Viongozi Mlima Kenya watazuru Nyanza kuthibitisha wanaunga mkono Raila – Orengo

Na MWANDISHI WETU

UJUMBE wa viongozi waliochaguliwa eneo la Mlima Kenya utazuru Nyanza kuthibitishia wenyeji kwamba ngome ya Rais Uhuru Kenyatta itamuunga mkono kiongozi wa ODM Raila Odinga katika uchaguzi mkuu wa mwaka ujao, seneta wa Siaya, James Orengo amefichua.

Bw Orengo alisema ana uhakika eneo la Mlima Kenya litamuunga Bw Odinga katika azma yake ya kugombea urais kwenye uchaguzi wa mwaka ujao.

“Ili kuthibitisha kuwa eneo la Mlima Kenya litamuunga mkono Bw Odinga, tutawaleta wabunge na maseneta kutoka eneo la Kati hapa Nyanza kuwadhihirishia watu kwamba kwa hakika wako nyuma yake,” alisema akiwa eneo la Usigu, Bondo Kaunti ya Siaya.

Mwaka jana, kundi la wazee kutoka eneo la Mlima Kenya na baadhi ya wanasiasa walimtembelea Bw Odinga nyumbani kwake Siaya ambako walikutana na wazee wa jamii ya Waluo.

Seneta Orengo ambaye ni mmoja wa washirika wa karibu wa Bw Odinga alisema kwamba makaribisho ambayo waziri mkuu huyo wa zamani amekuwa akipokea eneo la Kati hivi majuzi ni dhihirisho kwamba limeamua kumkumbatia.

Bw Odinga amezuru eneo la Kati mara kadhaa mwaka huu katika juhudi za kutafuta uungwaji mkono.Wiki jana, Bw Odinga alihutubia mikutano kadhaa ya kisiasa eneo la Kati akitoka Laikipia alipokutana na baadhi ya magavana na wabunge walioahidi kumuunga mkono.

Wiki hii, alikutana na mabwanyewe wa eneo hilo walioashiria kwamba wataunga mkono azma yake ya kumrithi Rais Kenyatta.

Bw Orengo alipuuza madai kwamba Rais Kenyatta atamsaliti Bw Odinga akifafanua kuwa uhusiano wao wa karibu unaonyesha kwamba kiongozi wa nchi anaunga azma ya Odinga.

Viongozi hao wawili wamekuwa na uhusiano wa kirafiki tangu handisheki yao mnamo Machi 9, 2018 iliyotuliza joto la kisiasa nchini baada ya uchaguzi mkuu wa 2017.

Akizungumza alipoongoza kampeni ya vijana kuchukua vitambulisho katika kituo cha afya cha Usigu Ijumaa, Bw Orengo alihakikishia wakazi kwamba kura za Bw Odinga hazitaibwa katika uchaguzi mkuu ujao.

Chama cha ODM kimekuwa kikishikilia kwamba Bw Odinga amekuwa akipokonywa ushindi katika chaguzi tatu alizowahi kugombea urais.

Bw Orengo alisema kwamba viongozi wa Nyanza wanazingatia sana siasa za kitaifa ili kuhakikisha Bw Odinga ataingia Ikulu baada ya uchaguzi mkuu wa 2022.

Kulingana na Bw Orengo, hakutakuwa na kitu cha maana kufaidi wakazi wa Nyanza iwapo Bw Odinga hatashinda urais.

Mbunge wa Bondo Gideon Ochanda ambaye aliandamana na Bw Orengo aliwahimiza wakazi kujisajilisha kwa wingi kama wapigakura kwa kuwa hiyo ndio njia ya pekee ya kuhakikisha wanachagua viongozi wanaowapenda.

Alikubaliana na Bw Orengo kwamba nyadhifa za uongozi eneo la Nyanza hazitakuwa na manufaa makubwa kwa wakazi iwapo Bw Odinga hatakuwa rais.

Orengo awalaumu vigogo ODM kwa kumtoroka Raila

Na VICTOR RABALLA

SENETA wa Siaya, James Orengo, amewakemea viongozi wa ODM kwa kumuacha kiongozi wa chama hicho Raila Odinga wakati anawahitaji zaidi.

Bw Orengo ameapa kutomuacha Bw Raila Odinga wakati kama huu ambapo waziri huyo mkuu wa zamani anajizatiti kuokoa mchakato wa mageuzi ya katiba kupitia mpango wa maridhiano (BBI).

Akiongea Jumamosi, mwanasiasa huyo ambaye ni Wakili Mkuu alisema kuwa inasikitisha kuwa baadhi ya viongozi huamua kumtelekeza Bw Odinga nyakati kama hizi anapokabiliwa na changomoto.

“Wakati kama huu, utawasikia wengine wanauliza Orengo yuko wapi ilhali wao ndio huwa mstari wa mbele kunishtumu wakidai ninamkosoa kiongozi wa chama chetu,” akasema alipohudhuria hafla ya mazishi katika Kaunti ya Siaya.

Bw Orengo ni miongoni mwa mawakili wenye uzoefu mkubwa walioteuliwa na Bw Odinga kumwakilisha katika kesi ya rufaa dhidi ya uamuzi wa Mahakama Kuu kuharamisha mchakato wa BBI. Wengine ni Mbunge wa Rarieda, Dkt Otiende Amollo, Bw Paul Mwangi, Bw Jackson Owele, Bw Ben Sihanya na Bw Arnold Oginga.

Bw Orengo, ambaye ni Kiongozi wa Wachache katika Seneti, alisema baadhi ya wanasiasa ndani ya ODM hawana uwezo wa kutetea chama hicho kama ilivyodhihirika hapo awali.

“Ni wachache tu waliojitokeza katika uwanja wa Uhuru Park mnamo Januari 30, 2018 tulipomwapisha Bw Odinga kuwa rais wa Wananchi. Ni wachache wetu tuliokuwa pale wakiwemo Mbunge wa Ruaraka TJ Kajwang na Miguna Miguna. Kitendo hiki cha ujasiri ndicho kilichangia Rais Uhuru Kenyatta kusalimiana na Bw Odinga,” akawaambia waombolezaji katika mazishi ya diwani wa zamani wa wadi ya Alego Kusini, Joshua Osuri.

Aliwashauri wakereketwa wa mchakato wa BBI kutovunjika moyo na wajiandae kupigia kura marekebisho yaliyomo kwenye mswada wa BBI kabla ya mwaka huu kutamatika.

“Nawataka mfahamu kwamba hakuna kizuri kinachopatikana kwa urahisi; sharti juhudi kubwa ziwekwe ilivyofanyika kabla ya kupatikana kwa Katiba ya sasa mnamo 2010,” Orengo akaeleza.

Aliwaomba wananchi kuwaombea wanapojiandaa kupinga uamuzi wa jopo la majaji watano wa Mahakama Kuu walioharamisha mchakato wa BBI wiki jana.

Seneta Orengo na Dkt Amollo wiki jana walishutumiwa vikali na wabunge wa ODM kutoka Luo Nyanza, wakiongozwa na Mbunge wa Ugunja Opiyo Wandayi, kwa madai kuwa walikaidi msimamo wa ODM Mswada wa BBI ulipojadiliwa katika Bunge la Kitaifa na Seneti.

Wawili hao pia walikuwa miongoni mwa jopo la mawakili waliotetea muungano wa NASA na Bw Odinga katika kesi ya kupinga ushindi wa Rais Kenyatta, katika Mahakama ya Juu, mnamo 2017.

Wakati huo huo, Katibu Mkuu wa ODM, Bw Edwin Sifuna amewataka mawaziri wanaotaka kujiunga na siasa wafanye hivyo badala ya kutumia vyombo vya usalama kutisha na kudhulumu wapinzani wao.

Akionekana kumrejelea Waziri wa Usalama wa Ndani, Dkt Fred Matiang’i, Bw Sifuna alimtaka kuingia siasa ikiwa anahisi kuwa na umaarufu katika ulingo huo.

Korti yamzima Orengo kuwa wakili wa Manduku

Na PHILIP MUYANGA

MAHAKAMA Kuu imemzima Seneta wa Siaya, James Orengo, kumtetea aliyekuwa Mkurugenzi Mkuu wa Mamlaka ya Bandari ya Kenya (KPA) Dkt Daniel Manduku.

Jaji Eric Ogola aliamua kwamba akiwa seneta, Bw Orengo ni afisa wa serikali na hafai kumwakilisha Dkt Manduku.Uamuzi huo unaweza kuwafungia nje wabunge wengine mawakili kuwakilisha maafisa wa serikali wanaoshtakiwa kwa makosa ya ufisadi.

Uamuzi huo ulifuatia kesi ambayo iliwasilishwa na Mkurugenzi wa Mashtaka ya Umma (DPP) kutaka Bw Orengo au maafisa wengine wa serikali kumwakilisha Dkt Manduku katika kesi yake.

Katika kesi hiyo, Dkt Manduku anataka DPP azuiwe kumfungulia mashtaka yoyote kuhusiana na ripoti ya uchunguzi na mapendekezo ya Idara ya Kuchunguza Uhalifu (DCI).

Jaji Ogola alisema iwapo Dkt Manduku ataitwa kufika mbele ya Seneti, Bw Orengo atakuwepo kama seneta na hata kama atajiondoa, itakuwa imechukuliwa anaweza kumpendelea.

“Mlalamishi yuko huru kutafuta wakili mwingine wa kumwakilisha lakini sio Orengo,” Jaji Ogola alisema.“Dkt Manduku hana haki ya kuwakilishwa na mtu anayeweza kumuita Bungeni,” alisema Jaji Ogola.

Kwenye kesi yake, DPP ilitaka mahakama kuamua kwamba hatua ya Bw Orengo au afisa mwingine wa serikali kuendelea kuwakilisha Bw Manduku ni kinyume cha Sura ya Sita ya katiba.

Naibu msaidizi mkuu wa DPP, Alexander Muteti pia alitaka mahakama iagize Dkt Manduku kumwajiri wakili ambaye sio afisa wa serikali kumwakilisha.

Bw Muteti alisema kwamba Bw Orengo ni seneta wa Kaunti ya Siaya na kwa hivyo ni afisa wa serikali ambaye sheria inasema hafai kushiriki kazi nyingine ya mshahara.

Bw Muteti alisema kwamba Dkt Mutuku ambaye alikuwa Mkurugenzi Mkuu wa shirika linalofadhiliwa na mlipa ushuru, aliwajibika kwa umma kupitia kamati za bunge zinazochunguza matumizi ya pesa za umma.

Orengo apendekeza Oburu Odinga kumrithi useneta Siaya

Na CECIL ODONGO

SENETA wa Siaya James Orengo ametangaza kuwa anampendekeza kakake kiongozi wa ODM Raila Odinga, Dkt Oburu Odinga, kurithi kiti cha Useneta wa Siaya kwenye uchaguzi mkuu ujao.

Bw Orengo ambaye pia alifichua kuwa analenga kujitosa katika mbio za ugavana 2022, alisema mwakilishi huyo katika Bunge la Afrika Mashariki (EALA) ana tajriba pevu ya kisiasa na jemedari halisi wa ODM.

Hivyo, anatosha kuwawakilisha wakazi wa Siaya katika Bunge la Seneti.Wakili huyo alisisitiza kuwa Dkt Oginga amesimama pamoja na Bw Odinga wakati wa maamuzi magumu ya kisiasa ndiposa ndiye bora zaidi kuwahi useneta 2022 kuliko wapinzani wake.

“Hao wote wanaokimbia hapa na pale wakisema wanataka useneta, wanafaa wawaeleze wamekuwa wapi wakati Bw Odinga alikuwa akipambana na mawimbi makali ya kisiasa.

“Huyu Oburu amesimama na Baba kila wakati. Alikuwa Uhuru Park tukimwaapisha Baba na amekuwa mwenye hekima kwa kuchangia na kuunga maamuzi magumu ya kisiasa tuliyoyakumbatia kama chama cha ODM,” akasema Bw Orengo.

Mbunge huyo wa zamani wa Ugenya alisisitiza kuwa ashaelekeza macho yake katika kiti cha ugavana na atahakikisha kuwa, pamoja na Dkt Oginga wanamsaidia Bw Odinga kuingia Ikulu 2022.Wakati huo huo, alisema Wakenya wataelekea kwenye referenda mnamo Julai na kukanusha madai kwamba Mswada wa BBI uliofikishwa bungeni wiki jana ulibadilishwa.

“Sitatea wadhifa wangu wa Useneta kwa sababu naomba niwe gavana wenu. Nitashikana na Oburu kumsaidia Kinara wetu afike Canaan,” alieleza mwanasiasa huyo mzoefu na kushikilia kuwa ni kupitia BBI ambapo Bw Odinga ana nafasi nzuri ya kuingia Ikulu 2022.

Dkt Oburu amekuwa akiendeleza kampeni za kichichini za Useneta kwani marufuku ya mikutano bado inaendelea nchini kutokana na janga la corona.Alihudumu kama Mbunge wa Bondo kwa miaka 19 (1994-2013), kisha akahudumu kama Mbunge Maalum kati ya 2013-2017 kabla kuteuliwa kama Mbunge wa Eala.

Atakuwa akijaribu bahati kwa mara ya pili katika kiti cha Useneta kupitia chama cha ODM, baada ya kumuachia Bw Orengo nafasi hiyo mnamo 2013.Japo mwaka huo alilenga useneta, Dkt Oginga alitupilia mbali azma yake kuepuka kivumbi kwenye kura za mchujo za ODM dhidi ya Bw Orengo., kisha akawania mchujo tata wa ugavana dhidi ya mfanyabiashara William Oduol.

Mchujo huo wa ugavana ulifutwa na ODM baada ya Dkt Oginga na Bw Oduol, wote kudai ushindi, kisha Cornel Rasanga akapokezwa tiketi ya moja kwa moja.

Katika juhudi zake za kutwaa ugavana, Bw Orengo naye anatarajiwa kutifua vumbi dhidi mbunge wa Alego Usonga Opiyo Wandayi, aliyekuwa Mbunge wa Rarieda Mhandisi Nicholas Gumbo kati ya wawaniaji wengine.

ODM yatisha kumng’oa Dkt Ruto

DICKENS WASONGA na CHARLES WASONGA

KWA mara nyingine viongozi ODM wamedokeza kuwa huenda wakadhamini hoja ya kumng’oa mamlakani Naibu Rais William Ruto wakisema uchunguzi unaoendeshwa dhidi ya afisi yake ni dhihirisho baadhi ya mambo yameshusha hadhi ya asasi ya urais.

Seneta wa Siaya James Orengo ndiye alitoa dokezo hilo Jumamosi aliposema chama hicho kinapanga kutumia njia za kikatiba kuadhibu Naibu Rais.

“Baada ya muda wa wiki mbili tutaanzisha mchakato wa kumwadhibu,” akasema Orengo katika eneobunge la Bondo, Kaunti ya Siaya wakati wa halfa ya mazishi ya Mhadhiri wa Chuo Kikuu cha Nairobi (UoN) Profesa Gilbert Ogutu.

Mazishi hayo pia yalihudhuriwa na kiongozi wa ODM Raila Odinga na kiongozi wa ANC Musalia Mudavadi.

Wanasiasa hao wa ODM pia waliendelea kumshinikiza Dkt Ruto aseme ‘ukweli’ kuhusu kifo cha Sajini Kipyegon Kenei ambaye alikuwa Mkuu wa Ulinzi Afisini mwake katika Jumba la Harambee House Annex, Nairobi.

Viongozi hao walikuwa; Dkt Gedion Ochanda (Bondo), Elisha Odhiambo (Gem), Opiyo Wandayi (Ugunja) Jacklyn Oduol (Mbunge Maalum), Mbunge Mwakilishi wa Wanawake wa Kaunti ya Siaya Dkt Christine Ombaka na Dkt Oburu Oginga wa Bunge la Afrika Mashariki (EALA).

Wengine walikwa ni Otiende Amolo (Rarieda) na magavana Peter Anyang’ Nyong’o (Kisumu) na mwenzake wa Siaya Cornel Rasanga.

Wanasiasa hao walimtaka Mkurugenzi wa Idara ya Upelelezi wa Jinai (DCI) George Kinoti kumchunguza Dkt Ruto, kutokana na sababu kwamba amekuwa akizungumzia uchunguzi huo hadharani na mitandaoni.

Kulingana na kipengee cha 150 (b) cha Katiba, Naibu Rais anaweza kuondolewa mamlakani akikiuka Katiba au sheria nyingine, ikiwa kuna sababu tosha za kuaminika kuwa ametenda uhalifu unaokiuka sheria za kitaifa na kimataifa, au kutokana na mienendo mibaya.

Hoja ya kumwondoa afisini Naibu Rais sharti iungwe mkono na angalau thuluthi mbili ya wajumbe katika bunge la kitaifa na lile la seneti.

Wakati huu Dkt Ruto anaungwa mkono na idadi kubwa ya wabunge na maseneta, ishara kwamba huenda ikawa vigumu kwa hoja ya kumwondoa mamlakani kupita.

Aidha, wadadisi wanasema kuwa Rais Uhuru Kenyatta hawezi kuruhusu hoja kama hiyo kuwasilishwa bungeni kwa sababu itachafua hewa ya kisiasa nchini na kuvuruga mchakato unaoendelea wa maridhiano (BBI).

“Nadhani Orengo na wenzake wanatoa vitisho tu. Wakati huu mandhari ya kisiasa sio faafu kwa hoja kama hiyo. Rais Kenyatta na Bw Odinga hawawezi kuikubali kwani itavuruga mpango wao wa BBI,” anasema Bw Martin Andati.

‘Punguza Mizigo’ yagawanya wanasiasa

Na WAANDISHI WETU

MSWADA wa kurekebisha katiba unaotarajiwa kuwasilishwa na Tume Huru ya Uchaguzi na Mipaka (IEBC) kwa mabunge ya kaunti, Jumapili ulizidi kuibua hisia mseto miongoni mwa viongozi wa kisiasa.

Hayo yamejiri huku Rais Uhuru Kenyatta, Naibu Rais William Ruto, Kiongozi wa ODM Raila Odinga miongoni mwa wengine wakisalia kimya kuhusu pendekezo hilo.

Wabunge, maseneta na madiwani katika maeneo mbalimbali wametofautiana, kwani baadhi yao wanaunga mkono mswada huo uliofadhiliwa na Chama cha Thirdway Alliance kinachoongozwa na Dkt Ekuru Aukot, lakini wengine wanapinga vikali.

Vigogo wa kisiasa katika Chama cha ODM walipuuzilia mbali mswada huo na kusema mchakato pekee wa marekebisho ya katiba ambao wanatambua ni ule unaoendeshwa na jopokazi la maridhiano (BBI).

Kwa upande mwingine, kuna mgawanyiko katika Chama cha Jubilee kwani imeibuka wandani kadhaa wa Naibu Rais William Ruto wanaunga mkono mswada huo, ilhali viongozi wengine chamani wanaupinga.

Viongozi wa ODM wakiwemo Wabunge Otiende Amolo wa Rarieda na Opiyo Wandayi wa Ugenya, pamoja na seneta wa Siaya James Orengo waliwataka wafuasi wao kupuuzilia mswada huo wa Dkt Aukot, na badala yake wasubiri pendekezo litakalotolewa na jopokazi la BBI lililobuniwa na Rais Uhuru Kenyatta na kinara wa ODM Raila Odinga, walipoweka mwafaka wa maelewano mwaka uliopita.

“Refarenda tunayotambua ni itakayoletwa na Rais Uhuru Kenyatta na Raila Odinga baada ya ripoti ya BBI. BBI ndiyo itatoa ripoti kuhusu uongozi wa nchi,” akasema Bw Orengo.

Wakiunga mkono pendekezo la Dkt Aukot, Kiongozi wa Wengi katika Seneti Kipchumba Murkomen na mbunge maalum David Ole Sankok walio wandani wa Dkt Ruto, walisema mapendekezo hayo yatamfaa mwananchi.

Kulingana na Bw Murkomen ambaye ni seneta wa Elgeyo Marakwet, huu ndio wakati wa madiwani kuonyesha mamlaka yao kwa kuupitisha mswada huo, akisema wamekuwa wakipuuzwa.

“Waupitishe ili kuwakumbusha watu kuwa ugatuzi una maana,” akasema seneta huyo.

Lakini Kiongozi wa wengi bungeni Aden Duale aliwaonya madiwani Kaunti ya Garissa kutopitisha mswada huo, akisema wataadhibiwa na wakazi wakiupitisha.

Bw Duale aliapa kuhakikisha mswada huo hautapita punde tu ukiwasilishwa katika mabunge ya kaunti.

“Tutazungumza na MCAs wa eneo pana la kaunti kame ili zisipitishe mswada wenyewe. Tutaupinga ili kuhakikisha haufikishi kaunti 24,” Bw Duale akasema.

Katika eneo la Kati, Wabunge Munene Wambugu kutoka Kirinyaga ya Kati, Gichimu Githinji wa Gichugu na Kabianga Wathayu wa Mwea nao walisema kuwa mswada huo hautawafaa Wakenya wa kawaida, wakisema unafaa kubadilishwa.

Viongozi hao walikuwa wakizungumza katika kanisa la Presbyterian katika Kaunti ya Kirinyaga, ambapo walisema mswada huo unafaa kupitishiwa kwa wananchi kwanza watoe maoni kuuhusu, kabla ya kufikishwa katika mabunge ya kaunti.

“Mswada huo ukiletwa bungeni jinsi ulivyo, mimi siutauunga mkono. Wakenya wanafaa kutoa maoni yao kwanza,” akasema Bw Wambugu.

Magavana John Lonyangapuo wa Pokot Magharibi na mbunge wa Kapenguria Samuel Moroto pia walimkosoa Dkt Aukot, pia walipuuzilia mbali mswada wake kuwa usio na maana yoyote.

Gavana Lonyangapuo alisema kuwa Dkt Aukot anasukuma mswada huo akiwa na lengo la kujinufaisha kisiasa, akidai kuwa kiongozi huyo wa Third Way Alliance analenga kuwa Gavana wa Turkana katika uchaguzi mkuu ujao.

“Tunajua kuwa analenga kuwa gavana hivyo aache kuwadanganya Wakenya,” akasema Prof Lonyangapuo.

Bw Moroto naye alisema kuwa japo kuna haja ya kufanya mabadiliko ya kikatiba, baadhi ya mapendekezo ya Dkt Aukot hayawezekani na kuwa kuna mengine ambayo hajajajumuisha.

“Tunaunga mkono mambo kama mawaziri kuteuliwa kutoka bungeni kwani viongozi wa kuchaguliwa ndio wanafahamu shida za wapiga kura, kinyume na wale wanaotolewa kutoka nje ya bunge,” akasema mbunge huyo.

Lakini mbunge huyo alipinga pendekezo la mswada huo la kupunguza idadi ya maeneobunge, akisema halifai.

Habari za George Munene, Oscar Kakai, Justus Ochieng, Rushdie Oudia Na Vitalis Kimutai

Msalimie Orengo yuko hapa, Raila amkumbusha Uhuru

Na CHARLES WASONGA

WAGENI mashuhuri waliohudhuria sherehe za Madaraka Dei Jumamosi katika Uwanja wa Michezo wa Narok walichangamshwa na hatua ya kiongozi wa ODM Raila Odinga kumkumbusha Rais Uhuru Kenyatta kumsalimia Seneta wa Siaya James Orengo.

Rais alikuwa amewasili uwanjani humo mwendo wa saa tano mchana na kuwasalimia watu mashuhuri waliokuwa wamefika, wakiwemo Naibu Rais William Ruto, kiongozi wa wengi katika bunge la kitaifa Aden Duale, Gavana wa Narok Samuel Tunai na kiongozi wa ANC Musalia Mudavadi.

Lakini kabla ya kiongozi wa taifa kuketi, Bw Odina alimgusa begani kumkumbusha kuwa alikuwa amesahau kumsalimia Bw Orengo ambaye alikuwa ameketi katika safu ya pili.

Kitendo hicho kiliibua kicheko kutoka kwa viongozi hao na wananchi ambao walikuwa wamehudhuria sherehe hizo.

Rais Kenyatta alirejea taratibu katika kiti chake.

Usalama waimarishwa

Wakati uo huo, usalama ulikuwa umeimarishwa zaidi mjini Narok huku vikosi mbalimbali vya walinda usalama wakishika doria.

Mwanamume mwenye umri wa miaka 22 alikamatwa asubuhi akijaribu kuingia katika uwanja huo kwa madai ya kuwa mfuasi wa kundi la kigaidi.

Adan Galhai maarufu kama, Urisha Galhai, alikamatwa kwa kujifanya kama afisa wa usalama.

“Alikuwa akijaribu kuingia katika uwanja wa michezo Ijumaa. Tulipomsaka, tuligundua kuwa alikuwa na vitambulisho viwili. Na tulipotaka kujua sababu ya yeye kuwa na vitambulisho hivyo akajaribu kutoroka na ndipo tukamkamata,” taarifa ya idara ya polisi ikasema.

Wanaotaka kuning’oa mamlakani wanaota mchana – Ruto

WAANDISHI WETU

NAIBU RAIS William Ruto, amewapuuzilia mbali wale wanaoendeleza mpango wa kumuondoa mamlakani akisema ataendelea kushikilia wadhifa wake hadi 2022.

Akiongea kwa mara ya kwanza tangu seneta wa Siaya James Orengo atangaze kuwa atawasilisha bungeni hoja ya kumng’oa mamlakani, Dkt Ruto alisema hakuna hoja kama hiyo inayoweza kumtisha.

“Wanakerwa kwamba Ruto yuko hapa na pale. Je, tuko na manaibu rais wawili nchini Kenya. Niko hapa, sasa shida iko wapi?” aliuliza alipoongoza shughuli ya kuchanga fedha za kusaidia kundi la akina mama katika uwanja wa michezo wa Hamisi, Kaunti ya Vihiga.

Alisema hayo huku Chama cha Orange Democratic Movement (ODM) kikisema hoja ya kumtoa uongozini kwa tuhuma za ufisadi ni ya dharura.

Katibu wa chama hicho Bw Edwin Sifuna alisema akiwa kaunti ya Kilifi kwamba, chama hicho kinafikiria njia kadhaa ambazo zitamuondoa Naibu Rais uongozini.

Bw Sifuna alisema kuwa chama cha ODM kitaendelea kuzungumza ukweli kuhusu ufisadi ambao umekithiri nchini bila kuogopa.

“Hatutaogopa mtu yeyote katika vita hivi dhidi ya ufisadi. Lazima kieleweke. Tutafichua ufisadi mchana na usiku na hata kama watatuua, tutakuwa tumesimama na hatutaogopa,” akasema Bw Sifuna.

Hata hivyo Bw Ruto alitaja mjadala huo kama mbinu za kulemaza ajenda ya serikali ya Jubilee.

Akionekana kumrejelea kiongozi wa ODM Raila Odinga, Dkt Ruto aliwaonya wapinzani wake dhidi ya kupanga njama ambazo zinalenga kuwanufaisha wao wenyewe akiwataka kuendeleza siasa zenye manufaa kwa Wakenya wote.

“Tunataka kuwaambia marafiki zetu kwamba tunataka kufanyakazi katika masuala ya maendeleo. Wasituletee mambo yasiyo na manufaa na yenye kuleta migawanyiko miongoni mwa Wakenya. Tunataka kuunganisha wananchi, tunataka kutekeleza Ajenda Nne Kuu za Maendeleo,” alisema.

Akiongea katika eneo bunge la Ugenya wikendi iliyopita, Bw Orengo alisema atawasilisha hoja ya kumuondoa mamlakani Dkt Ruto kwa kuhujumu vita dhidi ya ufisadi vinavyoendelezwa na serikali.

“Ikiwa Ruto amekataa kujiuzul, nitamuondoa kupitia kura ya hoja bungeni kwa kuzingatia kipengee cha 150 (1) (b) kinachotoa mwanya kwa naibu rais kuondolewa mamlakini kutumia mchakato wa kisiasa,” akasema Bw Orengo alipohutubia mkutano wa kampeni katika kijiji cha Sifuyo.

Kauli ya Seneta huyo wa Siaya ilichochea mjadala mkali wa kisiasa huku wandani wa Dkt Ruto wakidai nia yake ni kumwezesha Bw Odinga kuchukua wadhifa huo na hivyo kuzima ndoto ya naibu rais kuingia Ikulu 2022.

“Tunajua Orengo ni mtu wa mkono wa Odinga. Yeye, Raila, ndiye anataka Naibu Rais William Ruto aondolewe ili achukue kiti hicho kwa njia ya mkato.. lakini tunataka kumwambia kwamba Jubilee iko imara na mipango hiyo kamwe haitafaulu,” akasema mbunge wa Kiharu Ndindi Nyoro aliyewaongoza wenzake 15 kukashifu Bw Orengo.

“Tunataka kumwambia Raila kwamba njia ya kipekee ya kupata mamlaka ni kwa Raila na wenzake katika ODM kujiwasilisha kwa wananchi ili apigiwe kura. Sio kutumia Orengo kuwasilisha hoja ambayo haina mantiki yoyote kikatiba,” aliongeza.

Mpuuzeni Orengo kumpangia Ruto mabaya – Raila

Na JUSTUS WANGA

KIONGOZI wa chama cha ODM, Raila Odinga, hafurahishwi na mwandani wake seneta wa Siaya James Orengo, kufuatia matamshi yake ya hivi majuzi kwamba anapanga kuanza mchakato wa kumuondoa mamlakani Naibu Rais William Ruto.

Bw Odinga, anahisi kwamba matamshi hayo yanaweza kuathiri uhusiano baina yake na Rais Uhuru Kenyatta na inasemekana ameambia wabunge wa ODM kujitenga na matamshi ya Bw Orengo.

Bw Odinga, hasa ameghadhabishwa na matamshi ya Bw Orengo kuwa, yeye na Rais Kenyatta wako na mpango wa kisiri wa kisiasa, kufuatia muafaka wao wa Machi 9, 2018.

Siku moja tu baada ya Bw Orengo kutoboa kuhusu mpango huo, Bw Odinga alimtuma mwenyekiti wa ODM John Mbadi kufafanua ukweli wa mambo.

“Nataka kufafanua kwa uwazi na uhakika kuwa, ODM haijaunda muungano wowote na chama ama mtu yeyote. Maoni mengine yoyote ya kukinzana na haya yachukuliwe kuwa ya mtu binafsi,” Bw Mbadi alisema katika majengo ya bunge wiki mbili zilizopita.

Inasemekana Rais Kenyatta pia hakufurahishwa na matamshi ya seneta huyo, hasa aliposema kuwa alikutana naye kwa saa nne.

Matamshi hayo yalipandisha joto katika kambi ya Naibu Rais, ambapo wafuasi wake wanahisi ni Rais anayejaribu kumhujumu Dkt Ruto, kinyume na maelewano yao ya mbeleni kuwa angemuunga mkono baada ya kukamilisha muhula huu wa uongozi.

Ujumbe wa Bw Orengo umetoa fursa kwa Dkt Ruto na kambi yake kuendelea kukosoa muafaka baina ya Rais Kenyatta na Bw Odinga, wakisema ulilenga kuzuia Dkt Ruto kuingia ikulu.

Mahojiano na watu kadha ndani ya ODM yanaonyesha kuwa, kuna kuchanganyikiwa ndani ya chama hicho, wengine wakiamini kuwa Orengo alikuwa akizungumza kwa niaba ya Bw Odinga.

Mzozo huu ulianza mwaka jana ambapo kabla ya Rais Kenyatta kuzuru Nyanza, ilisemekana Orengo aliwaongoza viongozi wa eneo hilo kudai watu walioathiriwa wakati wa uchaguzi uliopita wafidiwe.

Bw Odinga alisemekana kutofurahishwa na wito huo, akisema haukuwa muda wa kujadili mambo hayo.

“Uhuru amekubali kufanya kazi nasi na mambo mengine kama haya yanaweza kusuluhishwa ndani kwa ndani si katika mikutano ya hadhara. Huu si wakati wa uanaharakati, tumejaribu hiyo njia na haikufanya kazi, kwanini tusijaribu mbinu nyingine,” mbunge ambaye hakutaka kutambulishwa alisema Bw Odinga alieleza viongozi wa eneo hilo Rais alipozuru huko.

Wandani wa karibu zaidi na Bw Odinga sasa wanamlaumu Bw Orengo kwa kuharibu mambo, baada ya Rais kukubali kushirikiana na upinzani.

Wabunge wa Nyanza sasa wameshauriwa kutojiunga na mrengo wa viongozi wanaomuunga Bw Orengo.

Baadhi ya viongozi wa ODM pia wamejitenga na matamshi ya Bw Orengo na wanaounga wito huo, wakisema hayafai kuhusishwa na chama.

Inasemekana kuwa Bw Odinga amemtaka Bw Orengo kumweleza sababu ya kusukuma ajenda ya kumng’atua Naibu Rais na atafaidika na nini.

JAMVI: Handisheki ilivyoibua ubabe wa kisiasa baina ya Orengo na Mbadi

NA CECIL ODONGO

MATAMSHI ya Seneta wa Siaya James Orengo ambaye pia ni mwandani wa kinara wa ODM Raila Odinga, kwamba chama hicho kiko tayari kuunda muungano na kile cha Jubilee kabla ya uchaguzi wa mwaka wa 2022, yamezua vita vya ubabe kati yake na Mwenyekiti wa chama John Mbadi.

Seneta huyo akizungumza wakati wa kipindi cha Point Blank katika runinga ya KTN, alidai ushirikiano kati ya Rais Uhuru Kenyatta na Bw Odinga unalenga kuimarisha uwezo wa kiongozi huyo wa ODM kuingia ikulu kwenye uchaguzi mkuu wa 2022.

“ODM inaendea mamlaka ya kisiasa na tunaandaa mikutano hii macho yetu yakilenga uchaguzi wa 2022. Mamlaka haya yatakuja kutokana na ushirikiano kutoka ODM na chama cha Jubilee ambacho Rais Kenyatta anahusika pakubwa,” akasema Bw Orengo.

Hata hivyo, Bw Mbadi alikuwa wa kwanza kujitokeza kupinga madai ya Bw Orengo akisema chama hicho kitawasilisha mwaniaji wa urais kivyake 2022 na hakina ufahamu wowote wa kuwepo kwa mkataba fiche kati ya Rais Kenyatta na Bw Odinga.

“Ni mapema sana kwa mtu yeyote kudai anazungumza kwa niaba ya ODM na kudai chama kimeingia makubaliano na chama kingine au mtu binafsi. Chama kitakuwa na mwaniaji uchaguzi mkuu ujao ila bado hatujui wapinzani wetu wala miungano itakayoundwa,” Bw Mbadi akamjibu seneta huyo.

Hata hivyo, imebainika kwamba kiini cha uhasama kati ya Bw Orengo ambaye ni Kiongozi wa wachache kwenye Bunge la Seneti na Bw Mbadi ambaye anashikilia wadhifa huo katika Bunge la Kitaifa ni uwaniaji wa viti vya Ugavana vya Kaunti za Siaya na Homa Bay mtawalia.

Bw Mbadi ambaye amehudumu kama mbunge wa Suba Kusini tangu 2007, ametangaza hadharani kuwa yupo kwenye kiny’ang’anyiro cha kutwaa ugavana wa Homa Bay baada ya muda wa kuhudumu wa gavana wa sasa Cyprian Awiti kukamilika.

Ingawa, Bw Orengo hajatangaza waziwazi kuwa atakuwa debeni kumrithi Gavana wa sasa Cornel Rasanga Amoth, kumeibuka madai kwamba viongozi hao wawili wanapanga kubadilishana viti katika kaunti hiyo. Vilevile kumeibuka madai Bw Mbadi anampigia upatu Mbunge wa zamani wa Rarieda Nichols Gumbo kutwaa ugavana wa Siaya, jambo ambalo halifurahishi kambi ya Bw Orengo.

Ingawa hivyo, Bw Mbadi ameonekana kuingiwa na baridi kwenye azma yake baada ya aliyekuwa mwaniaji wa ugavana wa Homabay Joseph Oyugi Magwanga kuonyesha dalili za kurejea chamani baada ya kukihama na kusimama kama mwaniaji huru mwaka wa 2017.

Uvumi kuwa Bw Magwanga aliyedai kupokonywa ushindi wa kiti hicho yupo pua na mdomo kurejea ODM ulishamiri mwezi Februari alipojitokeza katika Uwanja wa Jomo Kenyatta mjini Kisumu kuungana na familia ya Bw Odinga katika hafla ya ukumbusho wa miaka 25 tangu kifo cha babake waziri huyo mkuu wa zamani marehemu Jaramogi Oginga Odinga.

Bw Magwanga vilevile anasifiwa kutokana na rekodi ya kupigiwa mfano ya maendeleo alipohudumu kama mbunge wa Kasipul na hilo lilidhihirika aliposhindwa pembamba na Bw Awiti kwa kura chache katika uchaguzi wa mwaka 2017.

Hata hivyo, akizungumza na meza ya Jamvi , Bw Mbadi alikanusha kwamba uhusiano kati yake na Bw Orengo umeingia doa, akisisitiza kurejea kwa Bw Magwanga chamani hakumtishi kamwe.

“Vyombo vilifasiri visivyo usemi wangu kuhusu kauli niliyotoa kukanusha madai ya Seneta Orengo kwamba chama chetu kimeingia mkataba na Jubilee kuhusu uchaguzi wa mwaka wa 2022. Kama mwenyekiti na msemaji wa ODM, nilikuwa natoa msimamo wa chama na sina chuki na Bw Orengo kuhusu hilo, sisi ni marafiki sana,”

“Hata hivyo, kurejea kwa Bw Magwanga chamani hakunitishi kwa sababu ni haki yake ya kidemokrasia kusimama. Ukichunguza kwa makini, mimi ndiyo nimekuwa nikimrai Bw Magwanga arejee chamani na kama mwanasiasa wa miaka mingi niko tayari kukutana naye debeni. Mimi si mwoga na niko tayari kukabiliana naye akirudi chamani,” akasema Bw Mbadi.

Mbunge huyo wa Suba Kusini hata hivyo, alikanusha kuwa analenga kumhujumu marejeo ya Bw Magwanga kwenye chama hicho na kutumia nafasi yake ya uenyekiti kujivumisha kama mwaniaji anayeungwa mkono na Bw Odinga.

“Ndiyo najua kwamba kutwaa tiketi ya ODM ni kama kushinda uchaguzi eneo la Luo Nyanza lakini siogopi kushindana na mtu yeyote hata awe ni Bw Magwanga. Pia kumbuka Gavana wa Migori Okoth Obado alishinda kiti hicho mwaka wa 2013 bila kutumia ODM. Mimi niko uwanjani na nitapigania kiti hicho kama wengine,” akaongeza Bw Mbadi.

Kuonyesha kwa hali si hali ODM, Bw Orengo amekuwa akiongoza kampeni za kumpigia debe mwaniaji wa ODM kwenye uchaguzi mdogo wa eneobunge la Ugenya huku Bw Mbadi, anayeshikilia wadhifa muhimu chamani akihepa kampeni hiyo.

Hata hivyo, mchanganuzi wa masuala ya kisiasa Martin Andati anampuuza Bw Mbadi kama mwanasiasa anayemlenga Bw Orengo ili kujiinua kisiasa baada ya kugundua kwamba ana nafasi finyu ya kushinda kiti cha ugavana, Bw Magwanga akiwania.

Bw Andati anasema Bw Orengo ambaye pia ni wakili wa miaka mingi wa familia ya Bw Odinga, anajua anachokisema kwa sababu Rais Kenyatta au Bw Odinga hawajajitokeza kupinga kauli aliyoitoa kuhusu siri ya kushirikiana kwao.

“Ikiwa Bw Mbadi anataka kuchimba kaburi lake la kisiasa basi adhubutu kuonyeshana ubabe na Bw Orengo anayeaminiwa zaidi na kinara huyo wa ODM. Hafai kabisa kuhusisha wakili huyo na siasa za Homa Bay japo ukweli ni kwamba Bw Magwanga alimtoa gavana wa sasa kijasho wakati wa uchaguzi na kortini na ni wazi akirejea ODM basi Bw Mbadi huenda asitimize ndoto yake ya kuwa gavana,” akasema Bw Andati.

Mchanganuzi huyo hata hivyo, anadai Bw Orengo ndiye msema kweli kuhusu makubaliano kati ya Rais Kenyatta na Bw Odinga ikizingatiwa kwamba anawafahamu wawili hao na yupo karibu nao kuliko Bw Mbadi.

Hata hivyo, mhadhiri wa Chuo Kikuu cha Maseno, Dkt Tom Mboya anadai Rais Uhuru na Bw Odinga ndio wanaoweza kuelezea kilichoko kwenye makubaliano yao badala ya viongozi hao wawili wa ODM kutofautiana kuhusu mambo wasiyoyajua.

“Ukweli ulioko kwenye ‘handsheki’ ni Bw Odinga na Rais Uhuru wanaoweza kuelezea. Ingawa Bw Mbadi na Seneta Orengo wanatofautiana, hakuna kati yao anayeweza kusema anafahamu chochote kuhusu ushirikiano huo,” akasema Dkt Mboya.

Mbadi atofautiana na Orengo

Na CHARLES WASONGA

MWENYEKITI wa ODM John Mbadi amepuuzilia madai ya Seneta wa Siaya James Orengo kwamba kiongozi wa chama hicho Raila Odinga na Rais Uhuru Kenyatta wamekubaliana kushirikiana katika uchaguzi mkuu wa 2022.

Mbadi ambaye ni Mbunge wa Suba Kusini, amesema chama hicho hakitajiunga na muungano wowote wa kisiasa, akisema madai ya Orengo ni ya kibinafsi na hayawakilishi msimamo rasmi wa chama.

“Ningependa ieleweke kuwa ODM haibuni muungano na chama au mtu yeyote. Msimamo wowote unaokinzana na huu unafaa kuchukuliwa kama wa kibinafsi,” akasema Mbadi.

Akiongea na wanahabari afisini mwake katika majengo ya bunge Alhamisi, Bw Mbadi alisema muafaka kati ya Rais Kenyatta na Bw Odinga uliotiwa saini Machi 2018 haukuhusu masuala ya siasa na uchaguzi mkuu wa 2022.

“Kwa hivyo, ni makosa kwa mtu kudai kuwa tumebuni mwafaka wa kisiasa na mtu yeyote. Labda haya ni matamanio ya Bw Orengo ambayo sio mbaya lakini hafai kuwakanya wafuasi wetu na Wakenya kwa jumla kwamba ni msimamo wa chama chetu,” Bw Mbadi akasema.

Mbunge huyo ambaye ni kiongozi wa wachache katika bunge la kitaifa alisema msimamo wa ODM ni kwamba huu sio wakati wa kuchapa siasa za 2022 na msimamo huo haujabadilika.

“Kama chama tumekuwa tukiwaonya wanachama wetu dhidi ya kuanza kampeni za mapema za uchaguzi mkuu wa 2022 na kamwe hatujabadili msimamo huo,” akasema Bw Mbadi.

Urais

Mnamo Jumatatu, akihojiwa katika runinga ya KTN, Bw Orengo alisema ODM inafanya kazi kichinichini na Rais Kenyatta kwa lengo la kumwezesha Bw Odinga kutwaa urais mnamo 2022.

“ODM inalenga mamlaka ya kisiasa; na tunafanya mikutano kama hii. Macho yetu yanaelekezwa katika uchaguzi mkuu wa 2022. Ung’ang’aniaji huu wa mamlaka utaendelezwa na muungano katika ya ODM kwa upande mmoja na Jubilee kwa upande mwingine na Uhuru Kenyatta anachangia mchakato wa kuundwa kwa muungano huu,” Bw Orengo akasema.

Seneta huyo ambaye ni kiongozi wa wachache katika Seneti pia alisema kuwa amefanya mkutano wa faragha na Rais Kenyatta kwa saa nne ambapo alimshawishi kuwa ataunga mkono azma ya Odinga kuingia Ikulu mwaka 2022.

Caroline Mwatha aliuawa na polisi – Orengo

NA CAROLINE MUNDU

VIONGOZI katika Kaunti ya Siaya, wamepuuzilia mbali ripoti ya uchunguzi wa polisi iliyoonyesha mwanaharakati Caroline Mwatha aliaga dunia kupitia uavyaji mimba.

Wanasiasa hao pamoja na familia ya marehemu, sasa wanataka uchunguzi wa kina kufanywa ili kutegua kitendawaili cha kilichomuua mwanaharakati huyo, aliyefahamika sana mtaani Dandora kwa kuwatetea raia.

Wakiongozwa na Seneta James Orengo, Mbunge Mwakilishi wa Wanawake, Dkt Christine Ombaka, Mbunge wa Rarieda, Otiende Amollo na mwenzake wa Gem, Elisha Odhiambo, viongozi hao walikemea matokeo ya uchunguzi wa polisi wakati wa mazishi ya mwanaharakati huyo katika kijiji cha Asembo, eneobunge la Rarieda, Kaunti ya Siaya.

Bw Orengo alisikitika kwamba mauaji ya kiholela ya wanaharakati na kupotea kwa watu kwa njia tatanishi yanaendelea kuongezeka kwa kiwango cha kutisha nchini, huku polisi wanaohusika wakisalia huru bila kuchukuliwa hatua.

“Tunataka majibu kuhusu kifo cha Bi Mwatha. Hatujaridhishwa na uchunguzi uliofanywa na polisi kuhusu kifo cha mwanamke huyu. Tabia ya polisi kuwatekea wanaharakati kisha kuwaua kwa njia tatanishi lazima ikome,” akasema Seneta Orengo.

“Hatujasahau jinsi marehemu Musando alivyouawa kinyama. Tunawaambia polisi kuchunguza visa hivi kwa makini kabla hawajazungumza kuvihusu,” akasema.

Matamshi ya seneta huyo yaliungwa mkono na Bw Odhiambo, ambaye aliwataka polisi kufuata sheria badala ya kutoa ripoti aliyosema inaficha ukweli kuhusu mauaji ya Bi Mwatha.

“Walioshiriki mauaji ya msichana huyo lazima waadhibiwe kisheria, na ikiwa ni polisi waliohusika, nawalaani kabisa. Lazima tuheshimu uhai wa binadamu wenzetu,” akasema Bw Odhiambo.

Mumewe marehemu, Joshua Ochieng’ ambaye alizidiwa na hisia wakati wa ibada ya mazishi, alimtaja mkewe kama shujaa atakayekumbukwa na wengi.

“Nimempoteza rafiki na mke. Alikuwa shujaa atakayekumbukwa sana,” akasema Bw Ochieng’ akidondokwa na machozi.

Stanslaus Mbai, babake Bi Mwatha alisema mwanawe hakuwa mjamzito na kudai kwamba alikatwa tumboni kisha kijusi kikawekwa ndani.

Raila atakuwa debeni 2022 – Orengo

Na SHABAN MAKOKHA

KIONGOZI wa ODM, Bw Raila Odinga, anajiandaa kuwania tena urais mwaka 2022, washirika wake wa kisiasa wamefichua.

Wandani watatu wakuu wa Bw Odinga akiwemo Seneta wa Siaya James Orengo, walisema hakuna sheria yoyote inayomzuia Bw Odinga kuwania urais na hivyo, ana kila nia ya kushiriki kinyanganyiro kijacho cha kuwania urais.

Tangu Bw Odinga alipoweka makubaliano na Rais Uhuru Kenyatta, amekuwa akiepuka kuzungumzia maazimio yake ya kuongoza taifa hili na badala yake kusisitiza kwamba lengo lake kuu ni kuleta umoja wa taifa.

Amekuwa pia akisuta wanasiasa wanaojipigia debe kwa uchaguzi huo wa kumrithi Rais Kenyatta, hali ambayo iliacha wafuasi wake wengi kujiuliza kama ameamua kustaafu baada ya kujaribu kuwa rais mara nne na kushindwa, wakati mwingine katika hali tatanishi.

Kulingana na Bw Orengo, kwa sasa waziri huyo mkuu wa zamani ameweka mawazo yake katika juhudi za kupatanisha taifa lakini juhudi hizo ni miongoni mwa mikakati ambayo itamwezesha kufanikisha maazimio yake.

“Kabla wana wa Israeli kufika Kanani, iliwabidi wapitie Sinai kupokea Amri Kumi ambazo zingewaongoza na hilo ndilo tunajaribu kufanikisha. Lazima tuwe na mwongozo wa kimsingi ndipo Kenya izidi kuwa na amani na ipate heshima ulimwenguni kite. Tunataka nchi ambapo viongozi watakuwa wakiadhibiwa wanapokosea,” akasema Bw Orengo.

Alikuwa akizungumza katika Shule ya Upili ya Imbale, iliyo Kaunti Ndogo ya Ikolomani wakati wa mazishi ya Bi Bilha Akatsa ambaye ni mama mkwe wa Mbunge wa zamani wa Gem, Bw Joe Donde.

Chama cha ODM kina viongozi wengine wanaomezea mate tikiti ya kuwania urais 2022 wakiwemo Gavana wa Mombasa Hassan Joho na mwenzake wa Kakamega, Bw Wycliffe Oparanya na inasubiriwa kuonekana kama wataingia naye kwenye mchujo wakati huo utakapofika.

Zaidi ya hayo, vinara wenza katika Muungano wa NASA ambao ni Kiongozi wa Wiper Bw Kalonzo Musyoka, mwenzake wa Amani National Congress (ANC) Musalia Mudavadi na Seneta wa Bungoma Moses Wetang’ula (Ford-Kenya) wamekuwa wakimtaka Bw Odinga kumuunga mkono mmoja wao ifikapo 2022.

Akizungumzia suala hilo, Mbunge katika Bunge la Afrika Mashariki, Bw Oburu Oginga, alisema Bw Odinga, ambaye ni kakake mdogo, hajakamilisha malengo yake kwa taifa hili.

“Watu wa ODM wasimame imara na waache kupayukapayuka kwa sababu Raila bado yuko,” akasema.

Msimamo huu uliungwa mkono na Gavana wa Siaya, Bw Cornel Rasanga, ambaye aliongeza kuwa Bw Odinga hajastaafu kutoka kwa siasa na hatachoka hadi Kenya itakapopata uongozi bora unaojali masilahi ya wananchi.

Kulingana na viongozi hao, ODM inaendelea kufanyiwa mageuzi ambayo yataimarisha uwezo wake zaidi na vilevile, kuna juhudi za kumfanya Bw Odinga kuwa na sura mpya kabla uchaguzi ufanywe.

Katika chaguzi zilizopita, wapinzani wa ODM walitangaza chama hicho kama kinachopenda fujo huku Bw Odinga akikashifiwa kuwa kiongozi asiyependa maendeleo na mwenye uwezo wa kugawanya nchi kikabila.

Lakini tangu alipoanza kushirikiana na Rais Kenyatta, kiongozi huyo wa upinzani ameanza kuonyesha mwelekeo mpya wa kisiasa ambao umemzolea sifa hata katika maeneo ambako ilikuwa vigumu kwake kupenya kufanya kampeni katika miaka iliyotangulia.

Wandani wa Raila wamshauri ajitose debeni 2022

ELISHA OTIENO na RUSHDIE OUDIA

WANDANI wa kisiasa wa Kinara wa upinzani Raila Odinga jana wasisitiza kwamba waziri huyo mkuu wa zamani hatastaafu kutoka jukwaa la kisiasa hivi karibuni bali atakuwa debeni katika uchaguzi wa 2022.

Wakiongozwa na Kiongozi wa wachache kwenye bunge la seneti James Orengo, viongozi hao walisema liwe liwalo lazima Bw Odinga awe debeni mwaka huo.

Wakizungumza katika kijiji cha Piny Oyie, eneobunge la Suna Magharibi katika kaunti ya Migori wakati wa hafla ya makaribisho ya nyumbani ya Mwakilishi wa kike wa kaunti Bi Pamela Odhiambo ambayo ilihudhuriwa na Bw Odinga mwenyewe, walisema kwamba kigogo huyo wa siasa za upinzani yuko tayari kuonana kiume na wawaniaji wengine.

Naibu Rais William Ruto anaongoza orodha ya wawaniaji wengine wanaokimezea mate kiti cha urais.

Jumamosi, Bw Orengo alianzisha mjadala huo wa uchaguzi wa 2022 ingawa katika mazishi ya mwanasiasa Kenneth Matiba Rais Kenyatta na Bw Odinga waliwaonya wanasiasa dhidi ya kuanzisha kampeni za mapema na badala yake wahudumie Wakenya.

Aliposimama kuzungumza, Bw Odinga hakugusia suala hilo na badala yake akatetea maridhiano kati yake na Rais akisema siasa wakati mwingine huhitaji ubunifu na tajriba.

“Mimi ni mwanasiasa mwenye ujuzi anayeipenda nchi hii. Hatungeendelea kusambaratisha nchi ndiposa tuliamua kushirikiana,” akasema Bw Odinga.

Aliwataka wanaouliza kwa nini aliamua kushirikiana na hasimu wake wa kisiasa kubadilisha mtazamo na kujiuliza ni matunda yapi yalitokana na maafikiano hayo.

Aidha Bw Odinga aliwaonya waliofuja fedha za wananchi na kuendelea kuzitoa kama michango katika hafla ya Harambee kwamba watajipata pabaya hivi karibuni.

Viongozi wengine walioandamana na Bw Odinga walionyesha utiifu wao kwake na kumtaka asibabaike katika juhudi zake za kutetea wananchi.

Orengo aanza kazi huku Wetang’ula akilia

Na VALENTINE OBARA

SENETA wa Siaya, Bw James Orengo, Jumatano ameanza kuchapa kazi kwenye afisi ya kiongozi wa wachache katika seneti huku Seneta wa Bungoma, Bw Moses Wetang’ula, ambaye ni mtangulizi wake akizidi kulalamikia jinsi alivyong’olewa kutoka kwa wadhifa huo.

Bw Orengo alichaguliwa na maseneta wa upinzani katika wadhifa huo baada ya madai kuwa Bw Wetang’ula hakuwa akiwahudumia ipasavyo.

Mwandani huyo wa Kiongozi wa Chama cha ODM, Bw Raila Odinga, amekuwa akikutana na mabalozi mbalimbali afisini mwake.

Mnamo Jumanne, alikutana na Balozi wa Uingereza, Bw Nic Hailey, na jana akakutana na Naibu Balozi wa Australia, Bw Jonathan Ball.

“Tulijadiliana kuhusu hatua za kiuchumi na kisiasa, na umuhimu wa kudumisha uwiano,” akasema Bw Orengo.

Kwa kawaida mabalozi hukutana na viongozi mbalimbali wa bunge la taifa na wale wa seneti kwani asasi hizo mbili ndizo hutegemewa kupitisha sera na sheria ambazo hutoa mwongozo kuhusu jinsi taifa linavyoendeshwa.

Kufuatia ushirikiano wa Rais Uhuru Kenyatta na Bw Odinga, mabunge hayo yatategemewa zaidi kupitisha sheria ambazo zitawezesha utekelezaji wa makubaliano yatakayofanywa na viongozi hao wawili kuhusu masuala tofauti yanayogusia uongozi na utendaji wa haki kwa wananchi.

 

Amponda Raila

Ingawa Bw Wetang’ula alisema hana haja tena na wadhifa huo wa kiongozi wa wachache, Jumatano alizidi kumshambulia Bw Odinga kwa madai kuwa ndiye alichochea maseneta kumtimua.

Alimtaka kinara huyo mwenzake wa NASA aondoke katika muungano ili ubaki chini yake na vinara wengine ambao ni Kiongozi wa Wiper, Bw Kalonzo Musyoka, na Bw Musalia Mudavadi anayeongoza Chama cha Amani National Congress (ANC).

“Ulifanya uamuzi wako ukasonga mbele na vuguvugu la NRM, kwani inafahamika huwa unabadilisha vyama katika kila uchaguzi,” akasema, kwenye mtandao wa Twitter.

Taarifa ya kwanza iliyotolewa na Bw Orengo kwa niaba ya maseneta wenzake ilitoa wito wa umoja na ushirikiano kutoka kwa seneta huyo wa Bungoma.

“Huu ni wakati wa siasa za maendeleo na ni lazima tuwe katika safari hii kwa pamoja kama taifa moja la Kenya,” akasema Bw Orengo.

Alitoa wito kwa viongozi waeke ubinafsi kando ili kupigania malengo ya kuleta haki uchaguzini, kulinda ugatuzi, mamlaka ya mahakama na sheria, kuleta usawa kitaifa, kupambana na ufisadi, kudumisha haki za binadamu na uongozi bora.

Orengo ataka Raila asitishe muafaka na Uhuru

Na JUSTUS WANGA

CHAMA cha ODM sasa kinamtaka kiongozi wake Raila Odinga kusitisha ushirikiano wake na Rais Uhuru Kenyatta kutokana na masaibu yanayomkumba mwanaharakati Miguna Miguna.

Wakiongozwa na wakili James Orengo na Katibu Mkuu wa chama hicho, Edwin Sifuna, viongozi hao wa chama walisema Rais amekataa kutekeleza mageuzi waliyoafikiana katika muafaka huo kwa kuendeleza maovu kadha kama ukiukaji wa amri za mahakama na kuhangaishwa kwa Miguna.

“Kwa vile serikali ya Uhuru imekataa kuzingatia utawala wa sheria, hamna haja kwa Bw Odinga kuendelea kushirikiana naye,” Bw Orengo aliambia “Taifa Jumapili.”

Kuhangaishwa, na hatimaye kufukuzwa kwa Miguna, alisema, kunaashiria kuwa muafaka huu haukuwa na maana yoyote.

“Uhuru ndiye anawajibika kwa yale yanayoshuhudiwa nchini. Ushirikiano wowote naye hautakuwa na maana yoyote ikiwa maafisa wake wataendelea kupuuza maagizo ya mahakama.

Maafisa hao wanaabisha idara ya mahakama chini ya maagizo yake. Alionya idara ya mahakama ilipobatilisha ushindi wake na matokeo ya onyo hilo sasa yanaonekana na Wakenya wote,” Orengo ambaye ni Seneta wa Siaya alisema.

Akiunga mkono kauli ya Orengo, Bw Sifuna aliwataka Wakenya wa matabaka yote kujitokeza kutetea uhuru wa Idara ya Mahakama, utawala wa sheria na uzingatiaji wa maagizo ya mahakama.

“Kwa hivyo, ODM inatoa wito kwa Wakenya wenye nia njema, mawakili, mashirika ya kijamii na makanisa kujitokeza wiki ijayo na kuwakamata maafisa wakuu wa serikali waliokaidi amri ya mahakama,” akasema.

Bw Sifuna alikuwa akirejelea Waziri wa Usalama Fred Matiang’i, Inspekta Jenerali wa Polisi Joseph Boinnet na Katibu wa Wizara anayesimamia Idara ya Uhamiaji Gordon Kihalangwa ambao walikataa kufika mahakamani kufafanua sababu za wao kutomruhusu Wakili Miguna kuingia nchini.

Bw Odinga amekashifiwa na wafuasi wake ambao wanahisi alikosea kwa kubuni ushirikiano na Rais Kenyatta.

Wafuasi hao waliotuma jumbe kupitia mitandao ya kijamii wanahisi kuwa Bw Odinga anafaa kuendelea kuikosoa serikali kama zamani wakisema, Rais Kenyatta hajajitolea kutekeleza yale waliyokubaliana Machi 9.

Kauli ya Orengo na Sifuna inajiri wakati ambapo Bw Odinga ametengwa na vinara wenzake katika NASA; Kalonzo Musyoka, Musalia Mudavadi na Moses Wetang’ula waliokerwa kwa kuachwa nje katika muafaka huo.

 

UKINZANI
Hata hivyo, baadhi ya wandani wa Bw Odinga wanatofautiana na kauli ya Orengo na Sifuna wakimtaka kuendelea kushirikiana na Rais Kenyatta.

“Nadhanii Bw Orengo anapaswa kulaumu mahakama kwa kushindwa kuhakikisha kuwa maagizo yake yanatekelezwa. Suala hilo halina uhusiano wowote na muafaka kati ya Rais na Bw Odinga,” akasema Mbunge mmoja ambaye ni mwandani wa Odinga.

“Malalamishi hayo hayana msingi wowote… wanafaa kufahamu kuwa masaibu ambayo Miguna anapitia ni ya kujitakia.

Hayana uhusiano wowote na muafaka kati ya viongozi hao wawili ambao ulilenga kutuliza joto la kisiasa nchini kwa ajili ya maendeleo,” akasema Mbunge huyo kutoka Nyanza Kusini anayehudumu kipindi cha pili.

Naye Kiongozi wa Wachache katika Bunge la Kitaifa, John Mbadi vile vile ameanza kushuku ukweli uliopo katika ushirikiano kati ya Rais Kenyatta na Bw Odinga akisema huenda utulivu ulioshuhudiwa nchini tangu wawili hao waliposalimiana ukayeyuka.

“Kudhalilishwa kwa Miguna katika uwanja wa ndege wa JKIA na kufurushwa kwake kwa mara ya pili kunaibua wasiwasi kuhusu uhalali wa muafaka huu,” akasema mbunge huyo wa Suba Kusini.

Naye Mbunge Maalumu wa ANC Godfrey Osotsi alisema taarifa ya pamoja iliyotiwa saini na Rais Kenyatta na Bw Odinga na kusomwa nje ya jumba la Harambee, ilisisitiza uzingatiaji wa utawala wa sheria ambayo sasa serikali inakiuka.

“Kupitia salamu hizo, kiongozi wetu Raila Odinga alijitolea kupalilia amani na uthabiti nchini lakini sasa ni wazi kuwa serikali ya Kenyatta ilikuwa ikituhadaa,” akasema mbunge huyo.

 

Orengo ataka Miguna aundiwe pasi maalum ya usafiri apelekewe Dubai

Wakili na Seneta wa Siaya James Orengo. Picha/ Maktaba

Na RICHARD MUNGUTI

MAHAKAMA kuu iliaombwa Alhamisi iamuru Idara ya Uhamiaji itengeneze pasi ya kusafiria ya wakili Miguna Miguna apelekewe Dubai na mawakili Nelson Havi na Aulo Soweto.

Wakili James Orengo ambaye ni mmoja wa mawakili 14 wanaomtetea Miguna aliyedungwa dawa ya kumfanya apoteze fahamu aliambia mahakama sheria inamruhusu mkurugenzi wa idara ya uhamiaji kumtayarishia  mlalamishi cheti maalum cha kusafiria.

“Naomba hii mahakama imwamuru mkurugenzi wa idara ya uhamiaji Bw Gordon Kihalangwa amtengenezee Miguna pasi ya kusafiria kama alivyoamriwa apelekewe Dubai na mawakili Havi na Soweto,” Jaji George Odunga aliombwa na Seneta Orengo.

Jaji Odunga alimweleza wakili huyo mwenye tajriba ya juu kwamba Jaji Enoch Mwita aliamuru Bw Kihalangwa amtayarishie pasi maalum ya kusafiria kutoka Canada.

Pasi ya Kenya aliyokuwa amepewa Miguna ilitwaliwa na Serikali na kufutiliwa mbali.