Odera akanusha anataka kutoroka Simbas kujiunga na Shujaa

Na GEOFFREY ANENE

KOCHA wa timu ya Kenya ya raga ya wachezaji 15 kila upande Paul Odera amepuuzilia mbali madai kuwa anamezea mate wadhifa wa kocha mkuu wa timu ya Kenya ya raga ya wachezaji saba kila upande almaarufu Shujaa.

Katika mahojiano Alhamisi, kocha huyo mwenye umri wa miaka 45 ameambia Taifa Leo: “Kuna uvumi mwingi tu unaenezwa. Mimi sikutuma ombi la kuwa kocha mkuu wa timu ya Shujaa.”

Odera, ambaye ni mwalimu wa shule ya Peponi House Preparatory jijini Nairobi, amesema kuwa lengo lake ni kuongoza Simbas katika kampeni za kufika Kombe la Dunia 2023.

“Lengo langu ni Kombe la Dunia 2023 la raga ya wachezaji 15 kila upande nchini Ufaransa,” anasema kocha huyo aliyeongoza timu ya chipukizi ya Kenya almaarufu Chipu mwaka 2019 kupiga miamba Namibia kwa mara ya kwanza tangu mwaka 2005 na kuingia Kombe la Dunia la daraja ya pili la makinda (JWRT) lililofanyika nchini Brazil.

Alipoulizwa kuthibitisha habari zinazosambaa kuwa Odera yuko mstari wa mbele kutwikwa majukumu ya Shujaa, Mwenyekiti wa Shirikisho la Raga Kenya (KRU) Oduor Gangla amesema “sina habari kuhusu hilo.”

Wadhifa wa kocha mkuu wa Shujaa uliachwa wazi baada ya raia wa New Zealand Paul Feeney kuondoka Juni 12.

Feeney alisaidiwa na kocha wa klabu ya Mwamba, Kevin ‘Bling’ Wambua ambaye huenda akatwikwa majukumu hayo baada ya Wakenya Benjamin Ayimba, Felix Ochieng’, Innocent Simiyu, Mitch Ocholla na Paul Murunga kuwa kileleni miaka ya hivi karibuni.

KRU inatafuta kocha Mkenya kuongoza Shujaa kwa mashindao ya kifahari ya Raga ya Dunia pamoja na mashindano mengine ya kimataifa.

Kazi hii inahitaji kocha kujukumika wakati wote. Inamaanisha kuwa Odera atalazimika kuacha ualimu kwa muda atakaoongoza Shujaa.

Odera alicheza raga kati ya mwaka 1986 na 2005 alipostaafu uchezaji baada ya kupata jeraha mbaya la shingo. Mchezaji huyo wa zamani wa klabu za Barclays Bank na Kenya Harlequin alianza kazi ya ukocha mwaka 1994 akiwa mchezaji kabla ya kuzamia shughuli hiyo kabisa alipostaafu kucheza.

Wambua, Odera mstari wa mbele kupokezwa mikoba Shujaa

Na CHRIS ADUNGO

KEVIN Wambua na Paul Odera ni miongoni mwa wakufunzi wanaopigiwa upatu wa kupokezwa mikoba ya timu ya taifa ya raga ya wachezaji saba kila upande, Shujaa.

Shirikisho la Raga la Kenya (KRU) limesema linaelekea kukamilisha mchakato wa kutafuta kocha mpya wa Shujaa kwa minajili ya duru zilizosalia za raga ya dunia msimu huu.

KRU ilikatiza uhusiano na mkufunzi Paul Feeney aliyevunja rasmi ndoa kati yake na shirikisho hilo mwishoni mwa Aprili 2020 na kurejea kwao New Zealand baada ya kuongoza Shujaa kutia kibindoni ubingwa wa Raga ya Afrika.

Ushindi huo uliwakatia Shujaa tiketi ya kufuzu kushiriki makala ya 32 ya Michezo ya Olimpiki yatakayoandaliwa jijini Tokyo, Japan mnamo 2021 baada ya kuahirishwa kwa kipindi cha mwaka mmoja zaidi kutokana na janga la corona.

Feeney aliyewahi kudhibiti mikoba ya timu ya taifa ya Fiji mnamo 2015, pia aliiongoza Kenya Morans kutinga fainali ya Tusker Safari Sevens mnamo 2019 japo alishindwa kuongoza Shujaa kukamilisha duru za Raga ya Dunia zilizositishwa kwa sababu ya ugonjwa wa Covid-19.

Shujaa wanatazamiwa kurejea ulingoni kunogesha duru nne za mwisho za Raga ya Dunia msimu huu jijini London na Paris mnamo Septemba kabla ya kutua Singapore na Hong Kong mnamo Oktoba, 2020.

Feeney aliondoka Kenya kuelekea New Zealand kujumuika na familia yake baada ya kushikilia mikoba ya Shujaa na Morans kwa kipindi kifupi.

“KRU ingependa kumshukuru Feeney kwa mchango wake katika makuzi ya raga yetu kwa kipindi alichohudumia timu ya taifa. Tunamtakia kila la heri katika shughuli zake za baadaye,” ikaongeza taarifa hiyo.

Feeney aliteuliwa kuwa kocha wa Shujaa mnamo Septemba 2019 baada ya mkataba wa Paul Murunga kutamatika. Wambua ambaye kwa sasa anawanoa pia Kenya Lionesses, aliteuliwa msaidizi wake.

Chini yake, Kenya Morans walinyakua ufalme wa Safari Sevens mnamo 2019 huku Shujaa wakiridhika na nishani ya shaba katika mashindano hayo yaliyonogeshwa pia na Ufaransa, Afrika Kusini, Amerika, Uhispania, Ureno, Namibia na Hong Kong.

Ingawa hivyo, matokeo ya Shujaa katika Raga ya Dunia hayajakuwa ya kuridhisha zaidi chini ya Feeney hasa ikizingatiwa kwamba kwa sasa wanashikilia nafasi ya 12 kwa alama 35 baada ya kutandaza duru sita katika kivumbi hicho cha duru 10.

Feeney amewahi pia kunoa vikosi vya raga vya Auckland na Stormers nchini New Zealand na Afrika Kusini mtawalia. Odera kwa sasa anadhibiti mikoba ya timu ya taifa ya wachezaji 15 kila upande, Simbas na kikosi cha chipukizi wasiozidi umri wa miaka 20, Chipu.

Simbas kutumia kipute cha raga ya Afrika kufuzu kwa fainali za Kombe la Dunia

Na CHRIS ADUNGO

KIPUTE cha kuwania Raga ya Kombe la Afrika mnamo 2022 sasa kitatumiwa na Kenya Simbas kufuzu kwa fainali za Kombe la Dunia mnamo 2023 nchini Ufaransa.

Kivumbi cha Africa Cup hakijafanyika kwa kipindi cha misimu miwili iliyopita kutokana na uchechefu wa fedha na janga la corona mtawalia. Kampeni hizo zitarejelewa mwakani.

Mshindi wa Africa Cup atajikatia tiketi ya moja kwa moja ya kuingia fainali za Kombe la Dunia huku nambari mbili akilazimika kushiriki mchujo dhidi ya vikosi vingine vitatu kutoka mashirikisho tofauti.

Timu 12 tayari zimefuzu kwa fainali za 2023 nchini Ufaransa baada ya kukamata nafasi tatu za kwanza kwenye kampeni zao za Raga ya Dunia (RWC) katika msimu wa 2019. Hizi ni pamoja na Afrika, Uingereza, New Zealand, Wales, Japan, wenyeji Ufaransa, Australia, Ireland, Scotland, Italia, Argentina na Fiji.

Nafasi nane zilizosalia zitaamuliwa kupitia mchakato wa timu kushiriki mapambano ya mchujo katika kiwango cha kimaeneo. Shughuli hiyo itakamilika kwa mchujo wa mwisho utakaoshirikisha timu nne za mwisho mnamo Novemba 2022. Tarehe za kuandaliwa kwa mashindano ya msimu wa 2021 zitatolewa mapema wiki ijayo.

Kenya Simbas walikosa tiketi ya kunogesha fainali za Kombe la Dunia mnamo 2019 baada ya kuzidiwa maarifa na Canada kwenye mchujo wa mwisho uliotawaliwa na Ujerumani na Hong Kong nchini Ufaransa.

Chini ya kocha Paul Odera, Kenya Simbas watakuwa wakiwania fursa ya kushiriki fainali za Kombe la Dunia kwa mara ya kwanza katika historia.

Mnamo 2018, Simbas waliambulia nafasi ya pili barani Afrika baada ya kuwapepeta Uganda, Tunisia na Zimbabwe kabla ya chombo chao kuzamishwa na Namibia jijini Windhoek.

Mnamo 2015, walikosa padogo kufuzu kwa fainali za Kombe la Dunia nchini Uingereza baada ya Zimbabwe kuwazaba 27-10.

Awali, Kenya ilikuwa imewapiga wenyeji Madagascar 34-0 na Namibia ambao hatimaye waliwakilisha bara la Afrika kwa 29-22 katika hatua ya makundi.

Odera amesema kutoandaliwa kwa Kombe la Afrika katika kipindi cha miaka miwili mfululizo ni pigo kubwa kwa maandalizi ya kikosi chake ambacho sasa hakitashiriki mapambano yoyote ya haiba kubwa mwaka huu.

“Yasikitisha kwamba tutakuwa na mwaka mmoja pekee wa kujiandaa kwa mechi za kufuzu kwa Kombe la Dunia. Ingawa jambo hili linatuweka katika hali ngumu, naamini ukubwa wa uwezo wa vijana wangu” akasema.

Mechi za Simbas katika Kombe la Afrika zilitarajiwa kuanza dhidi ya Morocco kisha Ivory Coast, Uganda na Zimbabwe.

Lazima tujipange kabla ya mechi za marudiano – Odera

Na GEOFFREY ANENE

KOCHA Paul Odera amekiri kuna kazi kubwa ya kufanywa kabla ya Simbas kualika Zambia (Agosti 24) na mabingwa watetezi Zimbabwe (Septemba 21) katika mechi za marudiano za raga ya wachezaji 15 kila upande ya Victoria Cup.

Akizungumza na Taifa Leo baada ya Simbas kuzimwa 30-29 na Zimbabwe mjini Bulawayo, Odera alisema, “Ilikuwa mechi ngumu jinsi nilivyobashiri itakuwa. Tumejifunza jinsi ya kukabiliana na mashambulizi na kulinda ngome yetu pembeni. Hata hivyo, kazi bado ipo kabla ya mechi ya marudiano.”

Kabla ya kucheza na Zimbabwe hapo Agosti 3, Odera alikuwa ametabiri kuwa mechi dhidi ya wapinzani hawa itakuwa kali zaidi katika mashindano haya ya mataifa manne.

“Mechi dhidi ya Zimbabwe itakuwa ngumu kabisa. Motisha yetu iko juu. Wachezaji wazoefu wanashirikiana vyema na wale chipukizi kwa karibu. Tunathamini ujuzi wa wachezaji waliowahi kucheza kombe hili mjini Bulawayo,” alisema Odera kabla ya mechi hiyo ambayo Kenya ilipata alama zake kupitia kwa Monate Akuei (miguso miwili), Anthony Odhiambo (mguso mmoja na mkwaju), Elkeans Musonye (mguso mmoja), Johnstone Mung’au (mguso mmoja) na Charles Kuka (mkwaju).

Nahodha wa Zimbabwe, Hilton Mudariki alifungia timu yake alama 15 nao Takudzwa Kumadiro, David Makanda na Biselele Tshamala wakachangia mguso mmoja kila mmoja.

Kichapo hicho kilikuwa cha kwanza cha Kenya dhidi ya Zimbabwe tangu ilimwe 28-20 uwanjani Prince Edward mwaka 2015.

Tangu wakati huo, Kenya ilikuwa imetawala michuano yake dhidi ya Zimbabwe ikiwemo kubwaga Wazimbabwe mara mbili nchini Zimbabwe na moja jijini Nairobi.

Simbas iliingia nchini Zimbabwe ikitokea Zambia ambako ilikuwa imetamba 43-23 mjini Kitwe.

Majeraha ziarani

Ziara za Kenya nchini Zambia na Zimbabwe zilishuhudia ikipata majeraha matatu.

Isaac Njoroge alipata jeraha la kichwa dhidi ya Zambia mnamo Julai 27.

Hakushiriki mechi ya Zimbabwe baada ya kufeli uchunguzi wa kimatibabu.

Patrick Ouko na Melvin Thairu walipata majeraha ya kifundo dhidi ya Zimbabwe.

Baada ya mechi za wikendi, Zimbabwe inaongoza jedwali la Victoria Cup kwa alama 15.

Iliingia mechi ya Kenya na motisha ya kupepeta Zambia 39-10 (Julai 13) na Uganda 31-26 (Julai 27).

Kenya ni ya pili kwa alama 11 baada ya kupoteza pembamba dhidi ya Zimbabwe na kulima Uganda 16-5 na Zambia 43-23.

Uganda ina alama mbili kwa kupoteza pembamba dhidi ya Zimbabwe. Aidha, mechi kati ya Uganda na Zambia iiliyoratibiwa kusakatwa Agosti 10, imeahirishwa hadi Agosti 17.

Mabadiliko haya, kwa mujibu wa Shirikisho la Raga nchini Uganda, yalifanywa baada ya Zambia kuomba mchuano huo usukumwe mbele kutokana na mabadiliko katika mipango ya usafiri. Simbas ilirejea nchini Jumapili jioni.

Paul Odera ndiye kocha mpya wa Kenya Simbas

Na GEOFFREY ANENE

SHIRIKISHO la Raga la Kenya (KRU) limefagia benchi lote la kiufundi la timu ya taifa ya Kenya Simbas na kujaza nafasi hizo na maafisa wa timu ya Chipu wakiongozwa na Paul Odera.

Wembe uliowanyoa raia wa New Zealand Ian Snook (aliyekuwa kocha mkuu) na Murray Roulston (kocha) mwezi Januari, umewanyoa Wangila Simiyu (Meneja wa Timu), Christopher Makachia (Mtaalamu wa mazoezi ya viungo), Charles Ngovi (Naibu wa kocha), Dominique Habimana (Naibu wa kocha) na James Ondiege (Daktari wa timu), huku mtathmini wa timu Edwin Boit pekee akisalia.

Maafisa wanaoingia Simbas ni Odera (kocha mkuu), Jimmy Mnene (meneja wa timu), Ben Mahinda (mtaalamu wa mazoezi ya viungo), Boit (mtathmini wa timu), Michael Owino (kocha wa mazoezi ya viungo) na Albertus Van Buuren (kocha wa safu ya ulinzi).

Mwezi Aprili mwaka 2019, Odera aliongoza Chipu kurejea katika Raga ya Dunia ya daraja ya pili (JWRT) baada ya kuwa nje miaka 10. Chipu ilikanyaga Namibia 21-18 uwanjani Ruaraka na kujikatia tiketi ya kuwa nchini Brazil mwezi Julai 2019.

Amehitimu na kiwango cha tatu cha ukocha cha dunia na mkufunzi wa raga mwenye tajriba ya dunia.

Odera ni mwalimu wa masomo ya jiografia na sayansi katika Shule ya Upili ya Peponi House katika mtaa wa Kabete.

Mnene na Owino wamefanya kazi na Odera kwa miaka minne iliyopita katika benchi la kiufundi la Chipu.

Mahinda amekuwa akifanya kazi katika benchi la kiufundi la timu ya taifa ya wanawake almaarufu Lionesses.

Boit amefanya kazi na Chipu na Simbas katika majukumu yaliyopita akitathmini kila mchezaji na kutoa takwimu zao baada ya mazoezi na mechi.

Van Buuren alicheza katika shindano la Super Rugby mwaka 1996 kabla ya kuhamia New Zealand.

Lenana School

Amewahi kunoa Shule ya Upili ya Lenana.

Yeye ni Mkurugenzi wa Michezo katika Shule ya Kimataifa ya Crawford.

Odera ana ujuzi wa miaka 20 akifundisha shule nchini Kenya, Afrika Kusini na New Zealand.

Majukumu ya kwanza ya Odera kama kocha mkuu wa Simbas ni Kombe la Elgon dhidi ya Uganda mnamo Juni 22 mjini Kisumu na Julai 13 jijini Kampala.

Hakuna Kombe la Afrika (Gold Cup) mwaka 2019.

Shirikisho la KRU litaandaa mchujo wa kuunda timu ya taifa ya Simbas hapo Juni 1 uwanjani RFUEA jijini Nairobi.

Taarifa kutoka KRU zinasema kwamba Simbas itatafutiwa mechi zingine za kimataifa.

Aidha, KRU iko macho kufufua shindano la mataifa matatu la Victoria Cup kujaza nafasi iliyoachwa na kuondolewa kwa Gold Cup. Kombe la Victoria lilihusisha Kenya, Zimbabwe na Uganda.