanya kuogopwa na wengi na hivyo kuwatia wapinzani hofu ya kisaikolojia. Hofu hiyo sasa imeanza kutoweka nayo itapotea kabisa wakati City itapokezwa kichapo kingine.

Mabao ya Chelsea yalifunga na kiungo cha kati Nkolo Kante kunako dakika ya 45 kipindi cha kwanza, nalo bao la pili lilitiwa kimiani naye difenda David Luiz kunako dakika ya 78 ya mchezo. Licha ya City kutapatapa hapa na pale, hawakuweza kupata angalau bao la kufutia machozi.

Manchester City wanarudi tena dimbani kesho kutwa (Jumatano) kwenye mtanange wa Champions League ambapo watachuana na Hoffenheim ya Ujerumani katika uga wao wa nyumbani wa Etihad.

Tayari City imefuzu kwenye awamu ya mwondoano ya Champions League huku ikikalia uongozi wa kundi lake ambalo linahusisha Olympique Lyon, Shakhtar Donetsk na hiyo Hoffenheim.

Baada ya michuano ya katikati ya juma ya Ligi ya Klabu Bingwa Ulaya, City itatua tena dimbani siku ya Jumamosi kuzichapa na Everton katika uga wa Etihad.

Mechi hiyo itaanza saa tisa unusu alasiri.Bila ya shaka yoyote, mtu aliyekuwa na furaha riboribo kutokana na ushinde wa City ni Liverpool. Timu zote zilizo katika sita bora zilishinda mechi zao za wikendi isipokuwa Manchester City.

Liverpool iliishinda Bournemouth kwa mabao 4-0; Arsenal ikailima Huddersfield Town kwa bao moja kwa yai nayo Manchester United ikaiangusha Fulham kwa mabao manne kwa moja. Tottenham ilifunga siku kwa kuishinda Leicester kwa mabao mawili kwa bila.

Mahrez anusia tuzo ya mchezaji bora kikosini Man City

NA CECIL ODONGO

MCHEZAJI ghali zaidi kwenye kikosi cha mabingwa watetezi wa ligi kuu nchini Uingereza Manchester City, Riyad Mahrez ameteuliwa miongoni mwa wachezaji watakaowania tuzo ya mchezaji bora wa mwezi Oktoba, 2018 klabuni humo.

Ingawa alianza mwezi huo kwa kupoteza penalti muhimu dakika za lala salama Manchester City walipokutana na Liverpool ugani Anfield Oktoba 7, Mahrez aliyejunga na City kutoka mabingwa wa zamani Leicester City mwanzoni mwa msimu wa 2018/19 alijizoazoa na kubeba timu yake katika mechi zilizofuatia.

Mwanasoka huyo alikuwa mhimili mkubwa kikosini kwenye ushindi dhidi ya over Hoffenheim ya Ujerumani ugenini katika mechi ya kuwania klabu bingwa barani Uropa.

Mahrez,27 alifuata hayo kwa kufuma wavuni bao safi katika ushindi wa mechi ya EPL Burnley kisha kutoa pasi murwa iliyochangia bao la ushindi dhidi ya Shahtar Donetsk katika ligi ya klabu bingwa Uropa.

Jumatatu Oktoba 29 winga huyo alikuwa moto wa kuotea mbali baada ya kuonyesha kiwango cha juu cha kabumbu na kufunga bao lililowarejesha Mancity kileleni mwa jedwali la EPL.

Ingawa hivyo, Mahrez ambaye amewahi kushinda tuzo ya mchezaji bora wa mwaka anakabiliwa na ushindani mkubwa kutoka kwa midfilda David Silva na mlinzi Aymeric Laporte ambao pia walifanya kweli kwa kutambisha timu mwezi Oktoba.

Klopp amfunza Guardiola gozi la UEFA

Na CHRIS ADUNGO

LIVERPOOL wamejikatia tiketi ya nusu fainali ya UEFA,Klabu Bingwa Ulaya baada ya kuiengua Man City 5-1 kijumla kufuatia ushindi wao wa 2-1 uwanjani Etihad Jumanne usiku.

Vijana wa Jurgen Klopp wamekuwa mwiba wa Man City katika mikondo yote miwili na walijikakamua na kufuta bao la Gabriel Jesus lililofungwa katika dakika ya pili.

Man City ilimiliki mpira kwa asilimia 69 huku wakiishambulia Liverpool kutoka kila upande lakini ilibidi watosheke na bao hilo moja baada ya refa kuamua Leroy Sane alikuwa ameotea katika bao lake, na Liverpool kuzuia mipira ndani ya kisanduku.

Lakini ilikuwa Liverpool ambao waliamini walikuwa na uwezo wa kulemea vijana wa Pep Guardiola katika kipindi cha pili, hasa baada ya kocha huyo kumkabili refa na kulazimika kutazama mechi akiwa kwa mashabiki.

Mohamed Salah alionyesha makali yake mbele ya goli alipotia kimiani bao la kusawazisha baada ya madifenda wa Man City kushindwa kuondoa mpira uliomponyoka kipa Ederson.

Mbrazili Roberton Firmino alihakikishia Liverpool nafasi katika nusu fainali baada ya kumpkonya mpira Nicolas Otamendi na kupiga bao la hakika lililowafanya mashabiki wa Liverpool kusherehekea kwa njia ya kipekee.

Na ingawa Salah na Firmino walifunga mabao hayo muhimu, mchezaji bora wa mechi hiyo alikuwa James Milner ambaye aliwakaba kwelikweli viungo wa Man City na kuhakikisha nafasi za pasi za mabao zimedidimia.

Ilikuwa mechi ambayo wengi walitarajia Man City ingebadilisha ubao, lakini kocha Jurgen Klopp alimfunza Pep Guardiola jinsi ya kucheza mechi za Klabu Bingwa ulaya. Tumia nafasi zako vizuri kufunga mabao, kumiliki mpira bila mabao ni kazi hewa.

 

Lazima tuzime mashambulizi ya Liverpool, asema Guardiola

Na CHRIS ADUNGO

MAN City wanaikaribisha Liverpool uwanjani Etihad kujaribu kubadilisha kibao cha ushindi wa 3-0 wa vijana wa Jurgen Klopp ugani Anfield.

Lakini ikiwa wenyeji hao watapigwa bao moja tu na Liverpool, watajua itawabidi wafunge mabao matano ili kufuzu kwa nusu fainali.

Na kocha wao Pep Guardiola anajua uzito wa kazi iliyopo Jumanne usiku akiwa mzoefu wa michezo ya Klabu Bingwa Ulaya.

“Ili kufuzu, unafaa kucheza soka safi bila makosa” akasema kocha huyo katika kikao na wanahabari Jumatatu.

“Tunahitaji kuunda nafasi za kufunga na kuhakikisha tumezima nafasi ya kufungwa. Mashambulizi ya Liverpool lazima tuyakabili kikweli.

“Tuna dakika 90 pekee na chochote cheza kutokea. Tunakachofanya ni kujaribu kushinnda.

 

“Tutafikiria kuhusu idadi ya mabao tutakayofunga baada ya kupata bao la kwanza.”

Naye kiungo mkabaji wa timu hiyo Fernandinho amesema ni jukumu lake pamoja na wachezaji wazoefu kuiinua Man City ambayo imepokea vichapo viwili ndani ya siku nne kwa mara ya kwanza msimu huu.

“Imekuwa wiki ngumu kwetu, vichapo viwili, lakini haya kwa sasa ni ya kale,” akasema Mbrazili huyo na kuongeza kuwa ili washinde, lazima wawe na matumaini.

Msiidhalilishe Man City, Klopp aonya

Na CHRIS ADUNGO

KIPIGO cha 3-0 kwenye robo fainali za Klabu Bingwa Ulaya kilitangulia kingine cha 3-2 kwenye debi ya Manchester baada ya kuongoza katika kipindi cha kwanza kwa goli mbili mtungi.

Hata hivyo, licha ya Liverpool kupigiwa upatu kuingia nusu failnali baada ya mechi ya marudiano ugani Etihad Jumanne usiku, kocha Jurgen Klopp hajabadilisha mtazamo wake kuhusu timuwatakayochuana nayo.

 

Alipoulizwa iwapo Man City walikuwa wepesi wa kuachilia mabao kuingia kwa lango lao, Mjerumani huyo alisema: “La hasha, sidhani kitu kama hicho.

“Wamekuwa na msimu bora zaidi lakini wao ni binadamu, shukuru Mola. Wamekuwa na matokeo mawili ambayo labda hakuna aliyetarajia.

“Man United walikuwa na bahati, katika kipindi cha kwanza, Man City wangefunga mabao sita na Man United hawakuwa na mechi ya katikati ya wiki, nayo City ilifanya mageuzi ya kikosi.

“Walipotupiga 5-0 mwanzoni mwa msimu, kila mtu alijionea makali ya City hata kama tulikuwa na kadi nyekundu. Wana kocha bora zaidi ulimwenguni.

“Ni kweli ni wazuri lakini hakuna mechi bila kufanya makosa duniani. Mchezo huu haukuruhusu kuwa bora kiasi cha kutofanya makosa.”

 

“Sidhani Barcelona wanafikiri kuwa washafika nusu fainali baada ya kupiga Roma 4-1, kwa kuwa hii ni soka na una nafasi ya kujinyayua na kupata ushindi.

“Man City wana nafasi ya kuingia nusu fainali. Watu wengi wanafikiri Liverpool inafuzu lakini wanaweza kupoteza. Pia tuna nafasi ya kushinda,” amesema kocha huyo.

 

Liverpool kuvaana na Man City kwenye robo fainali UEFA

Na CECIL ODONGO

KIPUTE cha kuwania ubingwa wa soka Bara Uropa kinatarajiwa kunogeshwa zaidi baada ya ratiba inayoshirikisha timu nane mibabe zitakazochuana kwenye robo fainali kutolewa Ijumaa.

Mashabiki wa Ligi Kuu ya Uingereza (EPL) yenye mashabiki wengi zaidi duniani watakuwa na fursa nyingine ya kutazama pambano kubwa kati ya klabu za Liverpool na Man City kwenye anga za soka ya Bara. Kufikia sasa klabu hizi mbili zimeongoza kwa ufungaji wa magoli ligini EPL.

Liverpool ambao wanarekodi nzuri ya kutia kibindoni kombe hilo mara tano, iliwapa Mancity wanoelekea kutwaa ubingwa wa EPL mabao 4-3 kwenye mchuano wa ligi mwezi Januari uwanjani Anfield. Hii ni baada ya vijana hao wa kocha Pep Guardiola kuiadhibu Liverpool 5-0 ugani Etihad.

Klabu hizi zinajivunia mastaa washambuliaji Sergio Aguero, Gabriel Jesus na Leroy Sane kwa upande wa Man City, na Mohammed Salah, Sadio Mane na Roberto Firmino kwa upande wa The Reds.

Ratiba hiyo itashuhudia mabingwa watetezi Real Madrid wakivaana na mabingwa wa Serie A Juventus, Barcelona ya Uhispania watifue kivumbi dhidi ya Roma ya Italia na Sevilla wapambane na wafalme wa Ujerumani, Bayern Munich.

Kulingana uchanganuzi wa kina na historia ya kipute hiki, mchuano kati ya Juventus na Madrid ambao walishiriki fainali ya mwaka 2017 utanatazamiwa kuzua msisimko.

Juve watapigana kwa jino na ukucha kulipiza kisasi  cha kupoteza fainali ya mwaka 2017 kando na kwamba kipa wao mkongwe Gianliugi Buffon aliye na umri wa miaka 40 atakuwa anastaafu.

Japo ana historia pevu kwenye fani ya soka, Buffon hajawahi kushinda kombe hili la hadhi ya juu kwenye ulimwengu wa soka.

Real Madrid kwa upande wao watakuwa wanaazimia kuandikisha historia mpya kwa kushinda kombe hilo kwa mara ya tatu kwa mpigo.

Mechi kati ya Barcelona na Roma na Sevilla dhidi ya Bayern Munich pia zinatarajiwa kuwa kali.

Michuano ya mkondo wa kwanza itasakatwa tarehe 3 na 4 mwezi Mei huku wa pili ukichezwa tarehe 10 na 11 mwezi uo huo.

 

Pep ammiminia sifa tele mvamizi mwiba Aguero

Sergio Aguero (kushoto) asherehekea na wenzake baada ya kufungia Manchester City bao kwenye mechi ya Ligi Kuu ya Uingereza dhidi ya Leicester City uwanjani Etihad mnamo Februari 10, 2018. Picha/AFP

Na AFP

MANCHESTER, UINGEREZA

Kwa Muhtasari:

  • Guardiola amsifu Sergio Aguero kwa kufungia timu yake mabao manne
  • Hadi kufikia sasa, Aguero anajivunia jumla ya mabao 28 ndani ya jezi za Man-City msimu huu
  • Guardiola amewataka vijana wake kutozembea katika michuano yote iliyopo mbele yao

KOCHA wa Manchester City, Pep Guardiola alikuwa mwingi wa sifa kwa nyota Sergio Aguero baada ya mvamizi huyo mzawa wa Argentina kufungia timu hiyo jumla ya mabao manne katika ushindi wa 5-1 dhidi ya Leicester City mnamo Jumamosi uwanjani Etihad.

Winga Raheem Sterling aliwafungulia Man-City ukurasa wa mabao mwanzoni mwa kipindi cha kwanza kabla ya Jamie Vardy kusawazishia Leicester dakika ya 39.

Hata hivyo, Aguero aliwarejesha Man-City mchezoni katika kipindi cha pili na kuwawezesha miamba hao wa soka ua Uingereza kujivunia jumla ya mabao 14 kutokana na michuano saba iliyopita ugani Etihad.

Ushindi wa Man-City uliwachochea kufungua mwanya wa alama 20 kati yao na Tottenham Hotspur ambao waliwabamiza Arsenal 1-0 ugani Wembley na kuchupa hadi nafasi ya tatu kwenye msimamo wa EPL, saa chache kabla ya Liverpool kuvaana na Southampton nao Manchester United kumenyana na Newcastle United uwanjani St James’ Park.

 

Mwiba kwa madifenda

“Aguero kwa sasa ni miongoni mwa wachezaji bora katika ulimwengu wa soka. Kiwango cha ubora wake kinazidi kuimarika kila uchao. Ni sogora wa haiba kubwa ambaye hana kifani kila anapopata mpira ndani ya msambamba wa wapinzani,” akasema Guardiola ambaye pia amewahi kudhibiti mikoba ya Barcelona na Bayern Munich.

Kulingana naye, mchuano huo ulikuwa moja kati ya mechi nzuri na za kuridhisha zaidi ambazo zimewahi kusakatwa na Man-City tangu apokezwe mikoba ya kikosi hicho.

Licha ya ushindi huo mnono, Guardiola amewataka vijana wake kutozembea katika michuano yote iliyopo mbele yao huku akiwasisitizia umuhimu wa kutia kapuni mataji mengine zaidi katika kampeni za msimu huu.

Huku wakiwa pua na mdomo na ufanisi wa kujinyakulia ubingwa wa EPL, Man-City huenda wakatia kibindoni ubingwa wa League Cup majuma mawili yajayo wakati watakaposhuka dimbani kunyanyua na Arsenal kwenye fainali.

 

Mabao 21 EPL

Hadi kufikia sasa, Aguero anajivunia jumla ya mabao 28 ndani ya jezi za Man-City msimu huu na magoli 21 ambayo ameyafunga katika EPL ni idadi inayomweka katika nafasi ya tatu nyuma ya Harry Kane na Mohammed Salah kwenye orodha ya wafungaji bora wa EPL.

Kocha Claude Puel wa Leicester alimleta uwanjani kiungo Riyad Mahrez katika kipindi cha pili katika mechi ambayo ilikuwa ya kwanza kwa nyota huyo kuchezea waajiri wake tangu mpango wake wa kuhamia Man-City kuambulia pakavu mwishoni mwa Januari 2018.

MATOKEO YA EPL (Jumamosi): Tottenham 1-0 Arsenal, Everton 3-1 Palace, Swansea 1-0 Burnley, Stoke City 1-1 Brighton, West Ham 2-0 Watford, Man-City 5-1 Leicester