Watekaji nyara wamnyaka mzee aliyewapelekea Sh7m

Na MASHIRIKA

ABUJA, NIGERIA

WATEKAJI nyara Jumapili walimkamata mtu ambaye alikuwa ametumwa kuwasilisha ngawira – malipo kwa mtekaji – kabla ya kuwaachilia watoto 136 wa shule waliokuwa wakizuiliwa Kaskazini mwa Nigeria.

Mwanamume huyo ambaye ni mkongwe alitumwa na wazazi wa watoto hao ambao walikuwa wamechangisha Sh7 milioni wakitumai wangewaachilia huru ili waungane nao tena.

Hata hivyo, wazazi wa watoto hao sasa wametamauka zaidi, wakishangazwa na tukio hilo. Baadhi yao walikuwa wameyauza mashamba yao na mali nyingine ili kupata pesa hizo za juu zilizokuwa zikitakikana.

Taifa hilo limekuwa likikumbwa na visa vingi vya utekaji nyara hasa watoto wa shule huku wahalifu na watekaji nyara wakiitisha pesa za juu la sivyo wawaue watoto hao.

Ingawa watekaji nyara wamekuwa wakipokea pesa na kuwaachilia watoto, kisa cha jana kinashangaza kwa kuwa anayepeleka pesa hizo huwa hazuiliwi.

Jumapili, watekaji nyara hao walipiga simu na kuwaeleza walimu wakuu wa shule hiyo kuwa pesa zilizowasilishwa si zile walizoagana wangepokezwa.

Watoto hao wanatoka katika majimbo ya Tegina na Niger walitekwa mwezi Mei.

Wakati huo, watu waliojifunika nyuso wakiwa kwenye pikipiki walifika katika mji huo kisha kuwapiga risasi watu wote waliokuwepo kisha kumuua mmoja wao na kuwajeruhi wengine.

Watu walipokuwa wakitoweka, wavamizi hao walielekea shuleni kisha kuwanyaka watoto hao na kuenda nao.

Baadaye wazazi na wasimamizi wa shule walikubaliana na watekaji nyara hao na wakakubali kulipa pesa zilizokuwa zikihitajika. Waliuza kipande cha shamba la shule na mali nyingine ili kupata pesa zilizohitajika.

Mwalimu mkuu wa shule hiyo, Malam Abubakar Alhassan alifichua kuwa watu sita walitumwa ili wakutane na watekaji nyara hao karibu na msitu ambao watoto hao walikuwa wakizuiliwa kisha walipe pesa hizo ndipo watoto hao waachiliwe.

Walipowasili, watekaji nyara hao waliamrisha kuwa mzee mmoja aliyekuwa katika kundi hilo aandamane nao hadi ndani ya msitu ndipo wahesabu pesa hizo.

Hata hivyo, walipiga simu baadaye kusema pesa hizo hazikutosha kiwango kinachohitajika ndipo wakamzuilia mzee huyo pia.

“Wazazi sasa wameacha hatima ya watoto hao mikononi mwa Mungu. Sasa wanasema kuwa hawawezi kuchangisha fedha zaidi wala hawatashiriki mchango wowote,” akasema Alhassan.

Zaidi ya wanafunzi 1,000 wametekwa nyara kutoka shule mbalimbali Kaskazini mwa Nigeria tangu Disemba mwaka jana.

Wengi wao bado wanaendelea kuzuiliwa huku wananchi wakikosoa serikali kwa kutofanya lolote kuzuia visa vya utekaji nyara vilivyokithiri.

Wanafunzi 3 wa chuo kikuu waliotekwa nyara wauawa

Na AFP

LAGOS, Nigeria

WANAFUNZI watatu waliotekwa nyara wameuawa kwa kupigwa risasi na wahalifu, afisa mmoja wa serikali ya Nigeria alisema Ijumaa.

Afisa huyo alieleza hayo siku tatu baada ya wanafunzi hao kutekwa na watu wenye bunduki chuoni mwao kaskazini mwa nchi hiyo.

Mauaji ya wanafunzi hao yanajiri wakati ambapo visa vya utekaji nyara vimekithiri maeneo ya kaskazini na kati mwa Nigeria ambapo magenge ya wahalifu hushambulia vijiji na kusababisha uharibifu wa mali.

Wahalifu wenye bunduki walishambulia Chuo Kikuu cha Greenfield katika jimbo la Kaduna mnamo Jumanne, wakaua mfanyakazi mmoja na kuteka nyara idadi isiyojulikana ya wanafunzi.

Hicho ni kisa cha tano ambapo shule au vyuo hushambuliwa na wanafunzi kutekwa nyara nchini Nigeria tangu Desemba mwaka jana.

“Wahalifu wenye bunduki ambao waliwateka nyara wanafunzi wa Chuo Kikuu cha Greenfield wamewaua kwa kuwapiga risasi watatu kati ya mateka wao,” akasema Samuel Aruwan, ambaye ni kamishna wa usalama wa ndani katika jimbo la Kaduna, akiongeza kuwa idadi isiyojulikana ya wanafunzi walitekwa na wahalifu hao.

Maiti za wanafunzi hao zilipatikana katika kijiji kimoja karibu na chuo hicho, akasema kwenye taarifa.

Wafanyakazi wawili wa chuo hicho kikuu cha Greeenfield waliambia shirika la habari la AFP kwamba wanafunzi 20 na wahadhiri watatu walitekwa nyara, lakini maafisa wa jimbo hilo hawakuthibitisha takwimu hizo.

Katika miezi ya hivi karibuni majambazi wamekuwa wakiwateka nyara wanafunzi kwa lengo la kulipwa ridhaa na serikali na wazazi wa wanafunzi hao.

Lakini serikali ya jimbo la Kaduna imeshikilia kuwa haitatoa malipo kama hayo kwa wahalifu.

“Hatutawapa pesa zozote na hawatachuma faida yoyote kutoka jimbo la Kaduna,” gavana Nasir Ahmad El-Rufai aliwaambia wanahabari mapema mwezi huu.

Habari za kuuawa kwa wanafunzi hao zilijiri saa kadhaa baada ya Rais Muhammadu Buhari kulaani vifo vya “makumi” ya wanakijiji wiki hii mapema wiki hii katika jimbo jirani la Zamfara. Kiongozi huyo aliwaamuru maafisa wa usalama kuwawinda wahuni hao.

Rais alisema huenda karibu watu 60 waliuawa katika uvamizi katika vijiji kadha katika jimbo hilo lakini ni miili tisa pekee iliyopatikana.

Polisi na maafisa wa serikali hawangethibitisha idadi kamili ya waliouawa.

Kwenye taarifa Alhamisi jioni Rais Buhari alisema “mauaji hayo ya kinyama yatakomeshwa hivi karibuni,”

Aliviamuru vikosi vya usalama kupambana na wahalifu hao kwa lengo la kurejesha usalama katika jimbo hilo.

Wakazi walisema wavamizi wenye silaha waliokuwa wakisafiri kwa pikipiki walivamia vijiji 13 katika mji wa Magami jimboni Zamfara Jumatano jioni. Waliwafyatulia risasi wananchi na kuteketeza nyumba.

Wasomi 29 hatarini kuuawa na majambazi waliowateka nyara

Na MOHAMMED MOMOH

Mwandishi wa Nation, Afrika Magharibi

LAGOS, NIGERIA

WAFUASI wa genge moja la wahalifu wametisha kuwaua wanafunzi 29 waliowateka nyara baada ya serikali ya Nigeria kukataa kulipa ridhaa ya Naira 300 milioni (Sh1.2 bilioni) ili wawaachilie huru wanafunzi hao.

Wanafunzi hao wa chuo cha Federal College of Forestry Mechanisation, kilichoko katika jimbo la Kaduna walitekwa nyara Machi 11, 2021. Wahuni hao walitaka ridhaa hiyo ilipwe na serikali ya jimbo la Kaduna.

Wanafunzi 10 waliachiliwa huru baada ya wazazi wao kulipa ridhaa. Lakini 29 waliosalia wangali wanazuiliwa kwa sababu Gavana Nasir El-rufai wa jimbo la Kaduna amekataa kushauriana na watekaji nyara hao licha ya wazazi wao kuomba mara kadha kwamba serikali izungumze na majambazi hao.

Mwakilishi wa wazazi hao, Bw Friday Sanni mnamo Aprili 16, 2021, alisema wamekuwa wakipata simu kutoka kwa watekaji nyara hao wakitisha kuwaua wanafunzi wa kiume na kuwaoa wale wa kike.

“Tunatoa wito kwa Serikali ya Nigeria, mashirika yasiyo ya kiserikali na wafadhili watusaidie kutoa fedha za kuokoa watoto wetu,” akasema Sanni.

“Wahalifu hao wametisha kuwaua watoto wetu. Serikali nayo inasema kuwa mzazi yeyote atakayefanya mazungumzo na majangili watashtakiwa,” akaongeza.

Serikali ya jimbo la Kaduna imeonya kwamba, haitakubali vitisho kutoka kwa wahalifu hao kuhusu hatima ya wanafunzi hao.

Kamishna wa Usalama wa Ndani na Masuala ya Nyumbani, Bw Samuel Aruwan, mnamo Aprili 6, 2021 akasema hivi: “Serikali itaongeza juhudi za kuhakikisha visa vya ujangili na utekaji nyara vimezimwa bila kukubali ‘vitisho na kuingizwa siasa kwa tukio hilo la kusikitisha’”

Alikanusha madai kuwa Gavana Nasir El-Rufau alitisha kuwafungulia mashtaka mzazi yeyote ambayo ataamua kufanya mazungumzo na walihalifu hao ambao wamewaweka mateka watoto wao.

“Gavana hatafanya mazungumzo na hatalipa ridhaa kwa majangili hao,” akakariri.

Alieleza kuwa “kuna watu ambao wamekuwa wakidai kuwa wameteuliwa na serikali kufanya mazungunzo na wahalifu hao kwa niaba yake.”

“Hawa ni waongo na ni matapeli wakubwa,” akasema Bw Aruwan.

Wakati huo huo, nyingi za shule 1,029 zilizofungwa ili kuzuia visa vya kutekwa nyara kwa wanafunzi katika majimbo ya Sokoto, Zamfara, Kano, Katsina, Niger na Yobe kaskazini mwa Nigeria zimefunguliwa.

Pasta auawa kwa tuhuma za wizi wa nyeti za wanaume

Na AFP

DAUDU, Nigeria

AMRI ya kutotoka nje imetengazwa sehemu kadha za jimbo la Benue kufuatia kisa ambapo pasta mmoja aliuawa na umma kwa madai ya kuiba nyeti za mwanaume, maafisa walisema.

Visa vya wizi wa “sehemu za siri za wanaume” ambapo nyeti za waathiriwa huamini kuwa huzama mwilini, vinasemekana kukithiri zaidi nchini Nigeria na nchi kadha za Afrika Magharibi. Aghalabu hali kama hii imechochea machafuko katika jamii ambapo watu wanaoshukiwa kuchangia maajabu kama hayo hushambuliwa na halaiki.

Kisa cha hivi punde kilitokea katika mji wa Daudu, ulioko umbali wa kilomita 250 kutoka mji mkuu wa Abuja.

Maafisa wa serikali walisema kuwa kundi moja la vijana lilituhumu pasta huyo na mshirika wake mwingine kwa kuhusika na kitendo hicho cha kinyama.

Hata hivyo, Mkuu wa Serikali za Wilaya Caleb Aba alikataa tuhuma hizo akisema: “Ilithibitishwa kuwa madai hayo hayakuwa ya kweli kwani uchunguzi wa kisayasi ulifaywa.”

Mshirika wa pasta huyo alizuiliwa na maafisa wa usalama kama njia ya kumlinda dhidi ya kushambuliwa.

Naye pasta huyo, kwa kuhofia maisha yake, aligura mji huo, kulingana na msemaji wa polisi Cathrine Anene. Aliongeza kuwa kanisa lake liliteketezwa na vijana wenye hasira baada yake kutoweka.

“Lakini vijana walimfuata pasta huyo na kumuua. Hatimaye tulipataa mwili wake,” msemaji huyo akaongeza.

Bw Aba alisema kwamba baada ya siku mbili vijana hao pia walimtuhumu mtu mwingine kwa kosa la kuondoa nyeti za kijana mmoja.

“Mwanamume huyo alipigwa hadi akazirai kabla ya polisi kuingilia kati,” Aba akasema, akielezea sababu ya kutangazwa kwa kafyu hiyo.

Wanajeshi na maafisa wa polisi waliletwa katika eneo hilo kulinda doria baada ya vyombo vya habari kuripotiwa kuwa kundi moja la vijana lilivamia soko likiimba,“bila nyeti hakuna soko”. Vurugu hizo zilisambaratisha shughuli za kibiashara katika mji wa Daudu.

Watu wanane walikamatwa kwa kusabisha kuvuruga utulivu na kuchochea ghasia, polisi wakasema.

Maafisa walisema kafyu ambayo iliwekwa mnamo Jumatatu itadumu hadi hali ya usalama iimarike.

Polisi nchini Nigeria waanza operesheni ya kuwasaka wahalifu

Na MASHIRIKA

LAGOS, NIGERIA

POLISI wa Nigeria wamesema wameanza msako wa kupambana na wahalifu kote nchini humo ili kuimarisha usalama.

Hii ni baada ya machafuko kukithiri nchini humo kwa wiki moja ambapo zaidi ya watu 70 waliuawa na mali ya thamani kubwa kuharibiwa.

Katika taarifa iliyotolewa Jumapili, msemaji wa Polisi Frank Mba alisema serikali imeamuru polisi kuanzisha operesheni ya ya kukomesha ghasia zilizokumba miji kadha nchini Nigeria.

Mba alionya kuwa wahalifu watakabiliwa kwa mkono wa sheria.

Kwa muda wa siku saba zilizopita ghasia zimeripotiwa katika miji kadha nchini humo baada ya watu walioshukiwa kuwa wahalifu kuingilia maandamano ya amani ya raia waliokuwa wakikashifu mienendo la polisi kutumia nguvu kupita kiasi.

Shughuli za kiuchumi ziliathiriwa katika miji mikubwa nchini Nigeria huku wahuni hao walifunga barabara kuu kwa kuteketeza magurudumu, fanicha na bidhaa nyinginezo.

Rais Muhammadu Buhari alilaani vitendo hivyo Ijumaa baada ya kufanya kikao na viongozi wa zamani wa Nigeria kujadili hali ya usalama nchini humo.

“Inasikitisha kuwa maandamo yaliyonuiwa kuwa halali ambapo vijana walikwa wakilaani ukatili wa kikosi maalum cha polisi wa kukabiliana na wahalifu sugu yalitekwa na wahalifu,” Buhari akasema katika mkutano huo uliofanyika kwa njia ya mtandao.

Mnamo Jumapili, Mba alisema polisi wanapanga kuziba “nafasi” zote ambazo wahalifu hutumia kunawiri.

Hata hivyo, alitoa wito kwa maafisa hao kutumia njia halali kuzuia vitendo vya uvunjaji sheria na uharibifu wa mali.

Jiji la Lagos lenye shughuli nyingi za kiuchumi, polisi waliwaambia wanahabari kwamba kufikia Jumapili washukiwa 229 wamekamatwa kwa makosa kadha. Makosa hayo ni kama vile uteketezaji mali, mauaji, wizi, uharibifu wa mali na mashambulizi ya watu.

Nchini Kenya, kiongozi wa upinzani Raila Odinga alilaani ghasia hizo huku akitaka serikali ya Nigeria kuchukua hatua muafaka kuzizima.

“Kazi ya polisi ni kulinda raia na kupambana na wahalifu wala sio kuwafyatuliwa risasi na kuwaua raia wasio na silaha jinsi ilivyoshuhudiwa nchini Nigeria. Serikali ya nchi hiyo inapasa kuzuia vitendo kama hivyo vya ukiukaji wa haki za kibinadamu,” akasema Bw Odinga ambaye pia ni Mjumbe Maalum wa Muungano wa Afrika (AU) kuhusu miundomsingi.

Wakuu wa maandamano wadai serikali inawawinda

Na MASHIRIKA

ABUJA, Nigeria

VIONGOZI wa maandamano ya kulalamikia ukatili wa maafisa wa polisi nchini Nigeria, wamehimiza raia kukaa nyumbani baada ya kudokezewa habari kwamba wanawindwa.

Kupitia muungano wao wa Feminist Coalition ambao umeandaa maandamano hayo ya wiki tatu sasa, wameshauri watu kufuata kafyu zozote katika majimbo yao.

Hatua ya waandalizi hao inajiri baada ya habari kwamba wanachama wa muungano huo wanatishiwa maisha.

Barabara za jiji kuu Lagos, ambalo limekuwa kitovu cha maandamano hayo, zilikuwa tulivu Alhamisi usiku lakini hofu bado ilikuwa imetanda.

Majumba katika jiji hilo na miji mingine yalichomwa, maduka kuporwa na magereza kuvamiwa tangu Jumanne usiku waandamanaji walipofyatuliwa risasi jijini Lagos.

Shirika la kutetea haki la Amnesty International lilisema kwamba maafisa wa usalama waliwaua watu 12, ingawa jeshi la Nigeria limekanusha kuhusika katika mauaji yoyote.

Maandamano yalianza wiki tatu zilizopita wananchi, hasa vijana, wakitaka kikosi hatari cha polisi cha kukabiliana na unyang’anyi kivunjwe.

Kikosi hicho maarufu kama Special Anti-Robbery Squad (SARS) hatimaye kilivunjwa mnamo Oktoba 11.

Waandamanaji pia walidai kuwa wanajeshi waliwafyatulia risasi ili kuwaua.

Rais Muhammadu Buhari katika hotuba ya televisheni alilitaka jeshi kutekeleza majukumu yakee kwa kuzingatia sheria.

Katika hotuba hiyo Alhamisi usiku, Buhari pia alihimiza waandamanaji kusitisha maandamano na kufanya mazungumzo na serikali ili kutafuta suluhu.

Hata hivyo, hakuzungumzia hususan mauaji ya waandamanaji yanayodaiwa kufanywa na maafisa wa usalama, ambayo yameshutumiwa kote ulimwenguni.

Hotuba ya Buhari ilikosolewa mno katika mitandao ya kijamii ambapo vuguvugu la #EndSars liliasisiwa. Wengi walisema hakushughulikia matakwa ya waandamanaji. Badala yake alitilia mkazo kauli za vijana wengi wa Nigeria kwamba wanalengwa na serikali kupitia maafisa wa usalama.

Kwenye taarifa waliyochapisha kwenye mtandao wa Twitter, waandalizi wa maandamano hayo, ambao wamekuwa wakitumia hashtegi #EndSars, walilaani ghasia zote zilizotokea wakisema “vijana wa Nigeria wanahitaji kuendelea kuwa hai ili kutimiza ndoto ya kujenga nchi yao siku zijazo.”

“Sisi ndio wajumbe wa matumaini. Lengo letu wakati wote ni maslahi na usalama wa vijana wa Nigeria,” ilisema taarifa hiyo.

Iliongeza: “Kufuatia hotuba ya rais, tunahimiza vijana wote kutulia, kukaa nyumbani na kutii kafyu katika majimbo yao.”

Vile vile, kundi ilo lilisema halitapokea tena michango ya pesa lakini litatumia Sh3.6 milioni kutoka kwa wafadhili kuwasaidia wake ng’ambo kulipia waathiriwa wa ukatili wa polisi bili za hospitali na ada za mawakili. Makundi mengine na watu maarufu pia wamekuwa wakipanga maandamano na haikubainika iwapo yatafuata mkondo wa The Feminist Coalition.

Polisi lawamani kwa mauaji ya waandamanaji Jumanne

Na AFP

ABUJA, Nigeria

VIKOSI vya usalama nchini Nigeria vimedaiwa kuwaua waandamanaji kadhaa mnamo Jumanne, yalisema mashirika ya kutetea haki za binadamu.

Polisi wanadaiwa kuwafyatulia risasi watu waliokuwa wakiandamana katika sehemu moja jijini Lagos kwa kukiuka muda uliowekwa watu kutotoka nje.

Kufikia Jumanne, watu 18 walikuwa wameripotiwa kuuawa kwenye makabiliano kati ya polisi na waandamanaji hao.

“Vikosi vya usalama viliwaua watu waliokuwa katika eneo la Lekki, mjini Lagos,” alisema Isa Sanusi, ambaye ndiye msemaji wa shirika la Amnesty International nchini humo.

Eneo hilo limekuwa miongoni mwa maeneo ambayo yamekuwa ngome kuu ya maandamano hayo.

Msemaji alieleza mashirika hayo yanafanya kila juhudi kubaini idadi kamili ya watu waliouawa.

Waandamanaji wamekuwa wakilalamikia ukatili wa Kikosi Maalum cha Kukabiliana na Uhalifu (SARS) wakisema kimekuwa kikiwaua watu ovyo bila kubaini ikiwa ni wahalifu.

Serikali imekuwa ikitumia kikosi hicho, ambacho kinajumuisha polisi kukabili ongezeko la visa vya uhalifu.

Walioshuhudia walisema polisi walifyatua risasi kwa umati wa zaidi ya watu 1,000 waliokuwa wakifanya maandamano ya amani.

“Sote tulikuwa tumeketi chini bila usumbufu wowote. Walizima taa za barabarani ambapo kila mmoja alianza kupiga kamsa,” akasema mwandamanaji, aliyetambuliwa kama Toye.

“Walikuja tulikokuwa. Hatukujua walikuwa watu gani. Walikuwa wakifyatua risasi ovyo huku kila mmoja akikimbilia usalama wake katika sehemu tofauti,” akasema mwandamanaji mwingine, aliyetambuliwa kama Innocent.

“Kwa sasa, kuna watu wawili ambao nimelazimika kuwapeleka hospitalini wakiwa katika hali mahututi. Mmoja alipigwa risasi kwenye mgongo huku mwenzake akiwa na jeraha la risasi tumboni mwake,” akasema.

Mtumbuizaji mmoja maarufu alipeperusha video ya moja kwa moja iliyoonyesha watu wakimtoa mwenzao risasi kutoka mwilini mwake.

Awali, waandamanaji katika eneo hilo waliimba wimbo wa kitaifa huku wakiapa kubaki barabarani licha ya maagizo kuwataka kwenda nyumbani.

Maandamano dhidi ya kikosi hicho yalianza wiki mbili zilizopita, watu wengi wakieleza kukasirishwa na utendakazi wake.

Hapo Jumanne, gavana wa jimbo la Lagos, Babajide Sanwo-Olu aliagiza kufungwa kwa maeneo yote ambayo yanatumika na waandamanaji kama ngome yao.

Alisema maandamano hayo “yamegeuka kuwa tishio kuu la kwa uchumi na usalama wa taifa hilo” baada ya ghasia kuripotiwa katika baadhi ya maeneo.

“Wahalifu sasa wanatumia kisingizio cha maandamano kuendeleza uhalifu,” akasema kwenye Twitter, akisisitiza kuwa ni watu wanaotoa huduma muhimu pekee ambao wataruhusiwa kuwa kwenye jiji hilo.

“Hatutaruhusu ukiukaji wa sheria kuendelea katika jimbo letu,” akaeleza.

Mashirika ya kutetea haki za binadamu yamekuwa yakiwalaumu wahalifu “waliofadhiliwa” kwa kuwashambulia waandamanaji.

Ni mwenye nguvu nipishe The Eagles wakiwania 3-bora

Na MASHIRIKA

CAIRO, Misri

JUMATANO, Julai 17, 2019, itakuwa ni zamu ya Super Eagles ya Nigeria na Carthage Eagles ya Tunisia kupigania medali ya shaba baada ya kupoteza mechi za nusu-fainali Jumapili dhidi ya Algeria na Senegal mtawalia kwenye Kombe la Afrika (AFCON) nchini Misri.

Nigeria ya kocha Gernot Rohr ilichapwa 2-1 na Desert Foxes kupitia mabao ya William Paul Troost-Ekong aliyejifunga dakika ya 40 na nyota wa Manchester City, Riyad Mahrez dakika ya tano ya majeruhi. Odion Ighalo alikuwa amesawazishia Nigeria 1-1 kupitia penalti dakika ya 72 kabla ya Mahrez kufuma frikiki safi dakika ya 95.

Ighalo anaongoza ufungaji wa mabao katika makala haya ya 32.

Baada ya mechi, Rohr alinukuliwa na vyombo vya habari nchini Misri akikubali kushindwa kwa kusema Algeria ilistahili ushindi huo.

Hata hivyo, alikiri kuwa wachezaji wake walilegea katika dakika hizo za majeruhi pengine wakitafuta mechi hiyo iingie muda wa ziada wa daklika 30 katika uwanja wa kimataifa wa Cairo.

“Lilikuwa pigano kubwa hadi dakika ya mwisho. Ilikuwa mechi nzuri. Nadhani wachezaji wangu walitaka mechi iende katika muda za ziada wakidhani kuwa Algeria ilikuwa imechoka zaidi,” kocha huyo Mjerumani alinukuliwa akisema.

Mwenzake kutoka Algeria, Djamel Belmadi alisifu vijana wake kwa “kuonyesha ari kubwa na nguvu za kiakili.”

Tunisia pia ilijifunga bao ikibanduliwa nje ya mashindano haya ya mataifa 24.

Beki Dylan Bronn alicheka na nyavu za timu yake ya Tunisia dakika ya 100 uwanjani 30 June jijini Cairo katika nusu-fainali ya kwanza Jumapili.

Bao hili lilitosha kupatia Teranga Lions tiketi ya kuingia fainali kumenyana na Desert Foxes ya Algeria hapo Julai 19.

Katika mechi ya kutafuta nambari tatu itakayochezewa uwanjani Al Salam jijini Cairo, mabingwa wa Afrika mwaka 1980, 1994 na 2013 Nigeria na asilimia 29 ya kushinda washindi hawa wa mwaka 2004.

Takwimu

Takwimu za ana kwa ana kati ya mataifa haya zinapatia Tunisia asilimia 35 ya kumwaga Wanigeria.

Nigeria, ambayo inajivunia wachezaji wakali kama Ighalo, Alex Iwobi, Ahmed Musa na wengineo, itakuwa ikitafuta kudumisha rekodi ya kutoshindwa na Tunisia hadi mechi nne. Nigeria ilichapa Tunisia kwa njia ya penalti 6-5 katika robo-fainali ya AFCON mwaka 2006 baada ya kutoka 1-1 katika dakika 120.

Mechi mbili zilizopita zilikamilika 0-0 na 2-2 katika mechi za kufuzu kushiriki Kombe la Dunia la mwaka 2010. Baadhi ya wachezaji matata kwa upande wa Tunisia ni Wahbi Khazri na Taha Yassine Khenissi, ambao ni washambuliaji. Tunisia na Nigeria zinashikilia nafasi za 25 na 45 katika viwango bora vya soka duniani vya FIFA.

Nigeria, Algeria katika gozi la nguo kuchanika

Na MASHIRIKA

CAIRO, Misri

Baada ya kuwabandua Ivory Coast 4-3 kupitia kwa mikwaju ya penalti Alhamisi usiku, Algeria wanaopigiwa upatu wa kutwaa taji la mwaka huu watakutana na Nigeria kesho Jumapili katika nusu-fainali, kuanzia saa nne usiku.

Nusu-fainali ya kwanza itakutanisha timu za Senegal na Tunisia kuanzia saa mbili usiku.

Baghdad Bounedjah aliifungia Algeria bao katika muda wa kawaida kabla ya Johanthan Kodjia kusawazishia Ivory Coast.

Wakati wa penalti, Youcef Belaili wa Algeria alipoteza penalti yake kwa kupiga mwamba wa goli, sawa na Serey Die wa Ivory Coast.

Bounedjah alikuwa amepoteza penalti awali katika muda wa kawaida na kuwapa wasiwasi mashabiki wa timu yake ambao wamesubiri ubingwa wa taji hili tangu waunyakue kwa mara ya mwisho mnamo 2010.

Ni mechi ambayo Ivory Coast walitawala kwa kiasi kikubwa hasa katika kipindi cha kwanza, huku kipa Rais Mbolhi akikumbwa na wakati mgumu wa kupangua makombora ya washambuliaji wa timu hiyo kutoka Afrika Magharibi.

Wakati huo huo, kocha Pep Guardiola wa Manchester City ameeleza kufurahishwa kwake na kiwango cha winga wake, Riyad Mahrez ambaye timu yake ya Algeria imetinga hatua ya nusu-fainali ya AFCON.

Guardiola anayejiandaa kuwakaribisha wachezaji wake kwa maandalizi ya msimu mpya alisema kiwango cha Mahrez kimeimarika zaidi nchini hapa, huku akimtarajia kukiendeleza zaidi atakaporudi klabuni.

Ushindani

Klabuni, Mahrez anashindania namba dhidi ya Leroy Sane, Raheem Sterling na Bernardo Silva.

Mahrez aliyefunga bao nzuri na kuisaidia Algeria kuibuka na ushindi wa 3-0 dhidi ya Guinea, Jumapili na kufuzu kwa robo-fainali, juzi Alhamisi usiku alikuwa katika kikosi cha timu hiyo kilichoibuka na ushindi wa 4-3 dhidi ya Ivory Coast na kutinga hatua ya nusu-fainali.

Lakini iwapo Algeria itaipiga Nigeria na kufuzu kwa fainali ya michuano hiyo, basi inamaanisha Mahrez hataweza kujiunga na Manchester City mapema, ikizingatiwa kwamba lazima nyota huyo apewe lilikizo ya wiki tatu kabla ya kurudi katika klabu hiyo ya ligi kuu ya Uingereza (EPL).

Hali hiyo itawaweka mabingwa hao katika wakati ngumu ikikumbukwa kwamba vijana hao wa Guardiola wamepangiwa kukutana na Liverpool katika mchezo wa Community Shield Agosti 4 kabla ya ligi kuanza rasmi siku sita baadaye, ambapo wamepangiwa kukutana na West Ham United ugenini.

AFCON 2019: Nigeria na Misri zafuzu mapema

Na MASHIRIKA

CAIRO, Misri

NIGERIA na wenyeji Misri zilikuwa timu za kwanza kufuzu kwa hatua ya 16 Bora ya AFCON baada ya kuandikisha ushindi wa pili mfululizo.

Misri ambao awali waliandikisha ushindi wa 1-0 dhidi ya Zimbabwe waliikung’uta DR Congo kwa 2-0, mabao yaliyopatikana kupitia kwa Ahmed Elmohamady wa Aston Villa na Mohamed Salah wa Livperpool.

Nao Nigeria ambao walianza kwa ushindi wa 1-0 dhidi ya Burundi wakijipatia ushindi wa pili wa 1-0 dhidi ya Guinea, mfungaji akiwa Kenneth Omeruo, zamani mlinzi wa klabu ya Chelsea ya ligi kuu ya EPL, nchini Uingereza.

Uganda na Zimbabwe zilitoka sare ya 1-1 katika mechi ya kundi A la kinyang’anyiro hicho cha Kombe la Mataifa ya Afrika kinachoendelea nchini hapa.

Uganda ilichukua uongozi wa mapema kupitia Emmanuel Okwi baada ya mlinda lango wa Zimbabwe George Chigova kupangua shambulio la Lumala Abdi.

Lakini Zimbabwe ilisawazisha wakati Khama Billiat alipofunga baada ya kazi nzuri katika wingi ya kushoto iliyofanywa na mchezaji Ovidy Karuru.

Mbali na kufunga bao moja, Salah alitoa pasi iliyosababisha kufungwa kwa bao la pili.

Salah alifunga bao lake kwa ujasiri mkubwa hata baada ya kuzungukwa na wachezaji wawili wa DR Congo baada ya mshambuliaji Trezeguet kumuandalia pasi nzuri.

Wakati huohuo mchezaji wa Zimbabwe Knowledge Musona na mchezaji wa Uganda Patrick Kadu wote walikosa fursa nzuri ya kufunga goli.

Musona aligonga mwamba wa goli wakati aliposalia maguu manne na goli baada ya shambulizi la mchezaji wa Zimbabwe Evans Rusike kuokolewa lilipokuwa likikaribia mstari wa goli, Kaddu aliupiga mpira huo nje.

‘Mambo magumu kidogo’

Zimbabwe ambao walikuwa wanalenga kupata ushindi wao wa tatu katika michuano ya AFCON sasa watalazimika kuishinda DR Congo katika mechi yao ya mwisho ya kundi lao, Jumapili ili kuweza kupata nafasi ya kufuzu katika raundi ya muondoano kwa mara ya kwanza.

Mara tu baada ya kujipatia tiketi ya kucheza katika hatua ya 16 Bora, Shirikisho la Soka Nigeria (NFF) limetangaza kuwapa wachezaji hao marupurupu yao, ambapo kila mmoja atapokea Sh1 milioni.

Msemaji wa shirikisho hilo, Ademola Alajire alisema wachezaji hao watapokea pesa hizo leo, kabla ya kucheza mechi ya mwisho Jumapili dhidi ya Madagascar.

Wachezaji hao walikuwa wakipanga kufanya mgomo na hata kutocheza na Guinea. Timu ya wanawake ambayo iliwakilisha taifa hilo kwenye fainali za Kombe la Dunia zinazoendelea nchini Ufaransa pia ilifanya mgomo baada ya malipo yao kucheleweshwa.

Super Eagles inachezea mechi zake mjini Alexandria huku ikilenga kuongoza kundi B baada ya kushinda mechi mbili, huku ikisalia moja.

Nigeria kuingia uwanjani dhidi ya limbukeni Burundi mechi ya ufunguzi Kundi B

Na MASHIRIKA

CAIRO, Misri

NIGERIA watajibwaga uwanjani saa mbili usiku Jumamosi katika uwanja wa Alexandria dhidi ya limbukeni Burundi ambao hii itakuwa mara yao ya kwanbza kushiriki katika michuano ya AFCON, lakini itakuwa mara ya 18 kwa mabingwa hao wa zamani.

Mechi hiyo itachezewa Alexandria Stadium ambao una uwezo wa kuchukua mashabiki 20,000.

Nigeria ambao wamepangiwa Kundi B wanajivunia ushindi mara tatu, nishani za fedha nne na moja ya shaba.

Baada ya kutwaa ubingwa huo kwa mara ya tatu nchini Afrika Kusini mnamo 2013, Super Eagles ilishindwa kufuzu kwa michuano ya 2015 nchini Equatorial Guinea pamoja na ile ya 2017 nchini Gabon, lakini raundi hii walifuzu mapema ikisalia mechi moja.

Kocha wao, Gernot Rohr ameeleza kikosi chake kuwa cha wanasoka chipukizi ambao wana hamu kuu ya kutwaa ubingwa.

Baada ya miaka sita, ni wachezaji watatu pekee ambao wangali kwenye kikosi hicho ambao ni nahodha Mikel John Obi, naibu wake Ahmed Musa na mlinzi Kenneth Omeruo ambao walikuwa katika kikosi cha ushindi wa 2013.

Kikosi cha Nigeria kina makipa: Francis Uzoho (Anorthosis Famagusta, Cyprus); Ikechukwu Ezenwa (Katsina United); Daniel Akpeyi (Kaizer Chiefs, Afrika Kusini)

Walinzi ni: Olaoluwa Aina (Torino FC, Italia); Abdullahi Shehu (Bursaspor FC, Uturuki); Chidozie Awaziem (Caykur Rizespor, Uturuki); William Ekong (Udinese FC, Italia); Leon Balogun (Brighton & Hove Albion, Uingereza); Kenneth Omeruo (CD Leganes, Uhispania); Jamilu Collins (SC Padeborn 07, Ujerumani).

Viungo ni: Mikel John Obi (Middlesbrough FC, Uingereza); Wilfred Ndidi (Leicester City, Uingereza); Oghenekaro Etebo (Stoke City FC, Uingereza); John Ogu (Hapoel Be’er Sheva, Israel)

Washambuliaji ni: Ahmed Musa (Al Nassar FC, Saudi Arabia); Victor Osimhen (Royal Charleroi SC, Ubelgiji); Moses Simon (Levante FC, Uhispania); Henry Onyekuru (Galatasaray SK, Uturuki); Odion Ighalo (Shanghai Shenhua, China); Alexander Iwobi (Arsenal FC, Uingereza); Samuel Kalu (Girondins Bordeaux, Ufaransa); Paul Onuachu (FC Midtjyland, Denmark); Samuel Chukwueze (Villarreal FC, Uhispania).

 

Imetafsiriwa na John Ashihundu

Nigeria wasadiki ubingwa wa AFCON mara hii ni wao

Na CHRIS ADUNGO

NAHODHA wa zamani wa Super Eagles ya Nigeria, Joseph Yobo anaamini miamba hao wa soka wana kila sababu ya kutawazwa mabingwa wa Kombe la Afrika (AFCON) mwaka 2019 hasa ikizingatiwa uwezo wa chipukizi watakaoongoza kampeni za kikosi hicho nchini Misri.

Yobo, 38, aliwahi kuwaongoza Nigeria kutwaa ufalme wa soka ya Afrika akivalia utepe wa unahodha wa kikosi hicho mnamo 2013. Ndiye mchezaji wa kwanza kuwahi kuvalia jezi za Super Eagles zaidi ya mara 100 katika historia ya soka ya Nigeria.

Nigeria wanarejea katika kampeni za kuwania taji la AFCON mwaka huu baada ya kukosa fursa ya kunogesha kivumbi hicho mnamo 2015 na 2017.

John Obi Mikel, Ahmed Musa na Kenneth Omeruo ni kati ya masogora walioongoza Nigeria kutwaa ubingwa wa AFCON mnamo 2013. Watatu hao watategemewa pakubwa na kocha Gernot Rohr kwa mara nyingine katika fainali za mwaka huu zitakazoandaliwa nchini Misri kati ya Juni 21 na Julai 19.

Japo Rohr amekosolewa pakubwa kwa hatua yake ya kuteua chipukizi wengi kupeperusha bendera ya Nigeria nchini Misri, Yobo anahisi kwamba ‘damu changa’ ya Super Eagles itawaduwaza wengi.

“Kocha ameteua kikosi ambacho anaamini kina uwezo, nguvu na ari ya kurejesha Nigeria katika ramani ya soka ya Afrika. Kikubwa zaidi ambacho sisi mashabiki tunastahili kufanya ni kumuunga mkono,” akatanguliza Yobo.

“Nimewahi kuwa katika kikosi kilichopigiwa upatu wa kutamba zaidi kutokana na ukubwa wa majina wa baadhi ya nyota waliowakilisha Nigeria katika fainali za AFCON mnamo 2002, 2004 na 2006. Lakini tuliloweza ni kuambulia nafasi ya tatu katika kila mojawapo ya makala hayo,” akasema.

Licha ya marehemu Stephen Keshi aliyekuwa mkufunzi wa Nigeria mnamo 2013 kukosolewa pakubwa kwa kuteua ‘kikosi kisicho na tajriba’ kuwakilisha Nigeria mnamo 2013, Super Eagles walishangaza wengi na kutawazwa mabingwa wa Afrika.

Kikosi cha Rohr kilichoanza mazoezi mnamo Juni 2 kinatarajiwa kukamilisha maandalizi yao mjini Asaba, Nigeria hapo Juni 9 kabla ya kuelekea mjini Ismailia, Misri kwa mchuano wa kupimana nguvu na Senegal hapo Juni 16.

Nigeria ambao ni mabingwa mara tatu wa taji la AFCON, wamepangwa katika Kundi B kwenye fainali za mwaka huu. Wapinzani watakaokutana nao jijini Alexandria wakati wa fainali hizo ni Guinea, Madagascar na Burundi ambao hii ni mara yao ya kwanza kushiriki fainali za AFCON. Nigeria watafungua kampeni zao za makundi dhidi ya Burundi hapo Juni 22 jijini Alexandria.

“Ilikuwa aibu sana kwa Nigeria ambayo ina zaidi ya raia milioni 200 kushindwa kufuzu kwa makala mawili yaliyopita ya fainali za AFCON. Kwa sasa tuna fursa ya kujinyanyua na kuwadhihirishia wakosoaji wetu uwezo tulionao,” akasema Yobo kwa kusisitiza kuwa chipukizi wa sasa wa Super Eagles watatua Misri bila presha yoyote.

 

Fowadi wa Nigeria, Ahmed Musa asherehekea baada ya kufunga bao lake la pili katika mechi ya fainali za Kombe la Dunia, hatua ya makundi, dhidi ya Iceland mwaka 2018 ugani Volgograd Arena mjini Volgograd, Urusi. Picha/ Maktaba

Yobo alishiriki mchuano wake wa 100 ndani ya jezi za timu ya taifa ya Nigeria mnamo 2001 dhidi ya Zambia jijini Chingola katika mchuano wa kufuzu kwa fainali za AFCON mnamo 2002.

Nyota huyo wa zamani wa Everton, Fenerbahce na Norwich City, amewahi kuchezea Nigeria katika fainali sita za AFCON kati ya 2002 na 2013 katika kipindi cha miaka 14 ya kupiga kwake soka ya kitaaluma.

Alikuwa pia sehemu muhimu ya kikosi cha Nigeria kilichoshiriki fainali za Kombe la Dunia mnamo 2002, 2010 na 2014.

Mbali na Mikel aliyekuwa nahodha wa Nigeria kwenye fainali za Kombe la Dunia nchini Urusi mwaka jana, mchezaji mwingine anayetarajiwa kuwa nguzo kubwa katika kikosi hicho cha Super Eagles ni mvamizi matata wa Leicester City, Kelechi Iheanacho.

Iheanacho atakuwa na fursa ya kusaka bao lake la kwanza ndani ya jezi za Nigeria tangu Novemba 2017 alipofunga dhidi ya Argentina.

Mikel ambaye ni kiungo wa zamani wa Chelsea kwa sasa hana klabu baada ya mkataba wake na Middlesbrough kutamatika rasmi mwishoni mwa mwezi jana.

Rohr anatarajiwa kuchuja zaidi kikosi chake mwishoni mwa mechi ya kirafiki itakayowakutanisha na Zimbabwe apo Juni 8 na kusalia na wachezaji 23 pekee watakaoelekea Misri.

Buhari amshinda mpinzani wake mkuu kwa zaidi ya kura 4 milioni

Na MASHIRIKA

ABUJA, NIGERIA

RAIS Muhammadu Buhari ameshinda urais muhula wa pili ambapo ataongoza tena taifa hili lenye idadi kubwa ya watu katika Bara la Afrika; yanaonyesha matokeo ambayo bado tume ya uchaguzi haijayatangaza rasmi.

Raia wasimama palipo na bango la mgombea wa chama cha All Progressives Congress (APC) Rais Muhammadu Buhari mara baada ya kuchaguliwa tena Abuja, Nigeria Februari 26, 2019. Picha/ AFP

Mapema Jumatano tume ya uchaguzi imetangaza kwamba Buhari yuko kifua mbele kwa zaidi ya kura 4 milioni dhidi ya mpinzani wake mkuu ambaye pia aliwahi kuwa makamu wa Rais, Atiku Abubakar, ishara kwamba kiongozi wa nchi hakamatiki.

Upinzani mnamo Jumanne ulipuuzilia mbali matokeo hayo, ukidai kulikuwa na udanganyifu hata kabla ya matokeo ya majimbo 36 kutangazwa.

Chama cha Atiku cha People’s Democratic Party (PDP) kiliitisha kikao na wanahabari kikiitaka tume ya uchaguzi kusitisha ujumuishaji wa kura.

Afisa wa PDP, Tanimu Turaki alisema uchakachuaji wa kura ulifanyika.

“Chama cha PDP kinashikilia kwamba kura zilizopigwa vituoni na ambazo tunazo, zinaonyesha raia wa Nigeria kwa uwazi kabisa walimchagua Atiku Abubakar,” alisema Turaki.

Aidha PDP kinasema kinataka kura kupigwa upya katika majimbo matatu.

Hadi kufikia Jumanne asubuhi, Rais Buhari alikuwa ameshinda katika majimbo 36, huku mpinzani wake Atiku Akubakar akishinda katika majimbo mawili na Jiji Kuu la Abuja.

Mwenyekiti wa PDP, Uche Secondus alitaja shughuli ya kuhesabu kura kuwa “isiyo sahihi na isiyokubalika” akiongeza kuwa kumekuwa na “jaribio la serikali na mashirika mengine kubadili matokeo.”

Mashirika ya EU, AU na US yameeleza kughadhabishwa kwake na kucheleweshwa kwa shughuli hizo, japo hakuna kati ya waangalizi wa uchaguzi huo wametaja lolote kuhusu wizi wa kura kwenye uchaguzi huo.

Chama

Rais Buhari ni wa chama cha All Progressives Congress (APC).

Vyama vyote viwili vimelaumiana kuwa kingine kinashirikiana na tume ya uchaguzi nchini humo (Inec) ili kuiba kura.

Uchaguzi huo ulifaa kufanywa mnamo Februari 16 lakini ukaahirishwa, saa tano kabla ya uchaguzi kuanza.

Mshindi ana kibarua kigumu katika taifa hilo lenye watu wengi zaidi barani Afrika na pia lenye utajiri mkubwa, cha kutatua matatizo ya umeme, ufisadi, mavamizi ya kigaidi nay a kiuchumi.

Hata hivyo, matokeo kamili ya uchaguzi huo yatatolewa mwishoni mwa wiki hii.

Wagombeaji waliosajiliwa ni 73. Washindani wakuu, hata hivyo walikuwa ni Buhari na Abubakar ambao wanatoka kaskazini mwa taifa hilo na ambao wote wana zaidi ya umri wa miaka 70.

Wakati huo huo, polisi nchini hume walisema kuwa waliwakamata watu 128 kwa kutuhumiwa kuhusika na makossa ya uchaguzi, yakiwemo wizi wa masanduku ya kupigia kura, kuhongana katika maeneo ya kupiga kura na kujifanya kuwa watu wengine.

Polisi aidha walisema kuwa vilipuzi pamoja na silaha nyingine zilipatikana katika maeneo ya kupiga kura.

Uchunguzi mwingine ulisema kuwa watu 39 wameaga dunia katika visa vya fujo za uchaguzi nchini humo, kikiwemo cha vamizi la kigaidi kaskazini mashariki mwa taifa hilo.

Mwenyekiti wa tume ya uchaguzi Mahmood Yakubu aidha alisema kuwa japo uchaguzi umeendeshwa kwa njia salama, mmoja wa wafanyakazi wake aliuawa kwa kupigwa risasi alipokuwa akitoka kuendesha uchaguzi.

Watu milioni 72 walisajiliwa kupiga kura.

Ushelisheli yachezesha mpishi, madereva, waashi dhidi ya Super Eagles ya Nigeria

Na Geoffrey Anene

HEBU fikiria Harambee Stars inachezesha mpishi langoni, mabeki ni madereva na waashi, viungo ni maakuli na washambuliaji ni waelekezi wa watalii?

Hivyo ndivyo mambo yalikuwa timu ya Ushelisheli iliposherehekea kupigwa mabao 3-0 na Super Eagles ya Nigeria ikitumia kikosi chake thabiti kilichojumuisha watu wanaofanya kazi za kawaida wakiwemo wapishi, madereva, waashi, makuli na waelekezi wa watalii katika mechi za raundi ya pili za kufuzu kushiriki Kombe la Afrika (AFCON) mwaka 2019 hapo Septemba 9, 2018.

Kipa wa Ushelisheli, Dave Mussard, ambaye ni mpishi katika hoteli ya Pataran katika kisiwa cha Digue, hasa ndiye alifanya kikosi hicho kipate umaarufu katika mitandao ya kijamii.

Unene wa kipa huyu mwenye umri wa miaka 31 ulimfanya afananishwe na mvamizi wa zamani wa Brazil, Ronaldo.

Tovuti ya thesouthafrican.com inasema kwamba kwa sababu timu ya Ushelisheli inashirikisha wachezaji wasiotegemea timu ya taifa kupata posho lao, wote wana kazi za pembeni. “Wachezaji waliomba ruhusa kutoka kwa waajiri wao na wakati mwingine walinyimwa ruhusa hiyo na wakakosa mazoezi,” tovuti hiyo inasema.

Imeongeza, “Beki Bertrand Esther ni dereva, naye winga Colin Bibi ni mesenja. Na Mussard, bila shaka ni mpishi. Ukiweka pamoja mapato yao ni karibu Sh64,262 kwa mwezi. Kuna marupurupu ya kufanya mazoezi, lakini madogo sana, hayatoshi kufanya iwe kazi.”

Mechi hiyo ilisimamiwa na refa Mkenya Davies Omweno. Nigeria ilibwaga wenyeji wao Ushelisheli kupitia mabao ya Ahmed Musa, Chidozie Collins na Odion Ighalo.

Kwa wiki moja, Chidozie anakula mshahara wa Sh1,063,945 katika klabu ya Nantes nchini Ufaransa, Ighalo Sh25,174,408 katika klabu ya Changchun Yatai  nchini Uchina naye Musa alikuwa Sh8,096,000 akiwa Leicester City nchini Uingereza kabla ya kuhamia Al Nasr nchini Saudi Arabia baada ya kukamilisha mkopo kutoka CSKA Moscow nchini Urusi.

Ushelisheli inavuta mkia bila alama katika Kundi E linaloongozwa na Libya na Afrika Kusini, ambazo zina alama nne kila moja. Nigeria inashikilia nafasi ya tatu kwa alama tatu.

Pasta aitisha waumini Sh200,000 aombee Nigeria kufuzu

Na AFP

LAGOS, NIGERIA

PASTA ameshangaza wengi kwa kuambia waumini wake wamlipe zaidi ya dola 2,000 (Sh200,000) ili kuombea wachezaji wa timu ya taifa ya kandanda wanaoshiriki katika dimba la kombe la dunia nchini Urusi.

Mhubiri huyo anayejitambulisha kama mtume Tommy Yisa Akia, alisema atatumia pesa hizo kufadhili kikosi cha “mashujaa wa injili” kuombea timu hiyo ya Super Eagles.

Awali alikuwa amedai timu hiyo ilishindwa na Croatia katika mechi yake ya kwanza wiki iliyopita kwa sababu inaadhibiwa na Mungu kwa kuajiri mkufunzi mzungu, Gernot Rohr.

Lakini alisema anaamini Nigeria inaweza kubadili hali yao katika kombe la dunia na kuwa timu ya kwanza Afrika kushinda kombe hilo kama atalipwa pesa hizo.

“Ninahiotaji pesa hizo kidogo ili kununua vifaa kadhaa vya kidini na pia kulipa kikosi changu cha waombaji marupurupu kidogo,” alinukuliwa kusema na mashirika ya habari.

-Imekusanywa na Valentine Obara

URUSI 2018: Ahadi ya pesa ilivyochochea Nigeria kuiyeyusha Iceland

Na GEOFFREY ANENE

SUPER Eagles ya Nigeria ilipata msukumo wa kudhalilisha Iceland kutokana na ahadi ya Sh5,045,225 (Naira 18 milioni) kwa kila bao kutoka kwa wadhamini, Aiteo Group.

Taarifa nchini Nigeria zinasema vijana wa kocha Gernot Rohr watapata zawadi hiyo tu wakishinda mpinzani bila kufungwa bao. Ina maana kwamba kwa kunyuka Iceland 2-0 Juni 22 kwenye Kombe la Dunia linaloendelea nchini Urusi, Super Eagles ilitia kibindoni Sh10,090,450.

Katika mchuano huo wa Kundi D, mshambuliaji Leicester City Ahmed Musa, ambaye yuko CSKA Moscow kwa mkopo, alitikisa nyavu za Iceland mara mbili.

Nigeria haikuwa na shuti hata moja lililenga goli katika kipindi cha kwanza kabla ya Musa kufanga mabao haya safi katika dakika ya 49 na 75. Mabingwa hawa mara tatu wa Afrika waliingia mechi ya Iceland wakiuguza kichapo kikali cha mabao 2-0 walichopokea kutoka kwa Croatia mnamo Juni 17.

Nigeria inashikilia nafasi ya pili kwa alama tatu, tatu nyuma ya viongozi Croatia. Vijana wa Rohr watakamilisha mechi za makundi dhidi ya Argentina mnamo Juni 26.

Buhari kukutana na Trump White House

Na AFP

RAIS wa Nigeria Muhammadu Buhari, Jumatatu atakutana na Rais Donald Trump wa Amerika jijini Washington na kuwa kiongozi wa kwanza kutoka Afrika kukaribishwa na Trump katika ikulu ya White House.

Trump anapigwa darubini kufuatia tamko lake alilotukana nchi za Afrika ambalo alikanusha baadaye.

Uhusiano wa Trump na mataifa ya Afrika uliingia ndoa zaidi Machi mwaka huu alipomfuta kazi aliyekuwa waziri wa mashauri ya nchi za kigeni Rex Tillerson akiwa Nigeria kwenye ziara yake ya kwanza Afrika.

Hatua hiyo ilifichua machache kuhusu sera za utawala wa Trump kwa Afrika. Ziara ya Buhari inajiri siku chache baada ya Trump kukutana na Chansela wa Ujerumani Angela Merkel na rais wa Ufaransa Emmanuel Macron.

Kulingana na taarifa ya ikulu ya White House, mazungumzo ya Buhari na Trump yatahusu vita dhidi ya ugaidi na ukosefu wa usalama, ukuaji wa uchumi na demokrasia nchini Nigeria ambayo itaandaa uchaguzi wa urais Februari mwaka ujao.

Nigeria inapigana na magaidi wa Boko Haram kwa mwaka wa tisa sasa na watu zaidi ya 20,000 wameuawa na magaidi hao.

 

 

Korti yaagiza Boinnet afurushe Mnigeria kipenzi cha wanawake jijini

Na RICHARD MUNGUTI

HAKIMU mkuu katika mahakama ya Nairobi Bw Francis Andayi, Jumatano alimwamuru Mkuu wa Polisi (IG) Joseph Boinnet pamoja Idara ya Uhamiaji wamfurushe kutoka humu nchini raia wa Nigeria anayedaiwa kuwa mwizi wa magari na mwenye mazoea ya kuishi na wanawake tofauti tofauti.

“Mshtakiwa huyu Okeke Patrick Godwin Chukwudi (pichani) asafirishwe mara moja atoke mbele yangu hadi nchini Nigeria,” Bw Andayi alimwagiza IG.

Hakimu alisema Bw Chukwudi hana kitambulisho chochote hawezi kukubaliwa kuishi humu nchini.

Raia huyo wa kigeni aliyekabiliwa na shtaka la kupatikana bila cheti cha kumruhusu kuishi humu nchini alijitetea akisema kwamba: “ Nimeishi hapa nchini tangu mwaka wa 2010 na hata nimeomuoa mwanamke raia wa Kenya.”

Alimweleza hakimu kwamba mwanamke aliyekuwa akiishi naye alimwibia gari na pasipoti yake na “sasa hana hati yoyote ya kunitambulisha.”

Lakini kiongozi wa mashtaka Bw Solomon Naulikha alimweleza hakimu kwamba mshtakiwa alitiwa nguvuni na polisi akiendesha gari iliyo na nambari za usajili za humu nchini nambari KCE 128H.

“Naomba hii korti inionee huruma kwa vile mwanamke niliyekuwa nimemuoa raia wa Kenya Valentine Arigi aliniibia gari na pasipoti. Sasa sina hati yoyote ya kunitambua,” mshtakiwa alijitetea.

Lakini Bw Naulikha alimweleza hakimu kwamba mshtakiwa hana makao maalum kwa vile “yuko na tabia ya kuhama kutoka kwa mwanamke mmoja hadi kwa mwingine.”

Bw Naulikha alipinga mshtakiwa akiachiliwa kwa dhamana akisema “atoroka na hatafika kortini siku ya kusikizwa kwa kesi kwa vile hana makao maalum.”

Mahakama iliamuru IG na Idara ya Uhamiaji amsafirishe mshtakiwa hadi nchini Nigeria na kumkabidhi kwa wizara ya kigeni apelekwe alikozaliwa katika jimbo la Ibo.

Bw Chukwudi alidaiwa kwamba alipatikana humu nchini bila kibali cha kumruhusu kuishi mnamo Aprili 9, 2018.

Nigeria yaanza kusaka wasichana 110 waliotekwa na Boko Haram

Na AFP

ABUJA, Nigeria

SERIKALI ya Nigeria imeanza harakati za kuwatafuta wasichana 110 wa shule moja, wanaoaminika kutekwa nyara na kundi la kigaidi la Boko Haram wiki iliyopita.

Serikali ilisema imetuma wanajeshi zaidi na ndege ili kuimarisha operesheni hiyo.

Wasichana hao walitoweka muda mfupi baada ya wanamgambo hao kuvamia shule yao Jumatatu iliyopita katika mji wa Dapchi, jimbo la Yobe.

Rais Muhammadu Buhari alitaja kisa hicho kama “janga la kitaifa” huku akiomba msamaha kwa familia za wasichana hao. Tukio hilo linajiri baada ya jingine lililofanyika mnamo 2014, ambapo wasichana 276 walitekwa nyara na kundi hilo.

Familia za wasichana hao zimekumbwa na ghadhabu, baada ya ripoti kuibuka kwamba serikali ilikuwa imewaondoa wanajeshi wake katika maeneo muhimu ya Dapchi, mwezi uliopita. Mji huo uko umbali wa kilomita 275 kutoka eneo la Chibok, ambako shambulio la 2014 lilifanyika.

Wanamgambo hao wanadaiwa kuvamia Taasisi ya Mafunzo ya Sayansi ya Serikali, ambayo huwa na wasichana pekee.

Wakazi walio karibu walisema kuwa vikosi vya kijeshi vilijibu shambulio hilo mara moja kwa kutumia ndege za kivita.

Awali, mamlaka zilikanusha kwamba wasichana hao walikuwa wametekwa nyara, zikishikilia kuwa walikuwa wamejificha ili kutoonekana na washambuliaji hao.

Kundi la Boko Haram limekuwa likipigania kubuniwa kwa taifa huru katika ukanda wa kaskazini mashariki mwa nchi hiyo. Hadi sasa, wasichana waliotekwa nyara awali wangali kufahamika waliko.

Serikali baadaye ilitoa taarifa ikithibitisha kutekwa nyara kwa wanafunzi hao.

 

Uvamizi shuleni

“Serikali ya Nigeria ingependa kuthibitisha kwamba wanafunzi 110 kutoka Tasisi ya Kiufundi ya Serikali, mjini Dapchi hawajulikani waliko baada ya wanamgambo wa Boko Haram kuvamia shule yao,” ilisema taarifa kutoka Wizara ya Habari na Mawasiliano.

Kisa hicho kimeibua maswali kuhusu hali ya utayarifu wa jeshi hilo kuwakabili wanamgambo hao. Aidha, hili linajiri baada jeshi hilo kudai kwamba lilikuwa tayari kuwazima wanamgambo hao.

Kauli ya Rais Buhari pia imekosolewa vikali na baadhi ya wanaharakati, huku wakiamini kwamba serikali imeshindwa kabisa kulikabili kundi hilo.

Alipochaguliwa kama rais mnamo 2015, Bw Buhari, ambaye alikuwa mtawala wa kijeshi aliahidi kukabiliana na kundi hilo. Hii ni baada ya mtangulizi wake, Goodluck Jonathan kulaumiwa vikali kwa kushindwa kulikabili.

Mwalimu mmoja katika taasisi hiyo, Amsani Alilawan, alisema kwamba kulikuwa na wanajeshi katika eneo hilo hadi mwezi uliopita, ila wakaondolewa.

“Waliwaondoa wanajeshi hao wote na kuwahamisha katika maeneo mengine,” akasema.