CHOCHEO: Mume si suti, ni ujasiri!

NA BENSON MATHEKA

Faiza alishangaza marafiki wake kwa kumuacha Ali na kumchumbia Abdul ingawa mwanamume huyo alikuwa akimpenda na kumtunza vyema. Kwa mwanadada huyu, hakupata alichotafuta kwa mume katika Ali.

“Ni kweli ana pesa, ni jamala, nadhifu na ananipenda lakini ni mwoga. Siwezi kuishi na mume mwoga katika maisha yangu. Nani atanilinda nikiwa hatarini?” ahoji Faiza.

Mwanadada huyu anasema ingawa Abdul hana pesa kama Ali, ni jasiri. “Ninataka mume ambaye nitahisi kuwa salama sio mwoga atakayeniuliza atakachofanya kunitoa kwenye hatari,” asema.

Sally, mwanadada mwenye umri wa miaka 32 anasema aliolewa na Mwangi kwa sababu ya ujasiri wake. “Nilimuacha mwanamume aliyekuwa akinipatia chochote kwa sababu niligundua alikuwa mwoga.

Ingawa Mwangi ana pesa nyingi, ninajua kitu kimoja, kwamba hakuna anayeweza kunigusa kwa sababu ataona moto,” asema.Wataalamu wa masuala ya mapenzi wanasema kwamba hakuna mwanamke anayeweza kukubali mwanamume mwoga.

“Wanawake hupenda wanaume wanaoweza kuwahakikishia usalama wao, sio tu kwa kukidhi mahitaji yao, mbali pia kuwalinda dhidi ya hatari inayoweza kuwakabili. Unaweza kumpa mwanamke kila kitu anachohitaji lakini ikiwa hauwezi kumlinda akikumbwa na hatari, atakuacha,” asema Steven Omboki, mwanasaikolojia wa kituo cha Abundant Life mjini Athi River.

“Kigezo muhimu ambacho wanawake wanazingatia wanapotafuta mume ni ujasiri. Mtu jasiri anaweza kufanikiwa katika mambo mengi. Hata akishindwa anaweza kupigana hadi afaulu,” aeleza.Kulingana na Martha Kawira, mshauri mwandamizi wa shirika la Maisha Mema, wanawake wanaamini kwamba mwanamume mwoga hawezi kuwa mume bora.

“Kwa wanawake, mwanamume mwoga hafai kuwa mume wa mtu. Woga unafanya mwanamume kukosa mke kwa sababu wanawake wanapenda mtu atakayewahakikishia usalama wao na watoto wao,” asema Kawira.

Daisy Mukami, mwanadada mwenye umri wa miaka 32 na mama ya watoto wawili, asema alimuacha mumewe alipogundua alikuwa mwoga.

“Hakuweza kuua hata panya katika nyumba yetu. Hakuweza kukabili majirani wakituchokoza. Hakuweza kutetea mali yake ikitumiwa vibaya na watu wengine. Hivyo niliamua kumtema kwa sababu kuwa naye ni sawa na kuishi katika nyumba bila mlango,” asema Mukami. Kawira asema mume anafaa kuwa mlinzi wa mke, watoto na mali.

“Mume sio suti, mume ni zaidi ya kuwa na gari, sura nzuri na kumnunulia mkewe zawadi. Mume ni ngao ya mkewe na familia. Ukipungukiwa na ujasiri, unajiweka katika hatari ya kukosa mke,” asema Kawira.

Watalaamu wanasema wanawake wanaofahamu vigezo halisi vya mume bora huwa wanachunguza iwapo wanaowachumbia ni jasiri.

“Mwanamume jasiri huwa anajiamini na kwa kufanya hivyo, anaweza kufanikiwa. Mwanamume jasiri anaweza kuwa mfano mwema kwa wanawe,” aeleza Omboki.

Lakini Kawira anashauri wanawake kutofautisha aina za ujasiri akisema wanaweza kudhani mwanamume ni jasiri lakini awe katili.

“Hata unapotafuta mwanamume jasiri, chunga usiangukie katili atakayefanya maisha yako kuwa jehanamu. Wanawake wengi huwa wanakosea na hatimaye kujuta,” aeleza Kawira.Omboki anakubaliana na kauli hii akisema baadhi ya wanawake huwa wanajuta kwa kuolewa na wanaume katili wakidhani wamepata walio jasiri.

“Ni muhimu kufahamu chanzo cha ujasiri wa mtu. Kuna ujasiri unaotokana na elimu, mali, imani ya dini na kuna ujasiri wa kipumbavu pia wa kutumia kifua. Kuna watu jasiri lakini hawana hekima. Hao ni hatari,” aeleza.

Kulingana na wataalamu, mume anafaa kulinda mke lakini sio kuwa tishio kwake. Damaris* mwanadada mwenye umri wa miaka 28 anasema alidhani mumewe angekuwa ngao yake lakini akamkosesha amani kwa kumdhulumu kila wakati.

Mkewe Cohen ataka aachwe huru amzike mume

Na RICHARD MUNGUTI

MJANE wa mfanyabiashara tajiri kutoka Uholanzi, Tob Cohen, anayezuiliwa katika gereza la wanawake la Langata, Sarah Wairimu Kamotho, ameomba Mahakama Kuu iamuru idara ya magereza imsindikize ahudhurie mazishi ya mumewe licha ya kukataa kuhudhuria kikao cha kusomwa kwa wosia wake.

Wosia huo ulipangiwa kusomwa Ijumaa katika ofisi za wakili wa marehemu.

Wakili Cliff Ombetta anayewakilisha dada wa Tob Cohen alisema familia haina pingamizi Wairimu kuhudhuria mazishi ya mumewe yatakayofanyika katika makaburi ya Mayahudi yaliyoko barabara ya Wangari Mathai, Nairobi.

Na wakati huo huo, ombi hilo la Wairimu liliorodheshwa kuwa la dharura.

Naibu wa msajili wa kitengo cha kesi za uhalifu, Bi Jane Kamau, aliamuru ombi hilo lisikizwe na Jaji Jessie Lesiit hapo Septemba 23, 2019 ili atoe maagizo kuhusu ombi hilo.

Katika ombi hilo, wakili Philip Murgor na George Ouma wanaomba mahakama iamuru msimamizi wa gereza la Wanawake la Langata amsindikize Wairimu kuhudhuria mazishi ya Cohen na kutoa heshima zake za mwisho.

Kuhudhuria

Wakili huyo alisema Wairimu anataka kuhudhuria mazishi ya mumewe kutoa heshima zake za mwisho.

Bi Kamau alielezwa kuwa mnamo Septemba 18, 2019, Jaji Stellah Mutuku aliamuru idara ya magereza kumpeleka Wairimu mochari ya Chiromo kuhudhuria shughuli ya upasuaji wa maiti.

Wakati wa shughuli hiyo, tofauti zilizuka kuhusu jinsi mazishi yatakavyoendeshwa, Wairimu akitaka aruhusiwe kuzika mwili wa mumewe.

Hata hivyo, baadaye pande zote ziliamua kwamba marehemu azikwe naye Wairimu aruhusiwe kuhudhuria.

Katika kesi hiyo Wairimu ameshtaki afisi ya Mkurugenzi wa mashtaka ya Umma (ODPP) inayowakilishwa na viongozi watatu wa mashtaka Mabw Nicholas Mutuku, Alexander Muteti na Bi Catherine Mwaniki. Amemtaka dada yake marehemu Gabrielle Cohen kuwa mhusika.

Kisura taabani kumtandika mumewe kila siku

Na TOBBIE WEKESA

Tulienge, Bungoma

Kipusa mmoja wa eneo hili alijipata pabaya baada ya wazee wa ukoo kumuonya vikali dhidi ya kumuadhibu mume wake.

Inasemekana kipusa alikuwa na mazoea ya kumpa kichapo kila mara akifika nyumbani kwake hadi wazee wakaamua kumuita kikaoni na kumpa onyo.

“Wewe unatuaibisha na ukoo kwa jumla. Kila mara ni kumchapa mumeo. Shida yako ni gani?” wazee walimuuliza mwanadada. Kipusa alidai kwamba hakuwa na shida yoyote na kudai kwamba mumewe ndiye hajakomaa kiakili. “Huyu kijana wenu nikimuachilia awe huru, atapotoka,”mwanadada alijitetea.

Penyenye zinasema kipusa alikuwa amempa polo masharti makali mno. Mojawapo  saa moja ya jioni isimpate nje ya boma.

“Tunajua una nguvu nyingi sana. Hufai kumalizia hizo nguvu zako kwa kijana wetu. Nenda ukawe mwanandondi,” mzee mmoja alimwambia kipusa.

Inadaiwa kipusa aliapa kuendelea kumuadhibu polo iwapo hatabadili tabia na mienendo yake.? “Wewe huoni aibu mwanamume mzima kulia kama mtoto mdogo! Hilo lazima likome. Hili linafanya ukoo na familia hii kusemwasemwa sana kule nje,” kipusa alionywa.

Kipusa alilazimika kunyamaza alipoona wazee wote waliungana dhidi yake. ?“Siku mbili haziwezi kupita kama bwanako hajasikika akilia. Sisi hatutakubali kubandikwa majina ya dharau kwa sababu yako,” wazee walimuonya kipusa.

Kulingana na mdokezi, hata majirani hawakufurahishwa na namna kipusa alivyokuwa akimuadhibu mumewe. Kwao, kipusa alikuwa akitoa mfano mbaya kwa wanawake wenzake na wasichana wadogo.

Duru zinasema wazee hao walimlazimisha kipusa kuomba msamaha na kuahidi kutorudia tena tendo hilo.

 

 

Mkewe bosi atimua kidosho akidai atampokonya mume

Na TOBBIE WEKESA

Viwandani, Nairobi 

Mke wa mkurugenzi wa kampuni moja eneo hili aliwashangaza wafanyakazi alipomlazimisha kipusa kurudi nyumbani kubadilisha nguo akidai alinuia kumteka mumewe kimapenzi. ?

Inasemekana mwanadada aliamua kumfukuza mrembo huyo akihofia kuwa huenda angempokonya mume wake.

Penyenye zinasema mwanadada alikuwa amesikia habari kumhusu mrembo huyo na mavazi yake na aliamua kupitia kazini ambapo walikutana ana kwa ana. “Mbona unapenda kuvalia hivi?” alimuuliza mrembo.

Kwa kuhofia kufutwa kazi, mrembo aliamua kunyamaza.

Penyenye zinasema mke wa mdosi alikuwa akichunguza mienendo ya mrembo yule kisiri kwa muda baada ya kupata habari kuhusu mitindo yake ya mavazi.

“Mbona ni wewe peke yako unayevalia hivi kila siku? Ama mdosi wako alikupa idhini ya kuvaa hivyo?” mwanadada alitaka kujua.

Duru zinasema ilibidi kidosho kumjibu. “Hizi nguo ndizo chaguo langu. Sivai hivi kumpendeza wala kumvutia yeyote,” mrembo alimueleza mke wa mdosi wake.

Kulingana na mdokezi, maneno ya mrembo hayakumridhisha mke wa bosi. “Wewe utaacha ukora. Nia yako naijua. Unavalia hivi ukitaka kumteka bwanangu,” alimshtumu mrembo.

Wafanyakazi wa kampuni hiyo walibaki kushangaa lakini hawakusema lolote.

“Wewe ni wale wenye nia ya kuvunja ndoa za watu. Yangu hautoboi,” mwanadada aliapa.

Inadaiwa alimpa mrembo dakika tano kurudi kwake abadilishe nguo la sivyo atimuliwe kazini.

“Sitakuruhusu uendelee kukaa hapa na hizi nguo zako. Hata hizo nywele toa. Fanya hivyo haraka,” mwanadada alimueleza mrembo.

Mrembo alibaki mdomo wazi. “Nimesema toka hapa haraka. Shika njia na usirudi hapa tena ikiwa hautabadilisha mavazi yako,” alisema na kuwaita walinzi kumtimua kidosho.

Mke wa mwalimu aliyeuawa kukaa seli

Na NDUNGU GACHANE

MKE wa mwalimu Mkuu wa Shule ya Upili ambaye mwili wake ulipatikana Jumapili ukiwa umewekwa katika buti ya gari Jumatatu alifikishwa mahakamani pamoja na mshukiwa mwingine wa kiume.

Hata hivyo, Alice Mugechi na Samuel Harrison Gitu hawakujibu mashtaka katika mahakama ya Murang’a, baada ya upande wa mashtaka kuomba muda zaidi wa kuwachunguza.

Mwili wa Bw Samuel Mbogo uligunduliwa ukiwa kwenye buti ya gari eneo la Gakurwe, kwenye barabara ya Murang’a – Kiriaini.

Afisa anayechunguza kesi hiyo Jeremiah Kazungu Ngumbao aliomba mahakama kuwapa polisi muda zaidi kukamilisha uchunguzi, kabla ya kuwafungulia rasmi mashtaka washukiwa hao.

“Naomba mahakama kutupa siku 14 zaidi ili tuweze kukamilisha uchunguzi kabla ya kuwafungulia washukiwa mashtaka kuhusiana na mauaji haya,” afisa huyo akaambia mahakama.

Lakini washukiwa walipinga ombi hilo huku wakitaka mahakama kuwaachilia huru na wakamatwe tena polisi watakapokamilisha uchunguzi.

“Hakuna mtu nyumbani wa kutunza ng’ombe na mifugo wengine. Sikupata wakati wa kufunga mlango wangu nilipokamatwa. Kadhalika, naomba nipewe muda wa kuandaa mazishi ya mume wangu mpendwa.

Polisi wako huru kunikamata tena watakapokamilisha uchunguzi wao,” akasema Mugechi. Gitu aliambia mahakama kuwa yuko tayari kukamatwa tena polisi watakapokamilisha uchunguzi wao.

“Kwa sababu polisi hawajapata ushahidi wa kunihusisha na mauaji hayo, hawafai kuendelea kunizuia. Wanikamate watakapokamilisha uchunguzi wao,” akasema mshukiwa huyo.

Lakini, Hakimu Mkuu, Bi Margaret Wachira alikataa maombi ya washukiwa akisema kuwaachilia huru kutatatiza uchunguzi.

“Nimekubaliana na ombi la upande wa mashtaka. Hivyo naruhusu afisa wa uchunguzi kuzuilia washukiwa kwa siku 14,” akasema Bi Wachira.
Kesi hiyo itatajwa Mei 28.

Mshukiwa wa kiume anadaiwa kuwa mpenzi wa mke wa mwendazake.

Kulingana na afisa mkuu wa Idara ya Upelelezi wa Murang’a Kaskazini, Bw Japheth Maingi, viatu alivyokuwa amevaa Gitu vilipatikana na damu alipokamatwa. Viatu hivyo vinadaiwa kuwa vya mwalimu mkuu aliyeuawa.

“Tulipomshika Gitu alikuwa na damu katika viatu na nguo zake na tunaamini amehusika na mauaji,” akasema afisa huyo.

SHANGAZI: Nataka kumsahau mpenzi lakini nalemewa na hisia

Na SHANGAZI SIZARINA

Kwako Shangazi. Mimi ni msichana mwenye umri wa miaka 22. Sijaolewa lakini nilizaa mtoto na mwanamume tuliyekuwa wapenzi. Punde tu nilipojifungua, tulianza kukosana na hatimaye tukaachana aliponitambulisha kwa mpenzi wake mwingine. Muda si mrefu, waliachana na tangu hapo tumekuwa tukikutana na kufurahia mahaba kama awali. Hata hivyo, nataka kumsahau ili niendelee na maisha yangu lakini nimeshindwa kwa sababu nampenda sana. Nipe ushauri.
Kupitia SMS

Kulingana na maelezo yako, nahisi kuwa unajaribu kubishana na moyo wako. Ukweli ni kwamba, hutaki kumuacha mwanamume huyo kama unavyodai kwa sababu unamalizia kwa kukiri kuwa unampenda sana. Na hiyo ndiyo sababu yako kumkaribisha tena katika maisha yako baada yake kuachana na mpenzi aliyemfanya akuache. Kama yuko tayari mrudiane, acha maringo. Isitoshe, ndiye baba ya mtoto wako.

 

Kumbe ni kiruka njia
Vipi Shangazi. Nina kijana mpenzi wangu ninayempenda sana. Hata hivyo, juzi niliona kwenye mitandao msichana mwengine aliye na jina sawa na langu ambaye wanaitana wapenzi. Je, nimuache?
Kupitia SMS

Kama unayosema ni ya kweli, basi ina maana kuwa huyo unayemuita mpenzi wako si mwaminifu bali ni ndumakuwili. Sasa umejua kuwa ana mpenzi mwingine kwa hivyo utaamua mwenyewe iwapo utamuacha ama utaendelea kumvumilia na tabia yake hiyo.

 

Baba mzazi aniwinda
Shikamoo Shangazi. Mimi ni msichana mwenye umri wa miaka 16 na nina tatizo ambalo nataka unisaidie kutatua. Baba yangu mzazi amekuwa akitaka tushiriki mahaba na nimeshindwa nitafanya nini.
Kupitia SMS

Maajabu ya ulimwengu hayo! Siamini kuwa baba mzazi anaweza hata kufirikia kushiriki tendo hilo na binti yake mwenyewe. Usikubali kamwe kwani kitendo hicho ni mwiko katika jamii nzima ya binadamu. Pili, mfahamishe mara moja mama yako kuhusu jambo hilo. Kama mama yako hayupo, mwambie jamaa yako mwingine uliye karibu naye ili akupe mwelekeo zaidi.

 

Mimi kivutio kwa vipusa
Hujambo Shangazi. Mimi ni kijana mwenye umri wa miaka 22. Ninashangaa kwamba, warembo wanapenda sana kunifuata wakinitaka, si kwa simu, si kwa mitandao. Sijui nina jini la kupendwa ama vipi. Nishauri.
Kupitia SMS

Je, ina maana kwamba unalalamika kwa kupendwa ama nini? Mimi ninaamini kuwa mtu hupendwa kutokana na maumbile au tabia yake. Hayo yako eti una jini la kupendwa mimi siyajui. PiIi, unafaa kushuruku badala ya kulalamika kwa sababu kuna wenzako ambao wamekuwa wakisaka wapenzi kwa muda mrefu bila kufaulu.

 

Nifanyeje nipate mpenzi?
Kwako Shangazi. Nina umri wa miaka 26 na natamani sana kuwa na mpenzi. Nifanye nini?
Kupitia SMS

Kazi yangu katika safu hii ni kutoa ushauri wala si kusaidia watu kutafuta wapenzi. Kama wewe ni mwanamume, itabidi ujitahidi kutafuta mpenzi la sivyo utaishi pweke. Kama wewe ni mwanamke, kuwa na subira na ujaribu kutangamana na wanaume wala si kuketi kitako nyumbani ukitarajia mpenzi aanguke kutoka angani.

 

Mke alianza kuzurura nje
Shangazi naomba ushauri wako. Nilikuwa na mke na tukajaliwa mtoto mmoja ambaye ninampenda sana naye pia ananipenda. Lakini mke wangu alianza kutembea sana nje na nikalazimika kumuacha. Alirudi kwao na mtoto na sijui nitafanya nini ili nimpate mtoto wangu. Nisaidie tafadhali.
Kupitia SMS

Wazazi wanapotengana na kukosa kupatana kuhusu ni nani kati yao anayefaa kuishi na mtoto au watoto, mzozo huo hutatuliwa mahakamani. Kama mke wako amekataa na mtoto na unahisi wewe ndiye unayefaa kuishi naye, itabidi utafute suluhisho kortini.

 

Nikimkumbuka nalia
Nina miaka 45. Mpenzi wangu alifariki. Usiku silali. Nikimkumbuka nalia tu. Nitafanya nini?
Kupitia SMS

Pole zangu nyingi kwa kumpoteza mwenzako. Kuombeleza na kukubali kwamba umempoteza mwenzako sio jambo la siku moja. Huchukua hatua moja hadi nyingine hadi pale akili na mwili wako vitakapokubali kwamba mwenzako hayuko tena. Lia pale unapojisikia kufanya hivyo, mwandikie barua pale unapohisi unashindwa kumtoa mawazoni. Zungumza na watu wa karibu nawe kuhusu unavyojisikia. Lakini ukiona haya yote hayasaidii, ni vizuri umuone mshauri nasaha.

 

Ajuta kujaribu kumtia mumewe kiganjani

Na LEAH MAKENA

GITEMBENE, MERU

Mama wa hapa alipatiwa talaka  kwa kuweka akiba kisiri ili ajenge nyumba ya kifahari. Mama alikuwa na mshahara mnono na akaamua kuweka pesa akiwa na lengo la  kujenga nyumba na kumweleza mumewe baada ya kuikamilisha. 

Mumewe hakuwa na kazi nzuri na mapato yake yalikuwa kidogo mno.

“Nia ya mama ilikuwa kumpunguzia mumewe mzigo kwa sababu mapato yake yalikuwa ya chini sana. Alitaka familia yake kuwa na maisha mazuri,” alisema mdokezi.

Inasemekana kuwa mama alichukua mkopo  benki ili kuharakisha ujenzi wa nyumba hiyo na akaamua kulipa madeni yote bila kumhusisha polo.

Haikujulikana jinsi mumewe alivyogundua siri ya mama ila alimpigia simu akiwa kazini na kumtaka kujipanga kuondoka kwake.

Jioni ya kisanga, mama alifika na kupata begi la nguo nje huku jamaa akitetemeka kwa hasira.

“Yaani unanifanya kutoa jasho kushughulikia mahitaji yote ya nyumbani ilhali unachukua loni kujengea uwapendao majumba makubwa? Huu uwe mwisho wangu na wewe kwani umekuwa kero kwangu,” jamaa aliteta.

Juhudi za mama za kujaribu kujitetea hazikufua dafu kwani polo aliendelea kubishana akidai jengo lililokuwa likikamilika halikuwa lao.

“Siwezi kuishi katika nyumba ambayo sikuhusika kujenga. Ulikuwa unaficha nini iwapo ulikuwa na nia nzuri?” mzee aliwaka.

Ilibidi mama kuzoa kilichokuwa chake na kuondoka huku polo akiapa kulisha watoto pekee yake na kumlaumu mkewe kwa kuficha siri kubwa kama hiyo.

Haikujulikana iwapo jamaa alibadilisha nia  baadaye mkewe kuwajulisha wazee wazungumze naye apate kujua ukweli wa mambo.

…WAZO BONZO…

SHANGAZI: Kila niendapo kwa duka lake, hulalama kuhusu mumewe

Mimi ni kijana na nilioa miaka mitatu iliyopita. Nina mtoto mmoja. Tatizo ni kwamba, kuna mwanamke mwenye biashara ya nguo. Niendapo kununua wakati ninapotoka, yeye huniandama na kunilalamikia kuhusu mume wake. Nifanyaje?
Kupitia SMS

Watu hulemewa na matatizo na huwa wanatafuta jinsi ya kutua mzigo wa mawazo na hofu. Hivyo labda huyu dada ameona unaweza kumsikiliza na kumsaidia kutua aliyo nayo. Hata hivyo ni muhimu kuwa mwangalifu ili usijipate umetekwa kimapenzi. Ni vizuri kufafanua kwake kwamba nia yako ni kumsikiliza na labda kumpa usaidizi wa kupata suluhu na wala sio vinginevyo.

 

Natafuta mke wa mtu
Naitwa Maguta kutoka Narok. Nina mke na watoto wawili. Natafuta wanawake wanene na pia wake za watu. Aliye tayari ajitokeze. Kupitia SMS

Nadhani unatamani kupigwa, ama umechoka kuishi.

 

Nashuku nina mimba
Mimi ni msichana wa umri wa miaka 24. Nina mume ambaye nikilala naye natokwa na maji na nina mimba ya miezi sita. Niko Mombasa. Kupitia SMS

Unapokuwa mjamzito ni muhimu mno kuwa makini na kinachoendelea mwilini mwako hasa inapohusu burudani. Siwezi kujua kwa uhakika kama hali hiyo ni kawaida ama la. Bali itakuwa vyema umuone daktari,akuangalie na akupatie jibu la kitaalamu. Kwa sasa pumzisha burudani na mumeo hadi utakapomuona daktari.

 

Namtafuta kidosho
Mimi ni kijana wa umri wa miaka 25. Natafuta mpenzi. Awe anajiweza na umri wa miaka 30. Awe Muislam hasa Muarabu. Kama uko jitokeze.
Mohamed. Mombasa. Kupitia SMS

Natumaini unayemtafuta atajitokeza.

 

Ninachukia wanaume
Nina umri wa miaka 19. Sina mpenzi na wanaume watatu wananiandama. Nawachukia wanaume. Je, hii ni sababu ya kukosa mpenzi? Nifanyaje waache kunifuata? Kupitia SMS

Inawezekana pia umri wako unachangia pakubwa hiyo chuki uliyo nayo kwa wanaume. Ingawa pia inaweza kuwa mambo yaliyokutokea wakati unakua ama yale ambayo uliyashuhudia kuhusiana na wanaume. Jipatie wakati ukue, ukomae zaidi.

 

Kuna dawa ya chuma?
Chuma changu ni nchi nne unusu. Je, ni kidogo? Na kuna dawa? Kama ipo inaitwaje? Niipate wapi? Hussein Ali. Umri wangu ni miaka 24.
Kupitia SMS

Haya maswali yako ni kama ya afisa wa upelelezi. Huna haja ya kujiuliza haya yote, bali unatakiwa kulenga mbinu na jinsi za kutumia ulicho nacho kumfurahisha mwenzako. Kwani raha ya mapenzi sio ukubwa wa chuma, bali mbinu za kukitumia.

 

Niko tayari kumwoa
Nina umri wa miaka 20. Jina langu ni Bihija. Niko tayari kuishi na Twaha. Kupitia SMS

Natarajia huyo mwenzako amesikia mwitikio wako.

 

Nampenda lakini hajui
Naitwa James kutoka Thika. Kuna mrembo ninayempenda sana lakini sijamwambia. Kwani yuko sekondari na nataka kumpa muda amalize. Lakini naogopa atapatwa na mwingine.
Kupitia SMS

Kama kweli unampenda, mpatie nafasi amalize masomo, kabla ya kuchafua akili yake na masuala ya mahaba.
Naogopa lakini namtaka

 

Naogopa wa kando sababu nimeokoka
Nimeolewa na nina mtoto mmoja wa kike. Mume wangu ananipenda sana. Lakini kuna jamaa ana mke na mtoto mmoja alinipenda. Lakini hatujakutana kimwili. Tatizo ni kwamba naogopa sababu nimeokoka lakini nisipoona sura yake sina raha.
Kupitia SMS

Majaribu na vishawishi ni kawaida katika ndoa na hata mahusiano. Tofauti inakuja jinsi unavyosuluhisha roho yako na uweze kuishi na amani. Kitu gani hasa unachokosa kwa mumeo ambacho unadhani utakipata ukienda nje. Labda hilo ndilo swali kubwa la kujiuliza na ujijibu na kisha uamue.

 

Ana wivu ajabu
Nimeolewa na mume wangu ana mwanamke pembeni. Na akiniona na mwanaume anakasirika. Niko Mombasa.
Kupitia SMS

Ina maana mmeoana na nyote wawili mnachakachua nje? Hii ni ndoa ama maradhi?

 

Ni ugonjwa ama nini?
Mimi nina mke na umri wangu ni miaka 22. Nikirushana roho ni raundi moja tu. Huu ni ugonjwa ama uzima? Kupitia SMS

Kwa kweli hapo mwanangu siwezi kujua. Wewe wajielewa na mwili wako vyema zaidi.

 

Wa Muchomba atawataka wanaume kuoa wake wengi

Na ERIC WAINAINA

MBUNGE Mwakilishi wa Kaunti ya Kiambu Gathoni wa Muchomba amewaomba wanaume katika jamii ya Agikuyu kuoa wake wengi, ili kuepuka matatizo yanayotokana na ulezi wa watoto bila baba zao.

Mbunge huyo alisema kuwa ukosefu wa wazazi wa kiume katika ulezi wa watoto umezua migogoro mingi ya kijamii miongoni mwa vijana, baadhi ikiwa kusambaa kwa ulevi.

Aidha, alisema kwamba wanaume ambao wanapata watoto na wanawake wengine wanapaswa kuwaoa kuwa wake wao halali, akishikilia kuwa kuwa na wake wengi si hatia ila ni suala la utamaduni.

Alikuwa akihutubu Jumatatu katika kituo cha Violence Recovery Centre, eneo la Wangunyu, Kaunti Ndogo ya Kiambaa, ambacho kinasimamiwa na afisi yake.

Alisema kuwa vijana wengi katika jamii hiyo ambao wamekuwa wakijiingiza katika ulevi na uhuni huwa wanafanya hivyo kwa kukosa malezi mema.
Kulingana naye, watoto wengi wa kurandaranda walio jijini Nairobi wanatoka katika jamii hiyo.

“Huwa tunapata watoto hao, ila huwa hatutaki kuwajibikia majukumu ya kuwalea. Ushauri wangu ni kwamba, ikiwa wewe ni mwanamume kutoka jamii ya Agikuyu, na una uwezo wa kuwaoa na kuwagharamia wake hadi watano, oa,” akasema.

Alisema kwamba jamii hiyo inapaswa kuweka kwenye mizani Imani yake ya kidini na utamaduni.

Kulingana naye, ikiwa kuoa wake wengi ndiko kutakuwa suluhusho la mgogoro wa sasa wa kijamii, basi kunapaswa kukumbatiwa kikamilifu na kukoma kuweka usasa mwingi katika masuala ya ulezi, akitaja hilo kama kiini kikuu cha changamoto za kijamii zinazoikumba jamii yake.

Waraibu wa pombe
Katika hafla hiyo, Bi Wamuchomba alizindua mpango wa kuwarekebisha tabia waraibu wa pombe, ambao utadumu kwa miezi mitatu. Alisema kuwa umma unapaswa kukumbatia suala hilo na kulitathmini kwa kina.

Alitaja kuwa kinaya hali ambapo vijana wengi waliofika katika hafla hiyo walikuwa wakiwataja mama zao kama wazazi wanaowajua.

“Hilo linaonyesha kwamba wanaume wengi hawajakuwa wakiwajibikia masuala ya ulezi. Huu ni mkasa mkubwa unaotukabili kama jamii,” akasema.

“Lazima tuwe wasema ukweli, Je, watoto wanaolelewa na akina mama wanazaliwa bila uwepo wa wanaume?” alishangaa.

 

SHANGAZI AKUJIBU: Mume wangu bado anafuatafuata mke wa zamani

Kwako shangazi. Nimeolewa na mwanamume ambaye alikuwa amezaa na mwanamke mwingine kabla hajanioa. Sasa nimegundua bado anamfuata mwanamke huyo. Tafadhali nishauri.
Kupitia SMS

Iwapo unayosema ni kweli, inaonekana wawili hao wamefufua uhusiano wao ama hata hawakuachana licha ya mwanamume huyo kukuoa. Ni muhimu ujue msimamo wa mume wako kuhusu suala hilo ndipo uchukue hatua unayohisi inafaa.

 

Aliyenipa mimba kahepa, nasumbuka

Vipi shangazi? Kuna mwanamume aliyenipa mimba kisha akanihepa na kuoa mwanamke mwingine. Sasa wazazi wananilaumu na wananifukuza nyumbani sijui nitaenda wapi. Kuna wengi wanaotamani kunioa. Nishauri.
Kupitia SMS

Ni kweli ulikosea, sio tu wazazi wako, bali wewe mwenyewe, kwa kuzaa kabla hujaolewa ingawa pia si vyema kwao kukufukuza nyumbani. Kama kuna wanaume wanaotaka kukuoa, chagua mmoja wao akuoe kwani baba ya mtoto wako tayari ana mke na hutarajii kuwa atakurudia.

 

Nashindwa kuacha tajiri huyu aliyeoa
Nina umri wa miaka 20 na nina uhusiano na mwanaume wa miaka 33 ambaye ameoa na wana watoto wawili. Nimejaribu kuachana naye lakini nimeshindwa kwa kuwa nampenda sana. Ameniwekea biashara na anataka kunioa mke wa pili lakini naogopa. Nishauri.
Kupitia SMS

Kulingana na maelezo yako, ni dhahiri kuwa umekwama kwa mwanamume huyo na itakuwa vigumu kujitoa. Sasa huna budi ila kuendelea kuwa mpango wake wa kando ama ukubali kuolewa mke wa pili. Utaamua mwenyewe.

 

Nataka kutengana na mume mbanifu
Nimekuwa na mpenzi kwa miaka sita sasa lakini nahisi hanifai. Sababu ni kuwa tangu tujuane hajawahi kuninunulia chochote bila kumuitisha, hata pesa za matumizi ni lazima nimuombe. Nimejaribu kumrekebisha lakini nimeshindwa. Nishauri.
Kupitia SMS

Inawezekana kuwa mwanaume huyo hajui jinsi ya kujenga na kutunza uhusiano ama ni mkono gamu tu. Uhusiano ni chaguo la mtu binafsi kwa hivyo kama unahisi huyo siye mtu ambaye ungependa kuishi naye unaweza kujiondoa katika uhusiano huo.

 

Mchumba hataki nimlipie mahari
Hujambo shangazi. Nimekuwa na uhusiano na mwanamke fulani ambaye ana mtoto kwa miaka mitano sasa. Niko tayari kupeleka mahari kwa wazazi wake lakini amekataa. Nifanye nini?
Kupitia SMS

Hizo ni dalili kwamba mwanamke huyo hajaamua kwamba wewe ndiye utakuwa mume wake. Anajua vyema kuwa kupeleka mahari ni kuhalalisha ndoa na ndiyo maana amekataa. Kama unamtaka mke inaonekana haitawezekana.

 

Jamaa ninayempenda ni mkali kama chui
Hujambo shangazi. Nimepandana na kijana fulani lakini tatizo ni kuwa ni mkali sana hata namuogopa. Sasa sijui itakuwaje akinioa. Naomba ushauri wako.
Kupitia SMS

Kama tayari anakuonyesha ukali hata unamuogopa ilhali nyinyi bado ni wapenzi, nahisi kutakuwa na shida utakapokuwa mke wake. Itabidi uchukue hatua inayofaa kabla hamjaenda mbali.

 

Natamani mpenzi ila naogopa wanaume
Vipi Shangazi? Mimi ni msichana mwenye umri wa miaka 20. Natamani sana kuwa na mpenzi lakini huwa naogopa kuzungumza na wanaume. Nimejaribu kuondoa uoga huo nimeshindwa. Nishauri.
Kupitia SMS

Hiyo ni hali inayotokana na maumbile na watu wameumbwa kwa namna tofauti. Hata hivyo, maumbile hubadilika jinsi mtu anavyokuwa. Jaribu uwezavyo kutangamana na wanaume na hatimaye woga wa kuzungumza nao utakutoka.

 

Nina hamu kubwa ya kuwa na mume
Shangazi shikamoo. mimi ni msichana mwenye umri wa miaka na 23 sina mpenzi. Natamani sana kuwa na kwangu. Nishauri.
Kupitia SMS

Mapenzi hayanunuliwi dukani kama nguo mwanangu. Ni lazima kwanza mwanamume akuone, akupende, nawe pia umpende ndipo muwe wapenzi. Utaratibu huo unaweza kuchukua muda mrefu na itabidi uwe na subira. Isitoshe, wewe bado ni mchanga na huna haja ya kuwa na wasiwasi.

 

FATAKI: Si lazima kuzaa au kuolewa ndipo ukamilike kama mwanamke, usiishi kuridhisha waja

Na PAULINE ONGAJI

Kwa Muhtasari:

  • Maishani mwake hajawahi kuolewa ila alibahatika kukutana na dume la miaka 65 mtandaoni
  • Jamii imeweka viwango fulani kuhusu umri muafaka kwa mwanamke kuolewa
  • Ikiwa ndoto yako ni kusafiri duniani kote, basi usijinyime ili kuridhisha maoni ya watu

SIKU kadha zilizopita nilikuwa nikisafiri kuelekea nyumbani kutoka shughuli za kawaida katikati ya jiji la Nairobi.

Katika basi ambalo nilikuwa nimeabiri kulikuwa na mjadala uliokuwa unaendelea redioni ambapo watangazaji hao walikuwa wanazungumzia kuhusu binti ambaye alikuwa amepiga kueleza yanayomsibu.

“Nina miaka 52 na sijawahi olewa lakini nafurahi kutangaza kuwa nimebahatika kumpata mchumba ambaye napanga kufunga naye ndoa mwezi Julai,” alisema kwa furaha.

Kipusa huyo ambaye kulingana na sauti yake alionekana kuwa mrembo, maishani mwake hajawahi kuolewa ila alibahatika kukutana na kaka huyu mwenye umri wa miaka 65 kupitia mtandao wa kuunganisha wapenzi. Kwa mujibu wa binti huyu, mwanamume huyu alikuwa amejaribu ndoa mbili bila mafanikio.

“Miaka ilikuwa imepita kiasi cha kwamba watu walikuwa wananiambia kuwa hakuna matumaini ya kuolewa tena, lakini kwangu nilifahamu kuwa mwishowe ningepata mume,” alisema.

Ni hali ambayo utakubaliana nami kuwa imekuwa ikikumba mabinti wengi hasa wanapotimu umri fulani.

 

Umri wa kuolewa

Hii ni kwa sababu jamii imeweka viwango fulani kuhusu umri muafaka kwa mwanamke kuolewa. Kuna umri fulani maishani ambapo kama mwanamke unaanza kufanya watu kuingiwa na wasiwasi huku maswali ya lini utakapoolewa yakianza kuchipuka.

Wiki kadha zilizopita nilizungumzia taarifa fulani alizochapisha mtangazaji mmoja kuhusu jamii ilivyomkandamiza mwanamke huku ikiendelea kushusha thamani yake anavyozidi kuongeza umri tofauti na jinsi mwanamume husifiwa kwa uzuri wake anavyozidi kuzeeka.

Nakumbuka pia nikisisitiza kuwa huo ni upuuzi mtupu na ni uwongo ambao umeenezwa kwa muda mrefu kiasi cha kufanya wengi kuanza kuuamini.

Kuna binti fulani ambaye ni rafiki yangu kwenye mtandao wa Facebook ambaye siku kadha zilizopita alizungumza kuhusu jinsi amekuwa akipokea shinikizo kutoka kwa baadhi ya marafiki zake kupata mtoto huku wengi wakionekana kuhofia kwamba huenda akatalikiwa kabla ya kuafikia haya.

 

Ni lazima uzae?

Swali langu ni nani aliyesema kwamba ni lazima uzae ndio ukamilike kama mwanamke?

Nikidhani tuna muda mfupi sana ulimwenguni ambapo itakuwa muhimu kutumia wakati huo mchache kufanya jambo linalokufurahisha.

Ikiwa ndoto yako ni kuimarika katika taaluma na kusafiri duniani kote, basi usijinyime ili kuridhisha maoni ya watu. Na iwapo ndoto yako iko katika masuala ya mahusiano usiache kizingiti chochote hata iwe umri kikufungie njia.

Nakumbuka hadithi ya mwanamke wa miaka 92 kutoka Uganda ambaye hatimaye aliolewa baada ya kusubiri kwa miaka.

Kwa ufupi hakuna umri mkubwa zaidi unaomfungia mwanamke kuolewa. Ikiwa unahisi kuwa haujampata anayekufaa zaidi, zidi kutafuta bila haraka. Usiharakishe, kama wasemavyo wakati wa Mungu ndio mwafaka!

 

Mume wa wake wawili walioshtakiwa kumiliki bunduki pia akabiliwa kisheria

Mume wa wanawake wawili Bw Ibrahim Gedi Abdile akiwa kizimbani katika mahakama ya Nairobi aliposhtakiwa kumiliki silaha kinyume cha sheria Februari 12, 2018. Picha/ Richard Munguti

Na RICHARD MUNGUTI

Kwa Muhtasari:

  • Ibrahim Gedi Abdile alijisalamisha kwa maafisa wa polisi kaunti ya Wajir baada ya kufahamishwa wake zake
  • Ajieteta kuwa yeye ni mfugaji. Bunduki ilikuwa ya kujikinga  pamoja na wake zake, watoto na mifugo!
  • Makosa ya wanawake hao ni kuolewa na mume anayeshukiwa kuwa mwanachama wa kundi haramu la Al Shabaab
  • Kiongozi wa mashtaka alipinga wakiachiliwa kwa dhamana akisema serikali inahofia watatoroka

MUME wa wanawake wawili mmoja wao nyanya wa miaka 70 walioshtakiwa wiki mbili zilizopita kwa kumiliki bunduki aina ya AK47, alipotorokea nchini Somalia asikamatwe, alishtakiwa Jumatatu.

Bw Ibrahim Gedi Abdile alijisalamisha kwa maafisa wa polisi kaunti ya Wajir baada ya kufahamishwa wake wake wawili walitiwa nguvuni na kusafirishwa jijini Nairobi.

“Mshtakiwa alijisalamisha kwa polisi na kuwapa bunduki iliyokuwa ikisakwa,” kiongozi wa mashtaka Bi Cynthia Opiyo alimweleza hakimu mwandamizi Bw Kennedy Cheruiyot

Mshtakiwa alimweleza hakimu: “Mimi ni mfugaji. Bunduki hii ilikuwa ya kujikinga  mimi, wake wangu , watoto na mifugo.”

Abdile alikanusha shtaka na wakili David Ayuo aliomba aachiliwe kwa dhamana.

Alidaiwa alimiliki bunduki kinyume cha sheria katika kijiji cha Bula Elmi kilicho kaunti ndogo ya  Wajir Mashariki mnamo Januari 24, 2018.

 

Risasi

Pia alishtakiwa kwa kumiliki raudi 80 za risasi. Aliachiliwa kwa dhamana ya Sh200,000 pesa tasilimu.

Katika kesi iliyowakabili wake zake wawili, wakili Dunstan Omari alimweleza hakimu mkazi Bi Hellen Onkwani, “ wanawake hawa hawana makosa. Makosa yao ni kuolewa na mume anayeshukiwa kuwa mwanachama wa kundi haramu la Al Shabaab.”

Wanawake hawa walishtakiwa kumiliki bunduki aina ya AK47. Mahakama iliwaachilia huru wiki mbili zilizopita baada ya wakili wao kuishawishi kuwa makosa yao ni kuolewa na mwanaume anayeshukiwa na polisi kwa tuhuma za kuwa na uhusiano magaidi wa Al Shabaab. Picha/ Richard Munguti

Bw  Omari alimsihi Bi Onkwani awaachilie wanawake Bi Nurea Adhan Jimale (70) na Halima Sheikh Abdullahi hao kwa dhamana ili “warudie watoto wao kwa vile mume wao  alitorokea Somalia na watoto wako peke yao nyumbani.”

“Wanawawake hawa hawana hatia. Makosa yao ni kuolewa na mwanaume anayeshukiwa na polisi kwa tuhuma za kuwa na uhusiano magaidi wa Al Shabaab.”

Bw Omari alimweleza hakimu washukiwa walisafirishwa kutoka kaunti ya Wajir baada ya hakimu katika korti ya Wajir kuamuru waachiliwe kwa dhamana.

 

Wanateswa bure

“Wanawake hawa wanateswa bure. Waliachiliwa na mahakama ya Wajir kisha wakakamatwa tena na kusafirishwa hadi Nairobi kuzuiliwa.

Polisi wanawadhulumu kwa vile wanatoka eneo la mpaka wa Kenya na Somalia. Mume wao anadaiwa alitorokea nchi jirani. Washtakiwa hawa wanadhulumiwa kwa vile wameolewa na mtoro,” alisema wakili Omari.

Bw Omari alisema alikuwa amepeleka ombi katika mahakama  kuu na Jaji Luka Kimaru akaamuru kesi itajwe Feburuari 5, 2018.

Kiongozi wa mashtaka alipinga wakiachiliwa kwa dhamana akisema “serikali inahofia watatoroka.”

Bi Onkwani aliwaachilia wanawake hao kwa dhamana ya Sh500,000 pesa taslimu.

Kesi dhidi ya wanawake hao na mume wao itasikizwa Machi 8, 2018.