Sokomoko mpya Amerika raia mwingine mweusi akiuawa

NA MASHIRIKA

MAANDAMANO makubwa jana yalizuka viungani mwa jiji la Mineapolis, Amerika baada ya polisi kumpiga risasi raia mweusi karibu na mahali ambapo George Floyd aliuawa mwaka uliopita.

Kulingana na mwanahabari mmoja aliyenasa tukio hilo kwa video, polisi walilazimika kufyatua risasi hewani kutibua maandamano hayo ambayo yametonesha kidonda cha mauaji ya Floyd. Kesi ya Floyd bado inaendelea huku afisa aliyemuua bado akikabiliwa na mashtaka ya mauaji kortini.

Mamake mwanaume huyo kwa jina Daunte Wright ambaye alikuwa na umri wa miaka 20 pekee, aliwasimulia wanahabari kuwa mwanawe alikuwa amempigia simu akisema alikuwa anabururwa na polisi.

Kate Wright alisema aliwasikia polisi wakimwaagiza mwanawe aweke simu yake chini kisha wakakatiza mawasiliano kati yao. Baada ya muda mchache mpenzi wa mwanawe alimwaarifu kuwa alikuwa amepigwa risasi na polisi garini.

Idara ya kupeleleza visa vya uhalifu Minnesota ilithibitisha kutokea kwa mauaji hayo na ikafichua kuwa inamchunguza afisa aliyetekeleza mauaji hayo japo haikufichua jina lake.

Kulingana na taarifa kutoka kituo cha polisi cha Brooklyn, maafisa wa usalama walimtoa dereva (marehemu) kutoka kwa gari lake kwa kukiuka sheria za trafiki. Walibaini kuwa alikuwa ana hati ya kukamatwa kwa makosa ya awali na wakaamua apelekwa kizuizini.

Hata hivyo, dereva huyo alirejea katika gari lake na mmoja wa afisa wa polisi akampiga risasi ndipo akafa papo hapo. Taarifa hiyo iliongeza kwamba, mwanamke aliyekuwa kwenye gari hilo pia alipata majeraha madogo na akakimbizwa hospitalini kwa matibabu.

Kutokana na kisa hicho, waandamanaji waliojazana barabarani waliwasha mishumaa na kubeba mabango yenye maandishi ‘Haki kwa Daunte Wright’. Baadhi walivunja vyoo vya magari ya polisi huku makabiliano yakichacha.

Meya wa Brooklyn Mike Elliot alitaja mauaji ya Wright kama ya kusikitisha na akawaomba waandamanaji wawe watulivu uchunguzi ukiendelea.

“Tunawaomba waandamanaji wadumishe amani na polisi nao pia wajizuie kutumia nguvu kupita kiasi kuwakabili,” akaandika Elliot kwenye ukurasa wake wa Twitter.

Mauaji hayo yanajiri wakati aliyekuwa afisa wa polisi, Dereck Chauvin anakabiliwa na kesi ya mauaji ya Floyd mnamo Mei mwaka jana.

Mauaji ya Floyd kama tu ya Wright yalizua maandamano makali Amerika huku raia wakikemea ubaguzi wa rangi na dhuluma zinazotekelezwa na polisi dhidi ya raia weusi.

Kero mitandaoni polisi kumuua Mwafrika kwa kumkanyaga shingoni kwa goti

NA MASHIRIKA

Minnesota, Amerika

Video ya Mwafrika aliyefariki baada ya polisi wa Minneapolis kumkanyaga kwa goti shingoni huku amemtia pingu kwa muda wa zaidi ya dakika tano imezua hamaki na kero mitandaoni, wengi wakitaja dhuluma za polisi wa rangi nyeupe kwa watu weusi kama kukithiri kwa ubaguzi wa rangi.

Meya wa Minneapolis Jacob Frey aliwapiga kalamu polisi wanne kufuatia kifo cha George Floyd, ambaye hakuwa amevalia shati katika barabara ya Minneapolis, huku afisa mmoja akimkatia hewa ya kupumua kwa kumkanyaga shingoni.

“Siwezi kupumua, siwezi kupumua…mama.mama,” Floyd alilia polisi huyo asimsikize kamwe na kuendelea kumdhulumu.

Waliokuwa wakitazama walirekodi video ya Flyod anayekisiwa kuwa na miaka 46 akizimia na kukosa pumzi na nguvu za kunena na kujipindua na mwishowe kukimywa huku maafisa hao wakimwamuru kusimama aingie kwenye gari .

Baadaye ambulansi ilifika mahali hapo na kumpeleka hospitalini ambapo alitangazwa kufariki.

“Nilichoona katika video hio kinachukiza sana. Kwa dakika tano tulimuona afisa Mzungu akifinyilia goti lake kwa shingo la mwanaume Mwafrika bila huruma,” Frey alisema.

“Kuwa Mwafrika haifai kuwa hukumu ya kifo.”

AIBU YA UBAGUZI: Moussa Marega wa FC Porto ajiondoa uwanjani

Na MASHIRIKA

GUIMARAES, URENO

MSHAMBULIAJI Moussa Marega wa FC Porto alijiondoa uwanjani dakika ya 69 ya mechi dhidi ya Vitoria Guimaraes katika Ligi Kuu ya Ureno baada ya kushindwa kuhimili matusi na vitendo vilivyoashiria ubaguzi wa rangi kutoka kwa mashabiki.

Marega ambaye ni mzaliwa wa Mali alianza kuondoka ugani dakika tisa baada ya kuwafungia waajiri wake bao la pili katika ushindi wa 2-1 waliousajili ugenini.

Nyota huyo mwenye umri wa miaka 28 alivielekeza vidole vyake vya gumba ardhini kisha kuwaonyesha mashabiki wa Guimaraes vidole vya kati vya mikono yake alipokuwa akitoka kuelekea chumba cha kubadilishia sare.

Licha ya wachezaji wenzake (Alex Telles, Sergio Oliveira na Ivan Marcano) na hata maafisa wa benchi ya kiufundi kambini mwa Porto kumzuia kuondoka, Marega alishindwa kabisa kujidhibiti na tukio hilo likamchochea kocha Sergio Conceicao kukifanyia kikosi chake mabadiliko.

Katika ujumbe alioupakia baadaye kwenye mtandao wake wa Instagram, Marega alisema, “mashabiki wa vikosi vya nyumbani wanaofika uwanjani kuwabagua wachezaji kwa misingi ya rangi ya ngozi zao ni wapumbavu”.

Akizungumza mwishoni mwa mechi, kocha Conceicao alikilaani kitendo hicho cha mashabiki wa Guimaraes na kusisitiza kwamba, “soka ni mchezo unaostahili kujenga undugu na kuwaleta pamoja watu mbalimbali bila ya kujali uraia, lugha, rangi ya ngozi au nywele.”

Katika taarifa iliyotolewa baadaye na Porto, vinara wa kikosi hicho walitaka usimamizi wa Guimaraes kuomba radhi na kuchukuliwa hatua kali za kisheria kwa kushindwa kudhibiti mienendo ya mashabiki wao.

Marega aliwahi kuhudumu kambini mwa Guimaraes kwa mkopo wa msimu mmoja mnamo 2016-17 ambapo alifunga mabao 15 kutokana na mechi 25.

Kwingineko, Real Madrid walipoteza fursa ya kupaa zaidi kileleni mwa jedwali la La Liga baada ya kulazimishiwa sare ya 2-2 kutoka kwa Celta Vigo ugani Santiago Bernabeu.

Mabao ya Real yalifungwa kupitia kwa Toni Kroos na Sergio Ramos huku ya Celta yakifumwa wavuni na Fedor Smolov na Santi Mina. Real ambao wamejivunia ubingwa wa La Liga mara moja pekee tangu 2012, sasa wanajivunia alama 53, moja zaidi kuliko Barcelona.

Katika mechi nyinginezo za ligi kuu za bara Ulaya, Juventus waliwapokeza Brescia kichapo cha 2-0 kwenye kivumbi cha Ligi Kuu ya Italia (Serie A) huku Bayern Munich ya Ujerumani wakiwapepeta FC Koln 4-1.

Juventus wanadhibiti kilele cha jedwali la Serie A kwa alama 57, moja zaidi kuliko Lazio waliowapiga Inter Milan 2-1. Bayern walifunga mabao matatu chini ya dakika 12 za ufunguzi katika ushindi uliowakweza kileleni mwa jedwali la Ligi Kuu ya Ujerumani (Bundesliga) kwa alama 46, moja mbele ya Leipzig.

BBI: Ubaguzi umekolea katika kaunti

Na BENSON MATHEKA

WAKENYA wanasema serikali za kaunti zimejawa na ubaguzi wakati wa uajiri, ugavi wa rasilmali na huduma huku wanasiasa wakiingilia bodi za huduma za kaunti na kunyima baadhi ya maeneo miradi ya maendeleo, inaeleza ripoti ya Jopokazi la Maridhiano (BBI).

Ingawa katiba ya 2010 ilibuni ugatuzi kwa lengo la kupeleka mamlaka mashinani na kuimarisha huduma kote nchini, Wakenya waliambia jopokazi hilo kuwa magavana na wanasiasa wamekuwa wakibagua baadhi ya wadi na jamii katika kaunti zao.

“Wakenya wanataka wahusishwe zaidi katika utoaji wa huduma na miradi ya maendeleo ili kuepuka pesa kutumiwa vibaya na ufisadi,” inaeleza ripoti ya BBI iliyotolewa kwa umma jana.

Inasema kuwa Wakenya wanahisi wametengwa na serikali katika maamuzi yanayohusu kaunti zao.

“Kuwachukulia Wakenya kana kwamba hawana haki na nguvu katika sera, sheria, bajeti na miradi ya maendeleo ni jambo la kawaida katika serikali za kaunti. Kaunti zimejawa na ufisadi, ubaguzi na miradi ya maendeleo isiyoafiki mahitaji ya maeneo yao na isiyotekelezwa vyema,” inaeleza ripoti hiyo.

Inaeleza kuwa ilivyo katika serikali ya kitaifa, serikali za kaunti zinatumia gharama kubwa kulipa mishahara, zimekolewa na ubaguzi na siasa za mgawanyiko na ukosefu wa maadili.

Ripoti inapendekeza kuwa bodi za huduma za kaunti ziwe huru na zipewe majukumu ya kuajiri wafanyakazi, kuweka viwango vya mishahara vinavyotoshana na vya serikali ya kitaifa na kutimiza ushirikishi.

Kote nchini, Wakenya walilia kwamba seikali na mabunge ya kaunti yamekolewa na ufisadi ambao unalemaza maendeleo huku maslahi ya kisiasa yakitawala.

“Viongozi wa maeneo pia walilaumiwa kwa kupuuza sheria wakilenga kutimiza maslahi ya kibinafsi. Ikiwa ufisadi katika kaunti hautakomeshwa, utaporomosha ugatuzi,” inaeleza ripoti hiyo.

Ingawa inapendekeza kaunti 47 zidumishwe, ripoti inasema zimeshindwa kukusanya mapato ya kutosha na hata kueleza zinavyotumia zinazokusanya. Ripoti inapendekeza mgao wa pesa kwa kaunti ulenge zaidi sekta za kilimo, afya na ustawi wa miji.

Aidha, inapendekeza majukumu yote yanayotolewa na mashirika ya serikali katika serikali za kaunti yasitishwe na kuwianishwa na ugatuzi.

“Mfumo wa ugavi wa mapato unapaswa kuwa rahisi ili raia wauelewe,” inaeleza ripoti hiyo.

Ripoti inapendekeza madiwani wasimamie pesa zinazotengewa basari. Inasema maeneo ambayo yamekuwa yametengwa kwa miaka mingi yanapaswa kupigwa jeki kupitia hazina ya usawazishaji lakini iwe kwa muda utakaowekwa.

Ripoti inapendekeza kuwa Tume ya Ugavi wa Mapato (CRA) inapaswa kuchunguza kiwango cha pesa kila kaunti inachokusanya na kukishirikisha katika mgao wa kila mwaka.

Ili kuzuia ubaguzi, ripoti inapendekeza kila wadi itengewe asilimia 30 ya pesa za maendeleo katika bajeti ya kaunti katika kipindi cha miaka mitano.

Ripoti inapendekeza kuwe na kiwango cha wafanyakazi ambao kila kaunti inafaa kuajiri kwa kutengemea idadi ya watu na idadi ya wizara ambazo kila gavana anafaa kubuni.

Ikitekelezwa, Mdhibiti wa Bajeti anatakuwa akikagua na kuthibitisha pesa zinazotengewa miradi ya kaunti zitatumiwa vyema kabla ya serikali za kaunti kupatiwa pesa zaidi.

Lukaku ataka Fifa kuadhibu wanaoeneza ubaguzi wa rangi

Na AFP

SARDEGNA ARENA, ITALIA

MSHAMBULIZI mpya wa Inter Milan, Romelu Lukaku, amelitaka Shirikisho la Soka Duniani (Fifa) kuchukua hatua kali dhidi ya mashabiki wanaoendeleza ubaguzi wa rangi kwa sababu tabia hiyo inarejesha nyuma mchezo wa kabumbu.

Fowadi huyo raia wa Ubelgiji alitusiwa, akakejeliwa na hata kuitwa nyani na mashabiki wa Cagliari FC siku ya Jumapili wakati wa mechi ya Serie A baina ya timu hizo mbili ugani Sardegna Arena.

Lukaku ambaye alihamia Inter Milan kutoka Manchester United ya Uingereza, alikumbana na matusi hayo ya ubaguzi wa rangi alipokuwa akijiandaa kuchanja penalti kwenye lango la Cagliari, mkwaju ambao aliishia kuufunga na kuchangia ushindi wa 2-1 kwa timu yake.

Kinaya ni kwamba ni uga uo huo ambapo wanasoka nyota Moise Kean, Blaise Matuidi na Sulley Muntari ambao wana asili ya kiafrika pia walimiminiwa matusi ya kukejeli rangi ya miili yao miaka ya nyuma.

Tayari kitengo cha nidhamu cha Serie A kimeanzisha uchunguzi kuhusu tukio hilo na kuahidi kwamba mashabiki waliohusika wataadhibiwa vikali ili kutoa mfano kwa wengine wanaoendeleza ubaguzi huo.

Hata hivyo, Lukaku mwenyewe alisikitikia tukio hilo na kusema ubaguzi wa rangi ni tatizo ambalo halifai kuvumiliwa enzi hizi ambazo mchezo wa kabumbu umepiga hatua kubwa duniani.

“Wachezaji wengi walikumbana na ubaguzi wa rangi mwezi uliopita kutoka kwa mashabiki. Nilijipata kwenye hali hiyo Jumapili, kwa kweli inasikitisha sana,” akaandika Lukaku kwenye ukurasa wake wa mtandao wa kijamii Instagram.

“Soka ni mchezo ambao unaburudisha kila mtu na tabia zozote za ubaguzi hazifai kuvumiliwa kamwe. Ubaguzi wa rangi ni aibu kwenye soka na nina matumaini kwamba FIFA na Mashirikisho mengine ya soka duniani yatafanya juu chini kuhakikisha unatokomezwa kabisa,” akasema Lukaku.

Tukio hilo la Jumapili linajiri baada ya waliokuwa wachezaji wenza wa Lukaku, Marcus Rashford na Paul Pogba pamoja na wanasoka wa Chelsea Tammy Abraham na Kurt Zouma kurushiwa matusi ya ubaguzi wa rangi kwenye mitandao ya kijamii na mashabiki wa timu pinzani kwenye mechi zilizopita za Ligi Kuu ya Uingereza (EPL).

Aidha Lukaku alisema mitandao ya kijamii ambayo inatumika kueneza ubaguzi wa rangi pia inafaa kudhibitiwa, akifunguka na kusema yeye binafsi ameathiriwa sana na matusi aliyorushiwa Jumapili.

“Mitandao ya kijamii kama Facebook, Instagram, na Twitter inafaa kushirikiana na klabu za soka kwa sababu kila siku hapakosi chapisho la ubaguzi wa rangi. Tumekuwa tukisisitiza kwamba hili halifai lakini hakuna kinachobadilika.”

Kimombo kilimpiga chenga mfanyakazi wetu, Chandarana yajitetea

Na BRIAN OKINDA

WAMILIKI wa maduka ya Chandarana Foodplus yanayokabiliwa na madai ya kueneza chuki na ubaguzi wa rangi wanadai mfanyikazi aliyeandika baruapepe ya kubagua Wakenya, Rima Patel, hajulikani aliko.

Duka hilo pia limelaumu idara inayodhibiti mawasiliano na taarifa zinazotolewa kwa umma kwa kashfa hiyo.

Meneja Msimamizi wa Duka hilo Hanif Rajan aliyekuwa akihojiwa na Tume ya Utangamano (NCIC), alishikilia kuwa mfanyakazi huyo aliajiriwa hivi majuzi na hakuwa na ufahamu wa kutosha wa lugha ya Kiingereza.

“Kufikia sasa hatujui alipoenda kwani alitoweka mara tu baada ya kuandika baruapepe iliyoshutumiwa kote nchini. Hajafika kazini tangu Julai 27 aliposikia kwamba tulilenga kumwadhibu,” akasema Bw Rajan.

Meneja huyo alisema Bi Patel alitoka India na alikuwa amepewa kandarasi ya kufanyia kazi duka hilo kwa kipindi cha miezi mitatu na mkataba ulifikia kikomo Agosti 6.

“Tumetoa taarifa kumhusu kwa maafisa wa uchunguzi ili waweze kubaini alipo,” akasema.

Mkurugenzi wa Idara ya Malalamishi na Masuala ya Sheria wa NCIC, Kyalo Mwengi, alisema tume hiyo imeanzisha uchunguzi ili kubaini kiini cha baruapepe ya ubaguzi wa rangi ambayo iliwakera Wakenya.

“Huku tukiendelea kumsaka mfanyakazi huyo, tunafanya uchunguzi pia kubaini ikiwa ni sera ya duka hilo kuwatunuku wateja kwa misingi ya rangi yao,” akasema Bw Mwengi.

Matokeo ya uchunguzi wa tume hiyo ndiyo yataamua ikiwa mfanyakazi huyo alikiuka sheria au alikuwa mfichuzi aliyeweka wazi uozo wa duka hilo.

UBAGUZI SGR: Wakenya na Wachina hawakai meza moja wakila

Na LUCY KILALO

WAZIRI wa Uchukuzi James Macharia amekiri kuwa raia wa Kenya na wenzao wa China wanaofanya kazi katika SGR hawakai kwa meza moja katika sehemu yao ya maankuli.

Hata hivyo, waziri huyo ametetea hali hiyo kuwa inatokana na tofauti za kitamaduni na kukosa uwiano kwa njia kadha mojawapo ikiwa ni lugha wanazotumia.

Waziri huyo sasa anatarajiwa kuwasilisha ripoti katika muda wa wiki moja kuhusiana na madai ya ubaguzi dhidi ya Wakenya wanaofanya kazi kwa SGR.

“Mimi mwenyewe nilifuatilia suala hilo la sehemu ya maankuli na kupata kuwa sio ubaguzi bali ni tatizo la mwingiliano wa kitamaduni. Nilieleza CRBC ihakikishe kuwa inavunja hali hiyo na kuhakikisha uwiano,” alisema.

Kamati ya Uchukuzi ya Bunge la Kitaifa ilikuwa imemtaka waziri huyo kuelezea kuhusu madai ya ubaguzi hasa kwa Wakenya wanaofanya kazi wa SGR.

“Uwasilishe ripoti Jumanne wiki ijayo ambayo pia ionyeshe idadi ya Wakenya waliopo kwa nafasi za usimamizi katika kampuni ya China Roads & Bridge Corporations (CRBC), idadi ya Wakenya na wafanyakazi wengine wa kimataifa na pia mishahara inayolipwa kwa wote,” mwenyekiti wa kamati hiyo, ambaye ni mbunge wa Pokot Kusini, David Pkosing aliagiza.

Kampuni ya CRBC ilitia mkataba na shirika la Kenya Railways kuendesha shughuli za treni hizo.

Maswali hayo yaliibuka kufuatia taarifa iliyochapishwa na moja wapo ya magazeti nchini, ikionyesha wafanyakazi hao wakilalamikia kubaguliwa na kudhulumiwa.

Bw Macharia aliambia kamati kuwa madai hayo yanachunguzwa na atakuwa na jibu kamili baada ya kupokea ripoti ambayo ni pamoja na kutoka kwa wizara ya Leba.

“Yeyote atakayepatikana kuhusika atatimuliwa kwa kunyang’anywa kibali chake cha kufanya kazi,” alieleza.

Akijibu swali la wafanyakazi hao kutoruhusiwa kuwa kwa mitandao ya kijamii, aliunga mkono hatua hiyo akisema kuwa haiwezekani kwa mtu kumwaga mtama kuhusu kampuni iliyomwajiri.

“Hauwezi kuwa kwa mtandao wa kijamii ukizungumzia mwajiri wako. Hiyo haikubaliki,” alisema akiongeza kuwa hata baadhi yao waliapa kwa kutumia Biblia na kuna mambo hawawezi kuyazungumzia.

Vile vile, alisisitiza kuwa raia wa China wanaofanya kazi wa SGR ni 841 pekee ikilinganishwa na 2,679 ya Wakenya. Idadi hiyo ya raia wa China alisema itaendelea kupungua kadri Wakenya zaidi wanapopata ujuzi wa kuhudumu katika treni hiyo, hatua ambayo inatarajiwa kutekelezwa kwa kikamilifu kufikia 2027.

Alisema kuna wanafunzi wa Kenya 100 ambao wamedhaminiwa na CRBC kusomea katika Chuo Kikuu cha Beijing Jiatong kwa digrii ya miaka minne ya masuala ya uhandisi wa reli. Wanafunzi wa kwanza ambao walianza masomo 2016 wanatarajiwa kufuz8uu mwaka ujao na kuanza kufanya kazi kwa Madaraka Express.

Waziri Macharia alikuwa akijibu taarifa hiyo iliyochapishwa ambapo raia wa nchi hiyo walitajwa kuwa takriban 5,000 na kuchukua nafasi nyingi za kazi.

Baada ya madai hayo kuibuka wiki iliyopita, waziri wa Leba Ukur Yatani aliunda kundi la maafisa wa wizara wa ngazi za juu kuchunguza madai hayo ya ubaguzi. Waziri huyo pia alisema kuwa iwapo madai yatabainishwahatua mwafaka ambazo ni pamoja na kufunguliwa mashtaka zitachukuliwa.

Kundi hilo lilikuwa na muda wa siku saba kufanya uchunguzi wake na kuwasilisha ripoti.Wakati huo huo, jana Waziri Macharia alieleza kuwa kampuni hiyo ya China imeagizwa kuunda ua la umeme linalofaa ili kudhibiti vifo vya wanyama pori.

SHAIRI: Kwa nini tubaguane?

Na IZIRARE HAMADI

Uumbile lilo hariri, mola katuumbia,
Liwe shari au heri, adinasi jijazia,
Mapambo yake kahari, sote twayaajabia,
Kama sote umbile moja, tungejitambulisha.

Sote tuko kwa safari, hilo nawakumbushia,
Sangi zetu ni fahari, mola kutujaalia,
Humu ndani ya sayari, nini tunashindania,
Kama sote umbile moja, tungejitambulishaje?

Ukabila ni hatari, makabila hujitia,
Hiyo huwa ni dhahiri, macho wanaifumbia,
Nawaambia si siri, nchi yatuangushia,
Kama sote umbile moja, tungejitambulisha?

Ushakua utiriri, ukabila kuvalia,
Wenye dini na kafiri, wote waupalilia,
Hakika moyo ayari, umotoni waumia,
Kama sote umbile moja, tungejitambulisha?

Utu ushawa sufuri, sioni katu sharia,
Kwa laili wa nahari, wazidi kudidimia,
Lini taja siku nzuri, iwe siku ajnabia,
Kama sote umbile moja, tungejitambulisha?

 

Malenga:Izirare Hamadi
Eneo: Kisauni, Mombasa
Shule ya Upili ya Maweni

TAHARIRI: Serikali ikome kuwabagua wanawake katika usajili KDF

Usajili wa vijana kwenye jeshi waendelea mjini Lamu Februari 12, 2018. Kati ya wanajeshi 2,000 watakaosajiliwa kote nchini, kutakuwa na wanawake kati ya 140 na 160. Wenzao wa kiume watakuwa kati ya 1,840 na 1,860. Picha/ Kalume Kazungu

Na MHARIRI

Kifupi:

  • Kati ya wanajeshi 2,000 , kutakuwa na wanawake kati ya 140 na 160. Wenzao wa kiume watakuwa kati ya 1,840 na 1,860
  • KDF yapaswa kueleza vigezo ilivyotumia kuwapatia wanawake asilimia nane pekee
  • Kuwasajili asilimia nane pekee, kutaendeleza dhana kuwa nafasi ya wanawake ni jikoni pekee

USALAMA wa nchi ni jambo ambalo halifai kufanyiwa mzaha. Kwa muda mrefu tumekuwa tukiambiwa kwamba masuala ya usalama hayafai kuzungumzwa na wananchi, kwa kuwa hizo ni siri kuu ambazo maadui zetu hawafai kuzijua.

Lakini hakuna siri katika jambo hili tunalotaka kulizungumzia. Usajili wa makurutu watakaojiunga na vikosi vya jeshi letu (KDF) umefanywa kwa njia ambayo inaonekaa kukiuka mwongozo wa katiba kuhusu jinsia.

Alipokuwa akizindua usajili huo Jumatatu, Naibu Mkuu wa Majeshi Jenerali Joseph Kasaon alitangaza kwamba wanawake watakuwa kati ya asilimia saba na nane.

Kati ya wanajeshi 2,000 watakaosajiliwa kote nchini, kutakuwa na wanawake kati ya 140 na 160. Wenzao wa kiume watakuwa kati ya 1,840 na 1,860.

 

Masikitiko

Kinachohuzunisha zaidi ni kwamba KDF haikutangaza na mapema ni maeneo yapi ambako hawatarajii kusajili wanawake kujiunga na jeshi.

Kutokana na hilo, wanawake wamekuwa wakijitokeza katika viwanja mbalimbali kutaka kazi hiyo. Lakini kwa masikitiko makubwa, wamekuwa wakiambiwa kuwa hawahitajiwi.

Jambo hili linavunja mioyo Wakenya ambao wamejaaliwa kuwa na mabinti pekee. Wanaona kama walifanya makosa kuzaa watoto wa kike, ambao hawawezi kuitumikia nchi yao kwa kuilinda dhidi ya adui kutoka nje.

Jenerali Kasaon ana wajibu wa kuwaeleza Wakenya kuanzia leo, ni maeneo gani yaliyosalia ambako wanawake hawatasajiliwa. Kauli hiyo ikitangazwa hadharani, itasaidia watu kuokoa muda, nauli na nguvu zao kurauka asubuhi na mapema na kwenda katika viwanja vya usajili.

 

Thuluthi mbili

Pia tunajua kwamba kwa vile Katiba inasisitiza kusiwe na zaidi ya thuluthi mbili za jinsia moja, KDF yapaswa kueleza vigezo ilivyotumia kuwapatia wanawake asilimia nane pekee.

Jambo hili lafaa kuangaliwa kwa makini na haraka. Ikiwezekana, Mkuu wa Majeshi Jenerali Samson Mwathethe anapaswa kuingilia kati, ili idadi ya wawake katika jeshi letu angalau ifikie asilimia 15.

Tunajua kuna wanaoamini kuwa wanawake wengi wana mioyo ya huruma na hawawezi kwenda vitani. Lakini kuwasajili asilimia nane pekee, kutaendeleza dhana kuwa nafasi ya wanawake ni jikoni pekee.

Dhana hii ikiendelezwa, itarejesha nyuma hatua tulizopiga katika kuhamasisha wanawake kufanya kazi za jinsia ya kiume.