Kafyu yasaidia kuepusha hali mbaya shughuli ya utoaji chanjo ikiendelea – Kagwe

Na SAMMY WAWERU

AMRI ya kitaifa ya kutotoka nje kati ya saa nne usiku hadi saa kumi alfajiri itaendelea kutekelezwa kwa muda wa siku 30 zaidi.

Waziri wa Afya Mutahi Kagwe ametangaza Jumatatu, kuongezwa kwa muda huo wa kafyu kutaiwezesha serikali kutoa chanjo zaidi.

Tangazo hilo limejiri licha ya baadhi ya viongozi na wanasiasa, wadau katika sekta mbalimbali kuitaka serikali kufungua uchumi kikamilifu.

“Tumeongeza muda wa utekelezaji kafyu na sheria zinginezo kuzuia msambao wa virusi vya corona kwa siku 30 zaidi, ili tuweze kutoa chanjo kwa watu wengi iwezekanavyo,” akasema Bw Kagwe.

Alisema hayo jijini Nairobi, wakati akizindua rasmi sheria ya afya ya umma na jamii itakayotolewa na Shirika la Kuimarisha Huduma za Jiji la Nairobi (NMS).

Akitetea kuendelea kutekelezwa kwa kafyu ya kitaifa na mikakati ya kuzuia kuenea kwa Covid-19, waziri Kagwe alisema hatua hiyo pia inasaidia kulinda maisha ya Wakenya.

Kanuni hizo zilianza kutekelezwa mwaka 2020 mara baada ya Kenya kuthibitisha kisa cha Covid-19.

“Jukumu la kulinda Wakenya si la Mutahi Kagwe wala Rais Uhuru Kenyatta pekee, ni letu sisi sote,” waziri akasema.

“Watu wafahamu kuwa wamekodolewa macho na ugonjwa hatari,” akatahadharisha.

Kauli ya Bw Kagwe imejiri kipindi ambacho viongozi na wanasiasa wakiongozwa na Rais Kenyatta, Naibu wa Rais Dkt William Ruto, kiongozi wa ODM, Bw Raila Odinga kati ya wengineo wanaendelea kuandaa mikutano ya umma, katika kile kinachonekana kama mchakato wa kampeni za 2022.

Wanafunzi wanaougua corona hawaonyeshi dalili – Kagwe

Na SAMMY WAWERU

WAZIRI wa Afya Mutahi Kagwe ameonya kuwa endapo wananchi hawatachukua tahadhari na kujikinga kutokana na virusi vya corona huenda taifa likajipata katika hatari ya kushindwa kudhibiti msambao.

Bw Kagwe amesema maambukizi ya Covid-19 yanayoendelea kushuhudiwa, msambao unaendelezwa na wanafunzi.

Alisema wanafunzi wengi walioambukizwa hawaonyeshi dalili, suala alilotahadharisha ikiwa watu hawatatilia maanani sheria na mikakati iliyowekwa watajipata katika hatari.

“Idadi kubwa ya wanafunzi waliothibitishwa kuambukizwa Covid-19 hawaonyeshi dalili. Wanapoenda nyumbani wanasambazia wazazi na wanaoishi nao.

Nao wanapoenda maeneo yao ya kazi wanaambukiza wenzao. Hivyo ndivyo virusi vinaenea, na ni hatari,” Bw Kagwe akasema.

Waziri amewataka walimu wote kuhakikisha wamepata chanjo ya corona, ikizingatiwa kuwa wao ndio wako katika hatari zaidi ya kuambukizwa.

“Ifahamike kuwa hakuna upungufu wa chanjo ya walimu. Wahakikishe wamepata chanjo,” akahimiza.

Visa vya maambukizi ya corona vimeendelea kuongezeka, hasa baada ya shule kufunguliwa na wanafunzi wanaojiunga na kidato cha kwanza kuanza kusajiliwa juma hili kwenye shule walizoitwa.

Kenya imeingia katika mkumbo wa nne wa maambukizi ya Covid-19, virusi hatari aina ya Delta Variant kutoka India vikiendelea kusambaa.

Wizara ya Afya tayari imekiri baadhi ya hospitali kujaa wagonjwa, kiasi cha vitanda vya kuwalaza kupungua.

Corona: Kagwe atoa afueni kwa kaunti 13 za magharibi mwa Kenya

Na CHARLES WASONGA

SERIKALI sasa imebadilisha saa za kafyu katika kaunti 13 katika maeneo yanayopakana na Ziwa Victoria ambayo yalitajwa kuwa yenye visa vingi ya maambukizi ya corona.

Akiongea na wanahabari jijini Nairobi, Waziri wa Afya Mutahi Kagwe alisema Ijumaa kuwa amri hiyo ya kutotoka nje sasa itaanza kutekelezwa kuanzia saa nne za usiku hadi saa kumi alfajiri, sawa na maeneo mengine ya nchi.

Kwa kipindi cha siku 29 zilizopita, saa za kafyu katika kaunti hizo za magharibi mwa Kenya zimekuwa zikianza saa moja jioni hadi saa kumi alfajiri. Hii ni kufuatia kupanda kwa visa vya maambukizi ya virusi vya corona kuanzia mwezi jana

Kaunti zilizowekewa sharti hili ni; Kisumu, Kakamega, Siaya, Bungoma, Busia, Kisii, Nyamira, Migori, Homa Bay, Bomet, Kericho, Vihiga na Trans Nzoia.

“Saa za kafyu inayoendelea kuzingatiwa nchini zitasalia zilivyokuwa awali, kuanzia saa nne za usiku hadi saa kumi alfajiri. Saa hizi pia zitazingatiwa katika kaunti 13 za eneo la ziwa ambazo awali zilikuwa zimetajwa kwa pamoja kama eneo lenye maambikizi ya juu ya virusi vya corona,” Bw Kagwe akawaambia wanahabari nje ya jumba la Harambee jijini Nairobi.

Waziri ambaye alikuwa ameandamana na Inspekta Jenerali wa Polisi Hillary Mutyambai na Mkuu wa Utumishi wa Umma Joseph Kinyua, kwa mara nyingine aliwaonya Wakenya dhidi ya kulegeza masharti ya kuzuia kuenea kwa ugonjwa.

“Katika siku za hivi karibuni idadi ya visa vipya vinavyokakiliwa kila siku imeongezeka sawa na wagonjwa wanaohitaji kulazwa katika ICU na wale wanaotaka kupewa oksijeni ya ziada. Hali hii inachangia na hatua ya baadhi ya Wakenya kuanza kulegeza kanuni zilizoweka na wanasiasa kurejelea mikutano ya hadhara,” akasema Bw Kagwe.

“Nawaomba Wakenya kuchukua jukumu la kibinafsi kwa kuendelea kuzingatia kanuni zilizowekwa. Komeni kuhudhuria mikutano ya wanasiasa. Ikiwa unavutiwa kwenda huko na pesa, nenda ukachukue pesa kisha rejea nyumbani usije ukaambukizwa corona,” akaongeza.

Waziri pia aliwataka waajiri kuwaruhusu wale wahudumu kufanyia kazi nyumbani “ikizewekana ili kupunguza msongamano sehemu za kazi.

Bw Kagwe pia aliamuru kwamba maiti zizikwa baada ya saa 72 ili kuzuia uwezekano na watu kukongamana kwa muda mrefu wakipanga mazishi.

‘Hakuna kifo cha corona jana Jumatano’

Na CHARLES WASONGA

KENYA Jumatano, haikuandikisha kisa chochote cha maafa kutokana na ugonjwa wa Covid-19 huku visa 485 vipya vya maambukizi vikithibitishwa ndani ya muda wa saa 24.

Hii ina maana kuwa idadi jumla ya watu waliofariki kutokana na maradhi hayo inasalia 3,428.

Visa hivyo vipya sasa vimefikisha idadi jumla ya visa hivyo nchini kuwa 176,622 tangu Machi 13, 2020 kisa cha kwanza kilipogunduliwa nchini.

Watu hao 485 wamepatikana na virusi vya corona baada ya sampuli 5,355 kupimwa ndani ya muda wa saa 24

Kulingana na taarifa iliyotumwa na Wizara ya Afya kwa vyombo vya habari, idadi ya watu waliopona corona ilipanda hadi 121,206 baada ya watu 312 zaidi kuthibitishwa kupona.

“Miongoni mwa waliopona 219 walikuwa wakiuguzwa nyumbani ilhali 93 walikuwa wamelazwa katika hospitali mbalimbali nchini,” ikasema taarifa hiyo iliyotiwa saini na Waziri wa Afya Mutahi Kagwe.

Jumla ya wagonjwa 1,076 wa Covid-19 wamelazwa katika hospitali mbalimbali nchini wa huku jumla ya wagonjwa 4,810 wakihudumiwa chini ya Mpango wa Uuguzi Nyumbani.

Vile vile, jumla ya wagonjwa 102 wamelazwa katika vyumba vya kuwahudumia wagonjwa mahututi (ICUs), 29 kati yao wakiwa wamewekwa katika mitambo ya kuwasaidia kupumua huku 60 wakiongezewa hewa ya oksijeni.

Wakati huo huo, kaunti za Nyanza na Magharibi mwa Kenya zinaendelea kuandikisha visa vingi vya maambukizi japo Nairobi inaongoza kwa visa vipya vilivyothibitishwa Jumatano.

Nairobi ina visa 119, Homa Bay ina visa vipya 68, Siaya (61), Kisumu (48), Mombasa (28), Busia (24), Kakamega (19), Kericho (16), Nakuru (14), Bomet (13), Uasin Gishu (11), Bungoma (10) na Vihiga imeandikisha visa vinane.

Kaunti za Kisii na Machakos nazo zimenakili visa saba kila moja, Kilifi (5), Nyeri (4) na Narok (4) Migori (3), Kajiado, Kiambu, Kirinyaga, Kitui, Nyandarua Pokot Magharibi zina visa viwili kila moja huku Kwale, Laikipia, Murang’a na Nyamira zikirekodi kisa kimoja kila moja.

Kisumu ingali juu kwa visa vipya vya corona

Na CHARLES WASONGA

KAUNTI ya Kisumu inaendelea kuongoza katika idadi ya visa vya maambukizi ya Covid-19 inayorekodiwa katika kila moja ya kaunti 47 nchini licha ya hakikisho la Gavana Anyang’ Nyong’o kwamba hali hiyo imedhibitiwa.

Kulingana na takwimu zilizotolewa na Wizara ya Afya Jumamosi, Kisumu ilinakili visa 103 vipya vya maambukizi ya virusi vya corona. Kaunti hii inafuatwa na Nairobi yenye visa vipya 61, Kitui (visa 57) huku Kericho ikirekodi visa vipya 43.

Hofu imeibuliwa kuhusu ongezeko la visa vya maambukizi ya corona Kisumu wakati ambapo inajiandaa kuwa mwenyeji wa Sherehe za Kitaifa za Sikukuu ya Madaraka mnamo Juni 1, 2021.

Mnamo Ijumaa ripotiz zilisema kuwa wadi za Covid-19 katika Hospitali Kuu ya Rufaa na Mafunzo ya Jaramogi Oginga Odinga zimejaa, kwa mara ya kwanza tangu mlipuko wa janga hilo uliporipotiwa nchini mwezi Machi 13, 2020.

Visa 103 vipya vilivyoripotiwa Kisumu ni sehemu ya jumla ya visa 573 vipya vilivyoripotiwa Jumamosi nchini Kenya baada ya sampuli 5,798 kupimwa.

Mapuuza ya sheria yaendelezwa na mawaziri

Na CHARLES WASONGA

MOJAWAPO ya sababu zilizochangia mahakama kuu kuharamisha mchakato wa mageuzi ya Katiba kupitia mpango wa maridhiano (BBI) ni mazoea ya serikali ya kupuuza sheria.

Mapuuza hayo ya sheria na Katiba yamedhihirika tena baada ya mawaziri wa serikali wakiongozwa na Mutahi Kagwe (Afya) kuwashambulia hadharani majaji watano waliotoa uamuzi huo; na hivyo kuibua kero za Wakenya na wanasheria.

Hii ni kinyume na kanuni ya kikatiba ya utengano wa kimamlaka kati ya matawi matatu ya serikali inayosema kuwa tawi moja haliwe kuingilia utendakazi wa tawi jingine.

Vile vile, ni kinyume cha Katiba na sheria za utumishi wa umma kwa mawaziri kuingilia masuala ya kisiasa, kama vile mchakato wa BBI, unaoendeshwa na wanasiasa.

Akiongea katika kaunti ya Nyeri mwishoni mwa wiki jana, Bw Kagwe alitaja uamuzi huo kama pigo la muda tu huku akiwahakikishia Wakenya kwamba watapata mageuzi ya kikatiba wanayotaka mwaka huu au mwanzoni mwa 2022.

Waziri huyo wa Afya aliwaambia wananchi kutoingiwa na wasiwasi na wasibiri rufaa dhidi ya uamuzi huo huku wakiendelea kuvumisha yale aliyoyataja kama “mazuri yaliyomo kwenye Mswada wa BBI.”

“Kwangu sina shaka kwamba kwamba wakati kama huu mwaka ujao au mwishoni mwa mwaka huu tutakuwa na katiba mpya au iliyofanyiwa mageuzi,” Bw Kagwe akasema.

Kwa upande wake, Waziri wa Kilimo Peter Munya alidai uamuzi wa majaji, Joel Ngugi, George Odunga, Chacha Mwita, Jairus Ngaah na Teresia Matheka, ulichochewa na chuki wala sio sheria na Katiba.

“Ni wazi kuwa walikuwa wakilipisha kisasi. Ikiwa unasaka kazi na ukakosa, jizuie na ukome kutumia cheo chako kulipisha kisasi,” akasema huku akionekena kuwarejelea Prof Ngugi na Bw Odunga. Hawa ni miongoni mwa majaji 41 ambao Raisi Uhuru Kenyatta alidinda kuwateua rasmi.

Watalamu wa masuala ya kisheria na Wakenya kwa ujumbla walimshutumu vikali waziri huyu wakisema kauli yake inaonyesha dharau kwa agizo la mahakama kwamba mchakato wa BBI unakiuka katiba na hivyo ni haramu na batili.

“Ni wazi kwamba Waziri Kagwe anaendeleza makosa yale yale ambayo serikali ya Jubilee imekuwa ikifanya kwa kupuuza maagizo au maamuzi ya mahakama. Amekiuka kipengele cha 159 cha Katiba kuhusu mamlaka ya Idara ya Mahakama kwa kupuuzilia uamuzi wa mahakama kuhusu BBI hata kabla ya suala hilo kuwasilishwa katika rufaa dhidi ya uamuzi huo,” akasema wakili Danstan Omari.

“Sharti mawaziri wa serikali waheshimu Katiba ambayo wao huapa kulinda na kuzingatia wanapoapishwa kabla ya kuanza kutekeleza majukumu yao kulingana na kipengele cha 152 (4) cha Katiba,” akaongeza mwanasheria huyo.

Nao Wakenya mitandaoni walimkaripia Bw Kagwe, na wenzake wakisema mawaziri hao wametekwa na siasa kiasi cha kusahaua majukumu yao.

“Inaudhi kwamba Kagwe haheshimu mahakama. Akubali kuwa BBI ni haramu hadi mahakama ya rufaa itakapotoa uamuzi mwingi,” akasema Mwangi B, kupitia Twitter.

Naye Brigid @93 akauliza: “Kagwe ana kura ngapi za kupitisha mswada wa BBI?”

Kwa upande wake Mbunge wa Soy Caleb Kositany aliitaja serikali ya Jubilee kama sura halisi ya mapuuza ya sheria.

Katika uamuzi wao, majaji watano walisema mchakato wa BBI uliendeshwa kinyume cha Katiba na wakazima Tume Huru ya Uchaguzi na Mipaka (IEBC) dhidi ya kuandaa kura ya maamuzi kuhusu mswada wa marekebisho ya katiba.

Kenya yakabiliwa na uhaba mkubwa wa chanjo ya corona

Na CHARLES WASONGA

KIWANGO cha maambukizi ya corona kilipanda Jumatano hadi asilimia 9.1 kutoka asilimia 7.5 Jumanne baada ya serikali kutangaza kuwa Kenya inakabiliwa na uhaba mkubwa wa chanjo.

Kenya iliandikisha visa 376 vipya vya maambukizi baada ya sampuli 4,153 kupimwa. Vile vile, idadi ya wagonjwa waliothibitishwa kufariki kutokana na Covid-19 ilikuwa 14 na kufikisha idadi jumla ya waliofariki kuwa 3,035.

Akiongea na wanahabari Jumanne, Waziri wa Afya Mutahi Kagwe alitangaza kuwa kuna dozi 100,000 pekee za chanjo ya AstraZeneca ilhali shughuli ya utoaji chanjo ingali inaendelea.

“Tunahitaji chanjo kwa dharura kwa sababu maghala yetu kote nchi yamesalia na dozi 100,000 za AstraZeneca. Tunahitaji chanjo kwa dharura,” akasema huku akifichua kuwa jumla ya watu 945,597 wamepokea chanjo kufikia Jumanne.

Bw Kagwe aliongeza kuwa uhaba wa chanjo ya AstraZeneca umechangiwa na ongezeko la visa vya maambukizi na maafa kutokana na corona nchini India.

Kulingana na takwimu zilizotolewa Jumatano jumla ya wagonjwa 1,074 wa corona wamelazwa katika hospitali mbalimbali nchini. Wagonjwa wengine 4,626 wanahudumiwa chini ya mpango wa utunzaji nyumbani.

Vile vile, wagonjwa 107 wako katika vyumba vya kuwahudumia wagonjwa mahututi huku 21 miongoni mwao wakisaidiwa kupumua kwa mitambo maalum.

Wakati huo huo, jumla ya wagonjwa 318 walithibitishwa kupona corona Jumatano; 248 wakiwa ni wale waliokuwa wakihudumiwa chini ya mpango wa kuuguzwa nyumbani na 70 wakiwa na wale waliolazwa katika hospitali mbalimbali nchini.

“Kupona kwa wagonjwa 318 sasa imefikisha idadi ya waliopona kuwa 117,235,” ikasema taarifa hiyo kutoka Wizara ya Afya na kutiwa saini na Bw Kagwe.

Kaunti kupokonywa chanjo zipelekwe kwingine

Na IRENE MUGO

KAUNTI ambazo zina idadi kubwa ya watu wanaosusia chanjo ya virusi vya corona, zitapokonywa chanjo hizo ili zipelekwe kaunti nyingine zinazozihitaji.

Waziri wa Afya, Mutahi Kagwe alisema Ijumaa kuwa kuna takriban dozi 200,000 za chanjo ya AstraZeneca ambazo hazijatumiwa nchini.

“Tutatwaa dozi za chanjo kutoka kwa kaunti ambapo utoaji chanjo unafanyika polepole mno. Hatuwezi kuacha zipitwe na muda wa matumizi yake. Tutazisambaza kwingineko,” akasema Bw Kagwe.

Hata hivyo, hakufichua ni kaunti gani zitakazopokonywa chanjo.

Alikuwa akizungumza Ijumaa katika Kaunti ya Nyeri wakati wa uzinduzi wa mataneti katika Hospitali ya Kitaifa ya Kenyatta (KNH), tawi la Othaya.

Kwa mujibu wa takwimu alizotangaza Bw Kagwe, idadi ya watu waliopokea chanjo kufikia Ijumaa ilikuwa ni 911,515. Serikali ilikuwa imepokea dozi 1.2 milioni.

Miongoni mwao, watu 531,540 ni wenye umri wa zaidi ya miaka 58, wahudumu wa afya 160,468, walimu 142,624 na maafisa wa usalama 76,578.

Takwimu hizo zinadhihirisha kuwa, licha ya wito uliotanda kutaka watu wanaotoa huduma muhimu wapewe chanjo kwanza kabla ya wananchi wengine, wengi wao wamekataa kujitokeza.

Kuhusu aina mpya ya virusi vya corona kutoka India, Bw Kagwe alisema serikali imefanikiwa kuidhibiti ili isienee zaidi.

Aina hiyo ya virusi ambayo ni hatari na inasambaa kwa kasi kuliko aina nyinginezo, ilikuwa imepatikana kwa watu ambao walisafiri kutoka India hadi Kisumu hivi majuzi.

Watu 568 Ijumaa walithibitishwa kuambukizwa virusi vya corona.

Maelfu kuenda Uingereza kabla ya marufuku kuanza

Na LEONARD ONYANGO

SHIRIKA la Ndege la Kenya (KQ) limeongeza idadi ya ndege zitakazohudumia idadi kubwa ya watu wanaotaka kwenda Uingereza kabla ya marufuku ya kuzuia abiria kutoka Kenya kuanza kutekelezwa Ijumaa, wiki hii.

Kampuni ya KQ ilitoa tangazo hilo saa chache baada ya Kenya kulipiza kisasi kwa kutangaza kuwa kuanzia Ijumaa, Aprili 9, abiria wote wanaowasili humu nchini kutoka Uingereza watawekwa karantini kwa siku 14.

Serikali, kupitia taarifa yake iliyotolewa na wizara ya Mashauri ya Kigeni, ilisema kuwa wasafiri kutoka Uingereza watajilipia gharama ya kuwekwa karantini.

Serikali ilikerwa na hatua ya Uingereza kuingiza Kenya kwenye orodha ya mataifa yaliyo na maambukizi tele ya virusi vya corona licha ya juhudi ambazo zimekuwa zikifanywa kukabiliana na maradhi hayo.

“Kenya imeweka juhudi na bidii nyingi katika kukabiliana na janga la virusi vya corona. Kenya imepongezwa na Shirika la Afya Duniani (WHO) kutokana na juhudi zetu kupambana na virusi vya corona,” ikasema taarifa ya wizara ya Mashauri ya Kigeni.

Uingereza ilipiga marufuku wasafiri kutoka Kenya kuingia katika nchi hiyo ya Ulaya baada ya idadi kubwa ya abiria kupatikana na aina ya virusi vya corona ya B.1.351, vilivyogunduliwa kwa mara ya kwanza nchini Afrika Kusini.

Kulingana na Uingereza, asilimia 70 ya abiria kutoka Kenya wanaopatikana na virusi vya corona wana aina ya B.1.351.

Marufuku hiyo ni pigo kwa Kenya kwani wasafiri wengi wamekuwa wakipitia Nairobi kuelekea Uingereza baada ya Afrika Kusini, Ethiopia, Qatar na Miliki za Uarabuni (UAE) kuingizwa kwenye orodha hiyo nyekundu mwaka jana.

Nchi nyingine za Afrika Mashariki zilizoko kwenye ‘orodha nyekundu’ ya Uingereza ni Tanzania, Burundi na Rwanda.

Shirika la KQ jana lilisema kuwa limeongeza ndege mbili ili kuhudumia idadi kubwa ya abiria wanaotaka kuelekea Uingereza kabla ya marufuku kuanza kutekelezwa Aprili 9.

“Watu waliokuwa wamelipia tiketi za kutaka kwenda Uingereza baada ya Aprili 9, watarejeshewa fedha zao au watazitumia baada ya marufuku hiyo kuondolewa,” ikasema KQ.

Aina hatari ya corona imetua nchini – Kagwe

Na BENSON MATHEKA

Waziri wa Afya, Mutahi Kagwe, amekiri kwamba visa vya maambukizi ya aina mpya hatari ya corona iliyogunduliwa Afrika Kusini na Uingereza vimethibitishwa nchini.

Hata hivyo, Bw Kagwe aliondolea Wakenya hofu kuhusu athari za aina hizo akisema inayoambukiza watu wengi nchini ni ile iliyothibitishwa Kenya mwaka jana.

“Aina ya virusi vya corona inayosambaa Kenya kwa wingi ni iliyothibitishwa nchini mwaka jana. Hata hivyo, kumekuwa na visa vya aina mpya iliyogunduliwa Afrika Kusini na Uingereza,” Bw Kagwe alisema jana.

Kenya inakumbwa na wimbi la tatu la maambukizi ya corona ambayo yamefanya serikali kuchukua hatua za kuikabili kwa kufunga kaunti tano za Nairobi, Machakos, Kiambu, Kajiado na Nakuru. Akitangaza kufungwa kwa kaunti hizo mnamo Ijumaa wiki jana, Rais Uhuru Kenyatta alisema zimechangia asilimia 70 ya maambukizi ya virusi hivyo nchini.

Idadi ya maambukizi na vifo vinavyosababishwa na virusi hivyo inaendelea kuongezeka huku nchi ikikumbwa na uhaba wa oksijeni.

Bw Kagwe alisema kuna viwanda 75 vya oksijeni nchini ingawa baadhi havifanyi kazi.

Waziri Kagwe alisema oksijeni ni silaha muhimu katika vita dhidi ya janga la corona wagonjwa wanapolazwa hospitalini. Mnamo Ijumaa, Rais Kenyatta alisema zaidi ya Wakenya 950 walikuwa wamelazwa na katika vyumba vya wagonjwa mahututi na maelfu walikuwa wameongezewa oksijeni kuwasaidia kupumua. Aliagiza serikali za kaunti kushirikiana na Wizara ya Afya kuthibitisha kiwango cha oksijeni nchini. Rais Kenyatta aliagiza oksijeni iliyoko nchini itengwe kwa vita dhidi ya corona pekee.

Jana, Bw Kagwe alisema kiwango cha oksijeni nchini kinatishiwa na mambo kadhaa vikiwemo viwanda visivyofanya kazi.

Alisema moja ya changamoto kuu ni kuwa, mitungi 20,000 ya oksijeni iko katika nyumba za watu na taasis mbalimbali.

“Wanatakiwa kuirudisha mara moja, ni makosa kuweka mitungi hiyo huku watu wakifariki kwa kukosa oksijieni,” alisema.

Watu 13 waangamizwa na corona

Na CHARLES WASONGA

WATU 13 zaidi wamefariki kutokana na Covid-19 katika kipindi ambapo visa vipya 843 vya ugonjwa huo vimethibitishwa.

Kulingana na taarifa iliyotumwa kwa vyombo vya habari na Waziri Mutahi Kagwe Jumapili, wagonjwa wawili walifariki ndani ya saa 24 zilizopita ilhali vifo 11 vilitokea awali katika hospitali mbalimbali wakati tofauti.

“Kwa hivyo, idadi jumla ya waliofariki kufikia Jumapili ni 2,117,” akasema Bw Kagwe.

Visa 843 vipya vya maambukizi viligunduliwa baada ya sampuli za watu 5,377 kupimwa; ishara kwamba kiwango cha maambukizi Jumapili kilikuwa asilimia 16, kulingana na Waziri Kagwe.

“Kwa hivyo, idadi jumla ya maambukizi nchini ni 130, 214 kutokana na jumla ya vipimo 1,468,835,” akaongeza.

Visa vipya vimeripotiwa katika kaunti mbalimbali kama ifuatavyo; Nairobi 509, Kiambu 99, Uasin Gishu 59, Machakos 48, Nakuru 46, Kajiado 38, Meru 13, Kitui 12, Nandi 11, Kilifi 9, Elgeyo Marakwet 5, Marsabit 5 na Bungoma 4.

Kaunti nyingine ni; Murang’a visa 3, Vihiga 3, huku kaunti za Kakamega, Laikipia, Nyandarua, Taita Taveta, Wajir, West Pokot, zikirekodi visa viwili kila moja. Nazo kaunti za Turkana, Baringo, Lamu, Migori, Mombasa, Garissa, Nyeri na Homa Bay zikinakili kisa kimoja kila moja.

Bw Kagwe pia amesema kuwa wagonjwa 89 walithibitishwa kupona ambapo 57 walikuwa wakiuguzwa nyumbani na 32 walikuwa wamelazwa katika hospitali mbalimbali.

Kufikia Jumapili, jumla ya wagonjwa 1,221 walikuwa wamelazwa katika hospitali mbalimbali ilhali wengine 4,060 walikuwa wakiuguzwa nyumbani.

Jumla ya wagonjwa 121 wako katika vyumba vya kuwahudumia wagonjwa mahututi (ICUs), 32 wakiwa wamewekewa mitambo ya kuwaongeza oksijeni.

Kenya yaandikisha idadi ya juu zaidi ya maambukizi ya corona tangu Januari

Na CHARLES WASONGA

KENYA iliandikisha idadi ya juu zaidi ya maambukizi ya Covid-19 Jumatano na kuongeza hofu ya wimbi la tatu la maambuzi ya ugonjwa huo hatari.

Waziri wa Afya Mutahi Kagwe alitangaza kuwa jumla ya watu 713 walipatana na virusi vya corona baada ya sampuli 5,230 kupimwa ndani ya saa 24 wakati akitoa taarifa hiyo.

Idadi hii ya maambukizi inawakilisha kiwango cha maambukii cha asilimia 13.6 ambacho ni cha juu zaidi tangu Januari.

Akiongea na wanahabari jijini Nairobi baada ya kufanya mkutano na Baraza la Magavana (CoG) waziri Kagwe alitoa wito kwa Wakenya kuendelea kuzingatia masharti ya kuzuia corona kwani “wimbi jipya la maambukizi linaweza kulemea hospitali zetu.”

Bw Kagwe alisema idadi ya wagonjwa wa corona ambao wamelazwa hospitalini pia imeanza kuongezeka tena huku idadi ya wale waliolazwa katika vyumba vya wagonjwa mahututi (ICU) ikifika 89.

“Wakati umefika ambapo tunapaswa kuangalia masharti ambayo tumeweka ili kuona ikiwa tutayaongeza au tutasitisha baadhi. Wakati huu idadi ya maambukizi inaongezeka na kuna hofu kuwa huenda hospitali zetu zikalemewa. Idadi ya wagonjwa katika ICU pia imeenda juu na inakaribia 90,” akasema.

Miongoni mwa wanachama wa CoG waliokuwepo ni mwenyekiti, Martin Nyaga Wambora na Mwenyekiti wa Kamati ya Afya katika Baraza hilo Gavana wa Kisumu Peter Anyang’ Nyong’o.

Wagonjwa wengine 12 pia Jumatano walithibitishwa kufariki kutokana na Covid-19.

Ongezeko la maambukizi limeshuhudiwa siku mbili kabla ya kukamilika kwa kutamatika kwa kipindi cha kafyu ambacho Rais Uhuru Kenyatta aliongeza hadi Machi 12, 2021.

Hali imeibua hofu kwamba huenda Rais Kenyatta aongeza kipindi kingine cha kafyu atakapokuwa akitoa taarifa kuhusu masharti mapya ya kupambana na msambao wa Covid-19 nchini. Kiongozi wa taifa anatarajiwa kutoa taarifa hiyo Ijumaa wiki hii.

COVID-19: Kenya yathibitisha visa vipya 75

Na CHARLES WASONGA

HAKUNA mgonjwa aliyethibitishwa kufariki kutokana na Covid-19 Jumapili, huku Kenya ikiendelea kuandikisha idadi ndogo ya visa vipya vya maambukizi.

Hii ina maana kuwa idadi jumla ya watu waliofariki kutokana na homa hii ingali imesalia kuwa 1,795.

Kulingana na taarifa iliyotumwa kwa vyombo vya habari na Wizari ya Afya Mutahi Kagwe watu wengine 75 walipatikana na virusi vya corona baada ya sampuli kutoka watu 3,025 kupimwa ndani ya saa 24 zilizopita.

Visa hivyo vipya vilipatikana kutoka kaunti zifuatazo; Nairobi iliandikisha visa 51 ikifuatwa na Kiambu iliyorekodi visa sita. Nayo kaunti ya Busia iliripoti visa vine (4), Uasin Gishu (2) , Mombasa (2), Nyeri (2) huku kaunti za Garissa, Homa Bay, Kirinyaga, Meru, Murang’a, Nakuru, Nyandarua, na Trans Nzoia, kila moja ikirekodi kisa kimoja cha maambukizi.

“Wakati huo huo, jumla ya wagonjwa 56 wamepona na kuruhusiwa kurejelea maisha yao ya kawaida. 37 walikuwa wakiuguzwa nyumbani huku 19 wakiwa ni wale ambao walikuwa wamelazwa katika hospitali mbalimbali,” akasema Waziri Kagwe.

Hii ina maana kuwa idadi jumla ya wagonjwa waliopona tangu mwaka 2020 sasa ni 85,008.

Kulingana na Waziri Kagwe wagonjwa 347 sasa wamelazwa katika katika hospitali mbalimbali nchini wakiugua Covid-19 huku wengine 1,275 wakiuguzwa chini ya mpango wa utunzwaji nyumbani.

“Wagonjwa 33 wamelazwa katika vyumba vya kuwahudumia wagonjwa mahututi (ICU), 18 kati yao wakiwa ni wale wanaosaidiwa kupumua kwa mitambo ya ‘ventilators” huku wengine 18 wakiongezwa hewa ya oksijeni,” taarifa hiyo ikaeleza.

COVID-19: Kenya yathibitisha visa vipya 271 idadi jumla ikipanda hadi 97,394

Na CHARLES WASONGA

KENYA Jumatano imenakili visa 271 zaidi vya maambukizi ya Covid-19 na hivyo kufikisha idadi jumla ya maambukizi kuwa 97,394.

Kwenye taarifa kwa vyombo vya habari kuhusu hali ya janga hilo nchini, Waziri wa Afya Mutahi Kagwe amesema kuwa wagonjwa hao wapya walipatikana baada ya sampuli kutoka watu 5,830 kupimwa ndani ya kipindi cha saa 24 zilizopita.

Hiyo inawakilisha kiwango cha maambukizi cha asilimia 4.6 na Nairobi inaongoza kwa kuandikisha visa 117 vya corona.

Kufikia Jumatano Januari 6, 2021, idadi ya sampuli ambazo zimepimwa tangu janga hilo lilipogunduliwa nchini kwa mara ya kwanza Machi 13, 2020 ni 1,070,249.

Na idadi ya maafa kutokana na Covid-19 imeongezeka hadi 1,694 baada ya wagonjwa wanne kufariki.

Nazo habari njema ni kwamba jumla ya wagonjwa 609 walithibitishwa kupona corona ndani ya saa 24 ambapo jumla ya wagonjwa 502 walikuwa wakiuuguzwa nyumbani na wengine 107 walikuwa wamelazwa hospitalini.

“Kwa hivyo, kufikia sasa (Jumatano) idadi jumla ya wagonjwa wa Covid-19 waliopona na kuruhusiwa kurejelea maisha yao ya kawaida ni 79,966,” akasema Bw Kagwe.

Waziri aliongeza kuwa jumla ya wagonjwa 588 wa corona wamelazwa katika hospitali mbalimbali nchini huku wengine 2,708 wakiuguzwa chini ya mpango wa utunzaji nyumbani.

“Jumla ya wagonjwa 27 wamelazwa katika vyumba vya kuwahudumia wagonjwa mahututi (ICU) huku wengine 16 wakiongezwa hewa na oksijeni,” akaongeza.

Shule zinapofunguliwa tuwe waangalifu Covid-19 isitulemee – Kagwe

Na SAMMY WAWERU

WAZIRI wa Afya Mutahi Kagwe amesema kuna uwezekano wa ongezeko la maambukizi ya virusi vya corona nchini kushuhudiwa shule zitakapofunguliwa katika kipindi cha siku chache zijazo.

Shule zote na taasisi za elimu ya juu nchini zitafunguliwa mnamo Jumatatu, Januari 4, 2021.

Bw Kagwe amesema Ijumaa ongezeko la visa vya Covid-19 huenda likachangiwa na ufunguzi wa shule, ikizingatiwa serikali imeamuru watoto wote nchini warejee shuleni.

Hata hivyo, Waziri aliashiria kuwa upungufu wa maambukizi hayo utaanza kushuhudiwa mwezi Februari, akisisitiza serikali imeweka mikakati maalum kuhakikisha wanafunzi wanalindwa dhidi ya kuambukizwa.

“Walimu wawe makini na waangalifu sana. Hatutaki kupoteza mwalimu wala mwanafunzi yeyote, tutahakikisha kila mtu ni salama,” akasema.

Aidha, Bw Kagwe amehimiza wazazi kuhakikisha wanao wana maski za kutosha, akipendekeza wawe na zaidi ya mbili zinazoweza kuoshwa na kutumika tena.

“Tunaambia wazazi maski ihesabike ni sare ya shule,” akasema.

Waziri hata hivyo alisema serikali itasaidia wasio na uwezo, kuhakikisha wamepata barakoa (maski). Alisema serikali imeweka pembezoni maski zipatazo milioni 7.5 kwa minajili ya shughuli hiyo.

Bw Kagwe amesema hayo wakati akihutubia wanahabari Afya House, Nairobi, baada ya kutia saini mkataba wa makubaliano na matabibu na maafisa wa kliniki kurejea kazini, ambao wamekuwa kwenye mgomo wa kitaifa.

Juma lililopita, madaktari walisitisha mgomo wao baada ya kuafikiana na serikali kuhusu matakwa yao.

Wauguzi ndio wamesalia kwenye mgomo, Waziri Kagwe akisema mazungumzo ya muafaka na wawakilishi wa muungano wa kuwatetea, KNUN, yanaendelea.

Katika kikao tofauti na wanahabari Nairobi, Waziri wa Elimu Prof George Magoha alisema serikali imejiandaa kwa minajili ya shule kufunguliwa Januari 4.

Kufikia Ijumaa, maambuzi mapya 156 yalithibitishwa kutoka kwa sampuli 4,317 chini ya saa 24 zilizopita, huku 11 wakiangamia.

Jumla ya visa 96, 614 vya maambukizi ya corona vimeandikishwa nchini tangu kisa cha kwanza kitangazwe mnamo Machi 2020, idadi ya waliofariki kutokana na virusi hivi hatari ikigonga 1,681.

Aidha, jumla ya sampuli 1,050,984 zimefanyiwa ukaguzi na vipimo.

COVID-19: Wagonjwa wengine 16 wafariki wakati visa 644 vipya vikithibitishwa

Na CHARLES WASONGA

WAGONJWA 16 zaidi wamefariki kutokana na ugonjwa wa Covid-19 huku wagonjwa 994 wakiwa wamelazwa katika hospitali mbalimbali nchini.

Kwenye taarifa iliyotumwa Alhamisi kwa vyombo vya habari, Waziri wa Afya Mutahi Kagwe alisema visa 644 zaidi vya maambukizi vilithibitishwa nchini.

Bw Kagwe pia aliongeza kuwa wagonjwa 1,060 walipona na kuongeza idadi ya wale aliopona kufikia Alhamisi kuwa 71,254.

“Ongezeko la visa vipya 644 limepandisha idadi jumla ya visa hivyo kuwa 90,305 huku idadi jumla ya waliofariki kufikia 1,568 baada ya wagonjwa 16 zaidi kuangamia,” waziri huyo akaeleza kwenye taarifa hiyo iliyotumwa kwa vyombo vya habari.

Kwa mara nyingine Nairobi inaongoza kwa visa vipya vya maambukizi kwa kuandikisha viaa 158 ikifuatwa na kaunti jirani ya Kiambu yenye visa 69.

Kaunti ya Mombasa inashikilia nambari tatu kwa kusajili visa 67, Murang’a (56), Taita Taveta (36), Nakuru (31), Meru (26), Bungoma (19) na Busia (17).

Nayo kaunti ya Kakamega Alhamisi ilirekodi visa vipya 15 vya maambukizi ya corona, Makueni (13), Uasin Gishu (12), Tharaka Nithi (11), Kericho (11), Kilifi (10), Lamu na Kajiado visa 9, Kitui (7), Isiolo (5), Machakos (5) huku Kisumu ikinakili visa vitano vya maambukizi ya Covid-19.

Waziri Kagwe alisema kuwa miongoni mwa wagonjwa 1,060 waliopona, 910 kati yao walikuwa wakihudumiwa nyumbani ilhali 150 walikuwa wamelazwa katika hospitali mbalimbali nchini.

Bw Kagwe aliongeza kuwa miongoni mwa wagonjwa wa corona waliolazwa hospitalini, 55 wako katika vyumba vya kuwahudumia wagonjwa wahututi (ICU) ilhali 27 wamewekewa vifaa vya kuwasaidia kupumua.

Janga kuu mgomo ukianza

ANGELA OKETCH na STEVE OTIENO

HATARI kuu inakodolea macho taifa hili kuanzia leo Jumatatu endapo wahudumu wa afya watatimiza dhamira yao ya kuanza mgomo ili kuishinikiza serikali kuboresha mazingira yao ya kazi.

Madaktari, wauguzi, maafisa wa matibabu miongoni mwa wahudumu wengine katika hospitali za umma wamelalamika kuwa serikali imekataa kuwatimizia matakwa yao, ikiwemo kuwasambazia vifaa vya kutosha vya kujikinga wasiambukizwe na virusi vya corona wanapokuwa kazini.

Mgomo huo unajiri wakati ambapo maambukizi ya virusi vya corona yanaendelea kuongezeka katika kaunti kadhaa kama vile Nairobi na Mombasa, huku hospitali na vyumba vya kuwahudumia wagonjwa mahututi (ICU) vikifurika wagonjwa wa Covid-19.

Mgomo huo pia unajiri msimu wa sherehe za Krismasi na Mwaka Mpya ukianza, ambapo inatarajiwa viwango vya maambukizi vitaongezeka kwa sababu ya safari nyingi za watu na sherehe.

Kwa msingi huu, inatarajiwa kuwa mgomo wa matabibu utasababisha janga kubwa zaidi katika sekta ya afya ya umma ambayo tayari inatatizwa na vita dhidi ya Covid-19.

Kama ilivyo kawaida, watakaoteseka ni wananchi wa mapato ya chini ambao hawana uwezo wa kugharimia matibabu katika hospitali za kibinafsi.

Wahudumu wa afya wameathirika mno na janga hilo la corona kufuatia ongezeko la maambukizi na vifo miongoni mwao.

Wanachama wa vyama 16 vya kutetea maslahi ya wahudumu wa afya kote nchini wameapa kuanza mgomo wao kaunzia leo.

Mikutano kadhaa katika ya vyama hivyo na maafisa wa serikali kuu, kamati za bunge kuhusu afya, Hazina ya Kitaifa ya Bima ya Matibabu (NHIF), Baraza la Magavana na Tume ya Mishahara (SRC) haijazaa matunda yoyote.

Kaimu Katibu Mkuu wa Chama cha Madaktari Nchini (KMPDU) Chibanzi Mwachonda mnamo Jumamosi alishikilia kuwa mgomo utaendelea ikiwa wahudumu wa afya hawatapewa PPE, bima ya afya na marupurupu ya kufanya kazi katika mazingira hatari, miongoni mwa mahitaji mengine.

Vyama vingine vya wahudumu wa afya vinavyounga mkono mgomo huo ni pamoja na Chama cha Wahudumu wa Kimatibabu (KMA), Chama Kitaifa cha Wauguzi (KNUN), kile cha Maafisa wa Matibabu (KUCO) miongoni mwa vingine.

Wahudumu hao wa afya walisema PPEs zenye ubora wa chini wanazopewa wanapowahudumia wagonjwa wa corona ndizo zimechangia baadhi yao kupata maambukizi ya ugonjwa huo na kisha kufariki.

“Wanachama wetu wanahudumu katika mazingira magumu zaidi na hatari kwa muda mrefu,” akasema Dkt Mwachonda.

“Hatufutilia mbali mgomo hadi huo matakwa yetu yatimizwe. Matakwa hayo yanajumuisha uajiri wa madaktari 2,000 zaidi. Tulizipa asasi husika za serikali kuu na zile za kaunti muda wa wiki tatu kwa ajili ya mashauriano nasi lakini hazikutimiza matakwa yetu. Mgomo unaaanza usiku wa manane Jumapili,” akaongeza.

Dkt Mwachonda aliongeza kuwa wahudumu wa afya waliokodiwa kutoa huduma katika vituo vya karantini hawajalipwa wala hawana bima ya afya.

Katibu Mkuu wa KUCO, George Gibore alisema mgomo wao unaanza kesho Jumanne.

Aliambia Taifa Leo kwamba wanachama wake 37 wamelazwa katika hospitali mbalimbali nchini lakini NHIF imekataa kulipa bili zao.

Mnamo Jumanne wiki jana, Bunge la Kitaifa lilipitisha ripoti ya Kamati yake kuhusu Afya iliyopendekeza kuwa Hazina ya Kitaifa itoe Sh500 milioni za kufadhili bima ya afya kwa wahudumu wa afya miongoni mwa maamuzi mengine yenye manufaa kwa wahudumu wa afya.

Aidha, kamati hiyo inayoongozwa na Mwakilishi wa Kike wa Murang’a, Bi Sabina Chege iliamuru kwamba PPE zilizoko katika hifadhi za Mamalaka ya Dawa Nchini (KEMSA) na zilizonunuliwa kwa bei ghali zisambaziwe wahudumu wa afya.

Kemsa kuna PPE za kutosha kuzuia wahudumu wa afya kuambukizwa corona – Kagwe

Na SAMMY WAWERU

WAZIRI wa Afya Mutahi Kagwe amesema kuna vifaa vingi vya kutumia kujikinga – PPE – katika ghala la Shirika la Kusambaza Dawa na Vifaa vya Kimatibabu (Kemsa) ambavyo wahudumu wa afya wanafaa kutumia wakati huu wa janga la Covid-19.

Akitetea jitihada za serikali katika kupambana na virusi vya corona, Bw Kagwe amesema mdahalo wa ‘kutokuwepo kwa vifaa vya kimatibabu’ umechochewa kwa msingi wa kisiasa.

Waziri alisema wanaoeneza uvumi wa kutowepo kwa PPE na vifaa vingine kukinga maambukizi ya corona miongoni mwa madaktari na wahudumu wengine wa afya, wana ajenda zao binafsi na zisizopaswa kujumuishwa katika oparesheni kupambana na ugonjwa huu ambao ni janga la kimataifa.

Wahudumu wa afya, wakiongozwa na Muungano wa Madaktari, Wataalamu wa Dawa na Madaktari wa Meno (KMPDU), wamekuwa wakilalamikia upungufu na ukosefu wa PPE na vifaa vingine muhimu katika kuhudumia wagonjwa wa corona.

Wanasema mengi ya maafa ya madaktari na wahudumu wa afya yaliyosababishwa na Covid-19, pamoja na maambukizi yamechangiwa na ukosefu wa vifaa kujikinga.

Bw Kagwe hata hivyo, Jumatano usiku kwenye mahojiano na runinga ya Citizen, alisisitiza kwamba Kenya ina vifaa vya kutosha.

“Tuna vifaa vingi sana, vikiwemo PPE katika ghala la KEMSA. Ni vingi hata kupita kiasi,” akasema Kagwe.

Alieleza ni vingi kiasi kwamba viwanda na watengenezaji wa vifaa hivyo wanaviuza nje ya nchi.

“Serikali za kaunti ziviendee KEMSA,” Bw Kagwe akahimiza.

Kauli ya Waziri inajiri wakati ambapo Kemsa imezongwa na madai ya sakata za ufisadi na utoaji wa zabuni kwa njia isiyofaa.

Hofu huku maambukizi ya corona yakizidi

COLLINS OMULO na CHARLES WASONGA

WAZIRI wa Afya Mutahi Kagwe amewaonya wanasiasa dhidi ya kuandaa mikutano ya kisiasa huku 685 zaidi wakithibitishwa kuwa na virusi vya corona Jumapili.

Hii ni baada ya sampuli kutoka jumla ya watu 4,912 kupimwa ndani ya saa 24.

Akiongea na wanahabari katika makao makuu ya Wizara ya Afya, Nairobi baada ya kuongoza mkutano wa Kamati ya Kitaifa ya Kupambana na Janga hilo (NERC), Bw Kagwe alitangaza kuwa watu saba zaidi wamefariki kutokana na ugonjwa huo.

Alisema idadi ya maambukizi mapya iliyoandikishwa jana inaashiria kuwa kiwango cha maambukizi kimepanda hadi asilimia 12 kutoka asilimia 4 Septemba serikali ilipolegeza masharti ya kuzuia msambao wa virusi hivyo.

“Hii ina maana kuwa Wakenya haswa wanasiasa wameanza kupuuza masharti ya kudhibiti ugonjwa hali ambayo inaelekea kuchochea wimbi la pili la maambukizi. Nawaomba wananchi, haswa viongozi wa kisiasa kukomesha mikutano ya hadhara na wananchi wakome kuwazingira viongozi popote wanapoenda,” akasema Bw Kagwe.

Wakati huo huo, wakazi zaidi ya 2,000 wa Nairobi wamepimwa Covid-19 katika awamu ya pili ya shughuli ya kupima iwapo wameambukizwa, bila malipo, iliyozinduliwa na Idara ya Huduma za Jiji la Nairobi (NMS) mwishoni mwa wiki.

Mchakato huo wa upimaji wa halaiki uliendeshwa katika maeneobunge yote 17 ya Nairobi ambapo jumla ya watu 2,054 walipimwa katika siku ya kwanza mnamo Jumamosi huku kukiwa na dalili za kuzuka kwa wimbi la pili la maambukizi.

Eneo bunge la Makadara ndilo lilishuhudia idadi kubwa ya waliojitokeza kwa shughuli hiyo ambapo watu 247 walipimwa. Kibra ilifuatia kwa watu 214, Dagoretti Kaskazini (168), Kamukunji (140), Embakasi Kaskazini (135), Kasarani (125), Westlands (124) huku Embakasi Kusini ikiandikisha watu 120.

Watu wengine 106 walipimwa katika Embakasi Magharibi, Lang’ata (100), Embakasi ya Kati (96), Embakasi Mashariki (95), Ruaraka (82), Starehe (81), Mathare (80), Roysambu (72) na Dagoreti Kusini (69).

Sampuli za watu hao sasa zitapelekwa katika Hospitali ya Mama Lucy Kibaki, ili zipimwe katika maabara.

Huu ni mzaha tu!

Na TAIFA RIPOTA

MAAFISA wakuu serikalini wakiongozwa na Rais Uhuru Kenyatta na Waziri wa Afya Mutahi Kagwe, wameendelea kuvunja kanuni walizoweka wenyewe za kukabili kuenea kwa maambukizi ya virusi vya corona.

Ingawa wanafahamu misongamano ni moja ya njia zinazochangia pakubwa kusambaa kwa virusi hivyo hatari, viongozi hao wamekuwa wakikupuuza tahadhari ya Wizara ya Afya na Shirika la Afya Duniani (WHO).

Kwao binafsi wanakaa mbali na watu na kuvaa barakoa, lakini hawatalii maanani hatari wanayoweka wananchi wanaohutubia.

RAIS KENYATTA

Mnamo Jumatatu, Rais Kenyatta alihutubia umati uliosongamana alipokuwa akizindua ujenzi wa hospitali katika mitaa ya mabanda ya Uthiru, Kibra na Mukuru jijini Nairobi.

Hii ni licha ya kuwa Rais mwenyewe ndiye aliyetangaza marufuku ya mikusanyiko ya watu wengi, kulingana na ushauri wa wataalamu kuwa virusi vya corona vinasambaa kwa urahisi mahala kuna misongamano ya watu.

“Kwa ushauri wa Baraza la Kitaifa la Usalama na Kamati ya Dharura kuhusu janga la corona, naagiza kuongezwa kwa muda wa marufuku ya mikusanyiko aina yoyote ile kwa siku 30 zaidi,” akasema Rais Kenyatta alipohutubia taifa mnamo Julai 6.

Lakini hilo halikumzuia kiongozi wa nchi kuvunja sheria na kuhatarisha maisha ya mamia ya watu waliokusanyika kumsikiza, hali ambayo inachangia ongezeko la maambukizi nchini kila siku.

Alipohutubia taifa mnamo Julai 27, Rais alisisitiza kuwa hatua alizotangaza zinapasa kuheshimiwa na kila Mkenya bila kujali hadhi yake katika jamii.

“Maafisa wa utawala na polisi watatekeleza kikamilifu kanuni za Wizara ya Afya kuhusu mikutano ya umma. Inspekta Jenerali wa Polisi atahakikisha kuwa maafisa wake hawatasaza yeyote, awe mheshimiwa ama mtu binafsi, ambaye atavunja kanuni za afya, bila kujali cheo chake,” akasema Rais mnamo Julai 27.

KAGWE

Bw Kagwe naye amegeuka kuwa mhubiri anayewahimiza watu kunywa maji lakini yeye mwenyewe anabugia mvinyo.

Hii ni baada ya waziri huyo kuhutubia halaiki ya watu katika eneo la Ainamoi, Kaunti ya Kericho alipokuwa akikagua maandalizi ya kupambana na Covid-19.

Ilikuwa kinaya kwa Bw Kagwe kwenye hotuba yake kuwaambia wakazi hao kutii kanuni za kuzuia maambukizi ya virusi vya corona huku akijionea mwenyewe hawakuwa wakiheshimu hitaji la kuepuka misongamano.

“Nawahimiza muendelee kutii kanuni za Covid-19 ili kuzuia maambukizi zaidi,” akasema Bw Kagwe hali akijionea kuwa hadhira yake haikuwa ikizingatia kanuni hizo.

Waziri Kagwe kwenye hotuba zake kwa taifa amekuwa mstari wa mbele kuhimiza Wakenya kuepuka maeneo yenye watu wengi, akisema hali hiyo inachangia zaidi maambukizi.

Pia wizara yake imekuwa ikiendesha kampeni kwenye vyombo vya habari kuhimiza watu kuepuka misongamano, na ni jopo lake lililoshauri Rais kuhusu kuongeza muda wa marufuku ya mikusanyiko.

Katika kuzuia misongamano, Serikali ilitoa masharti makali ya shughuli za kidini, mazishi, uchukuzi wa umma na kuagiza kufungwa kwa mabaa kote nchini.

Lakini mnamo Jumatatu waziri alikiuka kanuni kwa kukubali kuhutubia watu waliokuwa wakivunja kanuni za wizara yake.

NATEMBEYA

Mshirikishi wa shughuli za serikali katika eneo la Rift Valley, George Natembeya naye amekuwa akikiuka kanuni za mikusanyiko mara kwa mara.

Wiki iliyopita, Bw Natembeya aliongoza mkutano uliohudhuriwa na mamia ya watu katika eneo la Nessuit, Kaunti ya Nakuru katika juhudi za kutafuta mwafaka wa amani kati ya jamii mbili ambazo zimekuwa zikizozana.

Kwenye mkutano huo watu walisongamana na hakukuwa na umbali uliowekwa, huku baadhi wakikosa kuvaa barakoa kama ambavyo serikali imekuwa ikihimiza.

Hii ni licha ya kuwa kamishna huyo ni miongoni mwa wakuu ambao wanapasa kuwa katika mstari wa mbele kuhakikisha kanuni za Wizara ya Afya kuhusu Covid-19 zinaheshimiwa na wote.

Mnamo Juni 26, Bw Natembeya na Naibu Inspekta Jenerali wa Polisi Edward Mbugua waliongoza mkutano mwingine ulioshuhudia msongamano mkubwa katika eneo la Ol-Lessos katika Kaunti ya Nandi. Wengi wa waliokuwemo hawakuwa wamevaa barakoa.

Awali Juni 22, 2020, Bw Natembeya na Gavana wa Nakuru Lee Kinyanjui walihutubia mkutano mkubwa katika eneo la Likia, ambapo wengi wa waliohudhuria hawakuwa wamevaa barakoa.

Uvunjaji huu wa kanuni ambazo wanaozikiuka ndio wameweka, zimewakera Wakenya wengi wanaoona kuwa wakuu wa serikali hawako makini kukabiliana na janga la Covid-19.

Matumaini juu idadi ya wanaopona corona ikiongezeka

CHARLES WASONGA na SAMMY WAWERU

KWA mara nyingine Kenya imeonekana kupiga hatua nzuri katika vita dhidi ya Covid-19 baada ya kuandikisha idadi ya juu ya waliopona ikilinganishwa na walioambukizwa.

Kulingana na takwimu zilizotolewa na Waziri wa Afya Mutahi Kagwe  akiwa Kericho mnamo Jumatatu, wagonjwa 534 wamepona kwa siku moja huku idadi ya wagonjwa wapya katika muda huo ikiwa 492.

Kupona kwa wagonjwa hao sasa kumefikisha idadi jumla ya waliopona kuwa 13,495 huku idadi jumla ya maambukizi ikiwa 26,926.

Wagonjwa 492 wapya walipatikana baada ya sampuli 4, 603 kufanyiwa uchunguzi. 478 miongoni mwao ni Wakenya huku 14 wakiwa raia wa kigeni,

Miongoni mwa waliopona, 478 walikuwa wakiuguzwa chini ya mpango wa kuwahudumiwa wagonjwa wa corona nyumbani ilhali 56 walikuwa wakipokea matibabu katika hospitali mbalimbali humu nchini.

Hata hivyo, wagonjwa watatu walifariki na hivyo kufikisha 423 idadi ya wagonjwa walioangamizwa na Covid-19

Waziri Kagwe alielezea hofu kwamba idadi ya watoto wanaoambukizwa virusi vya corona inazidi kuongezeka, kwani Jumatatu mtoto mwenye umri wa miezi 11 ni miongoni mwa watu 492 waliothibitishwa kuwa na virusi hivyo.

Kina mama wenye watoto wachanga wametakiwa kudhibiti idadi ya watu wanaowatemebelea.

Mtoto mwenye umri wa miezi 11 ni kati ya waliothibitishwa kuambukizwa virusi vya corona.

Waziri ametangaza kwamba mgonjwa wa umri mkubwa amekuwa na miaka 83.

Aidha, Bw Kagwe ameeleza wasiwasi kuhusu ongezeko la maambukizi ya corona miongoni mwa watoto wenye umri wa chini.

“Taifa linaendelea kuandikisha maambukizi ya corona miongoni mwa watoto hivyo ninahimiza kina mama wanaonyesha na wenye watoto wadogo, mdhibiti kiwango cha watatu wanaowatembelea,” waziri ameshauri.

Bw Kagwe ameonya kuwa ziara za wageni kusalimu watoto waliozaliwa ndizo zinachangia maambukizi.

“Tunaelewa upatapo mtoto wageni huja, lakini tumesema kwa wakati huu wenye hamu ya kusalimia mtoto tunawauliza mtume zawadi kwa njia ya M-Pesa ambayo haitaleta virusi; na baadaye utaenda kumuona,” waziri akasema.

Bw Kagwe amesema visa vya watoto wenye umri mdogo kuendelea kuandikishwa, ni jambo linalotia wizara hofu.

“Haya ni masuala muhimu kwetu, hatutaki watoto kuugua. Kwa hivyo, nawahimiza akina mama wenye watoto waachanga kukoma kuwaalika wageni wengi nyumbani,” akasisitiza.

Kulingana na Kaimu Mkurugenzi Mkuu wa Afya Nchini, Dkt Patrick Amoth, kufikia sasa Kenya imepoteza mtoto mmoja pekee aliyeangamia akiwa na umri wa miezi sita kutokana na Covid-19.

“Watoto waliozaliwa na wanaoendelea kukua wanafanya vyema,” Dkt Amoth amesema.

Afisa huyo amehimiza watu kula vyakula vyenye madini faafu na kamilifu ili kuimarisha kinga ya mwili, dhidi ya virusi vya corona.

“Hakikisha unakunywa maji mengi, aghalabu zaidi ya lita mbili kwa siku,” Dkt Amoth akashauri. Alisisitiza haja ya watu kuota miale ya jua, hasa majira ya asubuhi ili kuimarisha mifupa.

Watu pia wamehimizwa kupata lepe la usingizi wa kutosha, Dkt Amoth akipendekeza zaidi ya saa nane kwa siku.

Katika visa 492 vya Jumatatu, 478 ni Wakenya huku 14 wakiwa raia wa kigeni. Idadi hiyo imefikisha jumla ya visa 26, 928 vya maambukizi ya Covid-19 nchini.

Jumla ya sampuli 358,330 ndizo zimefanyiwa vipimo kufikia sasa. Jumatatu, chini ya saa 24 zilizopita wagonjwa 534 walithibitishwa kupona corona, huku watatu wakiripotiwa.

Waziri aitunuka sifa Kisumu kwa kiwango cha juu cha usafi

Na SAMMY WAWERU

KAUNTI ya Kisumu imepongezwa kwa kudumisha usafi katika kiwango cha hali ya juu.

Kati ya kaunti ambazo Waziri wa Afya Mutahi Kagwe amezuru kutathmini maandalizi katika kupambana na Covid-19, amesema Kisumu ndiyo inaongoza katika udumishaji wa kiwango cha usafi.

Hata ingawa Waziri anasema kila kaunti ina sifa yake ya kipekee na inayoifanya kuwa tofauti, alisema Kisumu imeonyesha ukakamavu kuhakikisha mazingira yake ni nadhifu.

“Mji wa Kisumu ni safi sana, mjivunie na muendelee vivyo hivyo,” Bw Kagwe akasema, akieleza kwamba alikaribishwa na taswira ya mazingira safi na yaliyomridhisha.

Waziri alisema hayo Jumapili baada ya kuzuru kaunti hiyo kutathmini maandalizi yake katika kukabiliana na corona.

Alisema picha iliyomlaki Mjini Kisumu, inaashiria wakazi wanathamini usafi, akieleza udumishaji usafi ni mojawapo wa kigezo kinachohitajika kupambana na ugonjwa wa Covid-19.

“Usafi ni kati ya mahitaji tunayotilia mkazo katika vita dhidi ya corona. Wakazi wa Kisumu, ninawapongeza. Kuna kaunti zingine ukitembea hujui iwapo uko kwenye msitu au la,” waziri Kagwe akaelezea.

Wizara ya Afya imekuwa ikilalamikia utupaji maski kandokando mwa barabara na njia, na pia kwenye dampo kiholela, suala linalohatarisha maisha ya wakazi kuambukizwa virusi vya corona ikiwa waliokuwa wamezivalia wameambukizwa virusi hivyo hatari.

Miezi kadhaa iliyopita serikali kuu ilizindua mpango wa Kazi Mtaani, ambao jukumu la walioajiriwa ni kuimarisha kiwango cha usafi nchini.

Aidha, mradi huo unajumuisha vijana walio kati ya umri wa miaka 18 – 35, na ambao wameathirika kufuatia janga la Covid-19, Waziri Kagwe akisema serikali itaendelea kuwafadhili ili waweze kujiendeleza kimaisha na kukimu mahitaji ya kimsingi.

Programu ya Kazi Mtaani imeajiri zaidi ya vijana 270, 000 kote nchini, ambapo wanapokea mshahara wa Sh455 kila siku.

Mpango huo unahusisha kufyeka nyasi kandokando mwa barabara, kwenye njia na pia mitaani. Vilevile, vijana waliopata ajira wanazoa taka, na shughuli zingine za kusafisha mazingira kwa jumla.

Wanaume watahadharishwa kuhusu corona

Na VALENTINE OBARA

WAZIRI wa Afya, Bw Mutahi Kagwe, ametahadharisha wanaume kuhusu virusi vya corona akisema athari zake za baadaye hazijulikani.

Huku akionekana kurejelea fununu kwamba kuna uwezekano wa ugonjwa huo kusababisha matatizo kwenye sehemu za siri za wanaume, alisema wanaume wana kila sababu ya kujilinda dhidi ya maambukizi.

“Tumekuwa tukisikia fununu kutoka China… Sitaki nionekane kama mtu anayeeneza uvumi lakini inafaa wanaume wajihadhari hasa wale ambao wangali vijana. Katika miaka ijayo, hatujui haya magonjwa yatakuwa na athari gani,” akasema.

Alikuwa akizungumza Nairobi alipotangaza kwamba maambukizi mapya 544 yalipatikana, na kufikisha idadi ya jumla hadi 19,125.

Wagonjwa 12 walifariki na hivyo basi kufikisha idadi hadi 311. Lakini wengine 113 walipona, na kufikisha idadi yao hadi 8,021.

Kufikia sasa, idadi ya wanaume wanaoambukizwa imezidi ya wanawake, ingawa Bw Kagwe alisema pia idadi ya wanawake imeanza kuongezeka.

“Natumai wanawake hawajaanza kuzembea katika kufuata kanuni za kujiepusha maambukizi,” akaeleza.

Athari za ugonjwa wa Covid-19 bado huendelea kugunduliwa kadri na jinsi tafiti kuhusu ugonjwa huo zinavyoendelezwa kimataifa.

Kufikia sasa, tafiti zimethibitisha athari za kudumu kwa baadhi ya wagonjwa wa Covid-19 ni kama vile kuharibu mapafu, kusababisha matatizo ya moyo na kiharusi.

Kando na hayo, serikali sasa imekiri kuna uwezekano wa maambukizi kuongezeka katika msimu huu wa baridi.

Bw Kagwe alieleza kuwa, kwa vile msimu wa baridi husababisha homa ya kawaida, inawezekana watu wengi wanakosa kinga mwilini dhidi ya magonjwa ndipo wanaambukizwa virusi vya corona.

“Katika msimu huu ni muhimu tuepuke kabisa kukongamana,” akasema.

Alikashifu wahudumu wa afya ambao alisema wanakiuka kanuni za kupambana na ugonjwa huo na hivyo kuwaweka wagonjwa na umma kwa jumla taabani.

“Wakati wa vita, nidhamu ya juu zaidi hutakikana kwa wanajeshi walio katika mstari wa mbele. Nawaomba tafadhalini, tutende yale tunayosema,” akasema.

CORONA: Waziri asema ada ya kupimwa ni Sh1,000

Na CECIL ODONGO

WANAOPIMWA virusi vya corona katika hospitali za umma wanapaswa kutozwa Sh1,000 pekee, Waziri wa Afya Mutahi Kagwe alisema Jumatatu.

Hii ni kinyume na hali ambapo hospitali za umma ikiwemo Kenyatta (KNH) inatoza Sh5,000 kwa wanaopimwa virusi hivyo.

Nazo hospitali za kibinafsi zinatoza Sh8,000 kwenda juu.

Waziri Kagwe alisema wanaopimwa kwenye shughuli za umma hawatozwi pesa zozote.

“Kuna wale ambao wangependa kupimwa kwenye maabara ya kibinafsi na hospitali za serikali. Katika hospitali za serikali, watapimwa kisha watozwe Sh1,000. Tunaendelea kuwapima wagonjwa wa Covid-19 pekee katika hospitali ya Mbagathi,” akasema.

Waziri alitangaza kuwa wagonjwa 65 zaidi wameruhusiwa kuondoka hospitalini na kufikisha idadi ya waliopona hadi 2,946.

Nayo idadi ya waliokufa ilipanda hadi 197 baada ya watu wengine 12 kufariki kutokana na virusi vya corona kulingana na takwimu alizotangaza waziri.

Bw Kagwe pia alitangaza visa vipya 189 na kufikisha idadi ya waliopata virusi hivyo tangu Machi kuwa watu 10,294

Hii ni baada ya sampuli 1,205 kupimwa kwa muda wa saa 24 zilizopita.

Bw Kagwe aliwataka Wakenya wafuate maagizo yaliyotolewa ili kuzuia maambukizi mapya hasa baada ya serikali kuondoa marufuku ya usafiri katika Kaunti za Nairobi, Mombasa na Mandera wiki iliyopita.

Pumwani

Pia alifichua kuwa wahudumu 22 wa afya katika hospitali ya Pumwani, Nairobi walipatikana na virusi hivyo.

baada ya shughuli ya kupima umma kuendeshwa hospitalini humo.

Alikariri kwamba hakuna malipo yanayotozwa kwenye vipimo vya umma na akawashauri watu wakumbatie shughuli hiyo ili kufahamu iwapo wana Covid-19 au la.

Alitangaza kuwa kaunti 13 zitapata magari ambayo yameigharimu serikali Sh200 milioni ili zitumike kuwafuatilia watu waliotangamana na wenye virusi vya corona.

“Tuna kikosi cha watu 229 katika kaunti zote ambao wanafuatilia wale waliotangamana na waliopatikana na virusi vya corona. Tumewapa mafunzo ya kutumia teknolojia,” akaongeza.

COVID-19: Kenya yathibitisha vifo 12 idadi jumla ya walioangamia ikifika 197

Na MWANDISHI WETU

KENYA imerekodi vifo 12 hii ikiwa idadi ya juu zaidi ya walioangamia kipindi cha saa 24 na kufikisha 197 idadi jumla, ametangaza Waziri wa Afya Mutahi Kagwe.

Waziri akiwa katika makao makuu ya wizara – Afya House – jijini Nairobi amesema wagonjwa 65 nao wameruhusiwa kuondoka hospitalini.

Sasa idadi ya waliopona ni 2,946

Lakini idadi ya visa vipya kipindi cha saa 24 ni 189 kumaanisha Kenya ina visa jumla 10,294 tangu kisa cha kwanza kiripotiwe nchini Machi 13, 2020.

Baraza laundwa kufungua ibada

CHARLES WASONGA na SAMMY WAWERU

HATIMAYE serikali imedhihirisha kujitolea kwake kufungua maeneo ya ibada kwa kubuni baraza maalum la viongozi wa kidini litakaloandaa mwongozo wa kufanikisha mpango huo.

Hata hivyo, ufunguzi huo utatekelezwa kwa awamu huku masharti yaliyowekwa na serikali ya kuzuia maambukizi ya ugonjwa wa Covid-19 yakihitajika kuzingatiwa.

Katika tangazo lililochapishwa kwenye toleo maalumu la gazeti la serikali, Waziri wa Usalama Fred Matiang’i na mwenzake wa Afya Mutahi Kagwe, walisema baraza hilo litaongozwa na Askofu Mkuu wa Kanisa Katoliki dayosisi ya Nyeri, Anthony Muheria.

“Kufuatia agizo lilitolewa na Rais Uhuru Kenyatta katika hotuba yake ya nane kwa Taifa kuhusa janga la Covid-19, na kutokana na mashauriano na viongozi wa madhehebu mbalimbali, tumeteua baraza la viongozi wa kidini watakaoongoza mchakato wa ufunguzi wa maeneo ya ibada,” likasema tangazo lililoidhinishwa na mawaziri hao.

Wanachama wengine wa baraza hilo ni pamoja na Kasisi Rosemary Mbogo, Pasta Samuel Makori, Al Haji Hassan Ole Naado, Sheikh Sukyan Hassan Omar, Sheikh Abdulatif Abdulkarim na Kasisi Joseph Mutie.

Pia kuna Askofu David Oginde, Kasisi Connie Kivuti, Sujata Kotamraju, Kasisi Samuel Thiong’o Mwangi na Sheikh Ali Saidi Samojah.

Hayo yakiendelea, watu 90 zaidi walithibitishwa kuwa na ugonjwa wa Covid-19, hivyo kufikisha 3,305 idadi ya jumla ya maambukizi nchini.

TF Body text: Hii ni baada ya sampuli 2,419 kufanyiwa uchunguzi ndani ya kipindi cha saa 24 zilizopita. Idadi jumla ya sampuli ambazo zimepimwa nchini kufikia sasa imetimu 108,666

Akitoa taarifa ya kila siku kuhusu hali ya janga hilo nchini, Waziri Msaidizi wa Afya Rashid Aman alisema wagonjwa 72 zaidi wamepona na kuruhusiwa kwenda nyumbani. Hii imefikisha 1,164 idadi ya wale ambao wamepona corona kufikia Ijumaa.

Kuhusiana na maambukizi mapya Nairobi inaongoza kwa visa 36, Mombasa inafuata kwa visa 34 huku Busia ikishikilia nambari tatu kwa visa 12.

Kutoa damu

Dkt Aman pia alitumia jukwaa la Ijumaa jijini, Nairobi, kuzindua mpango wa kitaifa wa kutoa damu.

Kiwango cha damu inayokusanywa nchini ili kusadia wagonjwa wenye mahitaji kinawakilisha asilimia 1 ya jumla ya idadi ya Wakenya, taifa hili likiwa na takriban watu milioni 50.

Huku Kenya ikijiandaa kuungana na mataifa mengine ulimwenguni kuadhimisha sikukuu ya utoaji msaada wa damu duniani 2020, mnamo Jumapili, inayoadhimishwa Juni 14 kila mwaka, Wizara ya Afya Ijumaa imesema kiwango hicho ni cha chini mno kikilinganishwa na mahitaji ibuka.

Waziri Msaidizi katika Wizara hiyo Dkt Rashid Aman, amesema kulingana na Shirika la Afya Duniani, WHO, kwa mujibu wa idadi jumla ya Wakenya, shirika hilo linapendekeza ukusanyaji wa paili 500,000 za damu kila mwaka, kiwango hiki kikiwa takriban paili 1,370 kwa siku.

Dkt Aman hata hivyo alisema Kenya hukusanya paili 160,000 kwa mwaka, kiwango hiki akikitaja kuwa cha chini mno kikilinganishwa na pendekezo la WHO ili kukithi mahitaji ya damu nchini.

“Kiwango hicho kinaashiria hukusanya paili 450 za damu kila siku. Ni cha chini mno, na kama taifa tunahitaji kufanya busara kukiongeza,” Dkt Aman akasema.

Wakati huu janga la Covid-19 linaendelea kuhangaisha, Wizara ya Afya inasema utafiti unaonyesha kiwango cha utoaji damu ulimwenguni kimeshuka kwa baina ya asilimia 70 na 80.

Hapa nchini, utoaji wa msaada wa damu ambao ni shughuli ya hiari umeshuka kutoka paili 450 hadi 250, Dkt Aman akisema upungufu huo umechangiwa na athari za virusi vya corona.

Hata hivyo, waziri amesema Wizara ya Afya inafanya kila juhudi kuhakikisha upungufu wa damu nchini unaangaziwa.

Akizungumza Ijumaa katika bustani ya ukumbi wa KICC, ambako kampeni ya kuhamasisha watu kujitolea kutoa msaada wa damu imeanza kwa minajili ya maadhimisho ya sikukuu ya usambazaji damu duniani 2020, Dkt Aman alisema serikali imeweka mikakati kabambe kuimarisha shirika la kitaifa kukusanya damu, KNBTS.

“Tumeliongezea wahudumu wengine 22 zaidi. Pia, kwa ushirikiano na Benki Kuu ya Dunia, tutafadhili KNBTS kwa Sh1 bilioni ili kuimarisha huduma zake,” akaeleza, akisema kwamba mikakati iliyowekwa itasaidia kuhakikisha shirika hilo lina vifaa vya kutosha kukusanya damu.

Aidha, aliongeza kusema kwamba serikali na wadau husika, wanapania kutumia mitandao ya kijamii kama vile Facebook kuhamasisha wachangiaji kujitokeza kutoa misaada ya damu.

Kufikia sasa, Dkt Aman alisema Kenya ina jumla ya vituo 33 vya kutoa na kukusanya damu.

COVID-19: Visa 147 vipya, wote ni Wakenya

Na SAMMY WAWERU

KENYA sasa imerekodi jumla ya visa 1,618 vya Covid-19 tangu iliporipoti kisa cha kwanza, baada ya wagonjwa 147 zaidi kuthibitishwa Alhamisi.

Idadi hiyo imebainika kutoka kwa sampuli 2,831 zilizochukuliwa zikafanyiwa vipimo katika kipindi cha saa 24 zilizopita.

Waziri wa Afya Mutahi Kagwe amesema kati ya wagonjwa hao, 87 ni wanaume, jambo linaloendelea kusababisha taharuki kufuatia ongezeko la maambukizi ya Covid-19 miongoni mwa watu wa jinsia ya kiume.

Mgonjwa mwenye umri wa chini zaidi amekuwa mtoto wa umri wa mwaka mmoja huku wa juu akiwa na umri wa miaka 87.

“Wagonjwa wote leo Alhamisi ni Wakenya,” Waziri Kagwe amesema.

Amehimiza raia kutilia mkazo mikakati iliyowekwa kuzuia msambao wa corona.

Kaunti ya Nairobi inaendelea kuongoza kwa maambukizi, mtaa wa Kibra ukitajwa kuwa na wagonjwa 35 waliothibitishwa kwa muda wa saa 24 zilizopita. Nairobi imefuatwa na Kaunti ya Mombasa.

Wakati huo huo, wagonjwa watatu wamefariki idadi jumla ya walioaga dunia kutokana na Covid-19 ikifika wahanga 58.

Waziri Kagwe amefafanua kwamba waliofariki ni mmoja kutoka Thika, Kiambu na wawili wa Mombasa.

Aidha, wagonjwa 13 wamepona, idadi jumla ya waliopona kabisa ikifika 421.

Gavana wa Kaunti ya Kiambu – ambako ripoti ya Alhamisi imetangazwa – James Nyoro, amesema Soko Mjinga ni mojawapo ya maeneo hatari katika maambukizi ya Covid-19 Kaunti ya Kiambu. Sababu amesema ni idadi kubwa ya watu wanaozuru soko hilo.

Bw Nyoro amedokeza kwamba soko hilo linapokea wateja kutoka kaunti mbalimbali, ikiwemo Mombasa na pia wafanyabiashara kutoka nje ya nchi.

“Tumelifunga kwa muda ili kutekeleza shughuli ya kunyunyuzia dawa,” gavana amesema.

Maeneo mengine hatari katika maambukizi ya Covid-19 Kiambu kutokana na idadi kubwa ya watu ni pamoja na soko la Makongeni, Githurai, Ngewa, Kiambu Mjini na maeneo yanayopakana na mji huo.

Alhamisi gavana Nyoro amesema kufikia sasa kaunti hiyo imefanya vipimo vya watu 509 ambapo 37 wamepatikana na ugonjwa wa Covid-19.

Aidha, serikali yake imeajiri wahudumu 200 wa afya, akiahidi 100 zaidi kuajiriwa kufikia wiki ijayo.

“Tunahitaji kufanya vipimo zaidi na tunaomba serikali kuu itufadhili na vifaa vingi vya shughuli hii,” gavana akarai.

Dkt Nyoro amesema hayo baada ya kukutana na Kagwe katika makao makuu ya kaunti hiyo, Kiambu.

Waziri Kagwe naye pia alikuwa ameandamana na mwenzake wa Teknolojia na Mawasiliano (ICT) Joe Mucheru.

COVID-19: Kenya yarekodi idadi ya juu zaidi ya visa vipya kipindi cha saa 24

MAGDALENE WANJA na SAMMY WAWERU

KENYA imerekodi idadi kubwa zaidi ya visa vipya vya Covid-19 kuwahi kutangazwa katika kipindi cha saa 24 baada ya Waziri wa Afya Mutahi Kagwe kuthibitisha Jumatano kwamba kutoka kwa sampuli 3,077 kuna wagonjwa 123.

Kenya sasa ina jumla ya visa 1,471 vya Covid-19 tangu cha kwanza nchini kuripotiwa Machi 13, 2020.

Akiwahutubia wanahabari katika makao makuu ya wizara, Kagwe amesema kuwa Nairobi inaongoza ikiwa na visa 85 huku Kaunti ya Mombasa ikifuatia kwa visa 24 nazo Kajiado na Kisumu pia zikiwa na wagonjwa.

“Inasikitisha kuwa tumewapoteza watu watatu zaidi kutokana na ugonjwa huu. Watu hao walikuwa na maradhi mengine ambayo yalichangia katika vifo hivyo,” alisema Bw Kagwe.

Hii inafikisha 55 idadi ya waliofariki kutokana na ugonjwa wa Covid-19 nchini.

Waziri Kagwe amesikitika kwamba baadhi ya wahudumu katika sekta ya uchukuzi tayari wamerejelea tabia na mienendo mibovu na ya kutojali ya hapo awali na kuwa hawazingatii sheria zilizowekwa za kuzuia maambukizi.

Waziri pia amezungumzia uozo katika wizara yake.

Amesema kuna visa kadhaa vya maafisa wanaoshiriki sakata za ufisadi.

Akieleza jinsi wanavyoshiriki ufisadi kupitia utoaji tenda au kandarasi katika idara, waziri ameonya kuwa siku zao zimewadia na kwamba asasi kama Tume ya Maadili na Kupambana na Ufisadi (EACC) na Idara ya Uchunguzi wa Jinai (DCI), zinafanya uchunguzi.

“Hapa Afya House si ajabu kuona baadhi ya maafisa waliohudumu zaidi ya miaka 12 ikawa wamehamishwa ila wanaendelea kusalia papa hapa. Jiulize ni kwa nini hawataki kutoka?” Bw Kagwe akahoji.

Wizara hiyo imekuwa ikilaumiwa kwa visa vya ufisadi na matumizi mabaya ya raslimali za umma, huku vituo vya afya vya umma nchini vikitoa huduma duni.

“Sawa na sekta zingine, katika yetu pia tuna changamoto za ufisadi; hatukatai. Kuna maafisa wachache wanaoturudisha nyuma,” Bw Kagwe akaeleza.

Mwaka 2019 operesheni ya kukamata maafisa wakuu serikalini waliotuhumiwa kuhusishwa na visa vya ufisadi, ufujaji wa raslimali za umma na matumizi mabaya ya ofisi ilitekelezwa.