Hamtakamatwa tena na polisi wa Uganda, serikali yahakikishia wavuvi Ziwa Victoria

Na BARACK ODUOR

SERIKALI imewahakikishia wavuvi katika Ziwa Victoria kwamba watapewa ulinzi dhidi ya kuhangaishwa na kukamatwa na maafisa wa usalama wa Uganda wanapoendeleza shughuli zao ziwani.

Kamanda wa Polisi katika Eneo la Nyanza, Bw Leonard Katana, alisema Idara ya Polisi wa Taifa (NPS) tayari imepeleka vifaa vya kutosha kutumiwa kukabiliana na ukosefu wa usalama ziwani na kulinda wavuvi.

“Tutapeana ulinzi katika maeneo yaliyo sugu kwa ukosefu wa usalama ili wavuvi wapate muda wa kutosha kuendeleza shughuli zao za uvuvi,” akasema Bw Katana.

Akizungumza wakati alipokutana na maafisa wa usalama na machifu wote wanaohudumu Kaunti ya Homa Bay, Bw Katana alisema wanalenga visiwa vya Remba, Takawiri, Kiwa, Ringiti na Migingo ziwani humo ambapo wavuvi wamekuwa wakilalamika kuhusu kuhangaishwa na kutishiwa na maafisa wa usalama wa Uganda.

Aliomba machifu na maafisa wengine wa usalama nchini wazidishe upigaji doria ili kuondoa wahalifu katika fuo za ziwa.

Aliahidi pia kuangamiza uuzaji wa pombe haramu katika visiwa vya Ziwa Victoria kwani zimesababisha maafa ya wavuvi wengi ziwani.

“Nimejitolea kuangamiza pombe haramu ambayo imeua wavuvi wetu wengi katika Ziwa Victoria,” akasema Bw Katana.

Mratibu wa serikali kuu katika eneo la Nyanza, Bw Morphat Kangi, aliomba wavuvi eneo hilo washirikiane kwa karibu na polisi ili kuwasaidia kuondoa wahalifu ambao wanatatiza usalama.

Haya yalitokea karibu mwezi mmoja baada ya wavuvi katibu 20 kutoka ufuo wa Kinda ulio kaunti ndogo ya Suba Kusini, kupigwa na kupokonywa taa zinazogharimu Sh70,000 na polisi wa Uganda.

Waliojaribu kuuzia polisi pembe huru kwa bondi ya Sh1m

Na HILLARY OMITI

MAHAKAMA ya Migori Jumatatu iliwaachilia watu wawili kwa dhamana ya Sh1 milioni kila mmoja, baada ya kukanusha kupatikana wakiwa na pembe za ndovu yenye thamani ya Sh1.5 milioni.

Hakimu Mkazi wa Migori, Bw Edwin Nyagah aliambiwa kuwa Mary Owino Likowa na George Ochieng walikamatwa Jumapili wakiwa na pembe hizo za uzani wa kilo 15.

Mahakama iliambiwa washtakiwa walikuwa katika kituo cha mafuta mjini Migori walipojaribu kuziuzia polisi wawili waliokuwa wamevaa kiraia na kujifanya wanunuzi baada ya kupata ujumbe kutoka kwa umma.

Kesi yao itasikizwa Juni 6 mwaka huu.

 

Polisi watetea udhalimu wao

Na LEONARD ONYANGO

IDARA ya Polisi imetetea maafisa wake wawili ambao walinaswa katika video wakimtesa na kumhamisha kwa nguvu mwanamke kutoka nyumba za polisi katika Kituo cha Buruburu, Nairobi.

Video hiyo iliyoonyesha mwanamke akifanyiwa ukatili ilichipuza mtandaoni Jumapili na kuzua ghadhabu miongoni mwa Wakenya katika mitandao ya kijamii.

Kulingana na Idara ya Polisi, mwanamke aliyekuwa akihamishwa kwa nguvu ni mke wa konstebo wa polisi aliyetambuliwa kwa jina la Charles Ochieng Adao anayedaiwa kuhepa kazi tangu Januari 1 na amekuwa akisakwa na polisi.

“Mwanamke huyo alipewa ilani ya kuondoka katika nyumba za polisi baada ya mumewe ambaye ni afisa wa polisi kukosa kufika kazini tangu Januari, mwaka huu,” ikasema taarifa ya polisi.

Idara hiyo ya usalama ilisema Bw Adao amekuwa akisakwa na polisi baada ya kupata kibali cha kumkamata mahakamani mnamo Januari 31, 2018.
Kulingana na taarifa hiyo, kufikia sasa afisa huyo hajulikani aliko.

Hata hivyo, inakiri kwamba mkewe amekuwa akiishi katika nyumba ya polisi katika kituo cha Buruburu.

Polisi walisema mkewe Adao alipewa ilani ya kuhama lakini akaruhusiwa kuendelea kuishi ili kuwezesha watoto kufunga shule katika muhula wa kwanza mwaka huu.

Katika video hiyo ambayo imekuwa ikisambazwa katika mitandao ya kijamii, mwanamke huyo anasikika akiwataka maafisa wa polisi wanaomhamisha kwa nguvu kutomtesa.

 

‘Mbona wanipiga bure?’

“Nimefanya nini? Unanipiga kwa nini…Haki nimekufanyia nini?’ alisikika akisema huku majirani wakipiga kamsa ya kuwataka maafisa hao kuachana naye.

Ripoti ambazo hazijathibitishwa zinaonyesha kuwa Bw Adao amekuwa akiugua maradhi ya kiakili na anatibiwa katika moja ya hospitali nchini.

Lakini idara ya polisi ilisema kuwa haijapata habari zozote kuhusiana na maradhi hayo na wala familia yake haijawahi kutoa taarifa kuhusiana na alipo.

“Idara ya Polisi haina taarifa kuhusiana na kulazwa hospitalini kwa Bw Adao na wala familia yake haijatoa ripoti kuhusiana na aliko afisa huyo wa polisi tangu alipotoweka Januari 2018. Mkewe amekuwa akitueleza kwamba hajui aliko mumewe,” ikasema taarifa ya polisi.

“Tumeanzisha uchunguzi ili kujua aliko afisa huyo na endapo atapatikana tutampeleka hospitalini ili afanyiwe uchunguzi wa kiakili kuthibitisha ikiwa yuko sawa au la,” ikaongezea.

Kulingana na kanuni za polisi, afisa yeyote hafai kuhepa kazi kwa zaidi ya siku 21 bila kufahamisha wakubwa wake mahali aliko.

Wanaofanya hivyo huchukuliwa kuwa wamehepa kazi na wakubwa wao hufika kortini kuomba kibali cha kuwakamata na kuwafunguliwa mashtaka ya kuacha kazi kinyume cha sheria.

Polisi, hata hivyo, hawakutoa sababu kwa nini wameanzisha uchunguzi sasa licha ya Bw Adao kutoweka zaidi ya miezi mitatu iliyopita.

 

 

Polisi kukamatwa kutoa ushahidi katika kesi ya ugaidi

Na RICHARD MUNGUTI

MAHAKAMA moja ya Mombasa Ijumaa iliamuru maafisa wawili wa polisi kutoka kitengo cha kupambana na ugaidi watiwe nguvuni kwa kukosa kufika kortini kutoa ushahidi dhidi ya wanawake wanne wanaokabiliwa na shtaka la kuwa wanachama wa kundi la magaidi wa Al Shabaab.

Akitoa kibali cha kuwakamata , hakimu mkuu Bw Evans Makori alisema amekuwa akiwatahadharisha maafisa wa polisi wanaochunguza kesi dhidi ya kuzembea kazini mwao.

“Maafisa wa polisi wanaochunguza kesi kaunti ya Mombasa wamekuwa mwimba katika utenda kazi wa mahakama na wahusikao sharti waadhibiwe,” alisema Bw Makori.

Hakimu huyo alisema mara nyingi kesi zimekuwa zikitupiliwa mbali kutokana na sababu za maafisa wa polisi waliochunguza kesi kufika kortini kutoa ushahidi ama kukosa kuwasilisha ushahidi.

Alisema uzembe wa maafisa wanaochunguza kesi wa kutowasilisha ushahidi ni njia moja ya kuvuruga  utenda kazi wa mawakili, kuwatesa washukiwa na vile  kusababisha mahakama kuchelewesha kuamua kesi katika muda unaofaa.

“Namwamuru afisa anayesimamia kitengo cha ATPU eneo la Pwani Bw Charles Ogeto awakamate na kuwafikisha kortini Koplo Samuel Ouma na Konstebo Fogat Abdi waeleze sababu ya kutotoa ushahidi dhidi ya washukiwa hawa wanne,” hakimu aliamuru.

Bw Makori pia alimwagiza OCPD Mombasa asaidie katika kutiwa nguvuni kwa maafisa hao wawili wa polisi.

Maafisa hao walikuwa wanatarajiwa kutoa ushahidi katika kesi dhidi ya Bi Ummulkheir Sadri Abdalla , Bi Khadija Abubakar Abdulkadir, Bi Maryam Said Aboud na Bi Halima Adan wanaoshtakiwa kuwa wanachama wa Al-Shabaab.

Polisi wanaowasaidia wezi wa mifugo wapokonywa silaha

Na MWANGI NDIRANGU

POLISI wa akiba katika baadhi ya sehemu za Kaunti ya Laikipia wamepokonywa silaha zao na serikali kwa kutuhumiwa kushirikiana na wahalifu kutekeleza wizi wa mifugo.

Kamishna wa kaunti hiyo Bw Onesmus Musyoki alithibitisha kwamba polisi 30 katika wadi ya Mukogodo Mashariki, katika Kaunti Ndogo ya Laikipia Kaskazini waliagizwa kurejesha silaha zao. Alisema kuwa watapigwa msasa kabla ya kukabidhiwa upya.

“Tumeagiza kamati ya usalama ya kaunti ndogo kuandaa upigaji msasa wa polisi wote wa akiba katika kata za Makurian, Ngwesi na Sieku. Wale ambao watapita zoezi hilo watarejeshewa silaha zao,” akasema Bw Musyoki.

Alikubali kwamba baadhi ya polisi hao waliajiriwa kwa haraka, akishikilia kuwa watazingatia tahadhari kubwa katika siku za baadaye ili kuepuka matumizi mabaya ya bunduki.

Kwa sasa, kuna jumla ya polisi 823 ambao wameajiriwa ili kuwasaidia polisi wa kawaida kuimarisha usalama katika eneo hilo.

Polisi hao walinyang’anywa silaha hizo kufuatia wizi wa zaidi ya ng’ombe 800 katika shamba la Ole Naishu mwezi Januari mwaka huu.

Na hata baada ya operesheni kali kuongozwa na vikosi vya usalama kuwatafuta, ni wachache tu waliopatikana.

Kwa hayo, wakuu wa usalama waliwatuhumu polisi hao kushirikiana kisiri na wezi kutoka kaunti jirani ya Isiolo.

Lakini licha ya zoezi hilo, baadhi ya wakazi wa eneo la Mukogondo Mashariki wameeleza hofu kwamba huenda hilo likaongeza tishio la usalama.

Diwani wa wadi hiyo Daniel Nyausi alisema kwamba serikali ingetathmini njia zingine za kukabili hali hiyo, badala ya kuwanyang’anya bunduki.

 

Mwanamume aliyejifanya Sabina Chege na kuwatapeli wabunge anaswa Tanzania

Na CHARLES WASONGA

MWANAMUME anayehutumiwa kuwadhulumu wabunge mitandaoni na kuwapunja hela hatimaye ametiwa mbaroni na anazuiwa katika kituo cha polisi cha Muthaiga, Nairobi.

Benson Wazir Chacha (pichani kushoto) aliletwa na polisi hadi Nairobi Jumatatu baada ya kukamatwa katika hoteli moja mjini Tarime, nchini Tanzania Jumapili.

Ilidaiwa kuwa mshukiwa huyo alikuwa amejificha huko baada ya kusakwa na polisi kwa muda wa wiki moja maovu yake yalipofichuliwa na Mbunge Mwakilishi wa Wanawake, Bi Sabina Chege.

Mkurugenzi wa Upelelezi wa Jinai (DCI) George Kinote alisema mshukiwa atafikishwa mahakamani Jumanne kujibu mashtaka kadhaa.

Bw Chacha anatuhumiwa kuitisha pesa kutoka kwa wabunge kwa kisingizio kuwa alikuwa Bi Chege na alikuwa katika hali “mbaya zaidi ambapo alihitaji wenzake kumnusuru”.

Bw Kinoti alisema mshukiwa alikuwa anapanga kutorokea taifa la Jamhuri ya Kidemokrasia ya Congo (DRC).

Mkurugenzi huyo wa upelelezi alifichua kuwa mshukiwa alinaswa kutokana na usaidizi kutoka polisi wa Tanzania walioshirikisha msako huo na kisha kusaidia kumsafirisha hadi mji wa mpakani wa Isebania.

Vile vile, Shirika la Polisi wa Kimataifa (Interpol) limekuwa likishirikiana na maafisa wa usalama wa Kenya na Tanzania  katika juhudi za kumsaka Bw Chacha.

 “Kikosi changu nilichobuni wiki moja iliyopita kimekuwa kikipanga na kukusanya habari ambazo zilisaidia katika kutiwa mbaroni kwa mshukiwa,” Bw Kinoti akasema.
Wiki iliyopita mkuu huyo wa DCI alitoa wito kwa umma kusaidia katika kutoa habari zitakazosaidia wapelelezi kumkamata Bw Chacha na akatoa zawadi ya Sh20,000.
Washirika wake watatu, akiwemo ajenti wa M-Pesa pia wameshikwa.

Ajenti huyo, kulingana na wapelelezi, alishirikiana na walaghai kusajili akaunti ya M-Pesa kwa jina na maelezo ya Bi Chege.

Baadhi ya maafisa wa serikali ambao wamepunjwa na Bw Chacha ni Spika wa Bunge la Kitaifa Justin Muturi (Sh300,000), aliyekuwa Mbunge wa Gem Jakoyo Midiwo (Sh20,000), mawaziri Eugene Wamalwa (Ugatuzi), Peter Munya (Afrika Mashariki), Profesa Margaret Kobia (Utumishi wa Umma) na Bi Sicily Kariuki.

Wakazi wakejeli maafisa kushindwa kuwakamata wahalifu

Ahmed Omar akilalamika juu ya idadi kubwa ya wahalifu wanaozidi kuwakosesha amani wakazi kisiwani Lamu. Picha/ Kalume Kazungu

NA KALUME KAZUNGU

WAKAZI wa kisiwa cha Lamu wameilalamikia idara ya usalama eneo hilo kwa kutowakamata wahalifu ambao wamekuwa wakiwahangaisha wakazi hao kwa kupora simu zao na pia kuwajeruhi mitaani na vichochoroni.

Wakazi wanadai wahalifu wamekuwa wakitekeleza ujambazio wao na kisha kutoweka baadaye na kuelekea mafichoni bila ya kufikiwa na mkono wa sheria.

Kwa mujibu wa Ahmed Omar, wahalifu hao kisha hurudi mitaani baadaye na kuendelea kuwahangaisha wananchi.

Bw Omar aliitaka idara ya usalama kujukumika vilivyo na kuwatia mbaroni wahalifu hao ili waadhibiwe kwa mujibu wa sheria.

“Tumechoshwa na tabia ya baadhi ya wahalifu ambao huelekea mafichoni punde wanapogundua kuwa wanatafutwa na polisi. Wanakaa huko miezi miwili au mitatu.

Baadaye wahalifu hao hao wanarudi mitaani na kujitanua vifua huku wakiendelea kutuhangaisha. Idara ya usalama itilie maanani malalamishi haya na kuwakamata wahusika. Tumechoka kuhangaishwa vichochoroni,” akasema Bw Omar.

Wahalifu hao wanadaiwa kutumia visu, mapanga na marungu katika kutekeleza uhalifu wao.

Bi Khadija Athman alisema idadi kubwa ya vijana wanojihusisha na uhalifu huo ni wale walioacha masomo na kuingilia matumizi ya dawa za kulevya.

“Wahuni wanaotekeleza vitendo hivyo ni vijana wadodo walioacha masomo na kuingilia matumizi ya mihadarati. Lazima wakomeshwe kwani ikiwa katika umri wao mdogo wanaweza kutekeleza uhalifu huo, je wakiwa wakubwa itakuwaje? Polisi watekeleze jukumu lao ipasavyo,” akasema Bi Athman.

TAHARIRI: Ukatili wa polisi dhidi ya waandishi ulikiuka haki

Na MHARIRI

UKATILI uliotekelezwa na maafisa wa polisi dhidi ya wanahabari katika Uwanja wa Ndege wa JKIAmnamo Jumatatu wakati wa kurejea nyumbani kwa wakili Miguna Miguna unafaa kukemewa vikali.

Shambulizi dhidi ya wanahabari halikufaa kwa kuwa walikuwa wakiwahudumia Wakenya waliokuwa wakifuatilia taarifa hiyo kwa hamu na ghamu.

Inspekta Jenerali wa Polisi Joseph Boinnet anafaa kuhakikisha maafisa waliohusika wanakabiliwa kisheria kwa udhalimu waliotendewa wanahabari hao.

Wanahabari hawafai kukabiliwa kama majangili wanapotekeleza kazi yao ya kupasha umma, haswa katika nchi inayojigamba kuwa inakumbatia mfumo wa utawala wa sheria.

Uhuru wa wanahabari umenakiliwa vizuri katika Katiba iwapo, kwa vyovyote vile, polisi na serikali kwa jumla, wamesahau hilo.

Kwa kweli idara ya polisi imegeuka kwa mkiukaji mkuu wa sheria na inayofanya mambo itakavyo. Marejeo ya Dkt Miguna na visanga vilivyogubika kurejea kwake vilikuwa habari ambazo Wakenya walifuatilia kwa makini sana.

Ni vizuri kutambua kwamba hakuna sheria inayowazuia wanahabari kuripoti visa vinavyotokea katika uwanja wa ndege, kwa hivyo ukatili wa polisi haukuwa na msingi wowote.

Polisi wana tabia ya kupuuza sheria na hili lilifahamika wazi baada ya kulaumiwa na Mashirika ya Kutetea Haki za Kibinadamu kwa mauaji ya waandamanaji mwaka jana.

Wakati huo, polisi walitumia nguvu kupita kiasi kuwakabili viongozi na wafuasi wa upinzani na hata watoto wadogo wasiojua chochote kuhusu siasa kama ‘Baby Pendo’.

Kenya siyo taifa linaloongozwa na polisi bali katiba na sheria. Hivyo basi, polisi walifaa kufahamu hilo kabla ya kutekeleza unyama wao.

Yaliyojiri katika uwanja wa JKIA yalisawiri nchi yetu vibaya machoni pa mataifa ya nje, haswa kuhusu uhuru na haki za wanahabari na raia wa taifa letu.

Uwanja huo uligeuzwa jukwaa la kivita kwa sababu ya mambo mepesi ambapo njia bora ingetumika hali ingekuwa shwari.

Ili kuonyesha mfano bora, Bw Boinnet anafaa kuwakabili polisi hao na kuhakikisha wamekamatwa na kushtakiwa mahakamani.

Iwapo kila mara polisi wataruhusiwa kutenda maovu na hawachukuliwi hatua, basi tutarajie mabaya zaidi siku za usoni.

Wakenya wana haki ya kupata habari,jukumu ambalo wanahabari wanapaswa kulitekeleza bila vitisho kutoka kwa polisi.

Kambi za polisi zajengwa katika maeneo yanayolengwa na Al-Shabaab

NA KALUME KAZUNGU

KAMBI za polisi zimebuniwa kwenye maeneo yote hatari ambayo awali yalikuwa yakishuhudia uvamizi wa mara kwa mara kutoka kwa kundi la Al-Shabaab kwenye barabara kuu ya Lamu kuelekea Garsen.

Kamanda Mkuu wa Polisi wa Kaunti ya Lamu, Muchangi Kioi, alisema serikali tayari imeweka kambi za polisi kwenye maeneo ya Milihoi, Nyongoro na Lango la Simba ambako visa vya Al-Shabaab kushambulia msafara wa mabasi ya usafiri wa umma na magari ya walinda usalama vilikuwa vimekithiri.

Bw Kioi kadhalika alisema serikali imeongeza doria za kutosha za polisi na jeshi kwenye barabara kuu ya Lamu kuelekea Garsen ili kuzuia mashambulizi yoyote kutoka kwa Al-Shabaab.

Kamanda Mkuu wa Polisi wa Kaunti ya Lamu, Muchangi Kioi wakati wa mahojiano na Taifa Leo. Picha/ Kalume Kazungu

Aliwataka wasafiri wanaotumia barabara hiyo kuondoa shaka na kusema kuwa usalama wao umedhibitiwa vilivyo.

Katika kipindi cha miaka mitatu iliyopita, Al-shabaab wamekuwa wakilenga mabasi ya usafiri wa umma na magari ya polisi na kuyashambulia kwa risasi na mabomu ya kutegwa ardhini.

Watu zaidi ya 30 walipoteza maisha yao kwenye maeneo ya Nyongoro, Milihoi na Lango la Simba baada ya magari waliyokuwa wakisafiria kushambuliwa na Al-Shabaab.

Maafisa wa usalama wakishika doria karibu na msitu wa Boni uliokaribiana na barabara ya Lamu-Garsen. Picha/ Kalume Kazungu

Bw Kioi aidha alisema tangu kambi hizo za polisi kubuniwa, visa vya mashambulizi ya Al-Shabaab havijashuhudiwa tena kwenye maeneo husika.

“Tumeweka kambi za polisi kwenye sehemu za Milihoi, Nyongoro na Lango la Simba. Hizo ni sehemu hatari ambazo zilikuwa zikitumiwa na Al-Shabaab kutekeleza mashambulizi dhidi ya magari ya usafiri wa umma, yale ya kibinafsi na pia yale ya walinda usalama.

Ningewasihi wanaotumia barabara kuu ya Lamu kuelekea Garsen kuondoa shaka kwani usalama umedhibitiwa vilivyo,” akasema Bw Kioi.

Kamanda huyo aidha aliwasihi wasafiri kwenye barabara hiyo kutii amri ya walinda usalama na kukubali kukaguliwa kila wakati wanapofikia vizuiozi vya polisi.

Kamanda Muchangi Kioi akiandamana na maafisa wengine wa usalama kutekeleza doria kwenye msitu wa Boni na karibu na barabara ya Lamu-Garsen. Picha/ Kalume Kazungu

Kamanda Muchangi Kioi akiandamana na maafisa wengine wa usalama kutekeleza doria kwenye msitu wa Boni na karibu na barabara ya Lamu-Garsen

Kadhalika aliwataka madereva kutii amri ya kusafiri kwa mpangilio katika msafara mmoja unaosindikizwa na maafisa wa polisi.

“Kuna baadhi ya wasafiri ambao wamekuwa wakikashifu vizuizi vya polisi barabarani. Wengine wanakataa kupekuliwa. Kuna haja ya wasafiri kutii amri hiyo kwa manufaa yao,” akasema Bw Kioi.

TAHARIRI: Polisi waheshimu amri za mahakama

Na MHARIRI

Hatua ya Serikali kuendelea kumzuilia wakili na mwanasiasa Miguna Miguna katika uwanja wa kimataifa wa ndege wa Jomo Kenyatta, (JKIA) Nairobi ni dhuluma na ukiukaji wa haki msingi za wakili huyo.

Kenya ni nchi inayoongozwa na utawala wa kisheria na inayokumbatia mfumo wa haki ambapo sheria ndio msema kweli. Yamkini, sheria inazingatiwa na kutekelezwa dhidi ya wachache.

Ni kwa nini wakili huyo anaendelea kuzuiliwa licha ya Mahakama Kuu kuamuru aachiliwe na kufikishwa mbele yake mara moja? Ni taswira gani inayojitokeza machoni pa raia wa kawaida maafisa wa polisi wanapokaidi amri za korti kiholela?

Kuna ukweli kwamba, wakili huyo huenda alivunja sheria kwa kuchelea kudai uraia wa Kenya baada ya kujisajili kama raia wa Canada. Lakini kama taifa linaloongozwa na Katiba, uhalali wa uraia wake unaweza tu kuamuliwa na mahakama.

Inasikitisha hata zaidi, maafisa wa polisi wanapojinata mbele ya waandishi habari wakidai wao ndio Serikali na kupuuza maagizo ya majaji na mahakimu.

Je, iwapo raia wangefuata mkondo wa polisi hao kudhalilisha amri za korti, nchi itaongozwa kivipi? Mfumo mzima wa sheria utasambaratika na matunda yake ni vurumai na maafa.

Idara ya polisi imejizolea sifa mbaya katika siku za hivi majuzi kutokana na namna inavyokandamiza haki msingi za raia, huku baadhi ya maafisa wakishirikiana na wahalifu kutenda maovu ya kijamii.

Wengine, hasa wale wa idara ya trafiki, wanasifika kwa kupokea hongo bila kujali wala kuogopa kushtakiwa. Sokomoko zilizotokea katika uwanja wa ndege Jumanne zinachafulia sifa idara hii ambayo kwa kweli inahusishwa na kila aina ya uozo nchini.

Tunahimiza Inspekta Jenerali Joseph Boinett kuhakikisha maafisa wake wanazingatia sheria wanapotekeleza wajibu wao. Kuvunja sheria na kukaidi amri za korti ndio mwanzo wa mwisho wa utawala wa kisheria kama tunavyoufahamu sasa.

Ni matumaini yetu kwamba, Mwanasheria Mkuu mpya Paul Kihara ambaye ni jaji mstaafu, atatoa ushauri mwafaka kwa wahusika wakuu kwenye vuta nivute inayoendelea katika JKIA ili sheria izingatiwe kwa dhati.

Kama nchi, hatuwezi kuwa na sampuli mbili za sheria; za kina yakhe na zile za mabwanyenye na wale walio na ushawishi katika jamii. Matokeo ya mpangilio kama huo ni vita na uhasama tele, na hatungependa taifa letu lichukue huo mwelekeo.

27 wakamatwa kufuatia ghasia Kakamega

Na SHARON OKOLLA

Watu 27 walikamatwa mjini Kakamega kwa kuhusika katika rabsha baada ya waombolezaji kukabiliana na polisi wa kupambana na fujo.

Machafuko yaliibuka mjini wakati mwili wa Sharlyne Mwanzia ulipokuwa ukitolewa chumba cha kuhifadhia maiti kupelekwa nyumbani kwao, mtaa wa Scheme mjini humo.

Vitoa machozi vilirushwa na milio ya risasi ilisikika wakati vijana walikuwa wakiandamana kuwataka maafisa wa polisi kumkamata mshukiwa wa mauaji hayo.

Msimamizi wa polisi eneo la Kakamega Joseph Chebii Jumamosi alithibitisha kukamatwa kwa washukiwa hao 27. Alisema watafikishwa mahakamani Jumatatu.

Hata hivyo, alikana madai kwamba baadhi ya vijana walifyatuliwa risasi na maafisa wa polisi Ijumaa.

“Hakuna ripoti iliyowasilishwa kwetu kuhusiana na suala hilo kufikia sasa, kwamba kuna mtu aliyejeruhiwa wakati wa vurugu iliyoshuhudiwa Ijumaa,” alisema.

“Hata hivyo, maafisa wawili wa polisi walijeruhiwa kidogo walipopigwa kwa mawe na vijana waliokuwa na ghadhabu,” aliongeza.

Aliwashauri wakazi wa eneo hilo kuepuka kukabiliana na maafisa wa polisi. Bw Chebii alisema wanawataka washukiwa kuwapa habari zaidi ambayo inaweza kupelekea kukamatwa kwa washukiwa zaidi.

Alishutumu mashambulizi dhidi ya maafisa wa polisi. Waombolezaji walionekana kulemewa na hisia kwani walilia kwa uchungu mwingi na kushutumu mauaji hayo ya mtoto huyo wa miaka tisa.

Mtoto huyo aliuawa na mwili wake kutupwa ndani ya tanki la maji, nyumbani kwao. Sharlyne aliyekuwa mwanafunzi wa darasa la tatu katika Shule ya Msingi ya St Joseph’s Academy, alipotea nyumbani kwao Machi 11, 2018 alipokuwa akicheza na ndugu zake. Mwili wake ulipatikana Machi 16.

Waombolezaji hao waliwashtumu polisi kwa kushindwa kukabiliana na ongezeko la ukosefu wa usalama .

Msichana huyo wa darasa la tatu katika shule ya St Joseph’s Academy, Kaunti ya Kakamega, alitoweka nyumbani kwa wazazi wake siku 13 zilizopita na anashukiwa kuhadaiwa na mtu asiyejulikana.

Ijumaa, vurumai zilizuka baada ya kundi la vijana kuanza kuharibu nyumba ambapo mwili wa mtoto huyo uligunduliwa, waombolezaji walipokuwa wakikaribia mtaa huo.

Mtu mmoja alijeruhiwa mikono alipojaribu kuchukua mkebe wa gesi hiyo ya kutoza machozi walipokuwa wakikabiliana na polisi.

Mkuu wa Polisi Kaunti, Bw Johanah Tonui hata hivyo alipuuzilia mbali mdai hayo akisema kuwa polisi walitumwa kuwatawanya vijana ambao walikuwa wakipora kutoka kwa duka kuu.

“Kile tulichofanya ni kuwatawanya vijana waliokuwa wamezuia barabara na kuwapiga mawe maafisa ili kuwachanganya akili na kisha kupora,” alitetea afisa.

Wakazi wa Githurai 45 waiomba mahakama imwachilie polisi akawahudumie

Na RICHARD MUNGUTI

MAHAKAMA kuu Jumatano iliombwa imwachilie afisa wa polisi Titus Ngamau Musila na mwanamuziki wa bendi ya ‘Kithangaini Lipua Lipua’  anayekabiliwa na shtaka la mauaji.

Jambo la kushangaza ni kwamba wakazi wa Githurai ambapo afisa huyo alikuwa akifanyakazi waliiomba korti imwachilie ndipo arudi kuwahudumia.

“Naomba hii mahakama itilie maanani wito na kilio cha wakazi wa Githurai 45 kwamba Katitu aachiliwe arudi kuwatumikia,” alisema wakili Cliff Ombeta.

Na wakati huo huo kiongozi wa mashtaka Catherine Mwaniki aliambia korti “amua kulingana na kilio cha wakazi wa Githurai na wito wa jamii ya mshtakiwa.”

Wote walikubaliana kuwa  “Katitu ni mzuri aachiliwe.”

Polisi kulipwa kulingana na uhalali wa vyeti vyao

Na NDUNGU GACHANE

WIZARA ya Usalama itatumia mfumo wa kidijitali katika idara yake ya wafanyakazi ya Huduma za Polisi kuhakikisha maafisa wa polisi wanatambuliwa na kulipwa kulingana na kiwango cha elimu yao.

Waziri wa Usalama, Dkt Fred Matiang’i alisema polisi pia watalipwa kulingana na uhalali wa stakabadhi walizowasilisha.

Waziri alisema hayo katika kituo cha polisi cha Githumu, eneo la Kandara, Kaunti ya Muranga kufuatia ripoti kuwa polisi wanatisha kujiuzulu kwa wingi kwa sababu ya uamuzi wa kupunguza mishahara yao. Hata hivyo, uamuzi huo umebatilishwa.

Alieleza kuwa kwa kufanya ukaguzi wa kina na kutumia mifumo hiyo ya kidijitali, wizara itaweza kujua inaowalipa pamoja na viwango.

“Kufikia mwaka ujao wa fedha baada ya kuweka mifumo ya kidijitali kwa idara ya wafanyakazi ya Huduma za Polisi, tutaweza kuwa na maelezo ya kila mtu na jinsi tunavyowalipa. Hii haitajumuisha polisi pekee bali pia machifu na wasaidizi wao na maafisa wengine katika utawala,” alisema.

Aliongeza, “Hatutavumilia biashara hii ambayo imekuwa ikiendelea katika idara ya Wafanyakazi na tutasafisha na kuangalia mishahara ya polisi,” alisema Dkt Matiang’i.

Alishtumu Huduma ya Polisi ya Kitaifa kwa “kuamka asubuhi na kuwashangaza polisi na mishahara mipya.”| Wakati huo huo, waziri aliwataka polisi kuelekeza malalamishi yao kupitia njia zinazostahili na sio kuzitoa nje ya kikosi.

“Nataka kuwakumbusha polisi kuwa wao ni kitengo cha usalama na hawafai kupeleka masuala yao ya ndani kwa Facebook kwa kufanya hivyo ni kuingiza siasa kwa mashauri ya polisi,” alionya.

 

Polisi huyu amenishtaki kwa kumnyima asali, kidosho aambia mahakama

Mary Wanjiru Ndung’u akiwa kortini Machi 20, 2018. Picha /RICHARD MUNGUTI

Na RICHARD MUNGUTI

KIPUSA aliyeshtakiwa kwa kumpiga na kumjeruhi afisa wa polisi alimwaga mtama mahakamani Jumanne akisema “nilifikishwa kortini kwa vile nilikataa kumuonjesha afisa huyo tunda la Edeni.”

“Mheshimiwa, nimeshtakiwa sio kwa sababu nilikosa bali ni kwa sababu nilikataa kushiriki ngono ndani ya seli na afisa wa polisi katika kituo cha Central, Nairobi,” alifichua Mary Wanjiru.

Bi Wanjiru aliyekuwa ameshtakiwa kwa kumpiga na kumjeruhi afisa wa polisi, Konstebo Francis Maina, alizamisha dau la afisa huyo wa kulinda usalama na sasa polisi huyo anachanguzwa kwa lengo la kumfungulia mashtaka ya kumpiga na kumjeruhi mahabusu.

Kuthibitisha alipokea majeraha,  Bi Wanjiru alipelekwa katika afisi ya hakimu mkuu Francis Andayi na kuvua nguo akakaguliwa na karani wa mahakama Bi Faith Ngigi.”

“N kweli mshtakiwa yuko na majeraha usoni , shavu jeusi chini ya jicho, uvimbe kwenye paja la kushoto na matako yana majeraha,” alisema Bw Andayi.

Ilibidi korti isitishe kesi yake kwa muda kumwezesha atulie. Alilia mpaka macho yakavimba.

Kidosho huyo mwenye umri wa miaka 25 aliendelea kusema , “…baada ya kukataa na tunda langu nilichapwa kwa bao kwa makalio, mikononi na mapajani na afisa huyo aliyekuwa amepandwa na mori nilipokataa kumtimizia mahitaji yake ya kimwili.”

Wanjiru alifichua kwamba alizuiliwa tangu Jumamosi usiku hadi Jumanne kwa kukataa kumvulia chupi Konstebo Francis Maina.

 

Polisi achunguzwe

Wanjiru alionyesha mahakama majeraha aliyopata kisha hakimu mkuu katika mahakama ya Milimani Nairobi Francis Andayi akaamuru afisa mkuu wa kituo cha polisi cha Kilimani (OCS) amchunguze Konstebo Maina na kuwasilisha ripoti kortini Jumatano.

Bw Andayi aliamuru OCS huyo achunguze madai kwamba mshtakiwa huyo aliporwa Sh4,500, simu mbili za rununu na kitambulisho.

Kiongozi wa mashtaka Bw Solomon Naulikha alisema, “adai haya dhidi ya afisa huyo wa polisi ni mabaya mno. Uchunguzi wa kina wapasa kufanywa ndipo ukweli ubainike.”

“Lakini ulikamatwa lini?”Andayi alimwuliza.

 

Kichapo

“Jumamosi saa sita na nusu usiku. Nilikuwa nimetoka sherehe kisha tukakosana na rafiki yangu wa kiume nikaenda kumripoti katika kituo cha polisi cha Central. Badala ya kunisaidia Konstebo Maina aliniambia nishiriki ngono naye. Nilikataa. Alinipiga sumbwi la uso na kunisukuma korokoroni.”

Andayi alimwachilia Wanjiru kwa dhamana ya Sh30,000 pesa taslimu na kuamuru arudishwe kortini Jumatano baada ya kuandikisha taarifa ya matukio hayo kwa OCS Kilimani.

Vile vile OCS huyo aliamriwa ampeleke Hospitali Kuu ya Kenyatta na kuwasilisha ripoti kortini.

Afisa wa polisi akana kumuua mahabusu

Na RICHARD MUNGUTI

AFISA wa polisi alikiri katika mahakama kuu Jumatatu mahabusu anayeshukiwa aliteswa akiwa seli alimwona akiwa amelowa maji.

Bw Kennedy Simiyu alimweleza Jaji Stella Mutuku kwamba aliyekuwa msimamizi wa kituo cha polisi cha Ruaraka hakumpiga na kumjeruhi mahabusu huyo Martin Koome akiwa ndani ya seli.

Bw Simiyu aliyekuwa akitoa ushahidi katika kesi inayomkabili afisa huyo mkuu wa polisi Nahashon Mutua alisema katika kituo cha polisi cha Ruaraka kuna tangi la maji na kwamba “Koome hakutoswa mle na mshtakiwa (Mutua).

Jaji Mutuku alifahamishwa kwamba Koome aliyekuwa ameshambuliwa na wanakijiji kwa madai alijaribu kumuua mtoto wake alikufa saa chache baada ya kupelekwa Hospitali Kuu ya Kenyatta.

Alifikishwa katika kituo cha polisi cha Ruaraka kutoka kijiji cha Baba Dogo.

Shahidi huyo aliambia mahakama kwamba Koome alipigwa na mahabusu wenzake.

Kabla ya kukamatwa na kushtakiwa kwa Bw Mutua, mahabusu kwa jina Kelvin Odhiambo almaarufu  Boxer alikuwa ameshtakiwa kisha akaachiliwa huru.

Hatimaye Bw Mutua alishatkiwa baada ya mamlaka ya utendakazi wa polisi (IPOA) kuchunguza kisa hicho.

Koome anadaiwa alipigwa na kuuawa ndani ya seli katika kituo cha Ruaraka mnamo Desemba 19, 2013.

Alipopelekwa KNH polisi walisema marehemu alikuwa amepigwa na umati wa watu. Marehemu alikuwa amevimba kichwani na hata ilikuwa vigumu kwa mkewe kumtambua.

Bw Mutua amewaita mashahidi watano kufikia sasa katika jitihada za kujinasua.

Mahakama iliambiwa marehemu aliteswa hadi akafa alipokuwa anazuiliwa katika kituo hicho cha polisi cha Ruaraka.

Polisi 1400 wajiuzulu kwa kupunguziwa mishahara

Na STELLA CHERONO

MAAFISA 1,400 wa polisi wamejiuzulu wakilalamikia hatua ya Tume ya Huduma ya Polisi (NPSC) kupunguza mishahara yao.

Maafisa hao ambao tayari wamepokea mshahara wa Machi  waliambia Taifa Leo kwamba mshahara wao umepunguzwa kwa hadi Sh26,000.

Wengi walioathiriwa ni wale walio na digrii na waliolemaa wakiwa kazini ambao walipunguziwa mshahara licha mahakama kuagiza serikali isitekeleze agizo la NPSC ambalo lilitolewa wiki iliyopita.

Kulingana na ilani za mishahara kutoka kwa chama cha ushirika cha Kenya police Sacco, baadhi ya maafisa hao walipata mshahara wa Sh20, Sh50 na Sh150 huku baadhi wakikosa kupata hata senti moja.

Baadhi ya maafisa waliokasirishwa na hatua hiyo tayari wamewasilisha barua za kujiuzulu kwa wakubwa wao.

“Ninadaiwa Sh15,000 na serikali hata baada ya kupata mshahara. Hii inamaanisha nitadaiwa Sh30,000 mwezi ujao na kiwango hicho kitaongezeka kila mwezi nikiendelea kufanya kazi katika huduma ya polisi,”afisa mmoja aliambia Taifa Leo.

Afisa huyo ambaye tayari amejiuzulu alisema alikuwa amechukua mkopo kwa sababu alikuwa na mshahara wa kutosha kulipa kila mwezi.

 

Makosa sana

“Ni makosa kupunguza mshahara mara moja bila kutupea notisi. Huu ni unyanyasaji,” alisema afisa huyo.

Alisema alilazimika kukopa pesa kufanikisha kujiuzulu kwake kwa sababu anahitajika kulipa serikali mshahara wa mwezi mmoja na kutoa notisi ya saa ishirini na nne au kutoa notisi ya kuacha kazi ya miezi mitatu jambo ambalo wengi hawataki.

Ikiwa mtu hataki kulipa mshahara wa mwezi mmoja na kutoa notisi anapaswa kutoa notisi ya miezi mitatu jambo ambalo maafisa hao hawataki.

Ni maafisa waliohudumu kwa miaka 12 wanaostahili kupata marupurupu wakijiuzulu. Maafisa wa polisi wa cheo cha konstebo walio na digrii wamekuwa wakipata mshahara wa chini wa Sh36,000 na marupurupu ya Sh11,000.

Baada ya NPSC kupunguza mishahara yao kufuatia agizo la Afisa Mkuu Mtendaji, Joseph Onyango, maafisa hao sasa watakuwa wakipata mshahara wa Sh18,000 na marupurupu ya Sh9,000, sawa na wale ambao hawana digrii.

Jumapili Katibu Mkuu wa Muungano wa Vyama vya Wafanyakazi (COTU), Francis Atwoli alisema hatua ya NPSC ni kinyume na azimio la Shirika la Leba ulimwengun (ILO) linalosema kuwa mfanyakazi hapaswi kupunguziwa mshahara wake.

 

Mishahara ya maafisa wa polisi haifai kupunguzwa – KNCHR

Na CECIL ODONGO

TUME ya Kitaifa ya Kutetea Haki za Binadamu, (KNCHR) Jumatatu imekejeli vikali ripoti kwamba mshahara wa maafisa wa polisi umepunguzwa na kuitaja kama hatua isiyofaa.

Mwenyekiti wa tume hiyo Bi Kagwira Mbogori amesema idara ya polisi imekuwa ikitekeleza majukumu muhimu ya kudumisha amani na hatua hiyo itaathiri mno mageuzi ambayo yamekuwa yakiendelezwa na tume ya huduma kwa polisi.

Maafisa wa polisi ambao tayari washapokea mishahara yao ya mwezi Machi waliambia Taifa Leo kuwa akaunti zao zilionyesha mishahara iliyopunguzwa kwa hadi Sh26,000.

Hata hivyo Mwenyekiti wa Tume ya Huduma kwa polisi Bw Johnstone Kavuludi amekanusha ripoti hiyo na kusema kwamba hakuna afisa aliyekatwa wala kupunguziwa mshahara.

Akiongea mjini Kitale, Bw Kavuludi alisema kile walikuwa wakifanya ni ukaguzi na utambuzi ili kila afisa awe akipokea mshahara anaostahili.

“Kuna maafisa ambao hawajawasilisha vyeti vya kuhitimu stashahada na shahada lakini wanapokea mshahara wa afisa wa cheo cha konstebo, hao ndio tunapambana nao,” akasema.

Kwa upande wake Bi Mbogori alitetetea tume yake kuhusu dhana machoni pa umma kwamba wao hupigania tu maslahi ya raia wanaodhulimiwa na polisi na kukosa kuwajibika haki za polisi wenyewe.

“Sisi tunaangazia haki za maafisa hao jinsi tunavyoshughulikia raia wanaodhulumiwa. Kwa sasa tuna kesi kadhaa ambazo tunafuatilia kuhusu raia waliowavamia polisi kipindi cha kabla na baada ya uchaguzi,” akasema.

Aidha alidai kwamba baadhi ya changamoto zinazokabili polisi ni kukosa kulipwa marupurupu yao, ukosefu wa bima ya afya inayoeleweka na muda mrefu wa kutolewa kwa pesa za maafisa wanaofariki wakiwa kazini.

Aliwapongeza Rais Uhuru Kenyatta na Kiongozi wa Nasa Raila Odinga kwa kuamua kushirikiana kisha akawataka kuipa kipaumbele swala la fidia kwa jamaa ya waliofariki na waliojeruhiwa wakati misururu ya maandamano baada na kabla ya uchaguzi wa marudio Oktoba 26.

“Wakati wa kurejea kwa Raila tuliona ukatili mkubwa wa maafisa wa polisi. Walitekeleza mauji na kutumia nguvu kupita kiasi,” akaongeza.

Bi Mbogori alikuwa akizungumza katika makao makuu ya tume hiyo iliyoko barabara ya Lenana wakati wa kutoa ripoti  ya kila mwaka kuhusu hali halisi ya nchi uhuru na haki za raia zikiangaziwa.

Maswala mengine yanayoathiri nchi aliyoyagusia ni utekelezaji kikamilifu wa ripoti ya Tume ya Haki Ukweli na Maaridhiano, utunzaji wa mazingira, uhuru wa vyombo vya habari, ufisadi katika serikali za kaunti na kulemazwa kwa masomo katika kaunti ya Wajir kutokana na hali mbovu ya usalama.

 

Waandamana wakitaka polisi wasake miili ya waliokufa maji

Na GEORGE SAYAGIE

SHUGHULI za kibiashara mjini Narok zilitatizwa Jumamosi asubuhi baada ya wakazi kuandamana na kufunga barabara ya Narok-Maimahiu wakilalamikia uzembe wa polisi kutotoa miili ya wanaume wawili waliokufa maji wakijaribu kumwokoa mwanafunzi aliyekuwa anasombwa na maji katika mto uliovunja kingo zake Ijumaa usiku.

Waandamanaji walitumia mawe na vikingi vya miti ya stima kufunga barabara hiyo karibu na jengo la bodi ya nafaka na mazao NCPB.

Wakazi hawa waliokuwa na hasira kali walitisha kusitisha shughuli zote hadi pale miili hiyo itakapotolewa.

“Hatutatulia hadi miili hii ipatikane na itolewe kwenye mto huu. Wahasiriwa walisombwa na maji saa 18 yaliyopita na hakuna ishara kutoka kwa polisi ya kushughulikia maiti hao,” mlalamishi mmoja Bw Joseph Salau alisema.

Wenye magari pamoja na watalii waliokuwa wanaelekea katika hifadhi maarufu ya wanyama wa pori ya Maasai Mara walikwama kwenye barabara hiyo kwa zaidi ya saa tatu baada ya barabara kufungwa.

Vurugu zilitanda huku polisi wakiwakabili waandamanaji kwa kuwatupia hewa ya kutoa machozi lakini wananchi wenye ghadhabu waliwashambulia polisi kwa mawe.

Polisi wakiongozwa na Bw Lawrence Opiyo walijisatiti na kuwatuliza waandamanaji.

“Kuna watu wagonjwa kwenye magari , kuna watalii wanaoenda Nairobi kuabiri ndege warudi makwao. Tafadhali fungueni barabara huku tukiendelea kusaka miili ya wanaume hao,” Bw Owino aliwasihi wakazi hao lakini “ hawakumjibu.”

Hatimaye wakazi hao walijitwika jukumu la kusaka miili hiyo na kujitosa katika kidimbwi kimoja kilichoko kwenye mto Kakaya unaovunja kingo zake inaponyesha na kusababisha madhara makubwa.

Maiti za Ntoika Partoip na Moseka Simat ziliondolewa na ndugu yao Bw Dickson Partoip aliambia wanahabari kwamba maafa yaliwakumba wawili hao wakirudi nyumbani kutoka kwa nyanya yao katika kijiji cha Lemanet walikopeleka ng’ombe wawili kuchinjwa wakati wa mazishi yake jana.

 

Uhuru aagiza polisi waliohudumu kwenye Uchaguzi Mkuu walipwe marupurupu yao

Na MWANGI MUIRURI

RAIS Uhuru Kenyatta ameagiza Inspekta Mkuu wa Polisi, Joseph Boinett kuhakikisha maafisa waliohudumu katika majukumu maalum kwenye Uchaguzi Mkuu wa 2017 wamelipwa marupurupu yote kama walivyoahidiwa.

Hii ni kufuatia malalamiko miongoni mwa maafisa hao ambao licha ya kuahidiwa marupurupu ya kati ya Sh30,000 na Sh70,000 kutegemea na siku ambazo walifanya kazi, wamekuwa wakilipwa kati ya Sh6,000 na Sh30,000.

Wiki iliyopita maafisa hao walikataa kuchukua pesa hizo na wakatoa habari kwa vyombo vya habari wakitaka kujua sababu ya pesa hizo kupunguzwa.

Katika barua ambayo imetumiwa Bw Boinett na kunakiliwa kwa Tume ya Huduma ya Polisi (NPSC) ikiwa imetiwa sahihi na Bw Kennedy Kihara kwa niaba ya rais, hali hiyo inafaa kurekebishwa mara moja.

“Maafisa wa polisi waliohudumu katika majukumu maalum ya maandalizi, ushirikishi na kulinda kura za uchaguzi wa Agosti 8, 2017 na Oktoba 26, 2017 walifanya hivyo kwa mujibu wa maelewano kuwa wangelipwa marupurupu kwa mujibu wa kanuni za utenda kazi wa idara ya polisi na kuidhinishwa na Tume ya Mishahara (SRC),” inasema barua hiyo.

“Ni msimamo wa rais kuwa malumbano hayo ambayo yanajitokeza katika kulipa marupurupu hayo hayafai katika kuimarisha imani na motisha ya maafisa wa polisi.

Uadilifu ni nguzo moja muhimu ya kusimamia maafisa wote wa serikali na ni matumaini ya rais kuwa hali hii itashughulikiwa kwa haraka na kwa kuzingatia uwazi,” barua hiyo inaeleza.

Barua hiyo ambayo ilitumwa Ijumaa wiki jana imezua taharuki miongoni mwa wakuu wa vitengo Polisi wa Kawaida, Polisi wa Utawala (AP), Idara za Magereza, Shirika la Huduma kwa Wanyama Pori (KWS) na Idara ya Misitu (KFS).

Duru zinasema kumetokea sintofahamu baina ya vitengo kutokana na Polisi wa Kawaida kuthibiti shughuli za kulipa marupurupu hayo.

Maafisa wa ngazi za chini wanalalamika kuwa imekuwa ni kawaida kwa wakuu wao kukosa kuwalipa marupurupu yao kulingana na makubaliano.

“Marupurupu hayo kwa kawaida yanafaa kujumuishwa kwenye mishahara yetu na kulipwa mwisho wa mwezi. Lakini hali hii ya wakubwa kutugaiwa pesa hizo kama njugu ndani ya ofisi zao ni njama ya kutuibia hadharani,” akasema mmoja wa maafisa hao.

 

Ashangaza kushangilia kukamatwa kwa mumewe

Na DENNIS SINYO 

KIMAMA, MLIMA ELGON

WAKAZI wa sehemu hii walishangaa kumuona mama mmoja akishangilia baada ya kupata habari kwamba mumewe alikuwa amekamatwa na polisi wa utawala.

Mama huyo aliabiri pikipiki hadi kituo cha polisi kudhibitisha kwamba mumewe alikuwa amewekwa kwenye seli kwa kupatikana na kwa mama-pima akinywa pombe haramu.

Wengi walitarajia kwamba mama huyo alitaka mumewe kuachiliwa huru lakini wakashtuka kusikia akisema maafisa walikuwa wamefanya jambo zuri sana.

“Huyu mtu alikuwa amenishinda nyumbani na kama mko naye hapa, najua leo nitalala kwa amani bila kusumbuliwa. Najua atabadilisha tabia zake mbaya,” mama huyo alisema.

Yasemekana mumewe alikuwa akipata hela nyingi kazini lakini alikuwa akizitumia vibaya kwa ulevi na anasa jambo ambalo hakufurahia. Licha ya kumsihi kuacha pombe, jamaa alijifanya kiziwi.

Visa vya jamaa kupoteza pesa na wakati mwingine kuibiwa na wenzake kwa mama pima vilimkera mama huyo na akafurahi alipotiwa mbaroni.

Alidai hiyo ilikuwa nafasi bora ya jamaa kupata funzo ili abadilike. “Mama huyo alidai mumewe alikuwa amemea pembe na kuwadharau watu wote waliojaribu kumshawishi kuacha ulevi,” alisema mdokezi.

Aliwataka polisi kumwadhibu abadilike kabla ya kumwachilia.

Kulingana na mdokezi, mama alirejea nyumbani na kumuacha mumewe kwenye seli akisema hiyo ilikuwa nafasi ya pekee ya jamaa kuacha starehe na ulevi.

Wanakijiji waliokuwa hapo walibaki vinywa wazi wakishangaa mama alipowataka polisi kumnyorosha sawasawa badala ya kuwaomba wamuachilie mumewe.

Baadhi walidai akili ya mama haikuwa sawa kwa kuchochea polisi waendelee kumzuilia baba ya watoto wake na kurudi nyumbani.

 

Mcheza kamari taabani kwa kuwatusi polisi

MCHEZAJI kamari Kennedy Okoth Aete akiwa kizimbani Jumanne kwa kosa la kuwatukana maafisa wa polisi. Picha/RICHARD MUNGUTI

Na RICHARD MUNGUTI

MCHEZAJI Kamari aliyeenda  kutafuta riziki katika Jokers Casino jijini Nairobi  alishtakiwa kwa kuwatusi maafisa wa polisi.

Bw Kennedy Okoth Aete alifikishwa mbele ya hakimu mwandamizi Kennedy Cheruiyot, Milimani.

Alikanusha mashtaka mawili dhidi yake.

Alikabiliwa na shtaka la kuzua vurugu kwa lengo la kuhatarisha amani kwa kuwatusi maafisa wa polisi – maneno ambayo hayawezi kuchapishwa.

Bw Aete aliomba aachiliwe kwa dhamana isiyo ya kiwango cha juu.

Aliachiliwa kwa dhamana ya Sh20,000.

Miguna Miguna: Nilivyokula samaki ‘kwa macho’ katika kituo cha polisi

Wakili mbishi aliyefurushwa humu nchini Dkt Miguna Miguna. Ameapa kurudi Kenya ‘haraka iwezekanavyo’. Picha/ Maktaba

Na LEONARD ONYANGO

Kwa Muhtasari:

  • Dkt Miguna asema aliletewa ugali, samaki na mboga lakini akalazimishwa kuingia katika gari la polisi kabla ya kuanza kula
  • Alizuiliwa kwa zaidi ya siku tano katika vituo mbalimbali vya polisi
  • “Nilisikia polisi niliokuwa nao ndani ya gari wakijigamba namna walivyofanikiwa kuwachezea shere wanahabari”
  • Aliketi ndani ya gari kwa zaidi ya saa tano na baadaye polisi walitokea na tiketi ya ndege na stakabadhi zilizoonyesha alikuwa mhamiaji haramu

MWANAHARAKATI wa NASA Miguna Miguna amevunja ukimya kuhusu mateso aliyopitia mikononi mwa polisi huku akielezea alivyokula samaki ‘kwa macho’ katika Kituo cha Polisi cha Inland Container Depot, Barabara ya Mombasa, Nairobi.

Kupitia mtandao wa Facebook, Dkt Miguna alisema aliletewa ugali, samaki na mboga ya kienyeji kwa ajili ya chakula cha jioni lakini akalazimishwa kuingia katika gari la polisi na kuelekea katika uwanja wa ndege wa JKIA kabla ya kuanza kula.

“Nilipokuwa nakijiandaa kula mlo wa samaki, ugali na mboga za kienyeji nilioletewa na msimamizi wa kituo (OCS) muungwana, maafisa wa polisi wakatili walijitokeza na kuniambia “tunaondoka sasa”. Huo ndio ulikuwa mlo wangu wa siku lakini niliacha na kuondoka,”| akasema Dkt Miguna.

 

Siku tano ndani

Dkt Miguna aliyekamatwa mnamo Februari 2, kwa kumwapisha kinara wa NASA Raila Odinga kuwa ‘rais wa wananchi’, alizuiliwa kwa zaidi ya siku tano katika vituo mbalimbali vya polisi jijini Nairobi na Kaunti ya Kiambu kabla ya kusafirishwa nchini Canada kutokana na kigezo kwamba si Mkenya.

“Nilipoingia ndani ya gari, dereva aliendesha kwa kasi  kutoka katika Kituo cha Polisi cha Inland Container Depot na dakika 25 baadaye tulikuwa katika Uwanja wa Ndege wa Jomo Kenyatta (JKIA),” akasema.

Dkt Miguna alikuwa amezuiliwa katika kituo cha polisi Inland Container Depot kabla ya kupelekwa katika Mahakama ya Kajiado kufunguliwa mashtaka ya kushiriki katika uhaini.

Baada ya kusomewa mashtaka katika mahakama ya Kajiado alirejeshwa tena katika kituo hicho huku kinara wa NASA Raila Odinga na wafuasi wake wakimngojea katika Mahakama ya Milimani Nairobi hadi saa tatu usiku.

Mara baada ya kukamatwa, Dkt Miguna alipelekwa katika Kituo cha Polisi cha Githunguri  na baadaye akahamishiwa kwenye kituo cha Lari katika Kaunti ya Kiambu.

Huu ndio msururu wa matukio kwa mujibu wa Dkt Miguna:

  • Februari 2 saa 5a.m, maafisa 35 wa polisi wavamia nyumbani kwa Miguna na kulipua lango kuu na mlango wa choo kwa kilipuzi.
  • Polisi wanampokonya Miguna simu na kutishia kumfunga macho kwa kitambaa na kisha kumpeleka katika Kituo cha Polisi cha Githunguri
  • Saa 5pm mawakili wake Edwin Sifuna, Waikwa Wanyoike na Willis Otieno wanaenda katika Kituo cha Polisi cha Githunguri
  • Usiku wa manane  polisi wakamtoa Bw Miguna katika Kituo cha Githunguri na kumpeleka katika Kituo cha Polisi cha Lari. “Kituoni Lari nilisimama seli kwa muda wa saa 24 bila kulala wala kuketi”

 

  • Februari 5 mchana: Polisi wanawasili na kumuagiza kuingia ndani ya gari. Magari matatu yanawafuata. Polisi wanafanikiwa kuwachanganya wanahabari na wafuasi wa NASA ambao walifuatilia gari tofauti. “Nilisikia polisi niliokuwa nao ndani ya gari wakijigamba namna walivyofanikiwa kuwachezea shere wanahabari.
  • Gari alilokuwemo Miguna linafululiza hadi katika Kituo cha Depot Police katika eneo la Embakasi Mashariki. “Kituoni hapa kwa mara ya kwanza napewa chakula kizuri, maji safi ya kuoga, mswaki na blanketi mbili zilizochakaa”.

 

  • Februari 6 asubuhi: maafisa wa polisi 15 wenye miraba minne wanawasili na kumwagiza  kuingia kwenye gari waliendesha gari hadi katika kituo cha mafuta katika eneo la Athi River na baadaye wakaendesha kwa kasi katika Barabara ya Kajiado.
  • Hatimaye alijipata katika mahakama ya Kajiado.
  • Nilipelekwa mbele ya hakimu ambaye aliagiza nipelekwe katika Mahakama ya Milimani Nairobi kabla ya saa tisa unusu mchana.
  • Badala ya kumpeleka katika Mahakama ya Milimani, polisi walimrejesha katika kituo cha Container Depot.
  • Hata hivyo, walipofika kituoni walimfungia ndani ya gari kwa takribani saa tano na kumpokonya paspoti yake ya Kenya.
  • Baadaye walimtoa nje ya gari na kumtaka kwenda kando kuzungumza. Kabla ya kuzungumza aliomba ruhusa ya kwenda chooni. “Walikubali niende chooni ila wakanipa maafisa watano wa kunisindikiza”.
  • Alipotoka chooni alizungukwa na maafisa 10 ambao walianza kumpekua mifukoni ambapo walipata paspoti yake ya Canada.
  • Takribani saa moja baadaye, aliletewa mlo lakini kabla ya kuanza kula, aliingizwa ndani ya gari na kupelekwa kwa kasi katika uwanja wa ndege wa JKIA.
  • Aliketi ndani ya gari kwa zaidi ya saa tano na baadaye polisi walitokea na tiketi ya ndege na kumkabidhi simu yake iliyokuwa imeharibika pamoja na stakabadhi zilizoonyesha kwamba alikuwa mhamiaji haramu asiyetakiwa.
  • Miguna asafiri kuelekea Canada.

Marehemu arejeshwa mochari kwa kukosa pa kuzikwa

Na MOHAMED AHMED na BRIAN OCHARO

Kwa Muhtasari:

  • Familia ilikuwa imechimba kaburi na kukamilisha mipango ya mazishi wakati iliarifiwa na askari wawili kusitisha mipango hiyo
  • Yasema mwenye shamba aliwasilisha kesi kortini kutaka mipango yote ya mazishi isitishwe 
  • Mlalamishi asema kuwa atapoteza shamba lake iwapo mwili huo utazikwa katika ardhi yake
  • Familia ya mwendazake sasa inaomba Mahakama ya Juu kuingilia kati na kuwapa ruhusa kuzika mtoto wao

KABURI la mwanamume wa umri wa miaka 43 Bw Edward Mwambui litabakia wazi katika shamba lao lililoko Kiembeni, Mombasa kutokana na mvutano kuhusu umiliki wa ardhi.

Bw Mwambui, ambaye amekuwa akifanya kazi katika Halmashauri ya Bandari nchini (KPA), hana amani wiki moja baada ya kuugua na kufa kutokana na kaburi lake kuchimbwa katika shamba la wenyewe.

“Alifariki siku ya Jumapili wiki iliyopita baada ya kuugua ugonjwa wa homa ya mapafu. Tulikuwa tumechimba kaburi na kukamilisha mipango ya mazishi wakati tuliarifiwa na askari wawili kusitisha mipango hiyo,” Bi Josephine Hongo, ambaye ni dadaye mwendazake alisema.

Siku ya Ijumaa, familia ya mwendazake ilikuwa imesafirisha mwili wake kutoka hospitali kuu ya kanda ya eneo la Pwani tayari kumzika katika shamba hilo kulingana na mapenzi yake lakini safari hiyo ilisitishwa ghafla kwa sababu ya mzozo huo.

 

Agizo la korti

“Tulikuwa tunaupeleka mwili katika kanisa la Jesus Power kwa maombi kabla ya kumpeleka nyumbani kuzikwa. Tulikutana na maafisa wawili ambao walitupa nakala ya kortini ambayo ilitueleza turejeshe mwili katika chumba cha kuhifadhi maiti hadi mgororo kuhusiana na shamba hilo utatuliwe,” alisema.

Wakiongea na Taifa Leo nyumbani kwake Kashani, Kiembeni, familia ya mwendazake ilisema mwenye shamba hilo aliwasilisha kesi kortini kutaka mipango yote ya mazishi isitishwe  kutokana na tofauti kuhusu umiliki wa shamba.

“Kaka yangu alinunua hilo shamba kwa Sh1.7 millioni mwaka wa  2014 kutoka kwa mlalamishi ambaye amewasilisha kesi kortnini kusitisha mazishi. Mwendazake tayari alikuwa amelipa Sh1 millioni na walikubaliana kulipa pesa zilizosalia baada ya kupata hati ya kumiliki ardhi hiyo,” alisema.

Nakala ya mashitaka ambayo ilipatiwa mamake mwendazeke Bi Ms Prisca Kavua inamzuia kumzika mwanawe katika ardhi hiyo kwasababu  hilo shamba si lake.

 

Atapoteza shamba

Bi Josephine Tole ambaye aliwasilisha kesi hiyo katika mahakama ya Mombasa anasema kuwa atapoteza shamba lake iwapo mwili huo utazikwa katika ardhi yake .

“Kama koti  haitapeana amri kutokana na ombi la mlalamishi(Bi Tole), mlalamishi atapata hasara kwani shamba lake litakuwa na kaburi la mtu ambaye hana uhusiano na  faida kwa familia yake,” Bi Tole alisema katika nakala hiyo ambayo iliwasilishwa mahakamani na Ndegwa Katisya Advocates.

Mshtakiwa pia analaumiwa kwa kupanga kuzika mwili wa motto wake katika shamba hilo licha ya kufahamu kuwa yeye siyo mmiliki wa ardhi hiyo.

Familia ya mwendazake sasa wanaomba mahakama ya juu kuingilia kati na kuwapa ruhusa kuzika mtoto wao huku wakiendelea na kesi kotini.

Bi Hongo alisema ndugu yake ambaye alikuwa ameajiriwa katika bandari hiyo aliwaacha watoto wanne na mjane.
Mwili wa mwendazake uliregeshwa katika chumba cha kuhifadhi maiti huku kesi hiyo ikiendelea.

 

Viongozi wa Kiambu wataka Ngilu akamatwe

GAVANA wa Kitui Bi Charity Ngilu akihutubu. Picha/ Maktaba

Na KITAVI MUTUA na ERIC WAINAINA

Kwa Muhtasari:

  • Bi Ngilu asema lori lililochomwa lilikuwa limezuiliwa na polisi na hivyo basi polisi ndio wanafaa kueleza yaliyotokea
  • Apuuzilia mbali video inayoenezwa kwenye mitandao ya kijamii ambayo inadaiwa ilinaswa akipochochea wakazi
  • Viongozi wa Kitui na Makueni wamtetea Ngilu kuhusu uamuzi wake wa kupiga marufuku biashara ya makaa

VIONGOZI wa Kaunti ya Kiambu wametaka Gavana wa Kitui, Bi Charity Ngilu, akamatwe mara moja kwa madai kuwa alichochea wakazi kuchoma magari yanayopatikana yakisafirisha makaa kutoka kaunti yake.

Hata hivyo, Bi Ngilu Jumapili alikana madai hayo akisema lori lililochomwa wiki iliyopita lilikuwa limezuiliwa na polisi na hivyo basi polisi ndio wanafaa kueleza yaliyotokea.

Mbunge wa Limuru, Bw Peter Mwathi, alimtaka Inspekta Jenerali wa polisi, Bw Joseph Boinnet, ahakikishe Bi Ngilu amekamatwa na kushtakiwa kuhusiana na kisa hicho ambapo lori la mfanyabiashara wa Limuru lilichomwa na wakazi wa Kitui.

Alipohutubia waandamanaji waliokasirishwa na uchomaji huo wa lori na ambao waliziba barabara ya Nairobi-Nakuru Jumamosi wakiandamana, Bw Mwathi alidai kuwa matamshi ya gavana huyo ndiyo yalisababisha kisa hicho.

“Kama una mashabiki, kwa wale wanaoelewa soka, na mashabiki wawe watovu wa nidhamu, klabu hutozwa faini. Katika kisa hiki, gavana mwenyewe ndiye alisimamisha gari hilo na ni lazima anafahamu wahusika waliolichoma,” akasema.

 

Haieleweki

Lakini alipozungumza katika mazishi ya Bw Michael Musambi, ambaye alikuwa mfanyakazi katika serikali ya kaunti ya Kitui, Bi Ngilu alisema lori hilo lilikuwa limezuiliwa na polisi katika eneo la Kanyonyoo na haieleweki kwa nini polisi walishindwa kuzuia lisichomwe.

Alipuuzilia mbali video inayoenezwa kwenye mitandao ya kijamii ambayo inadaiwa ilinaswa alipochochea wakazi, akisema video hiyo imenuiwa kupotosha wakazi dhidi ya kutetea uhifadhi wa mazingira yao na kuwaharibia viongozi sifa.

“Nina jukumu la kuchukua hatua mwafaka kulinda mazingira yetu ili kukabiliana na ukame wa mara kwa mara na uhaba wa mvua katika eneo hili,” akasema.

Viongozi wa kaunti za Kitui na Makueni walimtetea Ngilu kuhusu uamuzi wake wa kupiga marufuku biashara ya uchomaji makaa katika kaunti yake.

TAHARIRI: Usiri wa wananchi wafaa kuheshimiwa

Mwanamume akitumia simu yake. Serikali haifai kumruhusu mtu yeyote kuingilia usiri wa mwengine. Hii ni haki ya kuzaliwa ambayo haifai kukiukwa bila ya sababu maalumu. Sheria hiyo yafaa kutekelezwa kwa uangalifu mkubwa, ili isiturudishe nyuma. Picha/ Hisani

Na MHARIRI WA GAZETI LA TAIFA LEO

Kwa Muhtasari:

  • Watu wamekuwa wakiwahangaisha wenzao kwenye mitandao na kuwaibia mali ya mamilioni
  • Mahabusu na wafungwa magerezani pia wamekuwa wakiendeleza ukora mtandaoni
  • Serikali inapanga kuwatumia polisi kunusa na kufuatilia kwa makini mawasiliano ya wananchi
  • Haki ya usiri imo kwenye Katiba yetu na hakuna sheria inayoruhusu mtu yeyote kuingilia usiri wa mwengine

KILA Mkenya ana haki ya kulindwa dhidi ya kuvamiwa na watu wenye nia mbaya, hasa mitandaoni.

Kumekuwa na visa vya watu kuwahangaisha wenzao kwenye mitandao, na hata wakati mwingine kuendeleza uhalifu wa kusababisha wizi wa mali ya mamilioni.

Wahalifu wakiwemo magaidi wamekuwa wakipanga njama za kutekeleza mashambulizi kupitia mitandao ya kijamii kama vile Facebook. Baadhi ya makundi ya watu yanakuwa na majina ya kuonyesha labda ni wafanyibiashara wa kawaida, lakini huwa na malengo fiche ambayo yanaweza kuwadhuru wananchi.

 

Ukora

Mahabusu na wafungwa magerezani pia wamekuwa wakiendeleza ukora kupitia vifaa vya kielektroniki kama vile simu.

Kwa hivyo serikali yoyote inayojali watu wake, haina budi kuja na mbinu za kuhakikisha kuwa, yeyote anayeingia mitandaoni atakuwa salama. Mswada wa Cyber Crimes Bill unalenga kukabiliana na uhalifu wa aina hiyo, na hilo ni jambo zuri.

Hata hivyo, katika kutekeleza sheria hiyo, serikali inapanga kuwatumia polisi kunusa na kufuatilia kwa makini mawasiliano ya wananchi. Mawasiliano hayo yatakuwa kupitia simu au mitandao ya kijamii.

Polisi watapewa nguvu za kusikiza na hata kurekodi mazungumzo binafsi baina ya watu, hata wasiokuwa na nia yoyote mbaya.

 

Kumaliza uwazi

Haijalishi ni sababu zipi za msingi zitakazotumiwa, inavyofahamika ni kuwa polisi wana mazoea ya kujichukulia sheria mikononi. Iwapo wataruhusiwa kisheria kuchunguza, watakuwa wakihangaisha watu na kufanya iwe vigumu kwa wananchi kuzungumza kwa uwazi.

Pia, badala ya wananchi kufichua wahalifu, watakuwa wakizungumza kwa tahadhari kwa kuhofia kutambuliwa. Kwa sababu ya sifa za ufisadi zinazohusishwa na polisi, iwapo katika kusikiza mazungumzo ya watu watasikia habari kuwahusu wahalifu, kuna uwezekano wawaeleze na mapema. Hilo litafanya iwe vigumu mno kuangamiza uhalifu nchini.

Jambo hili mwaka 2017 lilipingwa vikali na wananchi, na hata kampuni za mawasiliano kama vile Safaricom.

Haki ya usiri imo kwenye Katiba yetu na hakuna sheria inayoruhusu mtu yeyote kuingilia usiri wa mwengine. Hii ni haki ya kuzaliwa ambayo haifai kukiukwa bila ya sababu maalumu. Sheria hiyo yafaa kutekelezwa kwa uangalifu mkubwa, ili isiturudishe nyuma.

 

 

Mtu aliyeshambulia waumini kanisani apigwa risasi

Na MASHIRIKA

JAKARTA, Indonesia

POLISI nchini Indonesia Jumapili walimuua kwa kumpiga risasi mwanamume aliyeshambulia waumini katika kanisa moja akiwa na upanga na kuwajeruhi watu wanne akiwemo kasisi mmoja.

Takriban watu 100 walikuwa wakihudhuria misa katika kanisa moja mjini Sleman, mkoa wa Yogyakarta, wakati mwanamume alipoingia kanisani akiwa na upanga wa urefu wa mita moja na kuanza kuwashambulia watu.

“Watu wanne walijeruhiwa wakati wa kisa hicho- walijeruhiwa vibaya- lakini hatujabaini lengo la mshambuliaji huyo,” msemaji wa polisi wa Yogyakarta, aliambia AFP.

Kulingana na Andhi Cahyo, aliyekuwa kwenye kanisa hilo, kisa hicho kilitokea mtu mmoja alikimbia ndani ya kanisa akitokwa damu kichwani huku mwanamume aliyekuwa na upanga akimfukuza.

“Kila mtu aliogopa na kupiga kemi, nilikuwa niking’ang’ania kumuokoa mke na watoto wangu,” Cahyo aliambia AFP.

Watu waliokuwa kanisani walikimbia nje kupitia mlango mwingine na mshambuliaji akawakimbiza huku akiharibu mali ya kanisa. Mtu huyo alimshambulia kasisi aliyekuwa akisimama kwenye altari.

Polisi walifika baada ya dakika chache. Mtu huyo alielekea alikokuwa afisa mmoja wa polisi akiwa na upanga wake. Afisa huyo alimpiga risasi sehemu ya chini ya tumbo.