JUMA hili naomba tuangazie uandishi wa insha ya tahakiki. Tahakiki ni maandishi yanayoandikwa kwa nia ya kuchambua kazi fulani ya kisanii.

Tahakiki huandikwa baada ya kuisoma kazi hiyo na kuielewa vizuri.

Aghalabu vitabu vya fasihi andishi kama vile riwaya, tamthilia, hadithi fupi na ushairi ndivyo huhakikiwa.

Uhakiki hufanywa na mtu aliye na tajriba na ujuzi wa kuhakiki kazi ya aina hiyo. Tahakiki hurejelea ukweli wa yaliyomo kitabuni. Lugha inayotumiwa huwa ya kitaaluma.

Tahakiki humwezesha mwandishi kujua mtazamo wa wengine kuhusu kazi yake.

Kichwa cha insha ya tahakiki huteuliwa kulingana na kitabu kinachohakikiwa na kile ambacho mhakiki angependa kuwasilisha kuhusu kitabu hicho.

Kichwa cha tahakiki huandikwa kwa herufi kubwa, kipigiwe mstari na kisitoneshwe mwishoni.

Chini ya kichwa, maelezo mengine kuhusu kitabu hicho hutolewa kwa ufupi.

Maelezo haya ni kama vile: anwani ya kitabu, jina la mwandishi/mhariri iwapo ni mkusanyiko wa makala kutoka kwa waandishi wengi, kampuni iliyochapisha kitabu husika, mwaka wa kuchapishwa kwa kitabu na jina la mhakiki.

Utangulizi wa tahakiki hujumuisha aya ya mwanzo ambayo hutoa ufafanuzi au maelezo zaidi kuhusiana na mada ya tahakiki.

Mwili wa tahakiki hufafanua au hujadili kwa kina maudhui yanayojitokeza katika kitabu au kazi ya kisanii na jinsi yanavyochangia kukuza dhamira ya mwandishi.

Maelezo kuhusu wahusika na jinsi wanavyosaidia katika kukuza dhamira hutolewa.

Wakati mwingine ufafanuzi hutolewa kuhusu mgogoro mkuu katika kitabu kwa kuulinganua na migogoro katika vitabu vingine.

Mwili pia hueleza mtazamo wa kijumla kuhusu mtindo uliotumika katika kitabu.

Unaweza kufanya hivi kwa kunukuu baadhi ya sehemu zinazotoa kielelezo bora cha fani hiyo, ama kwa kueleza jinsi mwandishi alivyodumisha msuko wa kazi yake.

Vilevile, mbinu zilizotumiwa katika kuwasilisha kazi husika zinaweza kufafanuliwa kwa kina.

Zaidi ya hayo, mwili hutoa maelezo zaidi kuhusu kitabu chenyewe – je, kinavutia? Kinaweza kukumbukwa?

Kinaburudisha? Je, kimejitosheleza kimaudhui ama kimeacha baadhi ya maudhui ama kimepungukiwa kimaudhui?

Maudhui yaliyoachwa yangeweza kushughulikiwa kwa njia ipi? Hili linaweza kufanywa kwa kurejelea vitabu vingine.

Hatimaye mwili huangazia kwa kina athari za kitabu kwa hadhira lengwa – maudhui katika kitabu hiki yana athari gani?

Maudhui hayo yamebadilisha vipi mtazamo kuhusu mada fulani? Yana uhusiano gani na mazingira husika? Je, yanajikita vipi katika mandhari lengwa?

Katika hitimisho, tahakiki hutaja umuhimu wa kitabu kwa ujumla na ikiwezekana ushauri hutolewa kuhusu kitabu hicho.

Zoezi

Umetambua kuwa shuleni mwako kumekuwa na tatizo la uhifadhi wa mazingira.

Andika tahariri kwa Gazeti la Mzalendo kuhusu namna mbalimbali za kuhifadhi mazingira katika shule yako.